ABAISIKI babiri bakaba nibarubata hamu omu rubuga rwa Baguio, omu Philippines. Bakarora akagaali k’okutebeza, baitu batagende nambere kali. Munyaanya itwe arukwetwa Helen, ow’akaba ayemeriire ha rubaju rw’akagaali akabateraho akaseko k’amaani muno h’amatama. Abaisiki banu bakagumizaamu nibarubata, baitu bakakwatahwaho muno habw’akaseko ka Helen.

Hanyuma, obubakaba nibagaruka omu ka baali omu baasi bakarora ekyapa kikooto ekya jw.org kiri ha Kyombeko ky’Obukama. Bakaijuka ngu enyuguta ezi nizo baali babaine ha kagaali k’okutebeza. Bakaruga omu baasi bagenda bakebera ha geeti ye Kyombeko ky’Obukama nambere hakaba hali orukarra orukwoleka obwire bw’ensorrokano ez’ebitebe ebirukwahukana.

Abaisiki banu bakagenda omu rumu ha rusorrokano orw’ahondiireho. Bakahunirra muno kurora Helen obubatahire omu Kyombeko ky’Obukama! Aho naaho bakaijuka ngu nuwe akaba abasekiire. Helen n’agamba ati: “Nkeralikirramu kake, habwokuba nkaba ntamanyire habwaki baizire nambere ndi.” Baitu abaisiki bakasoborra Helen ekyali kibaireho.

Abaisiki banu bakegondeza omu nsorrokano, kandi kikabasemeza muno kuba hamu n’aboruganda na banyaanya itwe. Obubarozere ab’oruganda nibasemeza Ekyombeko ky’Obukama hanyuma y’ensorrokano, nabo bakasaba kukonyera. Omu h’abaisiki banu takyaikara omu ihanga lya Philippines, baitu ondi agenda omu nsorrokano obutoosa kandi akatandika n’okwega Baibuli​—binu byona bikaleetwa akaseko h’amatama!