PAGB a yiib n da tũud taaba, n kẽnd ne nao zĩig butig-bɛd sẽn beẽ. Yaa Baguio, sẽn yaa Filipin galʋ-tẽng a ye wã. B yãa pag sẽn moond ne perzãntoaare, la b pa kolg ye. A Elɛn, saam-bi-poak ning sẽn da moond ne perzãntoaarã ges-b lame, n yõgemd a noore. Pagb a yiibã kell n sãagame, la a Elɛn sẽn yõgemd a noor ne-bã yɩ-b-la noogo.

Rẽ poore, pagb a yiibã wa n kẽe biis n kuusẽ, n yã b sẽn gʋls jw.org ne gʋsl-bi-bɛda, tɩ tab Rĩung roog zugu. B tẽegame tɩ gʋls-biis a woto buud n da gʋls perzãntoaarã zugu. B yiibã fãa sigame n tɩ ges tigims toɛy-toɛyã tigiss lɛɛr-dãmb b sẽn da tabl rignoorẽ wã.

Pagb a yiibã kẽnga tigsg ning sẽn pʋglã. La b sẽn wa n kẽed Rĩungã roogẽ wã, ãnd la b yã-yã? Yaa a Elɛn! Tao-tao bala, b bãngame tɩ yaa yẽ la sẽn da la moee ne bãmbã. A Elɛn yeelame: “M sẽn wa n ne b sẽn wat mam nengẽ wã, m yɛɛsa bilfu. M tagsame tɩ tõe tɩ m maana bũmb tɩ pa sõma ye.” La pagbã togs-a lame tɩ b yãa-a-la a sẽn da wa n yas ne perzãntoaarã.

Pagb a yiibã sũur yɩɩ noog wʋsg ne tigsgã, la nebã sẽn da sõsd ne taab sõma-sõma wã. Kɩtame tɩ pagb a yiibã ra getẽ tɩ yaa wa b bee ne b zak rãmb bala. Tigsgã poore, b sẽn yã nebã sẽn da pɩɩsd Rĩungã roogã, b kosame n na n sõng n pɩɩge. B nin-yend n yik n tɩ be tẽng a to masã, la a to wã wa n sɩnga tigissã waoongo, la a sɩng Biiblã zãmsg me. Woto fãa yɩɩ a Elɛn sẽn yõgemd a noor ne-bã yĩng bala!