DISOLO YA KULONGUKA 11
Mutindu ya Kubaka Kikesa na Masonuku
“Nzambi . . . ke sadisaka na kukanga-ntima.”—BAR. 15:5.
NKUNGA 94 Ntonda Sambu na Ndinga ya Nzambi
MAMBU YINA DISOLO YAI KE TUBILA *
1. Inki bampasi bansadi ya Yehowa ke kutanaka ti yo?
KETI nge ke kutana ti diambu mosi ya mpasi kibeni? Mbala ya nkaka mpangi mosi na dibundu me sala diambu yina me pesa nge mpasi. (Yak. 3:2) To mbala ya nkaka bantu yina nge ke salaka ti bo to bana ya nzo-nkanda ke seka nge sambu nge kele Mbangi ya Yehowa. (1 Pie. 4:3, 4) To bantu ya dibuta na nge ke sosa kukanga nge nzila ya kukwenda na balukutakanu to bo ke kanga nge nzila ya kusonga bantu ya nkaka balukwikilu na nge. (Mat. 10:35, 36) Kana mambu yango ke pesa nge mpasi mingi, yo lenda pusa nge na kuyambula kusadila Yehowa. Kansi nge fwete ndima nde ata nge ke kutana ti mpasi ya nki mutindu, Yehowa ta pesa nge mayele yina ta sadisa nge na kubaka balukanu ya mbote mpi ngolo ya kukangila yo ntima.
2. Mutindu Baroma 15:4 ke monisa yo, nki mambote beto ta baka kana beto ke tanga Ndinga ya Nzambi?
2 Yehowa me salaka nde bo sonika na Ndinga na yandi masolo ya ke monisa mutindu bantu ya kukonda kukuka kangaka ntima na bampasi. Sambu na nki? Sambu beto baka malongi na bambandu na bo. Yo yina, Yehowa sadilaka ntumwa Polo sambu na kusonika mambu yina kele na Baroma 15:4. (Tanga.) Kana beto ke tanga masolo yina, yo ta pesa beto kikesa mpi kivuvu. Sambu na kubakila yo mambote, beto fwete suka kaka ve na kutanga Biblia kansi beto fwete sala mpi mambu ya nkaka. Beto fwete bika nde mambu yina beto ke tanga na Biblia kusoba mutindu na beto ya kuyindula mpi kusimba bantima na beto. Mu mbandu, nki beto fwete sala kana beto kele ti mfunu ya ndongisila na diambu mosi ya mpasi yina beto ke kutana ti yo? Beto lenda sala mambu yai iya: (1) Kisambu, (2) Kumona na mabanza, (3) Kuyindulula, mpi (4) Kusadila. Beto ta mona mambu yina beto lenda sala na konso diambu yai ya beto me tubila awa. * Na nima, beto ta sadila mambu yai sambu na kubaka malongi na mambu yina ntotila Davidi mpi ntumwa Polo kutanaka ti yo.
1. KISAMBU
Na ntwala ya kuyantika kutanga Biblia, samba Yehowa sambu yandi sadisa nge na kuzwa malongi yina ta sadisa nge (Tala paragrafe 3)
3. Na ntwala ya kutanga Biblia, nki nge fwete sala mpi sambu na nki?
3 (1) Kisambu. Na ntwala ya kuyantika kutanga Biblia, samba Yehowa sambu yandi sadisa nge na kubaka mambote na mambu yina nge ke tanga. Mu mbandu, kana nge ke sosa ndongisila sambu na diambu mosi ya mpasi yina nge ke kutana ti yo, samba Yehowa sambu yandi sadisa nge na kuzwa minsiku na Ndinga na yandi yina lenda sadisa nge.—Bafil. 4:6, 7; Yak. 1:5.
2. MONA NA MABANZA
Sala bonso nde nge kele muntu yina disolo ke tubila (Tala paragrafe 4)
4. Inki lenda sadisa nge na kubakisa mbote disolo ya muntu mosi yina nge ke tanga na Biblia?
4 (2) Kumona na mabanza. Yehowa me pesaka beto dikabu ya kitoko kibeni ya kumona mambu na mabanza. Sambu na kubakisa mbote disolo ya muntu mosi yina nge ke tanga na Biblia, mona na mabanza mambu yina ke salama mpi sala bonso nde nge kele muntu yina bo ke tubila na disolo yango. Mona na mabanza mambu yina muntu yango kutanaka ti yo mpi mutindu yandi kudiwaka.
