1. Weh kaina chraiyalz Jehoava peepl mait goh chroo?

YOO di goh chroo wahn haad chraiyal? Maybi sohnbadi eena di kangrigayshan seh er du sohnting weh hert yu. (Jay. 3:2) Maybi di peepl weh yu werk wid er goh da skool wid mak yu bikaaz yu da wan a Jehoava Witnisiz. (1 Peet. 4:3, 4) Er maybi yu oan famili di chrai stap yu fahn goh da meetin er fahn preech. (Mach. 10:35, 36) If yoo di goh chroo wahn haad chraiyal, yu mait feel laik giv op. Bot yu ku bee shoar dat noh mata weh chraiyalz yu di goh chroo, Jehoava wahn gi yu di wizdom fi deel wid dehn ahn di schrent fi bayr op.

2. Akaadn tu Roamanz 15:4, how Baibl reedin ku help wi?

² Di Baibl gat een lata egzampl a how peepl weh noh perfek mi deel wid haad chraiyalz. Jehoava mi mek shoar fi inklood dehndeh egzampl eena fi hihn Werd. Wai? Soh dat wi ku laan fahn dehn. Jehoava mi yooz di apasl Paal fi rait bowt dat da Roamanz 15:4. (Reed.) Wen wi reed bowt dehnya Baibl egzampl, dehn gi wi komfert ahn hoap. Bot fi mek wi benifit, wi haftu du moa dan jos reed di Baibl. Wi haftu mek di Skripchaz chaynj di way wi tink ahn di way wi feel. Weh wi ku du if wi di luk fi gaidans pahn how fi deel wid wahn chraiyal? Wi ku fala dehnya foa step: (1) Pray, (2) Imajin, (3) Meditayt, ahn (4) Yooz weh yu laan. Mek wi diskos how wi ku fala dehnya foa step, * ahn si how wi ku yooz dehn fi laan fahn weh mi hapm tu King Dayvid ahn di apasl Paal.

3. Weh yu shuda du bifoa yu staat tu reed di Baibl, ahn wai?

 ³ (1) Pray. Bifoa yu staat tu reed di Baibl, aks Jehoava fi help yu si how yu ku benifit fahn weh yu reed. Fi egzampl, if yu di luk fi kongsl pahn how fi deel wid wahn prablem, aks Jehoava fi help yu fain prinsiplz eena fi hihn Werd weh ku gaid yu.—Fil. 4:6, 7; Jay. 1:5.

4. Weh yu ku du fi mek wahn Baibl pasij bee moa reel tu yu?

⁴ (2) Imajin. Jehoava gi wi wahn imajinayshan. Dat da wahn amayzin gif! Wi ku yooz wi imajinayshan fi help wi mek wahn Baibl pasij bee moa reel tu wi. How? Wel, wi ku chrai imajin weh di hapm ahn wi ku put wiself eena di plays a di persn weh wi di reed bowt. Wi ku aalso chrai feel di way how da persn mi feel.

5. Wat da meditayshan, ahn how yu ku meditayt?

⁵ (3) Meditayt. Fi meditayt meenz fi tink gud bowt weh yu di reed ahn bowt how yu ku yooz di infamayshan eena yu laif. Ih help yu fi put aidyaaz tugeda ahn geh wahn beta andastandin a weh yu di reed. If yu reed di Baibl widowt meditayt, da laik yu jos di luk pahn di peesiz a wahn pozl widowt put it tugeda. Bot if yu meditayt, da laik yu di put di peesiz tugeda soh dat yu ku si di hoal picha. Fi help yu du dat, yu ku aks yuself dehnya kweschan: ‘Weh di mayn karakta eena di pasij mi du fi help ihself? How Jehoava mi help ahn? How Ai ku yooz di lesn weh Ah laan fi help mi bayr op wen Ah ga prablemz?ʼ

