1. Makacamiho taani akhweya alapeli a Yehova anahoolelaaya?

APWANNE munnahoolela makacamiho oovila? Akhweya muchu mukina a mmulokoni ohoophucaani. (Tiy. 3:2) Naari akhweya asinthamwene oomutekoni naari oosikola annootheyaani nthowa na omurumeela Yehova. (1 Ped. 4:3, 4) Naari achu a veemusini anneererya woomaalihaani oya mmithukumano naari oloca wa akina sa nroromelo nanyu. (Mat. 10:35, 36) Waakhanle wi nikacamiho nanyu ti noovila, akhweya munahaala woona wi echu yaphaama ori ohiya omurumeela Yehova. Nyenya munanwerya ororomela wi moohiphwacha makacamiho munahoolelaanyu, Yehova onamoovahaani miruku wi mpake soolakelela saphaama ni ikuru wi nwerye ovilela ni makacamiho anyu.

2. Mwawiiwanana ni Aroma 15:4, waalakhanya Masu a Muluku eni enikhaviherye hai?

² Yehova oheeriha wi sootakiherya irempwe Mpiipiliyani seiyo sinooniherya mukhalelo achu oohiphaameya yaawenryaaya ovilela ni makacamiho oovila. Ntakhara heeni? Ni yoolakelela yawi nihuserye orweela wa seiyo. Nave ela ti yeeyo Yehova aamveerenleiye murummwa Paulo orepa. (Mwaalakhanye Aroma 15:4.) Vaavaa nnaalakhanyaahu saweereya seiya, sinnanilipiha nave sinnanivaha ewehereryo. Mwawiihiiha, wi niphurevo, ninnaphwanela opaka sincipale ohiya pahiru omwaalakhanya Piipiliya. Nnaphwanela weemererya wi Soorepa suupe mukhalelo ahu wa wuupuwela ni otannya murima ahu. Ntoko yootakiherya, tiheeni nnaphwanelaahu weera wakhala wi ninnachuna ohoolela vooloca sa nikacamiho vyakala nnahoolelaahu? Nnaphwanela opharihela ichu sese inacharela: (1) Ovekela, (2) Waanyiherya, (3) Wuupuwelela, nave (4) Opharihela muteko. Hankooni nthokororye  yeeyo enavolowelavo mu ichu seiya sese. * Voocharela nnahaala opharihela meerelo yaala a oohuserya wi nthokororye ichu seiyo seeren’ye ni Mwene Tavite nave tho murummwa Paulo.

3. Muhaakumve opacerya omwaalakhanya Piipiliya, tiheeni munaphwanelaanyu opaka, nave ntakhara heeni?

³ (1) Ovekela. Muhaakumve opacerya omwaalakhanya Piipiliya, mumveke Yehova wi ookhaviheryeeni woona mukhalelo muneeraanyu mphurelo yeeyo munaalakhanyaanyu. Ntoko yootakiherya, wakhala wi munaavya ekano vooloca sa mukhalelo muneeraanyu mvoothe nikacamiho, mumveke Yehova wi ookhaviheryeeni ophwanya malakiheryo Mmasu awe yaawo anahaala woohoolelaani.—Fil. 4:6, 7; Tiy. 1:5.

4. Tiheeni enahaala wookhaviheryaani wi yaweereya ya Mpiipiliyani etannye murima anyu?

⁴ (2) Waanyiherya. Yehova oonivaha mavyakelo ootikhiniha a waanyiherya ichu. Wi yaweereya ya Mpiipiliya yoophareeni murima, mweererye waanyiherya yaweereya eyo mookumini mwanyu nave muri mu nipuro na muchu yoowo. Mweererye woona ichu mmukhalelo owo ooneiye nave mwiisoone mmukhalelo owo aareiye.