3. YINDULULA
Yindulula mbote-mbote mambu yina nge ke tanga mpi tala mutindu nge lenda sadila mambu yango na luzingu na nge (Tala paragrafe 5)
5. Kuyindulula ke tendula nki mpi nki mutindu nge lenda yindulula?
5 (3) Kuyindulula. Kuyindulula ke tendula kuyindula mbote-mbote mambu yina nge ke tanga mpi mutindu mambu yango ke tadila nge. Yo ta sadisa nge na kuwakanisa bangindu mpi na kubakisa mambu yina nge ke tanga. Kutanga Biblia kukonda kuyindulula kele bonso ba pièce ya velo yina kele na karto. Kuyindulula kele bonso kuvukisa ba pièce yango sambu yo kuma velo ya mvimba. Sambu na kusadisa nge na kuyindulula, nge lenda yula mpi kupesa bamvutu na bangiufula yai: ‘Inki muntu yina bo ke tubila na disolo yina salaka sambu na kununga diambu ya mpasi yina yandi kutanaka ti yo? Inki mutindu Yehowa sadisaka yandi? Inki mutindu mono lenda sadila malongi yina mono me baka sambu yo sadisa mono na kukanga ntima na bampasi?’
4. SADILA
Sadila mambu yina nge me longuka sambu na kubaka balukanu ya mbote, sambu na kuvanda na ngemba mpi sambu na kukumisa lukwikilu na nge ngolo (Tala paragrafe 6)
6. Sambu na nki beto fwete sadila mambu yina beto ke longuka?
6 (4) Kusadila. Yezu tubaka nde kana beto ke sadila ve mambu yina beto ke longuka, beto kele bonso muntu yina me tunga nzo na zelo. Yandi me sala ngolo kibeni kansi bikesa na yandi yonso kele mpamba. Sambu na nki? Sambu kana mupepe ya ngolo kubula mpi mvula ya ngolo kunoka, nzo na yandi yina ta bwa. (Mat. 7:24-27) Mutindu mosi mpi, kana beto me samba, me mona na mabanza mpi me yindulula kansi beto me sadila ve mambu yina beto me longuka, bikesa na beto yonso ta vanda mpamba. Ntangu beto ta kutana ti bampasi to mbangika yina ta meka lukwikilu na beto, lukwikilu na beto ta vanda ve ngolo. Kansi kana beto ke longuka mpi ke sadila mambu yina beto ke longuka, beto ta baka balukanu ya mbote, beto ta vanda na ngemba mpi lukwikilu na beto ta kuma ngolo. (Yez. 48:17, 18) Ntangu yai, beto sadila mambu iya ya beto me katuka kutubila mpi beto tala malongi yina beto lenda baka na mambu yina ntotila Davidi kutanaka ti yo.
INKI MALONGI NGE LENDA BAKA NA DISOLO YA NTOTILA DAVIDI?
7. Inki disolo ya kele na Biblia beto ke tadila ntangu yai?
7 Keti nduku to muntu mosi ya dibuta me sadila nge diambu mosi ya mbi? Kana yo kele mpidina, nge lenda baka malongi na mambu yina ntotila Davidi salaka ntangu mwana na yandi Absalomi sadilaka yandi mambu ya mbi mpi sosaka kubotula yandi kimfumu.—2 Sam. 15:5-14, 31; 18:6-14.
8. Inki nge lenda sala sambu Yehowa kusadisa nge?
8 (1) Kisambu. Mutindu nge me zaba disolo ya Davidi, songa Yehowa mutindu nge ke kudiwa sambu na mambu ya mbi yina bo me sadila nge. (Nk. 6:6-9) Songa yandi kibeni diambu yina ke yangisa nge. Na nima, songa Yehowa na kusadisa nge na kuzwa minsiku yina ta sadisa nge na kununga diambu yina ya mpasi.
9. Tubila na bunkufi mambu yina kuminaka Davidi mpi Absalomi.
9 (2) Mona na mabanza. Yindula mutindu mambu salamaka na disolo yai mpi mona na mabanza mutindu ntotila Davidi kudiwaka. Na nsungi ya bamvula, Absalomi mwana ya Davidi vandaka kuleba bantu sambu bo zola yandi. (2 Sam. 15:7) Ntangu Absalomi zwaka dibaku ya kusala mambu yina yandi vandaka na mfunu ya kusala, yandi tindaka bantu na Izraele sambu na kuyidika mabanza ya bantu sambu bo ndima yandi na kukuma ntotila. Nkutu yandi ndimisaka Ahitofele nduku ya ngolo ya Davidi mpi yina vandaka kupesa Davidi bandongisila na kuvukana ti yandi sambu bo telemina Davidi. Absalomi kudikumisaka ntotila mpi na nima yandi sosaka kukanga Davidi mpi kufwa yandi. Yo lenda vanda nde na ntangu yina Davidi vandaka kubela ngolo. (Nk. 41:1-9) Davidi zabaka mambu yina, yo yina yandi tinaka na Yeruzalemi. Nsuka-nsuka, basoda ya Absalomi nwanisaka basoda ya Davidi. Absalomi ti basoda na yandi belaka mpi bo fwaka Absalomi.
