1. Mɛni nyagbahi nɛ Yehowa we bi kɛ ngɛ kpee?

ANƐ o kɛ ka ko nɛ nya wa ngɛ kpee lo? Eko ɔ, nɔ ko nɛ o kɛ lɛ ngɛ asafo mi ɔ pee mo nɔdɔ nɔ́ ko. (Yak. 3:2) Aloo eko ɔ, nihi nɛ o kɛ mɛ tsuɔ ní, loo o sukuu bi yeɔ o he fɛu akɛnɛ o ngɛ Yehowa sɔmɔe ɔ he je. (1 Pet. 4:3, 4) Aloo o weku li ngɛ mɔde bɔe kaa a maa tsi o nya nɛ o ko ya asafo mi kpehi, loo o kɛ ni kpahi nɛ ko sɛɛ o hemi kɛ yemi ɔ he ní. (Mat. 10:35, 36) Ke ka nɛ o kɛ ngɛ kpee ɔ mi wa wawɛɛ ɔ, eko ɔ, e maa pee mo kaa o kpa Yehowa sɔmɔmi. Se o ma nyɛ ma ná nɔ mi mami kaa ngɛ ka fɛɛ ka nɛ o kɛ maa kpe ɔ mi ɔ, Yehowa ma ha mo juɛmi nɛ o kɛ tsu he ní, kɛ he wami konɛ o nyɛ nɛ o fĩ si.

2. Ngɛ Roma Bi 15:4 ɔ nya a, kɛ Mawu Munyu ɔ nɛ wa maa kane ɔ ma nyɛ maa ye bua wɔ ha kɛɛ?

² Yehowa ha nɛ a ngma adesahi nɛ a yi mluku se a nyɛ nɛ a fĩ si ngɛ kahi a mi ɔ a nɔ hyɛmi níhi ngɛ Baiblo ɔ mi. Mɛni he je? Konɛ wa nyɛ nɛ waa kase ní ngɛ a nɔ hyɛmi ní ɔmɛ a mi. Lɔ ɔ he je nɛ Yehowa wo bɔfo Paulo he wami nɛ e ngma munyu nɛ ngɛ Roma Bi 15:4 ɔ nɛ. (Kane.) Ke wa kane sane nɛ ɔmɛ ɔ, e ma nyɛ maa wo wa bua, nɛ wa ma ná hɛ nɔ kami. Se bɔ nɛ pee nɛ wa ná he se ɔ, e sa nɛ waa pee babauu pe Baiblo ɔ nɛ wa maa kane kɛkɛ. E sa nɛ wa ha nɛ Baiblo ɔ nɛ kudɔ wa susumi nɛ e ta wa tsui he hulɔ. Mɛni wa ma nyɛ maa pee ke wa ngɛ blɔ tsɔɔmi ko hlae kɛ da nyagba pɔtɛɛ ko nya? Wa ma nyɛ maa pee ní eywiɛ nɛ ɔmɛ. (1) Waa sɔle, (2) Waa po níhi a he foni, (3) Wa pue wa yi mi tɛ, kɛ (4) Waa ngɔ níhi nɛ wa kaseɔ ɔ kɛ tsu ní. Wa ma susu blɔ nɔ nɛ wa maa gu nɛ waa kɛ oti nɛ ɔmɛ eko fɛɛ eko nɛ tsu ní ɔ he. * Wa maa da ní nɛ ɔmɛ a nɔ kɛ susu níhi nɛ ya nɔ  ngɛ Matsɛ David kɛ bɔfo Paulo a si himi mi ɔ a he.

3. Loko o maa kane Baiblo ɔ, mɛni e sa nɛ o pee, nɛ mɛni he je?

³ (1) Moo sɔle. Loko o maa je Baiblo kanemi sisi ɔ, mo bi Yehowa nɛ e ye bua mo konɛ o na bɔ nɛ nɔ́ nɛ o ma kanemi ɔ maa ye bua mo ha. Kaa nɔ hyɛmi nɔ́ ɔ, ke o ngɛ ga womi hlae ngɛ blɔ nɔ nɛ o maa gu kɛ da nyagba ko nya he ɔ, mo bi Yehowa nɛ e ye bua mo nɛ o na sisi tomi mlaahi ngɛ e Munyu ɔ mi nɛ ma nyɛ maa ye bua mo ngɛ si fɔfɔɛ ɔ mi.​—Filip. 4:6, 7; Yak. 1:5.