5. Wuupuwelela tiheeni, nave muni mweereno hai?

⁵ (3) Wuupuwelela. Wuupuwelela enataphulela wuupuwela moopwacha yeeyo munaalakhanyaanyu nave mukhalelo mwaha owo onaphariheleyaaya wa nyuwo. Ela enamookhaviheryaani wiiwananiha muupuwelo ni wiiwexexa phaama yeeyo munaalakhanyaanyu. Omwaalakhanya Piipiliya muchu ahuupuwelelaka ori ntoko ovarerya ichu inasiviha yoolya iri vameesa nave ahireherenrye wi aakanyerye vamoha. Wakhala wi muchu hareherenrye soothene seiyo hani awerye opuha yoolya yoosiva. Wiipakela ni waakhula makoho ntoko ala anacharela, onamookhaviheryaani wuupuwelela: ‘Tiheeni muchu onalociwa mu yaweereya yeela enreiye wi arehererye nikacamiho nawe? Yehova aamukhavihenrye mwawiihai? Kini kipharihele hai mahusiheryo yaala nave eni ekikhaviherye hai ovilela ni makacamiho?’

6. Ntakhara heeni ninnaphwanela opharihela yeeyo nnahuseryaahu?

⁶ (4) Opharihela muteko. Yesu aaloca wi wakhala wi hinnapharihela yeeyo nnahuseryaahu, nnalikana ni muchu yoowo otenke empa awe veehaavani. Owo onnalapa mwakuru, nyenya eyo henamukhaviherya. Ntakhara heeni? Nthowa nawi osareya wa maahi ni echeku yoowali yamana empa eyo, enamuuwa. (Mat. 7:24-27) Moolikana, wakhala wi ninnavekela, waanyiherya, ni wuupuwelela nyenya nihipharihela muteko yeeyo nihusenryaahu hiyaavo nenraahu. Vaavaa nroromelo nahu nneehiwaaya moorweela wa makacamiho naari wiikariwa, hinni nikhale noolipa. Nyenya, wakhala wi ninnahuserya ni opharihela yeeyo nnahuseryaahu, nnahaala opaka soolakelela saphaama, nnamukhalano murecele, nave nnamunnuwiha nroromelo noolipa. (Isa. 48:17, 18) Nipharihelaka ichu seiya sese nimanlaahu othokororya, hankooni noone yeeyo nnahuseryaahu orweela wa ichu seiyo seeren’ye ni Mwene Tavite.

7. Yaweereya taani ya Mpiipiliyani nnahaalaahu othokororya hiihaano?

⁷ Apwanne nthamwene anyu naari muchu a veemusini vanyu ohookhalihaani moonanara? Waakhanle wi ti hiiha, echu emoha enahaala wookhaviheryaani ori ohuserya yeeyo yeeren’ye ni Mwene Tavite elukuluku mwanawe Apisaloni ammwarenleiye nave anachuna okhala Mwene.—2 Sam. 15:5-14, 31; 18:6-14.

8. Tiheeni munaphwanelaanyu weera wi Yehova ookhaviheryeeni?

 ⁸ (1) Ovekela. Ni yaweereya yeeyo mmuupuweloni, muloce ni Yehova mukhalelo munoonaanyu vooloca sa echu yeeyo mweereliwaanyu. (Sal. 6:6-9) Mukhale ooluluwanya. Voocharela muloce ni Yehova wi ookhaviheryeeni ophwanya malakiheryo yaawo anahaala woohoolelaani wi mweererye ovilela nikacamiho nenlo noovila.

9. Tiheeni yeeren’ye variyari va Tavite ni Apisaloni?

⁹ (2) Waanyiherya. Muupuwele ichu seeren’ye, nave mwaanyiherye mukhalelo eyo yaamvolowenlaaya Mwene Tavite. Apisaloni mwaana a Tavite aahiilipiserya mu iyaakha sincipale wi aweerihe achu omusivela yoowo. (2 Sam. 15:7) Vaavaa Apisaloni onneiye wi yaari elukuluku yoophwanelela, owo aahaaruma achu awe oya o Isarayeli wi yaarehererye achu omwaakhela yoowo ntoko mwene aya. Ophiyerya tho wi aahimulekecha mmoha a asinthamwene awaacameleya a Mwene Tavite ni namiruku, Aitofeli, wi emmwareele vamoha. Apisaloni aahiiseera mwene nave aaheererya omphara Tavite wi amwiiphe yoowo, nave mweelukuluku yeele owo iiha iiceliwaka. (Sal. 41:1-9) Tavite aahisuwela yeeyo Apisaloni aachuneiye weera nave aachawawo o Yerusalemu. Mu elukuluku yeele, anakhoco a Apisaloni yaahiwana ni anakhoco a Tavite. Anakhoco a Apisaloni yaahivoothiwa, nave Apisaloni mwaana a Tavite aahiiphiwa.

