FILIPINAS nacionpa Baguio markanchömi, ishkaq shipashkuna imëkata rantikuyanqan cällipa purikäyarqan. Tsëchömi carrïtuwan yachatsikuykäyaqta rikäyarqan, peru manam witiyarqantsu. Carrïtupa lädunchö Helen jutiyoq panim, pëkunata alläpa kushishqa rikarqan. Tsë ishkan shipashkuna carrïtu këkanqanman mana witirpis, Helen kushishqa rikanqantaqa manam qonqayarqantsu.

Cärruwan wayinkunaman kutikuykarnash, Diospita Yachatsikuyänan wayichö jw.org neq letrëruta rikäyänaq. Tsëshi yarpäriyänaq Diospita yachatsikuyänan carrïtuchöpis, tsë letrëruta rikashqa kayanqanta. Cärrupita yarpurirshi, Diospita Yachatsikuyänan wayichö tsëman junta kaq congregacionkuna imë höra reunionkunata rurayanqanta rikäyänaq.

Tsë ishkan shipashkunaqa, reunionmanmi ëwayarqan. Y chärirllam Helenta rikäriyarqan. Kushishqalla këkaqta rikarmi pëta reqiriyarqan. Pani Helenmi kënö cuentakun: “Noqa kaqman shayämuptinmi, pëkunata ofendishqa kanqäta pensar mantsakarqä”. Peru tsë shipashkunaqa imanir ëwashqa kayanqantam Helenta niyarqan.

Tsë ishkan shipashkunatam, reunionchö yachakuyanqan y wawqi panikunawan juntu kë alläpa gustarqan. Y reunion ushariptin Diospita Yachatsikuna wayita wawqi panikuna limpiapakoqta rikarmi, pëkunapis yanapakuyarqan. Juknin kaq shipashqa manam tsë nacionchö tärannatsu. Peru juknin kaqqa, Helen kushishqa pëkunata rikanqampitam, tsë junaqpita reunionkunaman ëwar y Bibliapita yachakur qallëkurqan.