4. Mɛni ma nyɛ maa ye bua mo konɛ o nu Baiblo mi sane ko sisi saminya?

⁴ (2) Moo po níhi a he foni. Yehowa ha wɔ nyɛmi nɛ waa kɛ poɔ níhi a he foni ngɛ wa juɛmi mi. Bɔ nɛ pee nɛ o nu Baiblo mi sane ko sisi saminya a, e sa nɛ o po nɔ́ nɛ o ngɛ kanee ɔ he foni, nɛ o ngɔ o he kɛ wo si fɔfɔɛ ɔ mi. Bɔɔ mɔde nɛ o na níhi kaa bɔ nɛ nɔ nɛ o ngɛ e he sane kanee ɔ na níhi ha a, nɛ o nu níhi a he kaa bɔ nɛ e nu níhi a he ha a.

5. Ke a ke o pue o yi mi tɛ ɔ, mɛni e tsɔɔ, nɛ kɛ o maa pee lɛ kɛɛ?

⁵ (3) Mo pue o yi mi tɛ. O yi mi tɛ nɛ o ma pue ɔ tsɔɔ kaa o ma susu nɔ́ nɛ o ngɛ kanee ɔ he saminya nɛ o na bɔ nɛ e kɔɔ o he ha. Jã nɛ o maa pee ɔ maa ye bua mo konɛ o nu nɔ́ nɛ o ngɛ kasee ɔ sisi saminya. Ke o kane Baiblo ɔ nɛ o pue we o yi mi tɛ ngɛ he ɔ, e ngɛ kaa bo nɛ a poo kɛ pue okplɔɔ nɔ, se a kpɛ we lolo. Se yi mi tɛ puemi ngɛ kaa bo nɛ a poo nɛ a kpɛ kɛ pee tade. Bɔ nɛ pee nɛ o nyɛ nɛ o pue o yi mi tɛ ɔ, o ma nyɛ ma bi o he sane nɛ ɔmɛ: ‘Mɛni nɛ nɔ nɛ i ngɛ e he sane kanee ɔ pee kɛ tsu nyagba a he ní? Nɛ kɛ Yehowa ye bua lɛ ha kɛɛ? Kɛ níhi nɛ i kase ngɛ e sane ɔ mi ɔ maa ye bua mi kɛ da ye nyagba a nya ha kɛɛ?’

6. Mɛni he je nɛ e sa nɛ waa ngɔ níhi nɛ wa kaseɔ ɔ kɛ tsu ní ɔ?

⁶ (4) Ngɔɔ níhi nɛ o kase ɔ kɛ tsu ní. Yesu tsɔɔ kaa ke waa kɛ níhi nɛ wa kase ɔ tsu we ní ɔ, wa ngɛ kaa nyumu ko nɛ ngɛ tsu mae ngɛ zia nɔ. E ngɛ ní tsue wawɛɛ mohu lɛɛ, se yaka dengme e ngɛ gboe ɔ nɛ. Mɛni he je? Ejakaa ke ahumi fia, nɛ hiɔmi nɛ wawɛɛ ɔ, e tsu ɔ maa hule. (Mat. 7:24-27) Jã nɔuu kɛ̃ nɛ ke wa sɔleɔ, wa poɔ níhi a he foni, wa pueɔ wa yi mi tɛ, se waa kɛ níhi nɛ wa kaseɔ ɔ tsu we ní ɔ, wa dengme gbomi ɔ peeɔ yaka. Ke waa kɛ wa hemi kɛ yemi ɔ he ka kpe, aloo a ngɛ wɔ yi mi wae ɔ, wa be nyɛe maa da nya. Se ke wa kase ní nɛ waa kɛ níhi nɛ wa kase ɔ tsu ní ɔ, e yeɔ bua wɔ nɛ wa mwɔɔ yi mi kpɔhi nɛ da, wa náa tue mi jɔmi, nɛ wa hemi kɛ yemi ɔ mi waa. (Yes. 48:17, 18) Ngɛ otihi eywiɛ nɛ wa susu he ɔ a nya a, nyɛ ha nɛ waa hyɛ nɔ́ nɛ wa ma nyɛ maa kase ngɛ níhi nɛ ya nɔ ngɛ Matsɛ David si himi mi ɔ mi.