10. Inki ntotila Davidi lendaka kusala?
10 Diaka, mona na mabanza mutindu Davidi kudiwaka ntangu mambu yai yonso kuminaka yandi. Yandi vandaka kuzola Absalomi mpi yandi vandaka kutudila Ahitofele ntima. Kansi bo yonso zole sadilaka Davidi mambu ya mbi. Diambu yina bo salaka pesaka Davidi mpasi mingi kibeni mpi nkutu bo sosaka kufwa yandi. Davidi lendaka kuyindula nde banduku na yandi ya nkaka vukanaka ti Absalomi mpi yandi lendaka kuyambula kutudila bo ntima. Yandi lendaka kusala mambu na mutindu na yandi mosi to kutina yandi mosi. To yandi lendaka kulemba nitu. Kansi Davidi salaka ve mambu yai. Yandi nungaka diambu yina ya mpasi. Inki sadisaka yandi na kununga yo?
11. Inki Davidi salaka ntangu yandi kutanaka ti mambu ya mpasi?
11 (3) Yindulula. Inki minsiku nge lenda longuka na disolo ya Davidi? Pesa mvutu na ngiufula yai: “Inki Davidi salaka sambu na kununga diambu yina ya mpasi?” Davidi waka ve boma, yandi bakaka ve balukanu nswalu kukonda kuyindula mpi yandi bakaka ve balukanu ya mbi. Yandi pusaka ve bilumbu ya kusala mambu yina yandi kanaka kusala. Kansi yandi sambaka Yehowa sambu Yehowa kusadisa yandi. Yandi lombaka mpi banduku na yandi lusadisu. Yandi salaka nswalu mambu yina yandi kanaka kusala. Ata Davidi waka mpasi mingi, yandi yambulaka ve kutudila bantu ya nkaka ntima mpi yandi mengaka bo ve. Yandi landaka kutudila Yehowa mpi banduku na yandi ntima.
12. Inki Yehowa salaka sambu na kusadisa Davidi?
12 Inki mutindu Yehowa sadisaka Davidi? Kana nge sala bansosa, nge ta bakisa nde Yehowa pesaka Davidi ngolo yina yandi vandaka na yo mfunu sambu na kukanga ntima na bampasi yina yandi kutanaka ti yo. (Nk. 3:1-8; bangogo yina kele na zulu ya kapu) Yehowa sakumunaka balukanu yina Davidi bakaka. Yandi sadisaka banduku ya kwikama ya Davidi ntangu bo vandaka kunwana sambu na kutanina ntotila na bo.
13. Inki mutindu nge lenda landa mbandu ya Davidi kana muntu mosi me sala diambu yina me pesa nge mpasi kibeni? (Matayo 18:15-17)
13 (4) Sadila. Kudiyula nde: ‘Inki mutindu mono lenda landa mbandu ya Davidi?’ Nge fwete sala mambu nswalu kukonda kusukinina sambu na kuyidika diambu yina nge ke kutana ti yo. Nge lenda sadila mambu yina kele na ndongisila ya Yezu yina kele na Matayo kapu 18 to nge lenda sadila munsiku yina kele na ndongisila yango. (Tanga Matayo 18:15-17.) Kansi nge fwete baka ve balukanu nswalu ntangu nge kele na makasi. Nge fwete samba Yehowa sambu yandi sadisa nge na kuvanda ti ntima ya pima mpi sambu yandi pesa nge mayele yina nge kele na yo mfunu sambu na kuyidika diambu yina me kumina nge. Landa kutudila banduku na nge ntima mpi ndima lusadisu yina bo ke pesa nge. (Bing. 17:17) Diambu ya kuluta mfunu kele, kusadila bandongisila ya Yehowa yina kele na Ndinga na yandi.—Bing. 3:5, 6.
INKI MALONGI NGE LENDA BAKA NA DISOLO YA NTUMWA POLO?
