OMEJ ichpokamej nejnentiauiyayaj kampa tlanamakaj ipan altepetl Baguio (Filipinas). Maske kiitakej se carrito amo monechkauijkej. Helen, se tosiuaikni katli nopaya itstoya, kinixuetskilik. Maske nopa ichpokamej san panokej, mosentlachilijkej pampa tosiuaikni kinixuetskilik.

Kema nopa ichpokamej tlakuepiliyayaj ininchaj ipan se autobús, kiitakej ipan nopa kali kampa timosentiliaj ijkuilijtoya jw.org. Kiilnamijkej nopa tlajkuiloli nojkia eltoya ipan nopa carrito. Temokej ipan nopa autobús uan kiitakej tlake hora mosentiliaj.

Nopa omej ichpokamej yajkej ipan tlanechikoli uan nopaya kipantijkej Helen. Nima kiixmatkej pampa sampa ixuetskatoya. Helen kiijtoua: “Pejki nimajmaui kema nikinitak monechkauijtiualayayaj. Nimoiljuik nijchijtoya se tlamantli tlen amo kuali”. Nopa ichpokamej kiiljuijkej Helen tlen panotoya.

Nopa omej ichpokamej tlauel kinpaktik tlen kikajkej ipan tlanechikoli uan nojkia kuali kiyolmatkej pampa itstoyaj ininuaya toikniuaj. Kema kiitakej toikniuaj tlapojpouayayaj, inijuantij nojkia kinejkej kichiuasej. Se tlen nopa ichpokamej ayokmo itstok ipan nopa altepetl, uan nopa seyok pejtok yaui tlanechikoli uan pejtok momachtia Biblia. Kiampa panok pampa tosiuaikni ixuetskatoya.