1. Nkia mambu mampasi benuananga mau selo ya Yave?

NGA diambu diampasi onuananga diau? Dilenda kala vo mpangi mosi muna nkutakani uvangidi diambu dikendelekele. (Yak. 3:2) Dilenda kala mpe vo akwaku a salu yovo a sikola, bekusevanga wau vo u Mbangi a Yave. (1 Pet. 4:3, 4) Kuna diak’e sambu, dilenda kala vo e yitu yaku bekusimanga mu kwenda mu tukutakanu yovo samuna e nsangu zambote. (Mat. 10:35, 36) Avo diambu diampasi kikilu onuananga diau, nanga olenda yindula vo diambote mu yambula sadila Yave. Kansi, kala ye ziku vo, kana nkutu nkia mambu mampasi onuananga mau, Yave okuvana e ngangu mu zaya dina olenda vanga yo nkuma mu zizidila e mpasi zazi.

2. Landila e sono kia Roma 15:4, aweyi e ntangilu a Bibila ilenda kutusadisila?

² Muna Diambu diandi, Yave wasonekesa tusansu tusonganga una selo yandi bazizidila e mambu mampasi bawanana mau. Ekuma kavangila wo? Kadi wazola vo twalongoka diambu muna tusansu twatu. Ekiaki i kuma Yave kavumunuina Paulu wa ntumwa mu soneka mana masonama muna Roma 15:4. (Tanga.) O tanga tusansu twatu, dilenda kutufiaulwisa yo kutuvana e vuvu. Kansi, muna vua e nluta muna tusansu twatu, mayingi tufwete vanga ke mpasi tanga kaka Bibila ko. Tufwete yambula vo mana tutanganga muna Bibila masoba e ngindu zeto yo simba e ntima mieto. Ozevo, adieyi olenda vanga avo luludiku ovuidi o mfunu mu kuma kia diambu diampasi onuananga diau? Olenda vanga mambu yá malende: (1) Samba, (2) Yindula, (3) Badika, yo (4) Sadila Mana Olongokanga. Owau, yambula twavovela dimosi-dimosi muna mambu mama. * Tusadila  mpe mambu mama ekolo tulongoka mana mabwila Davidi wa Ntinu yo Paulu wa ntumwa.

3. Vitila wayantika tanga Bibila, adieyi ofwete vanga? Ekuma?

³ (1) Samba. Vitila wayantika tanga Bibila, samba kwa Yave kimana kasadisa mu bakula una olenda vuila e nluta mia mana otanga. Kasikil’owu, avo luludiku ovavanga muna zaya una olenda zizidila diambu diampasi onuananga diau, samba kwa Yave kimana kasadisa mu solola e nkanikinu mia Bibila mikusadisa mu zaya dina olenda vanga.—Fili. 4:6, 7; Yak. 1:5.

4. Nki kilenda kusadisa mu vua nluta muna lusansu otanganga muna Bibila?

⁴ (2) Yindula. Yave watuvana ngangu za yindula. Muna toma bakula lusansu otanganga muna Bibila, teza kuyisia vana fulu kia muntu oyikwanga muna lusansu. Teza yindula e lekwa ina kamona ye una kamonanga muna ntima. Avo ovangidi wo, ovua nluta muna lusansu lwa Bibila otanganga.

5. Nki i badika? Aweyi olenda wo vangila?

⁵ (3) Badika. O badika i toma yindula mana otanganga yo vava zaya una menena e ngwizani ye diambu onuananga diau muna zingu. O badika dikusadisa mu zaya una mambu otanganga menena e ngwizani ye mambu mankaka ozeye kala yo kusadisa mu toma bakula mana otanganga. O tanga Bibila yo lembi badika dina nze muntu omwene e ndambu-ndambu za foto zamwangana vana ntoto yo lembi zo yikakesa mu zaya kana vo dia nani. Kuna diak’e sambu, o vaula e ntangwa ya badika dina nze muntu oyikakese e ndambu-ndambu za foto mu zaya kana vo dia nani. Muna kuma kiaki, ekolo obadikanga, ukiyuvula e yuvu ilende: ‘O muntu oyikwanga muna lusansu lwalu, adieyi kavanga muna sunda e mpasi zandi? Aweyi Yave kansadisila? Aweyi mana ndongokele malenda kunsadisila mu zizidila e mpasi inuananga zau?’

