ESEKA epe watakɛndaki l’edjena k’onanghawɔ opoto, lá ngando kɛ Baguio, lá Philippines. Iwɔ wɛnaka Ewakɛ epe wɛ Yehova wa poposanyɛ la prezantwara, koko watasukana te wɔ. Nkaana kɛso Helen, kanga lemalisa entshupa la prezantwara, amonghamonghelaka. Eseka epe wɛsɔ wetakindjɛki ngo ntakɛnde, koko wopo wɔ Helen ndamonghamonghela akamoyɛka.

M’ɔkɔngɔ, wina w’iyotakalɔka tá mbandja la bisi, iwɔ wɛnaka kartɛ k’ekekete kɛ jw.org lá Mvulu k’Onkfumi. Iwɔ wavungɔka ambɔ wɛnaka efunelo wɛsɔ le ankaana ipe yepoposanyɛki lá prezantwara. Iwɔ wakitaka má bisi edjinge watateyɛka ndenda nonghanyi kɛ nsanghanyɛ yɛ ntshumano djetshikitanyi iyafune lá wiso wɔ Mvulu k’Onkfumi.

Eseka wɛkɔ epe wingelaka lá losanghanyɛ lɔmɔtshi lɔwɔlamisa. Nyo ndjewaka onto w’iyɛnyi wina w’iyotingelaka tá Mvulu k’Onkfumi? Helen! Mbala kɛkɔ kɛmɔ w’ewaka ambɔ, nde ndeke kanga lámonghamonghelisa. Helen ntepelaka ante: “Wina w’iyoyayɛka le lemi, nkiyanaka ndambo. Nfɛnyɛka ente ndananghekala nkambo mɔtshi djɛ nyɛtshi.” Koko wan’amato ape wasɔ wasipisoyɛka Helen ambɔ wɔwɛnaka ambemala lá prezantwara.

Ambayi ipe yɛsɔ, wakɔpaka losanghanyɛ lɔsɔ efula edjinge wayawokaka wɔlɔ djɛ ndjala esanga la wananyɔ l’ankaana. Wina w’iyɛnyi wananyɔ wɔmba Mvulu k’Onkfumi, iwɔ waalɔmbaka ɛnkɔmbɔ djɛ ndaakotshɛ. Oseka ɔmɔtshi apayintansɛ lá Philippines, koko onkina ambowanga ndjingela nsanghanyɛ edjinge ambowanga ndjeka Bible—k’enkfumɔ kɛsɔ ngo m’ɔtɛ w’omonghamongho!