1. Ki problenm bann serviter Zeova i fer fas avek?

ESKI ou pe fer fas avek en problenm grav? Petet en dimoun dan kongregasyon i’n ofans ou. (Zak 3:2) Oubyen i kapab ki ou koleg travay ouswa ou kanmarad lekol i sikann ou akoz ou servi Zeova. (1 Pyer 4:3, 4) Oubyen i posib ki ou fanmir pe esey anpes ou asiste renyon ouswa koz avek lezot konsernan ou lafwa. (Mat. 10:35, 36) Si sa problenm i vreman grav, ou kapab santi ki i pou pli bon pour ou aret servi Zeova. Me ou kapab asire ki malgre nenport ki problenm ou fer fas avek, Zeova pou donn ou sa lasazes pour fer bann bon desizyon e sa lafors pour andire.

2. Dapre Romen 15:4, ler nou lir Parol Bondye ki mannyer sa i kapab ed nou?

² Zeova in fer sir ki i annan bann legzanp dan Labib ki montre ki mannyer bann dimoun enparfe in andir zot bann difikilte. Akoz? Pour nou kapab aprann avek zot legzanp. Sanmenm ki Zeova ti fer zapot Pol ekrir. (Lir Romen 15:4.) Ler nou lir sa bann resi, sa i kapab ankouraz nou e donn nou lespwar. Me nou bezwen fer plis ki zis lir Labib. Nou bezwen les Lekritir sanz nou fason panse e tous nou leker. Me ki nou kapab fer si nou bezwen en konsey konsernan en problenm spesifik? Nou kapab fer sa kat keksoz swivan: (1) Priye, (2) Imazinen, (3) Medite, e (4) Met an pratik. Nou pou vwar ki mannyer nou kapab fer sa kat keksoz. * Apre nou pou servi sa fason etidye pour aprann avek bann keksoz ki ti arive avek Lerwa David ek zapot Pol.

3. Avan ou konmans lir Labib, ki ou devret fer e akoz?

 ³ (1) Priye. Avan ou konmans lir Labib, demann Zeova pour ed ou vwar ki mannyer ou kapab benefisye avek sa ki ou pe lir. Par egzanp, si ou pe rod konsey lo konman pour fer fas avek en problenm, demann Zeova pour ed ou vwar bann prensip dan son Parol pour ou kapab fer bann bon desizyon.​—Fili. 4:6, 7; Zak 1:5.

4. Kwa ki kapab fer en resi Labib pli reel pour ou?

⁴ (2) Imazinen. Zeova in donn nou en abilite merveye. Nou kapab servi nou limazinasyon pour imazin diferan keksoz. Pour fer en resi Labib pli reel pour ou, esey imazin sa senn e met ou dan plas sa dimoun ki ou pe lir lo la. Esey vwar bann keksoz ki sa dimoun ti vwar e esey santi parey i ti santi.

5. Ki savedir medite e ki mannyer ou kapab medite?

⁵ (3) Medite. Meditasyon i vedir ki ou reflesir byen lo sa ki ou pe lir e lo ki mannyer sa lenformasyon i aplik pour ou. I ed ou konpran ki mannyer sa ki ou pe lir i relye avek lezot lenformasyon e sa i ed ou konpran pli byen sa topik. Si ou lir Labib e ou pa medite, sa i parey ler ou pe get diferan bout en puzzle lo en latab me ou pa pe azout zot ansanm. Meditasyon i parey ler ou azout sa bann bout puzzle ansanm pour ou kapab vwar sa puzzle antye. Pour ed ou medite, ou kapab reponn bann kestyon parey: ‘Ki sa dimoun in fer pour rezourd son problenm? Ki mannyer Zeova in ed li? Ki mannyer sa ki mon’n aprann i kapab ed mwan pour andire?’