7. Mɛni Baiblo mi sane nɛ wa ma susu he?

⁷ Anɛ o huɛ ko, aloo o weku no ko pee mo nɔdɔ nɔ́ ko lo? Ke jã a, lɛɛ o ma nyɛ ma ná Matsɛ David sane ɔ nɛ wa ma susu he ɔ he se. E bi Absalom te si kɛ wo lɛ, nɛ e bɔ mɔde po kaa e ma kpɔ̃ matsɛ yemi ɔ ngɛ e dɛ.​—2 Sam. 15:5-14, 31; 18:6-14.

8. Mɛni o ma nyɛ maa pee konɛ Yehowa nɛ ye bua mo?

⁸ (1) Moo sɔle. Be mi nɛ David sane ɔ ngɛ o juɛmi mi ɔ, mo de Yehowa bɔ nɛ o nuɔ he ha ngɛ bɔ nɛ nɔ ko kɛ mo ye ha a he. (La 6:6-9) Mo de lɛ bɔ nɛ o nuɔ he ha a tutuutu. Lɔ ɔ se ɔ, mo de Yehowa nɛ e ye bua mo konɛ o nyɛ nɛ o na sisi tomi mlaahi nɛ maa ye bua mo nɛ o nyɛ nɛ o da si fɔfɔɛ nɛ mi wa nɛ ɔ nya.

9. Mɛni nɛ ya nɔ ngɛ David kɛ e bi Absalom a kpɛti?

⁹ (2) Moo po níhi a he foni. Mo susu níhi nɛ ya nɔ ngɛ Matsɛ David si himi mi ɔ he, nɛ o hyɛ bɔ nɛ ní nɛ ɔmɛ sa e he ha. David bi Absalom kɛ jehahi fuu to ga konɛ e plɛ ma mi bi ɔmɛ a  yi mi nɛ a suɔ e sane. (2 Sam. 15:7) Benɛ Absalom na kaa be su nɛ e ma kpɔ matsɛ yemi ɔ ngɛ e papaa dɛ ɔ, e tsɔ slaali kɛ ya Israel ma a tsuo mi konɛ a ya dla ni ɔmɛ a juɛmi nɛ a kplɛɛ e nɔ kaa a matsɛ. E gbe Ahitofel yi mi nɛ lɛ hu e te si kɛ wo Matsɛ David. Ahitofel ji David ga wolɔ kɛ e huɛ nɛ nyu bi ngɛ a kpɛti. Absalom tsɛ e he ke matsɛ, nɛ e bɔ mɔde kaa e nine maa su David nɔ nɛ e gbe lɛ. E ma nyɛ maa ba kaa Absalom to ga nɛ ɔ benɛ David nu hiɔ wawɛɛ ɔ. (La 41:1-9) David ba ná le ga nɛ a to ɔ, nɛ e tu fo kɛ je Yerusalem. Nyagbe kulaa a, Absalom tabo ɔ kɛ David tabo ɔ ya kpe. A ye Absalom tabo nɛ a ji atua tsɔli ɔ a nɔ kunimi, nɛ a gbe David bi Absalom.

