AKUX in che bʼet kabʼe txin jatumel at nim kʼaẍjel toj tnam Baguio te Filipinas, ok kykeʼyin jun yekʼbʼil uʼj, pero mintiʼ xi kyqanin jun kyuʼj. Toj qʼij aju, atoq ermana Helen in pakbʼan tukʼil yekʼbʼil uʼj ex tej t-xi tkeʼyin qe txin lu, xi tzeʼn toj kywitz. Mintiʼ e xi laqʼeʼ txin lu qʼil jun kyuʼj, pero e jaw labʼin tuʼnju xi tzeʼn Helen toj kywitz.

Tej tikʼ chʼin ambʼil, akux in bʼettoq kyxiʼ txin lu toj bus tuʼn kypon kyja, ok kykeʼyin jun cartel tok jw.org tiʼj. Tzaj kynaʼn qa aʼyex letra lu ok kykeʼyin tiʼj yekʼbʼil uʼj. Tuʼntzunju, e kuʼtz toj bus tuʼn tok kykeʼyin alkye or in nok kychmon kyibʼ erman toj Ja te Chmabʼil aju.

E pon kabʼe txin lu toj jun chmabʼil. Ex tej kyokx toj Ja te Chmabʼil, ¿alkye ok kyqʼoʼn kywitz tiʼj tnejel? Ikju, a Helen. Jurat naj el kynikʼ tiʼj tuʼnju kukx in tzeʼn twitz. In tzaj tqʼamaʼn Helen jlu: «Tej tok nkeʼyine qa kyjaʼtoq kytzaj wukʼile, tzaj chʼin nxobʼile tuʼnju mintiʼ bʼiʼn wuʼne tiquʼn». Noqtzun tuʼnj, xi kychikʼbʼaʼn txin te Helen qa otoq tzʼok kykeʼyin tej in pakbʼantoq tiʼj yekʼbʼil uʼj.

Tbʼanel ela chmabʼil toj kywitz txin ex e tzalaj tej kyten kyukʼil erman, mintiʼ e tzaj xobʼ ex kubʼ kynaʼn bʼaʼn. Tej kyok ten erman mesol toj Ja te Chmabʼil, xi kyqʼamaʼn qa kyajtoq tuʼn kyonin kyiʼj. Tej tikʼ chʼin ambʼil tbʼajlen jlu, xiʼ jun kye anqʼil toj juntl tnam. Atzun juntl xi tzyet tuʼn tbʼet kyoj chmabʼil ex xi tzyet tuʼn t-xnaqʼtzan tiʼj Tyol Dios. Bʼaj tkyaqil jlu noq tuʼnju xi ttzeʼn ermana toj kywitz.