10. Akhweya tiheeni Mwene Tavite aahaaleiye weera?

¹⁰ Voocharela, mwaanyiherye mukhalelo Tavite ooneiye vaavaa soothene seiya saamphacuwelaaya. Owo aanamusivela Apisaloni nave aanamuroromela Aitofeli. Chiryene, achu oothene yaala yaari asinthamwene awaacameleya yaahimmwareela. Awo yaahimweeriha Tavite okhala oothananasa nave ophiyerya wi yaanachuna omwiipha. Tavite anwerya wuupuwela wi asinthamwene awe akina ahiiwanana ni Apisaloni nave aamuhiya waaroromela. Owo anwerya wuupuwelaka sa yene mukhateiye nave ochawa mu elapo yeele meekheiye. Naari akhweya anwerya ohiya okhala oolipa murima. Nyenya Tavite henreno ichu seiya. Moohiyana, owo aavootha nikacamiho nenla noovila. Aawenrye hai weerano yeela?

11. Tavite aakhulenle hai variyari va makacamiho oovila?

¹¹ (3) Wuupuwelela. Tiheeni munahuseryaanyu orweela wa yaweereya yeela? Naakhulo na nikoho, “Tiheeni Tavite eenreiye wi emukhaviherye?” Tavite huukhunwe nave mwawaakuveya apaka soolakelela soololo. Owotho haari awoova ophiyerya wi ahilakelela echu yaweera. Ohiya yeeyo, owo aavekela wa Yehova wi amukhaviherye. Owo tho aahaaveka asinthamwene awe wi emukhaviherye. Nave mwawaakuveya aapaka yeeyo aalakelenleiye weera. Naamwi Tavite aari awuukhuwasa, owo haahin’ye waaroromela akina nave haari oonyeenyeya. Aahititelela omuroromela Yehova ni waaroromela asinthamwene awe.

12. Tiheeni Yehova enreiye wi amukhaviherye Tavite?

¹² Mmukhalelo taani Yehova aamukhavihenryeiye Tavite? Moorweela wa otholathola, munahaala woona wi Yehova aamvaha Tavite ikuru seiyo aachuneiye wi avilele nnikacamiho nenla. (Sal. 3:1-8; masu oohulela) Yehova aareeliha soolakelela Tavite aapankeiye. Nave owo aahaakhaviherya asinthamwene oororomeleya a Tavite vaavaa yaawanihaaya wi emukhapelele mwene aya.

13. Ti mwawiihai muneeraanyu mmutakiherye Tavite wakhala wi muchu mukina ohoochekelaani mmukhalelo vyakala? (Mateu 18:15-17)

¹³ (4) Opharihela muteko. Mwiikohe, ‘Kinii kimutakiherye hai Tavite?’ Nyuwaano munaphwanela weeravo echu mwawaakuveya wi murehererye nikacamiho. Mwawiiwanana ni mikhalelo sanyu nyuwaano munaphwanela opharihela ekano ya Yesu enaphwanyeya mu Mateu ekapitulu 18 mooluluwanya naari mwa nlakiheryo. (Mwaalakhanye Mateu 18:15-17.) Nyenya nyuwaano hamunaphwanela opaka soolakelela muri  oonyeenyeya. Munaphwanela ovekela wa Yehova wi oovaheeni murima woomaaleleya navetho wi musuwele echu yaweera. Hamunaphwanela ohiya waaroromela asinthamwene anyu. Moohiyana, mukhale ooreheryeya waakhela nikhaviheryo naya. (Masi. 17:17) Echu yoochuneyaxa, mucharihe miruku sa Yehova seiho onavahereryeiye mu Masu awe.—Masi. 3:5, 6.