6. Akoz nou devret aplik sa ki nou aprann?

⁶ (4) Met an pratik. Zezi ti dir ki si nou pa aplik sa ki nou aprann, nou parey en zonm ki fer son lakaz lo disab. I travay dir me son zefor i anven. Akoz sa? Parski ler tanpet i vini e delo i monte, son lakaz pou ganny detrir. (Mat. 7:24-27) Pareyman si nou priye, imazinen e medite me nou pa aplik sa ki nou aprann, nou zefor pou anven. Ler nou pas dan problenm oubyen nou ganny persekite, nou lafwa pa pou ase for. Me ler nou etidye e aplik sa ki nou aprann, nou pou fer bann pli bon desizyon, nou pou annan lape lespri e nou lafwa pou vin pli for. (Iza. 48:17, 18 NWT) Aprezan nou pou servi sa kat letap ki nou’n diskite pour vwar ki nou kapab aprann avek en keksoz ki ti arive avek Lerwa David.

7. Ki resi Labib nou pou diskite?

⁷ Eski en zanmi ouswa en manm fanmir in bles ou? Si wi, ou pou ganny bann byenfe ler ou etidye sa ki Lerwa David ti fer ler son garson Absalonm ti trai li e esey vin lerwa.​—2 Sam. 15:5-14, 31; 18:6-14.

8. Ki ou kapab fer pour ganny led Zeova?

⁸ (1) Priye. Avek sa resi antet, dir Zeova ki mannyer ou santi konsernan lafason ki sa dimoun in tret ou. (Ps. 6:6-9) Dir Zeova tou keksoz. Apre, demann Zeova pour ed ou vwar bann prensip Labib ki pou ed ou konnen ki pour fer.

9. Ki ti arive ant David ek Absalonm?

⁹ (2) Imazinen. Reflesir lo bann levennman dan sa resi e imazinen ki lefe sa ti annan lo Lerwa David. Pour plizyer lannen, Absalonm, garson David i fer tou sa ki i kapab pour fer dimoun kontan li. (2 Sam. 15:7) Ler Absalonm i santi ki sa bon moman in arive, i anvoy bann espyon partou dan Izrael pour motiv bann  dimoun pour aksepte li konman lerwa. I menm konvenk Aitofel, ki en zanmi pros e en konseye Lerwa David pour zwenn avek li pour rebele. Absalonm i deklar son lekor konman lerwa. Apre sa, i esey tyonbo David pour touy li. I kapab ki sa letan David ti vreman malad. (Ps. 41:1-9) Ler David i tann sa ki Absalonm pe fer, i kit Zerizalenm. Pli tar, larme Absalonm i lager avek larme David. Larme Absalonm i perdi sa lager e Absalonm, garson David i ganny touye.

10. Ki Lerwa David ti’n kapab fer?

¹⁰ Aprezan imazin lafason ki Lerwa David ti’n bezwen santi ler tousala ti pe arive avek li. I ti kontan Absalonm e i ti annan konfyans dan Aitofel. Me tou le de ti’n trai li. Zot ti fer David vreman sagren e zot ti menm esey touy li. David ti’n kapab krwar ki son bann lezot zanmi ti dan kote Absalonm e sa ti’n kapab fer li aret annan konfyans dan zot. David ti’n kapab mazin zis son prop lekor e esey kit pei li tousel. Ouswa i ti’n kapab les sa sityasyon dekouraz li. Me David pa ti fer sa bann keksoz. O kontrer i ti sirmont sa problenm. Akoz i ti kapab fer sa?

11. Ki David ti fer dan sa sityasyon difisil?

¹¹ (3) Medite. Ki bann prensip ou kapab aprann avek sa resi? Demann ou lekor, “Ki David ti fer pour ed son lekor?” David pa ti panik e fer bann desizyon bet. I pa ti sitan enkyet ki i pa ti kapab deside ki pour fer. O kontrer, i ti priy Zeova e demann li led. I ti osi demann led avek son bann zanmi e i pa ti tarde pour fer sa ki i ti’n deside. Menm si David ti vreman sagren, i ti kontinyen annan konfyans dan lezot e i pa ti gard rankin. I ti kontinyen annan konfyans dan Zeova e dan son bann zanmi.