6. Ekuma tufwete sadilanga mana tulongokanga?

⁶ (4) Sadila Mana Olongokanga. Yesu wavova vo ndiona olembi sadilanga mana kelongokanga, una nze muntu otungidi e nzo andi vana senge. E ngolo zawonso kavangidi mu tunga e nzo yayi zankatu kwandi. Ekuma? E kuma kadi, avo vabwidi kizalu ye tembwa kiangolo e nzo bwa ibwa. (Mat. 7:24-27) Diau dimosi, avo ke tusadidi ko mana tulongokele, e ngolo tuvanga muna samba, yindula yo badika zankatu kwandi. Kadi avo tuwananene ye mambu mampasi yovo lubangamu, o lukwikilu lweto luyoya. Kuna diak’e sambu, avo tusadidi mana tulongokanga, tubaka nzengo zambote, tukala yo luvuvamu lwa ntima, o lukwikilu lweto mpe lukumama. (Yes. 48:17, 18) Owau, yambula twasadila mambu yá mana tulongokele ekolo tufimpa dina diabwila Davidi wa Ntinu.

7. Nkia lusansu tubadika owau?

⁷ Nga wavangwa kala e diambu diambi kwa yitu yovo nkundi aku dina dialweka o ntima? Avo i wau, e diambu dilenda kusadisa i yindula dina Davidi wa Ntinu kavanga vava Abesalome wa mwan’andi kazola kunkota o nsoki yo vava kituka ntinu vana fulu kiandi.—2 Sam. 15:5-14, 31; 18:6-14.

8. Adieyi ofwete vanga muna vua lusadisu lwa Yave?

⁸ (1) Samba. Ekolo oyindulanga o lusansu lwalu lwa Davidi, samba kwa Yave mu kunzayisa una omonanga muna ntima mu kuma kia mbi ovangilu. (Nku. 6:6-9) Vova ye sikididi kiawonso una omonanga. I bosi, lomba kwa Yave kasadisa mu solola e nkanikinu mia Bibila mikusadisa mu zaya dina ofwete vanga.

9. Nkia diambu diabwa vana vakala Davidi yo Abesalome?

⁹ (2) Yindula. Yindula mawonso meyikwanga  muna lusansu lwalu ye una Davidi wa Ntinu kamona. Entete, Abesalome wa mwan’a Davidi wavanga mawonso kimana o nkangu watoma kunzola. (2 Sam. 15:7) I bosi, vava e ntangwa yafwana, watuma alangi muna Isaele yawonso kimana bakubika o nkangu muna kuntambula se ntinu. Walwaka nkutu yamu tezo kia kwikidisa Akitofele wa nkundi ye nludiki a Davidi kimana kanyikama muna ukolami wau. Abesalome wayikitula se ntinu yo vava kanga yo vonda Davidi. Nanga muna kolo kiakina, Davidi kimbevo kiangolo kakala kiau. (Nku. 41:1-9) Vava Davidi kazaya dina Abesalome kavanganga, wasisa Yerusaleme yo tina. I bosi, o makesa ma Abesalome banuana ye makesa ma Davidi. O makesa ma Davidi masunda yo vonda Abesalome.

10. Adieyi Davidi wa Ntinu kafwana vanga mu kuma kia dina diambwila?

¹⁰ Owau, yindula una Davidi kamona muna ntima mu kuma kia mambu mama mawonso mavangama. Watoma zolanga Abesalome yo bunda Akitofele e vuvu. Kansi, wantu wole awaya bavava kunkota o nsoki. Bankendeleka yo vava nkutu kumvonda. Nanga Davidi wadi yambula bunda e vuvu kwa akundi andi akaka yo yindula vo yau mpe Abesalome bayikama. Davidi wafwana tokanena kaka wete dia yandi kibeni yo tina yandi mosi kaka yovo bwa mu lukendalalu lwasaka. Kansi, ke diau ko kavanga. Wavanga mawonso muna zizidila e mpasi zazi. Ekuma Davidi kalendela zizidila e mpasi zazi?

11. Adieyi Davidi kavanga muna kolo kiakina kiampasi?

¹¹ (3) Badika. Adieyi olenda longoka muna lusansu lwalu lwa Davidi? Ekolo obadikanga ukiyuvula: “Adieyi Davidi kavanga muna singika e diambu diadi?” Davidi kabaka nzengo ko lembi teka yindula ngatu baka nzengo za uzowa. Kabakama mpe kwa wonga ko yamu tezo kia lembi zaya dina kadi vanga. Kansi, walomba lusadisu lwa Yave muna sambu. Walomba mpe lusadisu kwa akundi andi. Vana vau wasadila e nzengo zina kabaka. Kana una vo wakendalala kikilu mu kuma kia mambu mampasi kawanana mau, Davidi kayambula bunda vuvu ko muna wantu ngatu lunda makasi. Wakwamanana bunda Yave e vuvu kumosi ye akundi andi.