10. Kɛ Matsɛ David ko nyɛ pee e ní ngɛ níhi nɛ ya nɔ ngɛ e si himi mi ɔ a he ha kɛɛ?

¹⁰ Moo po he foni nɛ o hyɛ bɔ nɛ David nu he ha benɛ ní nɛ ɔmɛ tsuo ngɛ e nɔ bae ɔ. David suɔ e bi Absalom, nɛ e he e huɛ Ahitofel hu ye. Se mɛ tsuo a te si kɛ wo lɛ, a pee lɛ níhi nɛ dɔ lɛ, nɛ a bɔ mɔde po kaa a maa gbe lɛ. Nɔ́ nɛ a pee nɛ ɔ ko nyɛ ko ha nɛ hemi kɛ yemi nɛ David ngɛ ngɛ e huɛ kpa amɛ a mi ɔ ko ta, ejakaa e ma susu kaa mɛ hu a ya piɛɛ Absalom he. Enɛ ɔ ma nyɛ ma ha nɛ e susu lɛ pɛ e he, nɛ lɛ pɛ e tu fo kɛ je ma a mi. Aloo eko ɔ, e ma ha nɛ e kɔni mi nɛ jɔ̃. Se David pee we ní nɛ ɔmɛ ekoeko. E bɔ mɔde nɛ e da ka nɛ nya wa nɛ ɔ nya. Mɛni lɛ ye bua lɛ?

11. Kɛ David pee e ní ngɛ si fɔfɔɛhi nɛ a mi wa nɛ e kɛ kpe ɔ a he ha kɛɛ?

¹¹ (3) Mo pue o yi mi tɛ. Mɛni o ma nyɛ maa kase ngɛ David sane ɔ mi? Mo ha sane bimi nɛ ɔ heto. “Mɛni nɛ David nitsɛ pee ngɛ e si fɔfɔɛ ɔ he nɛ ye bua lɛ?” David tsui pui, nɛ́ lɔ ɔ nɛ ha nɛ e kɛ oya yemi nɛ mwɔ yi mi kpɔhi nɛ dɛ. E yi gbeye tsɔ nɛ lɔ ɔ nɛ ha nɛ e juɛmi nɛ gbɛ. E sɔle konɛ Yehowa nɛ ye bua lɛ. Jehanɛ hu ɔ, e de e huɛ ɔmɛ nɛ a ye bua lɛ. Nɛ lɔ ɔ se ɔ, e kɛ oya yemi tsu yi mi kpɔhi nɛ e mwɔ ɔ a he ní. E ngɛ mi kaa níhi nɛ ya nɔ ngɛ e si himi mi ɔ dɔ lɛ wawɛɛ mohu lɛɛ, se kɛ̃ ɔ, e yi aywilɛho tsɔ, e ya nɔ nɛ e ngɔ e hɛ kɛ fɔ Yehowa nɔ, nɛ e he e huɛmɛ ɔmɛ hu ye.

12. Mɛni nɛ Yehowa pee kɛ ye bua David?

¹² Kɛ Yehowa ye bua David ha kɛɛ? Ke o pee níhi a mi hlami ngɛ sane nɛ ɔ he ɔ, o maa na kaa Yehowa ha David he wami nɛ e hia a, nɛ e nyɛ nɛ e da ka nɛ ɔ nya. (La 3:1-8) Yehowa jɔɔ yi mi kpɔhi nɛ David mwɔ ɔ nɔ. Nɛ e fĩ David huɛmɛ anɔkualetsɛmɛ nɛ a bɔ mɔde kaa a maa po a matsɛ ɔ he piɛ ɔ a se.

