AXIMWALI anli yeetta vamosa edistritu eneettiwa nakoso epooma ya oBaguio oFilipina. Nto awo yaahoona ekarinyu ninlaleeryana ahu mapuro oowaatta atthu, masi khiyaattamenle. Murokora mmosa eemenle waattamela ekarinyu oniihaniwa Helen aahitheya moopatthaneya aawehaka. Aximwali ale yaahivikaniha weetta, masi awo khiyaaliyanle enamuna Helen aatheyale awe moopatthaneya.

Muhoolo mwaya, aximwali ale yaahiwela ekaaro wira atthikele owannyeya. Yeettaka mphironi yaahoona Empa a Omwene nilempwale ene nipawe jw.org. Nto awo yahuupuwela wira moolumo ale yaamulikana ni moolumo yaalempwale ekarinyu yaawenhe aya. Oowanli aya yaahikhuruwa mukaaroni arowa mpakha Empa ya Omwene oweha iprokrama sa mithukumano sa miloko sotheene saalempwale vamukhora ya Empa ya Omwene ele.

Aximwali oowanli yaahirowela mithukumano saattharelana. Tani yaawenhe aya okathi yaaphiyale aya Empa ya Omwene? Awo yanwenhe Helen! Moohipisa, awo yaahiweha wira aari mutthu yoole aatheyale moopatthaneya. Helen onihimya so: “Okathi yaakaattamenle aya kaahixanka. Maana nkaasuwenle etthu yaawiirinhe okaattamela miyo. Nto kuupuwela wira kaahipaka etthu yoohiloka”. Masi aximwali ale, yaahimuleela Helen wira yaahinweha olaleeryaka ni ekarinyu.

Aximwali ale yaahisiveliwa vanceene mithukumano iye saapakiwe ni yaahihakalala okhala vamosa ni anna ni arokora. Nuumala-vo, yaahitthikela owannyeya. Nuumala waaweha atthu akina arattelaka Empa ya Omwene nuumala mithukumano, awo yaahikoha akhala wira yaneemereriwa okhaliherya. Vano mwali mmosa khonikhala oFilipina, masi mukina oopacerya orowela mithukumano ni onnisomihiwa Biibiliya. Sotheene iyo sihiiraneya mwaha wootheya moopatthaneya!