6. Wai wi haftu yooz weh wi laan?

⁶ (4) Yooz weh yu laan. Jeezas mi seh dat if wi noh yooz weh wi laan, wi da laik wahn man weh bil ih hows pahn loan san. Di man werk haad, bot ih onli di ways ih taim. Wai? Bikaaz wen wahn staam kohn, ahn breez lash gens di hows ahn flod waata rayz, di hows wahn jrap rait dong. (Mach. 7:24-27) Eevn if wi pray, imajin, ahn meditayt, aala da werk wuda bee loan ways a taim if wi noh yooz weh wi laan. Bikaaz wen wi goh chroo chraiyalz er fays persikyooshan weh tes wi fayt, wi fayt noh wahn bee schrang inof. Pahn di ada han, wen wi stodi ahn yooz weh wi laan wi wahn mek beta disizhanz, wi wahn ga moa pees, ahn wi fayt wahn bee schranga. (Isa. 48:17, 18) Soh mek wi yooz di foa step weh wi jos diskos ahn si weh wi ku laan fahn weh mi hapm tu King Dayvid.

7. Wich Baibl egzampl wi wahn diskos now?

⁷ Weh ku help yu if yu feel hert bikaaz a sohnting weh wan a yu fren er sohnbadi eena yu famili seh er du? Yu ku stodi weh King Dayvid mi du wen fi hihn son Absalom mi hert ahn, an chrai tek weh di kingdom fan ahn.—2 Sam. 15:5-14, 31; 18:6-14.

8. Weh yu ku du fi geh help fahn Jehoava?

⁸ (1) Pray. Tink bowt di pasij az yu tel Jehoava egzakli how yu feel bowt di way sohnbadi mi chreet yu. (Ps. 6:6-9) Den aks Jehoava fi help yu fain prinsiplz weh wahn help yu fi noa weh fi du eena da sichuwayshan.

9. Weh mi hapm bitween Dayvid an Absalom?

⁹ (2) Imajin. Tink bowt weh mi hapm eena dis pasij, an imajin how King Dayvid mosi mi feel. Fi yaaz, Absalom mi werk haad fi mek di peepl lov hihn. (2 Sam. 15:7) Wen Absalom mi feel laik di peepl mi redi, ih sen owt sohn spai aal chroo di nayshan a Izrel fi pripyaa di peepl fi aksep hihn az dehn king. Hihn eevn kanvins wan a Dayvid kloas fren, Ahitofel, fi ribel  gens Dayvid tu. Absalom tel evribadi dat hihn da di king, ahn den ih chrai fi kyapcha Dayvid ahn kil ahn. Dayvid mi praabli veri sik rong da taim. (Ps. 41:1-9) Dayvid fain owt weh Absalom mi-di plan fi du, soh ih lef Jeroosalem. Afta wahn wail, Absalom aami mi fait gens Dayvid aami. Di rebl aami mi looz, ahn Dayvid son Absalom mi ded.

10. Weh King Dayvid kuda mi du?

¹⁰ Now imajin how Dayvid mosi mi feel wen aala dis mi-di hapm tu ahn. Hihn mi lov Absalom, an ih mi chros Ahitofel. Bot di too a dehn mi bichray ahn. Dehn mi hert ahn bad, ahn dehn mi eevn chrai kil ahn. Dayvid kuda mi tink dat aala ih ada frenz mi jain Absalom tu, an ih kuda mi stap chros dehn. Hihn kuda mi tink onli bowt ihself ahn chrai ron weh fahn di konchri hihn wan. Er ih kuda mi geh veri diskorij ahn jos giv op. Bot Dayvid neva du dat. Insted, hihn mi get oava di prablem. How hihn kuda mi du dat?

11. Weh Dayvid mi du eena da sichuwayshan?

¹¹ (3) Meditayt. Weh prinsiplz yu ku laan fahn weh mi hapm tu Dayvid? Fain di ansa tu dis kweschan: “Weh Dayvid mi du fi help ihself?” Dayvid neva geh fraitn ahn hori mek disizhanz weh neva waiz. An ih neva geh soh frayd dat ih wayt til laas minit fi mek wahn disizhan needa. Insted, hihn mi pray tu Jehoava an aks ahn fi help. Hihn mi aalso aks ih frenz fi help ahn. Ahn hihn mi kwik fi du weh hihn mi disaid fi du. Aldoa Dayvid mi feel hert, ih neva stap chros peepl, an ih neva ton intu wahn haytful persn needa. Hihn mi kantinyu fi chros Jehoava an ih fren dehn.