14. Nge lenda tanga 2 Timoteo 1:12-16; 4:6-11, 17-22 ntangu nge ke kutana ti nki mambu?
14 Keti bantu ya dibuta na nge ke monisa nge mpasi? To keti na insi yina nge ke zingaka, bo ke teleminaka Bambangi ya Yehowa to nkutu bo me buyisaka kisalu na bo? Kana yo kele mutindu yina, nge lenda baka kikesa kana nge tanga 2 Timoteo 1:12-16; 4:6-11, 17-22. * Polo sonikaka mambu ya kele na baverse yai ntangu yandi vandaka na boloko.
15. Inki nge lenda songa Yehowa?
15 (1) Kisambu. Na ntwala ya kutanga baverse yina, songa Yehowa diambu yina nge ke kutana ti yo mpi mutindu nge ke kudiwa. Songa Yehowa diambu yina ke yangisa nge. Na nima, lomba yandi na kusadisa nge na kuzwa minsiku ya kele na masolo yina ke tubila bampasi yina Polo kutanaka ti yo yina ta sadisa nge na kuzaba mambu yina nge fwete sala sambu na kununga diambu yina ya mpasi.
16. Tubila na bunkufi mambu yina kuminaka Polo.
16 (2) Mona na mabanza. Sala bonso nde nge kele Polo. Yandi kele na boloko na Roma mpi bo me kanga yandi bashene. Bo vandaka kutula Polo na boloko mpi yandi vandaka kubasika kansi ntangu yai yo kele pwelele nde bo ta fwa yandi. Banduku na yandi ya nkaka me yambula yandi mpi yandi me lemba mingi kibeni.—2 Tim. 1:15.
17. Inki Polo lendaka kusala?
17 Polo lendaka kuyindula luzingu na yandi ya ntama mpi kutuba nde kana yandi bakaka ve lukanu ya kukuma Mukristu, bo zolaka ve kutula yandi na boloko. Yandi lendaka kuwila bantu ya distrike ya Azia makasi sambu bo yambulaka yandi mpi kutudila diaka ve banduku na yandi ya nkaka ntima. Kansi Polo salaka yo ve. Inki sadisaka yandi na kulanda kutudila banduku na yandi ntima mpi kundima nde Yehowa ta sadisa yandi?
18. Inki Polo salaka ntangu yandi kutanaka ti diambu yina ya mpasi?
18 (3) Yindulula. Pesa mvutu na ngiufula yai: “Inki sadisaka Polo na kukanga ntima na bampasi yai?” Ata Polo zabaka nde bo ta fwa yandi, yandi vilaka ve nde yo kele mfunu mingi na kupesa Yehowa lukumu. Yandi landaka kuyindula mutindu ya kupesa bantu ya nkaka kikesa. Yandi tudilaka Yehowa ntima mpi yandi vandaka kusamba mbala na mbala. (2 Tim. 1:3) Yandi kudiyangisaka ve kuluta ndilu sambu na bantu yina yambulaka yandi kansi yandi monisaka ntonda ya mingi sambu na zola yina banduku na yandi ya kwikama monisilaka yandi mpi na mambu yina bo salaka sambu na kusadisa yandi. Diaka, Polo landaka kulonguka Ndinga ya Nzambi. (2 Tim. 3:16, 17; 4:13) Diambu ya kuluta mfunu kele nde Polo ndimaka kibeni nde Yehowa mpi Yezu ke zolaka yandi. Bo yambulaka yandi ve mpi yandi ndimaka nde bo ta sakumuna yandi sambu na kwikama na yandi.
19. Inki mutindu Yehowa sadisaka Polo?
19 Yehowa songaka Polo nde bantu ta niokula yandi sambu yandi kele Mukristu. (Bis. 21:11-13) Inki mutindu Yehowa sadisaka Polo? Yandi pesaka mvutu na bisambu ya Polo mpi pesaka yandi ngolo. (2 Tim. 4:17) Yehowa songaka Polo nde yandi ta baka lufutu, yo yina yandi vandaka kusala ngolo sambu na kubaka lufutu yango. Yehowa sadilaka mpi banduku ya kwikama ya Polo sambu na kusadisa yandi.
20. Mutindu Baroma 8:38, 39 ke monisa yo, nki mutindu nge lenda landa mbandu ya Polo?
20 (4) Sadila. Kudiyula nde: ‘Inki mutindu mono lenda landa mbandu ya Polo?’ Bonso Polo, beto fwete zaba nde bantu ta monisa beto mpasi sambu beto ke sadilaka Yehowa. (Mar. 10:29, 30) Sambu na kubikala ya kwikama na Yehowa ntangu beto ke kutana ti bampasi, beto fwete landa kusamba yandi mpi beto fwete longuka Ndinga na yandi mbala na mbala. Beto fwete vila ve nde diambu ya mfunu yina beto fwete sala kele kupesa Yehowa lukumu. Beto fwete ndima nde Yehowa ta yambula beto ve ata fioti mpi nde ata diambu mosi ve lenda kanga Yehowa nzila ya kuzola beto.—Tanga Baroma 8:38, 39; Baeb. 13:5, 6.
