EMẸSE awanva ri ha iphuphẹn a nya kugbe uvuẹn ekete ra sueyi uvuẹn amwa Baguio, obẹ Philippines. Aye ni djokarhọ ophanphan re je ẹbe rhọ, ọrẹn aye a vwẹriẹ-ẹ. Helen, ro rhiẹ omizu ọmase ro mevi kẹrẹ ophanphan na, nọ chẹẹ miẹmiẹmiẹ rẹn aye. Emẹse na ni nyarhẹn, ọrẹn aye i karorhọ echẹẹ miẹmiẹmiẹ i Helen.

Ọke oru, ọke aye a ruẹ imoto rie, aye ni mẹrẹn ophanphan ọduado ra ya jw.org rhọ, ra ha tamwu Aghwẹlẹ Uvie. Aye ni karorhọ taghene aruẹ ikerẹmro owu yẹ aye i mẹrẹnren uvuẹn ophanphan na kikisin. Aye awanva ni ruotọre nẹ imoto na, ji mẹrẹn ọke re ruẹ uyono uvuẹn ukoko sansan ra ya rhẹ anurẹsẹ Aghwẹlẹ Uvie na.

Emẹse awanva na ni riẹ uyono ukoko re ruru. Ọrọmo yẹ aye i mẹrẹnren rọ ruẹ Aghwẹlẹ Uvie na? Helen! Aye ni karorhọ ogege taghene ọye yọ chẹẹ phia miẹmiẹmiẹ rẹn aye. Helen nọ tare, “Ọke aye a nya bru mẹ sa, ofẹn no mwurun mẹ ibiesuọn. Ni mie roro sẹ mi ruẹ oborẹ ọ sọre.” Ọrẹn, emẹse na ni dje fiotọre rẹn Helen oborẹ ọ phiare.

Emẹse na i riamerhen uyono na ọrhẹ okugbe imizu na; oma ọ dabu merhen aye. Ọke aye a mẹrẹn awọrọ re ruẹ Aghwẹlẹ Uvie na fuan ọke re ruẹ uyono na hin, aye ni nọren sẹ aye ina sabu homaba aye. Owu usuẹn emẹse na o nẹ ẹkwotọre na ne, ọrẹn ọreva ye o riẹ uyono ukoko ọke ephian, ọ ji tuẹn uyono i Baibol rhọ ne—fọkiẹ echẹẹ miẹmiẹmiẹ!