NAAˈˈU yelaga macca asati Pilippinsen Bagiˈo giyo kataman issippe hemettoosona. Eti dabaaban markkattiyaageeti xuufiyaa wottiyo gaariyaa beˈikkokka, yaa shiiqibookkona. Gaariyaa matan eqqida michchiyaa Helena etakko xeellaydda keehi noocu gaasu. He macca asati ogiyaa oyqqidi bi bayikkonne, Helena pashkki gaada noocu giidoogaa dosidosona.

Guyyeppe, he macca asati otobisiyan bantta soo simmiiddi, jw.org giya gita malaatay xaafettido SHiiquwaa Addaraashaa beˈidosona. He pitaleta xuufiyaa wottiyo gaariyaa bolli beˈidoogaa eti hassayidosona. Eti otobisiyaappe wodhdhidi SHiiquwaa Addaraashaa biidosona. He SHiiquwaa Addaraashan awude awude shiiqoy deˈiyaakko eti yan beˈidosona.

He macca asati kaalliya issi shiiquwaa shiiqidosona. Eti SHiiquwaa Addaraashaa geliyo wode Heleno beˈidi garamettidosona! A he keehi noocu giida maccaasiyo gidiyoogaa eti sohuwaara hassayidosona. Helena, “Eti ayssi taakko yiyaakko erabeenna gishshawu taani guuttaa hirggaas” yaagaasu. SHin he macca asati Heleno gaariyaa matan beˈidoogaa iyyo yootidosona.

He yelaga macca asati shiiquwaa dosidosona, qassi ishanttinne michchontti eta moozoyibookkona. Eti shiiqoy wuri simmin harati addaraashaa geeshshiyoogaa beˈidi, maaddanawu oychchidosona. He macca asatuppe issinniyaa haˈˈi Pilippinsen deˈukku, shin hankkoriyaa shiiquwaa shiiqiyoogaanne Geeshsha Maxaafaa xannaˈiyoogaa doommaasu—hegee noocu giidoogee demissido loˈˈoba!