SO DARUA ndra alawe sawuyu-wuyu sowaö-waö ba fasa Baguio, Filipina. Laʼila sambua naha mbuku si so gaolo-gaolo, hizaʼi lö lafahatö ira. Maʼiki khöra dalifusöda ira alawe sotöi Helen si zizio ba zinga naha mbuku si so gaolo-gaolo andrö. Lö tebato ira, hizaʼi toröi-röi sibai ba dödöra me maʼiki khöra Helen si fao faʼafahuwu.

Lö ara aefa daʼö, me latörö moto ira alawe si darua andrö wangawuli ba khöra, laʼila logo jw.org sebua ba zi sambua Balai Mbanua Lowalangi. Itörö tödöra wa fagölö logo daʼö ba naha mbuku si so gaolo-gaolo niʼilara no mege. Börö daʼö, möi ira tou ba moto ba laʼila ginötö wamalua angowuloa si no mufalemba ba pagar Balai Mbanua Lowalangi andrö.

Ba gafuriata, möi ndra alawe si darua andrö ba gangowuloa. Tahö atö, haniha zi falukha khöra ba Balai Mbanua Lowalangi? Helen! Iʼanemaiʼö itörö tödöra wa yaʼia zaʼiki khöra me luo daʼö. Imane Helen, ”Ataʼu ndraʼo me lafahatö ira khögu. Uwalinga so zalagu khöra.” Hizaʼi, latutunö khö Helen wa no laʼila ia me izago naha mbuku.

Owua-wua dödöra ba wamondrondrongo fefu nifaʼema ba gangowuloa, ba lö ataʼu ira fariawö khö ndra talifusöda. Me laʼila wa so ndra talifusöda sangehao Balai Mbanua Lowalangi me no aefa mufalua gangowuloa, laʼandrö enaʼö tola lalului wamalua daʼö. So samösa ba gotaluara zi lö saʼae toröi ba Filipina, hizaʼi si samösania no ibörögö iʼondrasi gangowuloa ba ifahaʼö ia ba Zura Niʼamoniʼö. Ha faʼiki wamobörö fefu daʼö!