12. Ki Zeova ti fer pour ed Lerwa David?

¹² Ki mannyer Zeova ti ed Lerwa David? Si ou fer resers, ou pou vwar ki Zeova ti donn David sa lafors ki i ti bezwen pour fer fas avek sa sityasyon. (Ps. 3:1-8, lentrodiksyon) Zeova ti beni bann desizyon ki David ti fer. I ti osi ed bann zanmi fidel David ler zot ti lager pour protez zot lerwa.

13. Ki mannyer ou kapab swiv legzanp Lerwa David ler en dimoun i bles ou? (Matye 18:15-17)

¹³ (4) Met an pratik. Demann ou lekor, ‘Ki mannyer mon kapab swiv legzanp Lerwa David?’ Ou pou bezwen azir deswit pour rezourd sa problenm. Ou kapab aplik konsey Zezi dan Matye sapit 18 ouswa aplik sa prensip ki ganny trouve dan sa konsey. (Lir Matye 18:15-17.) Ou pa devret taye pour fer bann desizyon, sirtou ler ou ankoler. Ou devret demann Zeova pour ed ou reste kalm e pour donn ou lasazes pour fer fas avek sa sityasyon. Kontinyen annan konfyans dan ou bann zanmi e aksepte zot led. (Prov. 17:17 NWT) Me pli enportan ankor, swiv konsey ki Zeova i donn ou dan son Parol.​—Prov. 3:5, 6.

14. Dan ki sityasyon ki 2 Timote 1:12-16; 4:6-11, 17-22 i kapab ankouraz ou?

¹⁴ Eski ou fanmir pe opoz ou akoz ou servi Zeova? Ouswa eski ou reste dan en pei kot bann aktivite ki pep Zeova i fer i anba restriksyon ouswa in ganny enterdi? Si wi, ou kapab ganny ankouraze ler ou lir 2 Timote 1:12-16 ek 4:6-11, 17-22. * Zapot Pol ti ekri sa bann verse ler i ti dan prizon.

15. Ki ou kapab demann Zeova pour fer?

 ¹⁵ (1) Priye. Avan ou lir sa bann verse, dir Zeova konsernan ou problenm e lafason ki ou pe santi. Dir Zeova tou keksoz. Apre, demann Zeova pour ed ou vwar bann prensip ki pou ed ou konnen ki pour fer.

16. Ki ti arive avek zapot Pol?

¹⁶ (2) Imazinen. Esey met ou dan plas zapot Pol. I dan en prizon Ronm. I ti deza dan prizon avan me safwasi i asire ki i pou ganny touye. Serten son bann zanmi in abandonn li e i fatige.​—2 Tim. 1:15.

17. Ki Pol ti’n kapab fer?

¹⁷ Zapot Pol ti’n kapab konsantre lo lepase. I ti’n kapab mazinen ki si i pa ti’n vin en Kretyen ki sitan devoue, i pa ti pou’n ganny arete. I ti’n kapab ankoler avek bann dimoun dan distrik Lazi ki ti’n abandonn li e i ti’n kapab aret annan konfyans dan son bann lezot zanmi. Me Pol pa ti fer sa bann keksoz. Akoz i ti asire ki son bann zanmi ti pou kontinyen reste fidel avek li e ki Zeova ti pou rekonpans li?

18. Ki mannyer zapot Pol ti fer fas avek en sityasyon difisil?

¹⁸ (3) Medite. Demann ou lekor, ‘Ki zapot Pol ti fer pour ed son lekor?’ Menm si Pol ti konnen ki i ti pe al mor, i pa ti oubliye ki i vreman enportan pour glorifye Zeova. I ti kontinyen mazin lo lafason ki i ti kapab ankouraz lezot. I ti depan lo Zeova par priy souvan. (2 Tim. 1:3) Pol pa ti kontinyen mazin lo bann frer ki ti’n abandonn li. O kontrer i ti dir ki i vreman rekonesan pour lafason ki son bann zanmi ti siport li e ed li. Pol ti osi kontinyen etidye Parol Bondye. (2 Tim. 3:16, 17; 4:13) Pli enportan ankor, i ti asire ki Zeova ek Zezi i kontan li. Zot pa ti’n abandonn li e zot ti pou rekonpans li pour son servis.

