CHEB jchʼiel antsetik yakalik ta beel ta banti ay te negosioetik ta Baguio City (Filipinas). La yilik jun karrito swenta scholel skʼop Dios, pero maba noptsajik bael. Te ermana Helen te ay ta karrito sok tseʼelnax yoʼtan la yil te cheb antsetik. Jelawik bael, pero yan-nax la yilik-a te bitʼil tseʼel yoʼtan te Helen.

Ta patil kʼalal yakik ta bael ta autobus ta sujtel bael ta snaik, la yilik te jw.org ta jun sNail Tsoblej. Jul ta yoʼtanik te jaʼ pajal sok te la yilik ta jun karrito yuʼun scholel skʼop Dios. Koik ta autobus sok la yilik te jayeb ora ya stsob sbaik te kongregasionetik.

Te cheb antsetike, kʼotik ta jun tsoblej. ¿Machʼa la staik ta ilel ta oranax te kʼalal ochik bael ta sNail Tsobleje? ¡Jaʼ te Helen! Oranax la snaʼbeyik sba yuʼun te bitʼil tseʼelnax yoʼtan te ermanae. Te Helen jich la yal: «Te kʼalal noptsajik ta jtojole, la jxiʼ jtebuk, la jnop te yuʼun-niwan ay bin chopol jpasoje». Pero te antsetik-abi, la scholbeyik yaʼiy te Helen te bin kʼot ta pasele.

Te cheb antsetik bayal la smulanik te tsoblej sok te la sjokin sba sok te ermanoetike, jich la yaʼiyik te ayik ta snaike. Kʼalal la yilik te ya spasik jilel limpiesa te kʼalal ya xlaj yoʼtanik ta tsobleje, ochik ta jkoltaywanej-euk. Te jtule maba tey kuxinemix ta nasion-abi, pero te yane kaj ta bael ta tsoblejetik sok ta snopel te Biblia ¡ta swentanax jun tseʼej!