14. Mmikhalelo taani 2 Timóteo 1:12-16; 4:6-11, 17-22 oneereiye oolipiheeni?

¹⁴ Apwanne amusi anyu annawiicaani nthowa na omurumeela Yehova? Naari munakhala elapo yeeyo muteko wa achu a Yehova oniiciwaaya naari okhwatiihiwa? Waakhanle wi ti hiihaa, nyuwaano munanwerya olipihiwa moorweela wa omwaalakhanya 2 Timóteo 1:12-16 ni 4:6-11, 17-22. * Paulo aarempe iversikulu seiha vaavaa aareiye mukariposo.

15. Munaphwanela omveka Yehova ntakhara eheeni?

¹⁵ (1) Ovekela. Muhaakumve waalakhanya makupa yaawo, mmuleele Yehova vooloca sa makacamiho anyu ni mukhalelo munoonaanyu. Mukhale ooluluwanya. Voocharela mumveke Yehova wi ookhaviheryeeni ophwanya malakiheryo mu saweereya sa Paulo yaawo anahaala wookhaviheryaani osuwela echu yaweera.

16. Tiheeni yeeren’ye ni Paulo?

¹⁶ (2) Waanyiherya. Mwaanyiherye wi nyuwaano mwa Paulo. Owo aamakiwa nave oowaleliwa mukariposo o Roma. Tahi wi ela yaari ekwaha yoopacerya omakiwa, nyenya ekwaha ela owo aahaala wiiphiwa. Asinthamwene awe akina yaamunyanyala, nave owo aari awuukhuwa mmuupuweloni.—2 Tim. 1:15.

17. Tiheeni Paulo aahaaleiye opaka?

¹⁷ Paulo aanwerya otikitheryeya ni ichu seeren’ye muculi, uupuwelaka wi waakhanle wi haari Mukristu amvai, owo haahaala wiiphiwa. Owo aanwerya onyeenyeya ni alopwana o epooma yo Asiya yaawo yaamunyanyanle, nave akhweya owo aanwerya ohiya waaroromela asinthamwene awe akina. Nyenya Paulo henreno yeeyo. Ntakhara heeni Paulo aanaroromela wi nlelo asinthamwene awe oororomeleya yaari ni yoowo nave wi Yehova aahaala omvaha nchuwelo?

18. Tiheeni Paulo eenreiye variyari va nikacamiho nenla noovila?

¹⁸ (3) Wuupuwelela. Mwaakhule nikoho, “Paulo iikhavihenrye hai?” Naamwi Paulo aasuwela wi aahaala wiiphiwa moohilekela, owo haacuwanle wi echu yoochuneyaxa waari oruuha ncicimiho wa Yehova. Nave owo aatitelela wuupuwelela mukhalelo aahaaleiye waalipiha akina. Owo aanamuroromela Yehova moorweela wa ovekela moohihiyererya. (2 Tim. 1:3) Paulo haatitelenle wuupuwelela vooloca sa asinnawe yaamunyanyanle. Ohiya yeeyo, owo ooloca wi aanathamalela vancipale mukhalelo asinthamwene awe moosivela yaamulipihaaya ni omukhaviherya. Mwawaaceererya, Paulo aanatitelela ohuserya Masu a Muluku. (2 Tim. 3:16, 17; 4:13) Echu yoochuneyaxa, owo aanaroromela wi Yehova ni Yesu yaanamusivela. Awo hiyaamunyanyanle, nave aanaroromela wi awo yaahaala omuchuwela nthowa na muteko woororomeleya.

19. Yehova aamukhavihenrye hai Paulo?

¹⁹ Yehova aamulopola Paulo wi aahaala ohoolela wiiciwa nthowa na okhala Mukristu. (Saw. 21:11-13) Ti mwawiihai Yehova aamukhavihenryeiye Paulo? Owo aanaakhula mavekelo a Paulo nave ilukuluku soothene aanamvaha ikuru. (2 Tim. 4:17) Paulo aaloca wi aahaala waakhela nchuwelo nenlo aalampeiye mwakuru wi aakhele. Yehova tho aahaapharihela asinthamwene oororomeleya a Paulo wi emukhaviherye.

