Vanyamahegyane vavili va di gu gimbiya vatshavbo ga lidhoropa la Baguio, Filipinas. Avo va di wona gikarinyana nya mabhuku ganiolu avo kha hidzimeya. Ndriyathu nya nyamayi nyo pwani khu Helen, a nga ba a thuma avba nya gikarinyana a di va hegeya. Vanyamahegyane vale va di simama gu gimbiya, ganiolu, avo va tsakisidwe khedzi Helen a nga va hegeya khidzo nigu kha va mu divala.

Hwane nya isoso, na va romo movhani na va gu bweleya gaya, va di wona Salawu nya Mufumo yi nga ba yi lovidwe khu dziletra nya dzikhongolo gu pwani jw.org. Avo va di dundruga gu khavo dziletra dzile khidzo dzadzimwedzo va nga dzi wona avba nya gikarinyana nya mabhuku. Va vavili va di tshiga khu movhani va hongola Salawuni nya Mufumo. Salawuni va di ya wona longoloko nya mitshangano.

Vanyamahegyane vale va di hongola ga mitshangano yi nga landreya. Avo va samade ngudzu tepo va nga beya Salawuni nya Mufumo va wona Helen. Avo va di dzegeya gu dundruga gu khavo uye muthu nya mahego. Helen wari khuye: “Tepo va nga nyi teya nyi di garadzega kholu nyi di si dziti gu kheni vo nyi teya khu ginani.” Ganiolu, avo va di embeya Helen gu khavo va mu wonide avba nya gikarinyana nya mabhuku.

Vanyamahegyane vava va tsakisidwe khu mitshangano va bwe va tsakiswa khu gu manega ni vandriyathu. Tepo va nga wona vambe na va agisa salawu hwane nya mitshangano, avo va di wudzisa gu khavo va nga phasedzeya gani. Moyo nya vanyamahegyane vava a di fuluga khu Filipinas, ganiolu, mumbe a di simama gu hongola mitshanganoni a bwe a pheya gu hevbula Bhibhiliya. Satshavbo sesi mihandro nya gu mwerugeye!