13. Ke nɔ ko pee mo nɔdɔ nɔ́ ɔ, mɛni blɔ nɔ o maa gu kɛ kase David? (Mateo 18:15-17)

¹³ (4) Ngɔɔ níhi nɛ o kase ɔ kɛ tsu ní. Mo bi o he ke, ‘Mɛni blɔ nɔ ma gu kɛ kase David?’ E he maa hia nɛ o tsu nyagba a he ní nɔuu. O ma nyɛ maa da bɔ nɛ o si fɔfɔɛ ɔ ngɛ ha a nɔ konɛ o kɛ ga womi nɛ Yesu kɛ ha ngɛ Mateo yi 18 ɔ mi ɔ nɛ tsu ní tɛɛ, aloo o ngɔ sisi tomi mlaa nɛ ngɛ mi ɔ kɛ tsu ní. (Kane Mateo 18:15-17.) Se e sɛ nɛ o da bɔ nɛ o nuɔ he ha a nɔ nɛ o kɛ oya yemi nɛ mwɔ yi mi kpɔ. Moo sɔle ha Yehowa nɛ e ye bua mo nɛ o to o tsui si, nɛ e ha mo juɛmi nɛ o kɛ da nyagba a nya. Yaa nɔ nɛ o ná o huɛmɛ a mi hɛ kɛ nɔ fɔmi, nɛ́ o kplɛɛ yemi kɛ buami nɛ a kɛ ma ha mo ɔ nɔ. (Abɛ 17:17) Nɛ nɔ́ nɛ pe kulaa a, o kɛ ga womi nɛ Yehowa kɛ ha mo ngɛ e Munyu ɔ mi ɔ nɛ tsu ní.​—Abɛ 3:5, 6.

14. Mɛni si fɔfɔɛhi a mi nɛ 2 Timoteo 1:12-16; 4:6-11, 17-22 ɔ ma nyɛ maa wo mo he wami?

¹⁴ Anɛ o weku li teɔ si kɛ woɔ mo lo? Aloo o ngɛ ma nɛ a tsi Yehowa we bi a ní tsumi ɔ fã ko aloo tsuo nya ngɛ mi ɔ mi lo? Ke jã a, lɛɛ ngmami komɛ kaa 2 Timoteo 1:12-16 kɛ 4:6-11, 17-22 * ɔ ma nyɛ maa wo mo he wami. Benɛ Paulo ngma munyu nɛ ɔmɛ ɔ, jamɛ a be ɔ, a wo lɛ tsu.

15. Mɛni o ma nyɛ ma bi Yehowa?

 ¹⁵ (1) Moo sɔle. Loko o maa kane ngmami nɛ ɔmɛ ɔ, moo sɔle nɛ o de Yehowa o nyagba a, kɛ bɔ nɛ o ngɛ he nue ha. Mo de lɛ nyagba tutuutu nɛ o kɛ ngɛ kpee. Mo de lɛ nɛ e ye bua mo nɛ o na sisi tomi mlaahi nɛ ngɛ Paulo sane ɔ mi nɛ maa ye bua mo konɛ o na nɔ́ tutuutu nɛ e sa nɛ o pee ngɛ o nyagba a he.

16. Mɛni si fɔfɔɛ mi Paulo ya je?

¹⁶ (2) Moo po níhi a he foni. Moo po he foni kaa mo ji Paulo. A wo Paulo tsu ngɛ Roma, nɛ e ngɛ kɔsɔkɔsɔ mi. A wo lɛ tsu hyɛ, se enɛ ɔ lɛɛ, e le kaa a maa gbe lɛ. E huɛmɛ komɛ kua lɛ, nɛ pɔ hu tɔ lɛ wawɛɛ.​—2 Tim. 1:15.

17. Kɛ Paulo ko nyɛ ko pee e ní ha kɛɛ?

¹⁷ Paulo ko nyɛ ko ngɔ e juɛmi kɛ ma e sa si himi ɔ nɔ, nɛ e ko susu kaa kaa e ba pee we Kristofo no nɛ ngɛ kã a, jinɛ a ko wui lɛ tsu. E mi mi ko nyɛ fu nyumuhi nɛ a ngɛ Asia nɛ a kua lɛ ɔ, nɛ eko ɔ, e ko ná we e huɛ ɔmɛ a mi hɛ kɛ nɔ fɔmi hu. Se Paulo pee we ní nɛ ɔmɛ ekoeko. Mɛni he je nɛ Paulo ná nɔ mi mami kaa e huɛ ɔmɛ maa ya nɔ maa ye lɛ anɔkuale, nɛ Yehowa hu maa jɔɔ lɛ ɔ?

