NISY somonjara roe rezay nitsangatsanga ta Baguio a Philippines any, le nahita tablò fitoria. Fe tsy namonjy teny rozy. Nahita an-drozy Helen, azy ranabavy nitsanga tanilani-tablò teo iny, le nihehy tamin-drozy. Nandeha avao somonjara rey, fe tsy nihalinon-drozy tsikitsikini-Helen iny.

Lafa rozy noly, le nahita plaky jw.org bevata tamy Efitrano Fanjakà eo. Nitiaron-drozy hoe mitovy amy soratsy nihitan-drozy tamy tablò fitoria tany iny raha io. Tanabo bisy rozy amin’io fe nijotso, le nandeha amy Efitrano eny. Hitan-drozy hoe nisy fandaharam-pivoria ataoni-ze fiangona iaby mivory ao nipetaky tamy vavahady eo.

Nanatriky ty raiky amy fivoria manaraky rozy. Ia hoasanao ty nihitan-drozy lafa nilitsy tan’Efitrano ao rozy? Helen! Avy le nitiaron-drozy hoe io ampela nihehy tamin-drozy iny. “Lafa namonjy ahy rozy”, hoasani-Helen, “le somary natahotsy aho. Nieritseritsy aho hoe hay ndre nisy raha tsy nety nataoko.” Fe nihazavanini-somonjara rey tamy Helen hoe fa nihitan-drozy tamy tablò fitoria teny ie.

Niteateani-somonjara rey fivoria iny, sady niazoazon-drozy ty ain-drozy niaraky amy rahalahy noho anabavy reo. Lafa nahita ani-mpiara-manompo rey nanadio Efitrano rozy tafarani-fivoria iny, le nanontany hoe mahazo manampy koa va. Fa tsy mipetraky a Philippines any sasy ty raiky amy somonjara rey, fe raiky iny mivory tsy tampaky sady fa mianatsy Baiboly. Tsikitsiky iny avao ro nahavy ani-raha iaby zay!