BAƐ zege nɛɛwa gaa bee kiā tɛɛ̄ kɛ̄ ba wee ura du li Gbɛnɛ buɛ̄ Baguio a le barasī Philippines. Ba bee muɛ̄ kpe yere kpa bu kigere, mɛ ba naa bee yii loo. Wuga nɛɛwa a kura Helen a bee le kpaɛ̄ lo kpe bee baa bɛɛ kaāna sa wa ɛp sī. Baɛ pya lo nɛɛwa bee kiā kii kɛ̄ ba gaa bee kii, mɛ kɛ̄ Helen wa baa bɛɛ ɛp sī doo bee wa nia kaāna.

Sɔ̄ esaa, sɔ̄ pya lo nɛɛwa bee le bu fah gaa obia kii be, ba bee muɛ̄ ziī Tɔ Nɔnu Buɛ̄-mɛnɛ ba ɛm jw.org loo. Ba bee nyɛŋiabu kɔ ba ebee muɛ̄e nu ama ba ɛm loo kpe yere kpa bu kigere a gaa bee lu esu zuema ue dɔɔ̄na sɔ̄. Baɛ aba bee aabu lo fah sirakɛ̄ sa ɛp nyɔɔ nu a tɔgɛ sɔ̄ keekee bɔŋanaloo wee ɛrɛ enɔānu bie lo Tɔ Nɔnu Buɛ̄-mɛnɛ.

Baɛ aba bee si ziī lo enɔānu dɔɔ̄na dee. E mɛɛ̄ na ba bee muɛ̄ sɔ̄ ba yii lo Tɔ Nɔnu Buɛ̄-mɛnɛ ani? A bee le Helen! Ba bee ye suā loo kɔ alɛ na a bee baa bɛɛ kaāna a. Helen, bee kɔ: “Tua sɔ̄ ba bee mɛ kiā yii kpaɛ̄, a bee mɛ deege. M bee kɛɛrɛ kɔ a ɛrɛ ziī piya nu m edora naa e.” Mɛ pya lo nɛɛwa bee baatɛ̄ nɛ Helen kɔ ba ebee ye muɛ̄e bie kpaɛ̄ kpe yere kpa bu kigere.

Lo enɔānu le gbaaloo bee kpeloo baɛ lo nɛɛwa kaāna; e loo wa bee sukɛ̄. Sɔ̄ ba muɛ̄ pya dɔɔ̄na a gaa kwa kɛ̄ sɔ̄ enɔānu e’ina kuma, ba bee bip lo a le ba edabege yerebah lo ekwa kɛ̄. Ziī lo nɛɛwa e aara lo edo bu nyɔɔnyɔɔ sɔ̄, mɛ elua a ebɔātɛ̄ esi enɔānu sa bɔātɛ̄ enɔ Baibol, aba nyɔɔ baa bɛɛ!