12. Weh Jehoava mi du fi help Dayvid?

¹² How Jehoava mi help Dayvid? If yu du sohn risaach, yu wahn fain owt dat Jehoava mi gi Dayvid di schrent weh ih mi need fi bayr op chroo dis chraiyal. (Ps. 3:1-8; hedin) Jehoava mi bles di disizhanz weh Dayvid mi mek, ahn hihn mi sopoat Dayvid laayal frenz wen dehn mi-di fait fi protek dehn king.

13. How yu ku kapi Dayvid egzampl if sohnbadi seh er du sohnting weh hert yu bad? (Machyu 18:15-17)

¹³ (4) Yooz weh yu laan. Aks yuself, ‘How Ai ku kapi Dayvid egzampl?ʼ Yu wuda need fi tek akshan rait away fi fiks di prablem. Dipendin pahn di sichuwayshan, yu ku fala di kongsl weh Jeezas mi gi wi da Machyu chapta 18, er yu ku du ada tingz weh bays pahn di prinsipl eena da skripcha fi mek pees wid di persn. (Reed Machyu 18:15-17.) Bot yu shuda neva hori mek disizhanz wen yu beks. Yu shuda pray tu Jehoava an aks ahn fi gi yu wahn kaam haat ahn fi gi yu di wizdom weh yu need fi deel wid di sichuwayshan. Noh stap chros yu frenz. Wen dehn aafa fi help yu owt, bee wilin fi aksep dehn help. (Prov. 17:17) Bot di moas impoatant ting weh yu need fi du da fala di advais weh Jehoava gi yu eena fi hihn Werd.—Prov. 3:5, 6.

14. How 2 Timoti 1:12-16; 4:6-11, 17-22 ku inkorij yu?

¹⁴ Yu famili di chrai stap yu fahn serv Jehoava? Er yu liv eena wahn konchri wehpaat di govament ban wi werk? If dat da di kays, yu mait feel inkorij wen yu reed 2 Timoti 1:12-16 ahn 4:6-11, 17-22. * Paal mi rait dehnya vers wail ih mi deh da prizn.

15. Weh yu ku aks Jehoava fa?

 ¹⁵ (1) Pray. Bifoa yu reed dehndeh vers, tel Jehoava bowt yu prablem ahn tel ahn egzakli how di prablem mek yu feel. Den wen yu reed bowt weh aal mi hapm tu Paal, aks Jehoava fi help yu fain prinsiplz weh wahn help yu fi noa weh fi du eena di sichuwayshan weh yu di fays.

16. Weh mi hapm tu Paal?

¹⁶ (2) Imajin. Imajin yuself eena Paal sichuwayshan. Hihn mi deh eena prizn da Roam. Dis da noh di fers taim hihn mi deh da prizn, bot dis taim hihn mi shoar dat dehn mi wahn kil ahn. Som a ih fren dehn mi lef ahn, an hihn mi reeli taiyad.—2 Tim. 1:15.

17. Weh Paal kuda mi du?

¹⁷ Paal kuda mi foakos pahn di paas ahn staat tu tink dat if ih mi du tingz difrent, ih neva mi wahn en op da prizn. Ih kuda mi geh beks wid di peepl fahn di dischrik a Aysha weh mi lef ahn, an stap chros aala ih ada fren dehn tu. Bot Paal neva du dat. Weh mi help Paal fi kip di chros ih frenz ahn fi kip di chros dat Jehoava wuda bles ahn?

18. Weh Paal mi du wen hihn mi-di goh chroo dis chraiyal?

¹⁸ (3) Meditayt. Fain di ansa tu dis kweschan: “How Paal mi help ihself?” Eevn wen Paal mi noa dat ih mi wahn soon ded, hihn neva ferget dat ih veri impoatant fi bring prayz an aana tu Jehoava. Hihn mi aalso kantinyu fi tink bowt weh hihn kuda du fi inkorij adaz. Hihn mi pray tu Jehoava wahn lat ahn pen pan ahn eena evriting. (2 Tim. 1:3) Insteda ways ih taim di foakos pahn aala di bradaz weh mi lef ahn, Paal mi shoa apreeshiayshan fi di lovin frenz weh mi laayal tu hihn ahn weh mi help ahn owt. Paal mi aalso kantinyu fi stodi Gaad Werd. (2 Tim. 3:16, 17; 4:13) Bot moa impoatant dan aala dat, hihn mi shoar dat Jehoava ahn Jeezas mi lov ahn. Dehn neva lef ahn! Hihn mi noa dat dehn wuda bles ahn bikaaz hihn mi laayal tu dehn, an ih mi serv dehn rait dong tu di en.

