ONTHIKI imwe ovahikuena vevali ankho veli nokuenda-enda mepunda-umbo lyo Baguio ko Filipinas. Avamono omuhikuena umwe ankho uli pokatuku-tuku komikanda mahi avahafuene-po. Omuhikuena oo, ankho utiwa o Helena. Etyi Helena evemona akala ondyandyi navo. Ovahikuena ovo avatualako nondyila yavo, mahi avahalimbuiko onkhalelo Helena ankho akala ondyandyi navo.

Pokukondoka keumbo avamonena metuku-tuku, onondaka jw.org mbahonekwa Mondyuo Yomaliongiyo. Avahinangela okuti, onondaka ombo tupu vembumonale pokatuku-tuku komikanda. Avatuluka metuku-tuku opo vatale ononthiki omawaneno alinga omaliongiyo.

Onthiki imwe ovahikuena ovo vevali avaende keliongiyo. Etyi vehika meliongiyo avaimbuka Helena, wakalele ondyandyi navo. Helena wati: “Etyi veli nokuya no kuame, andyitili owoma, andyiti oityi vali nalinga tyapenga.” Mahi avamphopila omokonda yatyi veilila keliongiyo.

Ovahikuena ovo vahambukilwe unene novanthu vavasile meliongiyo, avakala ngatyina veli vala meumbo. Etyi eliongiyo liapwa avamono ovakuatate veli nokukomba, navo avevekuatesako okukomba. Pahetyino umwe povahikuena ovo wailukila kotyilongo otyikuavo. Mahi omukuavo utualako okuenda komaliongiyo tupu wehimbika okulilongesa Ombimbiliya. Atyiho otyo omokonda youndyandyi wa Helena!