TU LUʼUMIL Filipinas, tiʼ junpʼéel kaaj ku kʼaabaʼtik Baguioeʼ, kaʼatúul x-chʼúupalaloʼobeʼ táan kaʼach u xíimbaloʼob tiʼ junpʼéel calle tuʼux ku yúuchul koonol. Tu yiloʼob junpʼéel carrito tuʼux ku yúuchul kʼaʼaytaj pero maʼ náatsʼoʼobiʼ. Helen, le kiik tiaʼan yiknal le carritooʼ tu paktaj le x-chʼúupalaloʼoboʼ ka cheʼejnaji. Kex maʼ náatsʼ le x-chʼúupalaloʼob yiknal le carritooʼ maʼ tuʼubtiʼob baʼax tu beetaj Heleniʼ.

Maʼ úuch tiʼ leloʼ le x-chʼúupalaloʼobaʼ le táan u suutoʼob tu yotochoʼoboʼ tu yiloʼob junpʼéel letrero tuʼux tsʼíibtaʼan jw.org. Le letreroaʼ tiaʼan kaʼach teʼ tuʼux ku muchʼkuba u testigoʼob Jéeobaoʼ. Le ka tu yiloʼobeʼ kʼaʼajtiʼob letiʼe letrero tu yiloʼob xan teʼ carritoeʼ. Éemoʼob teʼ camión tuʼux ku binoʼoboʼ ka náatsʼ u yiloʼob baʼax hora ku beetaʼal le reuniónoʼoboʼ.

Le kaʼatúul x-chʼúupalaloʼobaʼ binoʼob tiʼ junpʼéel reunión. Le ka kʼuchoʼobeʼ, ¿a ke maʼ a wojel máax tu yáax iloʼobiʼ? Tu yiloʼob le kiik Helenoʼ. Séeb úuchik u kʼaj óoltikoʼob tumen le kiikaʼ táan kaʼach u cheʼej le ka tu yilaj le x-chʼúupalaloʼoboʼ. Heleneʼ ku yaʼalik: «Le ka tin wilaj táan u náatsʼal le x-chʼúupalaloʼob tin wiknaloʼ chan nerviosachajen tumen tin tuklaj yaan baʼax maʼ maʼalob tin beetiʼ». Pero le x-chʼúupalaloʼoboʼ tu tsikbaltoʼob tiʼ Helen bix úuchik u kʼuchloʼobiʼ.

Le x-chʼúupalaloʼoboʼ jach utschaj tu yichoʼob le baʼax kaʼansaʼaboʼ bey xan u modos le sukuʼunoʼoboʼ. Ka tsʼoʼok le reuniónoʼ tu yiloʼobeʼ le sukuʼunoʼoboʼ táan u limpiarkoʼob le tuʼux tu muchʼubaʼoboʼ, le oʼolal tu yaʼaloʼob jeʼel u yáantajoʼobeʼ. Juntúul tiʼ le x-chʼúupalaloʼoboʼ bin kajtal yaanal tuʼux, pero le uláakʼoʼ ku bin reunión yéetel táan u tsʼaʼabal xook tiʼ. Tuláakal lelaʼ úuchi chéen tumen cheʼejnaj le kiikoʼ.