20. Nni ntakiherye hai nroromelo na Paulo nenlo nnooniheryiwa mu Aroma 8:38, 39?

²⁰ (4) Opharihela muteko. Mwiikohe, ‘Kinii kimutakiherye hai Paulo?’ Ntoko Paulo nnaphwanela  weemererya wi nnahaala wiiciwa nthowa na nroromelo nahu. (Mar. 10:29, 30) Wi nihiyeleele nroromelo nahu mwa Yehova vaavaa nnahoolelaahu makacamiho, nnaphwanela otitelela ovekela wa yoowo ni ohuserya masu awe moohihiyererya. Nave ilukuluku soothene nnaphwanela wuupuwela wi echu emoha nnaphwanelaahu weera ori omuruuhela ncicimiho Yehova. Nnanwerya ororomela wi Yehova harwa anihiya nave hiyaavo echu eri yoothene enahaala omuhiiha owo onisivela.—Mwaalakhanye Aroma 8:38, 39; Ahe. 13:5, 6.

21. Tiheeni yaamukhavihenrye Aya ni Hector ovootha makacamiho yaahoolelaaya?

²¹ Sootakiherya sa Mpiipiliyani sinnanikhaviherya ophwanya ikuru seiho nnachunaahu wi nivilele nnikacamiho vyakala. Ntoko yootakiherya, Aya, piyoneera o Xapau, ooloca wi yaweereya ya Yona yoomukhaviherya ovootha woova mu olaleerya wa vanlakani. Hector, mmiravo o Intonesiya yoowo asitiithi awe ahinamurumeela Yehova, ooloca wi yootakiherya ya Rute yoomukhaviherya ochuna ohuserya vooloca sa Yehova ni omurumeela yoowo.

22. Muni mphure hai orweela wa itrama sa Mpiipiliyani ni miyaha ini “Imite a Sua Fé”?

²² Muni mphwanye woowi sootakiherya sa Mpiipiliyani seiho sinahaala woolipihaani? Ixilema sahu ni itrama sooruma vamoha ni miyaha “Imite a Sua Fé” sinamookhaviheryaani osuwela okumi wa achu analociwa Mpiipiliyani. * Muhaakumve woona, owiriyana, naari waalakhanya saweereya seiha mumveke Yehova wi ookhaviheryeeni ophwanya ipontu soochuneya seiho munahaalaanyu opharihela. Mwiisaanyiherye muri mu nipuro na muchu yoowo. Muupuwelele yeeyo akapuro oororomeleya a Yehova yeenraaya ni mukhalelo owo aakhavihenryeiye ovilela ni makacamiho. Voocharela mpharihele mahusiheryo yaawo mu okumi anyu. Mmuthamalele Yehova ntakhara nikhaviheryo nenlo onoovaheiyeeni. Nave mooniherye wi munnathamalela nikhaviheryo nlo, moorweela wa waavya mikhalelo sa waalipiha ni waakhaviherya akina.

23. Mwawiiwanana ni Isaiya 41:10, 13, tiheeni Yehova onaroromeliheiye weera wa hiyaano?

²³ Ekumi mu elapo yeela enalamuleliwa ni Satana enanwerya okhala yoovila, ophiyerya wi mu ilukuluku ikina hannasuwela echu yaweera. (2 Tim. 3:1) Nyenya hannaphwanela okhala awuukhuwa naari awoova. Yehova onnasuwela makacamiho yaawo nnahoolelaahu. Vaavaa nnachunaahu nikhaviheryo, onnaroromeliha onipharela ni ntata nawe nakuru noolopwana. (Mwaalakhanye Isaiya 41:10, 13.) Nroromelaka wi Yehova onahaala onikhaviherya, nnanwerya ophwanya ikuru orweela mu Soorepa ni ovootha nikacamiho vyakala.