18. Kɛ Paulo pee e ní ngɛ ka nɛ e kɛ kpe ɔ he ha kɛɛ?

¹⁸ (3) Mo pue o yi mi tɛ. Mo ha sane bimi nɛ ɔ heto, “Mɛni Paulo nitsɛ pee kɛ ye bua e he?” E ngɛ mi kaa Paulo le kaa e be kɛe nɛ a maa gbe lɛ mohu lɛɛ, se e hɛ ji sane nɛ he hia, nɛ ji Yehowa hɛ mi nyami nɛ e maa wo ɔ nɔ. E ya nɔ nɛ e susu blɔ nɔ nɛ e maa gu kɛ wo ni kpahi he wami ɔ he. E sɔle ha Yehowa be fɛɛ be kɛ tsɔɔ kaa e ngɔ e hɛ kɛ fɔ e nɔ. (2 Tim. 1:3) Paulo ngɔɛ e juɛmi kɛ ma nihi nɛ a kua lɛ ɔ a nɔ tsɔ, mohu ɔ, e je hɛ sa kpo ngɛ níhi nɛ e huɛmɛ anɔkualetsɛmɛ pee kɛ ye bua lɛ ɔ a he. Jehanɛ hu ɔ, Paulo ya nɔ nɛ e kase Mawu Munyu ɔ. (2 Tim. 3:16, 17; 4:13) Nɔ́ nɛ pe kulaa a, e ná nɔ mi mami kaa Yehowa kɛ Yesu suɔ lɛ. Yehowa kɛ Yesu kua we Paulo, nɛ a maa jɔɔ lɛ ngɛ anɔkuale nɛ e ye mɛ ɔ he.

19. Mɛni blɔ nɔ nɛ Yehowa gu kɛ ye bua Paulo?

¹⁹ Yehowa bɔ Paulo kɔkɔ kaa akɛnɛ e ji Kristofo no he je ɔ, a maa wa lɛ yi mi, nɛ e ma bi nɛ e fĩ si. (Níts. 21:11-13) Kɛ Yehowa ye bua Paulo ha kɛɛ? E ha Paulo sɔlemi ɔmɛ a heto, nɛ e wo lɛ he wami ngɛ be nɛ sa mi. (2 Tim. 4:17) E ha nɛ Paulo ná nɔ mi mami kaa a maa jɔɔ lɛ ngɛ ní nɛ e tsu ɔ he. Yehowa hu gu Paulo huɛmɛ anɔkualetsɛmɛ a nɔ kɛ ye bua lɛ.

20. Ngɛ Roma Bi 8: 38, 39 ɔ nya a, mɛni blɔ nɔ o maa gu kɛ kase Paulo?

²⁰ (4) Ngɔɔ níhi nɛ o kase ɔ kɛ tsu ní. Mo bi o he ke, ‘Mɛni blɔ nɔ ma gu kɛ kase Paulo?’ Kaa bɔ nɛ Paulo pee ɔ, e sa nɛ waa hyɛ blɔ kaa a maa wa wɔ yi mi ngɛ wa hemi kɛ yemi ɔ he. (Maak. 10:29, 30) Loko wa ma nyɛ maa ya nɔ maa ye anɔkuale ngɛ kahi a mi ɔ, jã wa ngɔ wa hɛ kɛ fɔ Yehowa nɔ ngɛ sɔlemi mi, nɛ wa ya nɔ nɛ wa kase Mawu Munyu ɔ be fɛɛ be. Nɛ e sa nɛ wa kai kaa nɔ́ kake nɛ he hia pe kulaa nɛ wa maa pee ji kaa wa maa wo Yehowa hɛ mi nyami be fɛɛ be. Wa ma nyɛ ma ná nɔ mi mami kaa Yehowa be wɔ kuae, nɛ nɔ́ ko be nyɛe maa tsi suɔmi nɛ e ngɛ kɛ ha wɔ ɔ nya.​—Kane Roma Bi 8:38, 39; Heb. 13:5, 6.