12. Aweyi Yave kasadisila Davidi?

¹² Aweyi Yave kasadisila Davidi? Avo otomene vavulula, obakula vo Yave wavana nkuma wafwana kwa Davidi mu zizidila e mpasi zandi. (Nku. 3:1-8; mvovo mina vana ntandu) Yave wasambula e nzengo za Davidi. Wasadisa mpe akundi akwikizi a Davidi vava banuana muna tanina ntinu au.

13. Avo muntu uvangidi e mbi, aweyi olenda tanginina e mbandu a Davidi? (Matai 18:15-17)

¹³ (4) Sadila Mana Olongokanga. Ukiyuvula: ‘Aweyi ndenda tanginina Davidi?’ Singika e diambu vana vau. Kiakala nkia diambu diambi bavangidi, sadila o nkanikinu una muna longi dia Yesu diasonama muna Matai kapu kia 18. (Tanga Matai 18:15-17.) Kansi, kukadi ye nzaki za baka nzengo ko lembi teka yindula. Samba kwa Yave kavana o ntim’a vuvama ye ngangu ovuidi o mfunu mu zizidila e mpasi. Kwamanana bunda e vuvu muna mpangi zaku. Tambulwilanga lusadisu lwau. (Nga. 17:17) Edi disundidi o mfunu, i sadila malongi kekuvananga o Yave muna Bibila.—Nga. 3:5, 6.

14. Mu nkia mambu e mvovo mia 2 Timoteo 1:12-16; 4:6-11, 17-22 milenda kukasakesela?

¹⁴ Nga kitantu osiwanga kwa yitu yaku wau vo u Mbangi a Yave? Nga muna nsi ozingilanga e salu kieto kiasiwa e nkaku yovo nkutu simwa? Avo i wau, olenda kasakeswa muna tanga e sono kia 2 Timoteo 1:12-16; 4:6-11,  17-22. * Paulu wasoneka e sono yayi ekolo kakala muna pelezo.

15. Adieyi olenda lomba kwa Yave?

¹⁵ (1) Samba. Vitila watanga lusansu lwalu, zayisa kwa Yave e diambu onuananga diau ye una omonanga muna ntima. Yika mambu masikididi. I bosi, lomba kwa Yave kasadisa mu solola e nkanikinu muna lusansu lwalu lwa Paulu emi milenda kusadisa mu zaya dina ofwete vanga.

16. Adieyi diabwila Paulu?

¹⁶ (2) Yindula. Uyisia vana fulu kia Paulu. Mu pelezo kena kuna Roma yo kangwa muna tuvambu. Nkumbu miayingi kasiwa kala mu pelezo, kansi e nkumbu wau una ye ziku vo vondwa kevondwa. Akaka muna akundi andi bambembwele ye wayoya kena muna nitu.—2 Tim. 1:15.

17. Adieyi Paulu kafwana vanga mu kuma kia mana mambwila?

¹⁷ Paulu wafwana sia e sungididi muna zingu kateka kala kiau yo yindula: “Kele vo yabaka nzengo zankaka, kiadi kala mu pelezo ko.” Nanga wadi fungila makasi awonso ana bambembola, ana bazingilanga kuna mvivu wa Asia yo yambula bunda e vuvu kwa akundi andi akaka. Kansi, ke diau ko kavanga o Paulu. Nki kiansadisa mu kwamanana bunda e vuvu muna akundi andi ye muna lusadisu lwa Yave?

18. Adieyi Paulu kavanga muna zizidila e mpasi kawanana zau?

¹⁸ (3) Badika. Ekolo obadikanga, vana e mvutu za kiuvu eki: “Adieyi Paulu kavanga muna zizidila e mpasi zazi?” Kana una vo Paulu wazaya wo vo vondwa kevondwa, kavilakana ko e diambu diasunda o mfunu, i sia vo, vana o nkembo kwa Yave. Wakwamanana yindula una kalenda kasakesela akaka. Wabunda Yave e vuvu muna sambanga ntangwa zawonso. (2 Tim. 1:3) Vana fulu kia viokesa e ntangw’andi mu yindula ampangi ana bambembola, Paulu wavutula matondo muna lusadisu kavewa kwa akundi andi akwikizi ana bansadisa. Vana ntandu, Paulu wakwamanana longoka e Diambu dia Nzambi. (2 Tim. 3:16, 17; 4:13) Edi disundidi o mfunu, wakala ye ziku vo Yave yo Yesu batoma kunzolanga. Ke babembola Paulu ko. Wakala mpe ye ziku vo bekunsenda mu kuma kia salu kiandi kiakwikizi.

