BO matoko muadi ma bakieto baba kangala ku divula dimueka bamvangilanga lungosu ku Baguio, tsi yi Filipina, bawu bamona dikalu di bilongulu vayi basa fikama ko diawu. Helen, khomba wunkieto wuba va ndeku dikalu di bilongulu, bo kaba mona mu mayangi, nandi wuseva. Bakieto beni buadi, batatamana kudiata vayi bayituka beni mu disevu Helen kaba monisa.

Bilokolu kuntuala, bo baba vutuka ku nzo mu autocarro, bakieto beni bamona mu nzila Nzo yi Kintinu na bisono binneni bi jw.org. Bawu batebuka moyo ti bisono beni, biawu bamona mu dikalu di bilongulu. Bawu bakuluka mu autocarro muingi kuzaba thangu mbi bamvangilanga zikhutukunu mu Nzo beni yi Kintinu.

Bakieto baba buadi, balandakana lukutukunu lulanda. Ayi ngie zebi nani bawu bamona bo bakota ku Nzo yi Kintinu? Helen! Bawu bafika kuntebukila moyo mu kibila ki disevu kaba monisina. Helen wutuba: “Bo bafikama vo yiba, minu yimona nkadu boma kibila yiyindula ti ḿba diambu dimbi yivanga.” Vayi bakieto beni basudikisa Helen ti, bawu bammona mu dikalu di bilongulu.

Bakieto beni bazola beni mambu balonguka mu lukutukunu ayi phila zikhomba baba yambila. Bo bamona zikhomba kudiodisa Nzo Kintinu kutsuka lukutukunu, bawu banyuvula boti mvawu balenda buela mioko. Wumueka mu bakieto beni, kasiala ko bezingila ku Filipina. Vayi wunkaka wukhidi landakananga zikhutukunu ayi wutona kulonguka Kibibila—mamoso mu kibila ki disevu.