21. Mɛni ye bua Aya kɛ Hector nɛ a nyɛ da si fɔfɔɛhi nɛ a kɛ kpe ɔ a nya?

²¹ Bɔ fɛɛ bɔ nɛ wa si fɔfɔɛ ma ji ha a, nɔ hyɛmi níhi nɛ a ngɛ Baiblo ɔ mi ɔ ma nyɛ maa wo wɔ he wami. Kaa nɔ hyɛmi nɔ́ ɔ, Aya nɛ e ji daa blɔ gbalɔ ngɛ Japan ɔ tsɔɔ kaa Yona sane ɔ ye bua lɛ nɛ e yi gbeye hu ke e ngɛ ma nɔ odase yee. Niheyo ko nɛ a tsɛɛ lɛ ke Hector nɛ e ngɛ Indonesia nɛ e fɔli sɔmɔ we Yehowa a tsɔɔ kaa Rut sane ɔ wo lɛ he wami nɛ e na kaa e sa nɛ e kase Yehowa he ní nɛ e sɔmɔ lɛ.

22. Mɛni o ma nyɛ maa pee konɛ o ná Baiblo dramahi kɛ munyu nɛ ji “Moo Kase A Hemi Kɛ Yemi ɔ” he se kɛ pi si?

 ²² Jije o ma nyɛ maa na Baiblo mi nɔ hyɛmi níhi nɛ maa wo mo he wami ngɛ? Wa video ɔmɛ, dramahi nɛ a fiaa nɛ a buɔ tue, kɛ munyu nɛ ji “Moo Kase A Hemi Kɛ Yemi ɔ” nɛ ngɛ jw.org ɔ nɔ ɔ ma nyɛ maa ye bua mo nɛ o nu Baiblo mi sanehi a sisi saminya. * Loko o maa hyɛ video nɛ ɔmɛ eko, loo o bu drama nɛ ɔmɛ ekomɛ tue, loo o kane nihi a he sane nɛ a je blɔ pee níhi a mi hlami loko a ngma a, moo sɔle kɛ bi Yehowa nɛ e ha nɛ o na oti pɔtɛɛ komɛ nɛ o kɛ ma nyɛ ma tsu ní. Ngɔɔ o he kɛ wo nɔ nɛ o ngɛ e he sane kanee ɔ si fɔfɔɛ ɔ mi. Mo pue o yi mi tɛ ngɛ nɔ́ nɛ Yehowa sɔmɔli nɛ ɔmɛ pee, kɛ nɔ́ nɛ Yehowa pee kɛ ye bua mɛ nɛ a nyɛ da nyagba nɛ ɔmɛ a nya a he. Lɔ ɔ se ɔ, ngɔɔ níhi nɛ o kase ɔ kɛ tsu o nyagba a he ní. Moo na Yehowa si ngɛ yemi kɛ buami nɛ e kɛ ha mo momo ɔ he. Mo je hɛsa kpo ngɛ níhi nɛ e pee ha mo ɔ a he kɛ gu he blɔ nɛ o ma hla kɛ wo ni kpahi he wami nɛ o ye bua mɛ ɔ nɔ.

23. Kaa bɔ nɛ a tsɔɔ ngɛ Yesaya 41:10, 13 ɔ, mɛni Yehowa wo si kaa e maa pee ha wɔ?

²³ Si himi ngɛ je nɛ Satan lɛ ngɛ lɛ kudɔe ɔ mi ɔ be gbɔjɔɔ, nɛ be komɛ po ɔ, wa li nɔ́ nɛ wa maa pee. (2 Tim. 3:1) Se e sɛ nɛ waa pee yeyeeye loo waa ye gbeye. Yehowa le nɔ́ nɛ mi nɛ wa ngɛ gblee. E wo si kaa e maa ngɔ e dami hiɔ nine nɛ he wa a kɛ pɛtɛ wa he ke wa nɔ si. (Kane Yesaya 41:10, 13.) Wa ngɛ nɔ mi mami kaa Yehowa maa ye bua wɔ, nɛ Baiblo ɔ hu ma nyɛ maa ye bua wɔ nɛ waa da nyagba fɛɛ nyagba nya.