19. Aweyi o Yave kasadisila Paulu?

¹⁹ Yave walukisa Paulu vo bangikwa kebangikwa vava kekituka Nkristu. (Mav. 21:11-13) Aweyi Yave kasadisila Paulu? Muna vananga e mvutu za sambu yandi yo kunkumika. (2 Tim. 4:17) Yave wasikidisa Paulu vo okunsenda mu kuma kia fululu kiandi muna salu. Wasadila mpe akundi akwikizi a Paulu muna kumvana lusadisu luna kavuanga o mfunu.

20. Landila e sono kia Roma 8:38, 39, aweyi tulenda tanginina e mbandu a Paulu?

²⁰ (4) Sadila Mana Olongokanga. Ukiyuvula: ‘Aweyi ndenda tanginina e mbandu a Paulu?’ Nze Paulu, tufwete dio zaya vo bangikwa tubangikwa wau vo tu Mbangi za Yave. (Maku 10:29, 30) Muna sikila ye kwikizi muna Yave vava tunuananga ye mpasi, tufwete kwamanana samba yo longoka e Diambu dia Nzambi. Katuvilakana ko vo e diambu disundidi o mfunu i vana nkembo kwa Yave. Tufwete kala ye ziku vo Yave kesinga kutubembola ko. Kavena diambu ko balenda vanga o wantu dilenda fila Yave mu yambula kutuzola.—Tanga Roma 8:38, 39; Ayib. 13:5, 6.

21. Nki kiasadisa mpangi Aya yo mpangi Hector mu sunda e mpasi banuana zau?

²¹ Kiakala nkia mpasi tunuananga zau, o tusansu twa wantu beyikwanga muna Bibila tulenda  kutukumika. Kasikil’owu, mpangi ankento Aya una vo mviti a nzila kuna Japão wavova vo o lusansu lwa Yona lwansadisa mu sunda o wonga wa sila umbangi vana fulu kia ndonga. Mpangi Hector una vo nleke kuna Indonésia, una ye mase ke besadilanga Yave ko, wavova vo o lusansu lwa Rute lwamfila mu longoka mayingi mu kuma kia Yave yo kunsadila.

22. Adieyi olenda vanga muna vua e nluta muna drama za ntangilu a Bibila yovo muna malongi “Tanginina Lukwikilu Lwau?”

²² Akweyi olenda sololwela tusansu twa Bibila tulenda kumika lukwikilu lwaku? Olenda solola tusansu twatu muna video, drama za ntangilu a Bibila ye muna malongi mena yo ntu a diambu, “Tanginina Lukwikilu Lwau.” * Tusansu twatu twatoma vavululwa. Ozevo, vitila watala, wá yovo tanga to, samba kwa Yave kimana kasadisa mu solola mambu masikididi olenda sadila. Uyisia vana fulu kia muntu oyikwanga muna lusansu. Badika dina selo yayi ya Yave bavanga muna zizidila e mpasi zau ye una Yave kabasadisila mu sunda zo. I bosi, sadila mana olongokele. Vutula matondo kwa Yave muna lusadisu kekuvananga. Songa vo oyangalelanga lusadisu lwalu muna vavanga e lau dia kasakesa yo sadisa akaka.

23. Landila e sono kia Yesaya 41:10, 13, nkia nsilu kekutusianga o Yave?

²³ Dialudi vo e zingu mu nza yayi iyalwanga kwa Satana, kiampasi kikilu. Ezak’e ntangwa, ke tuzayanga ko dina tulenda vanga. (2 Tim. 3:1) Kansi, ke tufwete tokananga kwayingi ko ngatu mona o wonga. Yave ozeye e mpasi zeto. Vava tuvuanga lusadisu lwandi o mfunu, okutusianga o nsilu wa kutusimbinina muna koko kwandi kwalunene kwa unsongi. (Tanga Yesaya 41:10, 13.) Kieleka, tuna ye ziku vo Yave okutusadisa. Osadilanga e Bibila muna kutuvana o nkuma tuvuidi o mfunu mu zizidila konso mpasi.