MALONGI YINA BETO LENDA BAKA NA BANTU YA KWIKAMA YINA BIBLIA KE TUBILAKA
21. Inki sadisaka mpangi Aya mpi Hector na kununga mambu ya mpasi yina bo kutanaka ti yo?
21 Ata beto ke kutana ti bampasi ya nki mutindu, beto lenda baka kikesa na bambandu ya bantu yina Biblia ke tubilaka. Mu mbandu, mpangi-nkento Aya na Japon ke tuba nde disolo ya Yonasi me sadisaka yandi na kukatula boma ntangu yandi ke ta kimbangi na kisika ya bantu mingi. Hector, leke mosi na Indonésie yina bibuti na yandi kele ve Bambangi ya Yehowa ke tuba nde mbandu ya Ruti sadisaka yandi na kulonguka mambu ya Yehowa mpi na kusadila yandi.
22. Inki mutindu nge lenda baka mambote na badrame ya Biblia mpi na masolo “Landa Mbandu ya Lukwikilu na Bo”?
22 Na wapi nge lenda zwa bambandu ya bantu yina Biblia ke tubilaka yina ta pesa nge kikesa? Bavideo na beto, badrame ya kuwidikila mpi masolo “Landa Mbandu ya Lukwikilu na Bo” ke sadisaka beto na kubakisa mbote mambu ya luzingu ya bantu yina. * Na ntwala ya kutala bavideo, kuwidikila badrame, mpi kutanga masolo yina, samba Yehowa sambu yandi sadisa nge na kuzwa malongi ya mfunu yina nge lenda sadila. Sala bonso nde nge kele muntu yina disolo yango ke tubila. Yindulula mambu yina bansadi yai ya kwikama ya Yehowa salaka mpi mutindu Yehowa sadisaka bo na kukanga ntima na bampasi yina bo kutanaka ti yo. Na nima, sadila malongi yina nge me baka. Pesa Yehowa matondo sambu na lusadisu yina yandi me pesaka nge. Sosa mutindu ya kupesa bantu ya nkaka kikesa mpi ya kusadisa bo sambu na kumonisa nde nge ke sepela ti lusadisu yina Yehowa ke pesaka nge.
23. Mutindu Yezaya 41:10, 13 ke monisa yo, nki Yehowa ke sila beto?
23 Luzingu na nsi-ntoto yai ya Satana ke yala kele mpasi kibeni mpi bantangu ya nkaka beto lenda zaba ve mambu yina beto lenda sala ntangu beto ke kutana ti bampasi. (2 Tim. 3:1) Kansi beto fwete kudiyangisa ve mingi mpi beto fwete wa ve boma. Yehowa ke zaba bampasi yina beto ke kutana ti yo. Yandi ke sila nde kana beto me bwa, yandi ta telemisa beto ti diboko na yandi ya ngolo ya kitata. (Tanga Yezaya 41:10, 13.) Beto ke ndima nde Yehowa ta sadisa beto mpi nde mambu yina kele na Biblia ta pesa beto ngolo ya beto kele ti yo mfunu sambu na kukanga ntima na konso mpasi yina.
NKUNGA 96 Mukanda ya Nzambi Kele Kimvwama
^ par. 5 Masolo mingi na Biblia ke monisa kibeni nde Yehowa ke zolaka bansadi na yandi mpi yandi ke sadisaka bo na kukanga ntima na konso mpasi yina bo lenda kutana ti yo. Disolo yai ta tubila mambu yina nge lenda sala sambu na kubaka mambote na masolo yina nge ke tanga na Biblia.
^ par. 2 Na disolo yai, beto me tubila kaka mbandu mosi ya mutindu ya kulonguka. Bangindu ya nkaka ya mutindu ya kulonguka Biblia kele na Mukanda ya Bansosa Sambu na Bambangi ya Yehowa na ntu-diambu “Biblia” mpi na kantu-diambu “Kutanga mpi Kubakisa Biblia.”
^ par. 14 Beno tanga ve baverse yai ntangu beno ke longuka Nzozulu ya Nkengi na dibundu.
^ par. 22 Tala masolo “Landa Mbandu ya Lukwikilu na Bo—Babakala mpi Bankento Yina Biblia Ke Tubilaka” na jw.org. (Bweta na MALONGI YA BIBLIA mpi na KUKWIKILA NA NZAMBI.)