19. Ki mannyer Zeova ti ed Pol?

¹⁹ Zeova ti averti Pol ki dimoun ti pou persekit li akoz i en Kretyen. (Akt 21:11-13) Ki mannyer Zeova ti ed Pol? Zeova ti reponn lapriyer Pol e donn li lafors. (2 Tim. 4:17) Zeova ti asir Pol ki i ti pou ganny sa rekonpans ki i ti’n travay vreman dir pour gannyen. Zeova ti donn Pol sa led ki i ti bezwen atraver son bann bon zanmi.

20. Avek Romen 8:38, 39 antet, ki mannyer nou kapab swiv legzanp zapot Pol?

²⁰ (4) Met an pratik. Demann ou lekor, ‘Ki mannyer mon kapab swiv legzanp zapot Pol?’ Parey zapot Pol, nou bezwen ekspekte ki dimoun pou persekit nou akoz nou servi Zeova. (Mark 10:29, 30) Pour nou reste fidel avek Zeova ler nou dan problenm, nou bezwen kontinyen priye e etidye son Parol regilyerman. Nou devret toultan mazinen ki enn bann keksoz pli enportan ki nou kapab fer i pour glorifye Zeova. Nou kapab asire ki Zeova pa pou zanmen abandonn nou e ki personn pa pou kapab anpes li kontan nou.​—Lir Romen 8:38, 39; Ebr 13:5, 6.

21. Kwa ki ti ed Aya ek Hector pour sirmont zot problenm?

²¹ Bann legzanp dan Labib i kapab ed nou ganny sa lafors ki nou bezwen pour fer fas avek nenport sityasyon. Par egzanp, Aya, en pionye ki reste Zapon ti dir ki zistwar Zonas ti ed li pour sirmont son  lafreyer pour fer temwannyaz an piblik. Hector, en zenn ki reste Lendonezi e ki son paran pa servi Zeova, i dir ki legzanp Rit ti motiv li pour aprann konsernan Zeova e pour servi li.

22. Ki mannyer ou kapab benefisye avek bann video lo Labib ouswa sa seri lartik “Imit zot lafwa”?

²² Kote ou kapab trouv bann legzanp dan Labib ki pou donn ou sa lafors pour fer fas avek ou sityasyon? Nou bann video, lanrezistreman odyo e sa seri lartik “Imit zot lafwa,” i kapab ede pour fer bann resi dan Labib vin pli reel pour ou. * Avan ou get sa bann video, ekout sa bann lanrezistreman odyo oubyen lir en lartik, demann Zeova pour ed ou vwar bann leson ki ou kapab met an pratik. Esey met ou dan plas sa dimoun ki ou pe lir lo la. Medit lo sa ki sa bann serviter fidel ti fer e lo lafason ki Zeova ti ed zot sirmont zot problenm. Apre aplik bann leson ki ou’n aprann. Remersye Zeova pour led ki i pe deza donn ou. Montre ki ou apresye sa led par rod loportinite pour ankouraz e siport lezot.

23. Ki Zeova i promet pour fer pour nou dan Izai 41:10, 13?

²³ I kapab difisil pour viv dan sa lemonn ki ganny kontrole par Satan e parfwa nou pa konnen ki pour fer. (2 Tim. 3:1) Me nou pa bezwen enkyet ouswa per. Zeova i konnen ki nou pe pas ladan. Ler nou bezwen led, Zeova i promet ki i pou soutenir nou avek son lanmen drwat. (Lir Izai 41:10, 13.) Nou asire ki Zeova pou ed nou e sa ki nou aprann dan Labib i kapab donn nou sa lafors ki nou bezwen pour fer fas avek nenport problenm.