NA‘E ‘alu fakataha ha ongo finemui ki ha feitu‘u pisinisi ‘i he Kolo Baguio, ‘i he ‘Otu Motu Filipainí. Na‘á na fakatokanga‘i ha papa faifakamo‘oni, ka na‘e ‘ikai ke na ‘alu ki ai. Ko Helen, ‘a e tuofefine na‘e tu‘u ‘i he tafa‘aki ‘o e papá, na‘á ne malimali atu kiate kinaua. Na‘e hoko atu ‘ena lué, ka na‘e maongo kiate kinaua ‘a e malimali loto-māfana ‘a Helen.

Ki mui ai, ‘i he heka atu ‘a e ongo fefiné he pasí ki honau ‘apí, na‘á na fakatokanga‘i ha faka‘ilonga ‘o e jw.org ‘i ha Fale Fakataha‘anga. Na‘á na manatu‘i ko e faka‘ilonga tatau pē mo ia na‘á na sio ki ai ki mu‘a ange ‘i he papa faifakamo‘oní. Na‘á na hifo mei he pasí ke vakai‘i ‘a e taimi-tēpile ki he fakataha ‘a e ngaahi fakataha‘angá ‘i he ‘ā ‘o e Fale Fakataha‘angá.

Na‘e ma‘u ‘e he ongo fefiné ‘a e taha ‘o e ngaahi fakataha hokó. Pea ko hai na‘á na sio ki ai ‘i he‘ena hū ki he Fale Fakataha‘angá? Ko Helen! Na‘á na ‘ohovale ‘i he‘ena ‘ilo‘i ‘a e tokotaha na‘e malimali angé. ‘Oku pehē ‘e Helen, “‘I he‘ena lue mai kiate aú, na‘á ku ongo‘i manavasi‘i. Na‘á ku fakakaukau mahalo na‘á ku fai ha kovi.” Ka na‘e fakamatala ange ‘e he ongo fefiné kia Helen ‘a e me‘a na‘e hokó.

Na‘e fiefia ‘a e ongo finemuí ‘i hono ma‘u ‘a e fakatahá pea na‘á na ongo‘i fiemālie ‘i he feohi mo e fanga tokouá. ‘I he‘ena sio ki he fakama‘a ‘e he ni‘ihi ‘a e fale fakataha‘angá ‘i he tuku ‘a e fakatahá, na‘á na tala ange pe ‘e sai pē ke na tokoni. Ko e taha ‘i he ongo fefiné kuó ne mavahe mei he ‘Otu Motu Filipainí, ka ‘oku kamata ke ma‘u fakataha ‘a e fefine ‘e tahá pea ako ‘a e Tohi Tapú​—koe‘uhi pē ko ha malimali!