19. How Jehoava mi help Paal?

¹⁹ Jehoava mi waan Paal heda taim dat ih wuda haftu fays persikyooshan bikaaz ih da-mi wahn Kristyan. (Aks 21:11-13) How Jehoava mi help Paal? Hihn mi ansa Paal pryaaz ahn giv ahn di schrent weh ih mi need. (2 Tim. 4:17) Jehoava mi pramis Paal dat ih wuda geh di riwaad weh ih mi werk soh haad fi get. Jehoava mi aalso yooz Paal laayal fren dehn fi giv ahn help ahn sopoat.

20. How wi ku kapi di egzampl a fayt weh Paal mi shoa da Roamanz 8:38, 39?

²⁰ (4) Yooz weh yu laan. Aks yuself, ‘How Ai ku kapi Paal egzampl?ʼ Jos laik Paal, wi shuda ekspek dat wi wahn fays persikyooshan bikaaz wi serv Jehoava. (Maak 10:29, 30) If wi waahn stay faytful eevn wen wi di goh chroo chraiyalz, wi haftu kip di pray tu Jehoava ahn kip di stodi fi hihn Werd regyula. Ahn wi haftu aalwayz memba dat wan a di moas impoatant ting weh wee ku du da prayz an aana Jehoava. Wi ku bee shoar dat Jehoava wahn neva abandan wi ahn dat nobadi kyaahn stap hihn fahn lov wi.—Reed Roamanz 8:38, 39; Heeb. 13:5, 6.

21. Weh mi help Aya ahn Hector fi deel wid di chalenjiz weh dehn mi fays?

²¹ Difrent Baibl egzampl ku gi wi di schrent weh wi need fi deel wid eni prablem weh wi mait fays. Fi egzampl, Aya, wahn painyaa da Japan, seh dat di Joana  egzampl mi help shee fi get oava ih fyaa a poblik witnisin. Ahn kansida di egzampl a Hector, wahn yong brada fahn Indonesia. Fi hihn payrents noh di serv Jehoava, bot Root egzampl mi gi hihn di schrent fi laan bowt Jehoava ahn serv ahn.

22. Weh yu ku du fi mek yu reeli benifit fahn di Baibl jrama dehn er fahn di aatikl seeriz “Kapi Dehn Fayt”?

²² Wehpaat yu ku fain Baibl egzamplz weh wahn schrentn yu? Wi veedyo an aadyo jrama dehn, ahn di aatikl seeriz “Kapi Dehn Fayt” ku reeli help mek di tingz weh mi hapm eena di Baibl bee moa reel tu wi. * Bifoa yu wach veedyo, lisn tu aadyo rikaadn, er reed bowt dehnya Baibl egzampl, aks Jehoava fi help yu fain di impoatant lesn dehn weh yu ku yooz eena yu laif. Imajin yuself eena di plays a di mayn karakta. Meditayt pahn weh dehnya faytful servants a Jehoava mi du, ahn how hihn mi help dehn fi get oava dehn chraiyalz. Den yooz weh yu laan eena yu oan sichuwayshan. Tank Jehoava fi di help weh ih don di gi yu. Ahn shoa ahn dat yu apreeshiayt da help wen yu luk fi wayz fi inkorij ahn sopoat adaz.

23. Akaadn tu Isaiah 41:10, 13, weh Jehoava pramis fi du fi wi?

²³ Laif eena dis werl weh deh anda Saytan kanchroal ku bee haad, ahn sohntaim wi noh noa weh fi du. (2 Tim. 3:1) Bot wi noh need fi feel angshos er frayd. Jehoava noa weh wi di goh chroo. Wen wi need help, hihn pramis fi hoal aan tu wi wid fi hihn schrang rait han. (Reed Isaiah 41:10, 13.) * Wee ku bee shoar dat Jehoava wahn help wi ahn dat di Skripchaz wahn gi wi di schrent fi deel wid eni chalenj weh wi fays.