1. Anto ran subok so dadalanen na saray lingkor nen Jehova natan?

KASIN walay subok o problema ya dadalanen mo natan? Ompan asakitan ka ed imbaga o ginawa na kakongregasyon mo. (Sant. 3:2) Odino ompan iinsultoen ka na saray kaklasem o katrabahom lapud sakey kan Tasi. (1 Ped. 4:3, 4) Odino ompan babawalan ka na saray kapamilyam ya miaral tan manpulong. (Mat. 10:35, 36) No singa agmo la nasarag so problemam, ompan isipen mo ya mas maong lay ontundan manlingkor ed si Jehova. Pero tandaan mo ya anggan anto ni tay subok ya dadalanen mo, ikdan ka nen Jehova na karunongan tan biskeg pian nasarag mo itan.

2. Base ed Roma 15:4, antoy nitulong na Biblia ed sikatayo?

² Sinegurado nen Jehova ya nisulat ed Biblia iray agawa ed saray lingkor to, ya anggano aliwa ran perpekto et alampasan da iray subok. Akin et impaisulat to iratan? Pian makaaral tayo ed sikara. Atan imay mismon insulat nen apostol Pablo diad Roma 15:4. (Basaen.) No basaen tayo irayan salaysay, ombiskeg tayo tan nawalaan itayo na ilalo. Balet pian natulongan itayo na Biblia, agtayo labat itan babasaen. Kaukolan ya onsepsep itan ed isip tan onsabi ed puso tayo. Singa bilang, panon to no walay problemam tan labay mon naamtaan no antoy dugan gawaen mo? Makatulong iraya: (1) Manpikasi, (2) Man-imadyin, (3) Mandalepdep, tan (4) Iyaplika. Sansakeyen tayon pantongtongan iratan. * Insan tayo usaren iyan paraan na panag-personal study pian aralen iray agawa ed bilay nen Arin David tan apostol Pablo.

3. Antoy nepeg mon gawaen antis kan manbasa na Biblia, tan akin?

 ³ (1) Manpikasi. Antis kan manbasa na Biblia, kerew mod si Jehova ya tulongan to ka pian makaaral ka ed basaen mo. Alimbawa, ibagam ed si Jehova ya makaalmo ka komon na saray prinsipyo ya makatulong ed problemam.—Fil. 4:6, 7; Sant. 1:5.

4. Antoy gawaen mo pian mabilabilay ed isip mo so babasaen mo?

⁴ (2) Man-imadyin. Inikdan itayo nen Jehova na nikadkaduman abilidad ya man-imadyin. Kanian pian mabilabilay ed isip mo so babasaen mo, imadyin moy eksena tan kunwari et sikan mismo may manunan karakter ya babasaen mo. Anto ra kasi anengneng to? Anto ra kasi alikna to?

5. Anto so panagdalepdep, tan panon mon gawaen itan?

⁵ (3) Mandalepdep. Say labay ya ibaga na satan et isip mon maong so babasaen mo tan no anto kasi nitulong tod sika. No ontan so gawaen mo, napankokonektaan mo iray impormasyon kanian mas lalon natalosan mo so babasaen mo. No babasaen moy Biblia balet agka mandadalepdep, singa sankanengneng mo labat iray piraso na jigsaw puzzle ya walad arapan mo pero agmo met lanlamang bubuoen. No mandadalepdep ka, singa tutuopen mo iramay piraso ya anggad nabuo may interon litrato. Nia ray pigaran tepet ya makatulong ed pandalepdep mo: ‘Antoy ginawa na manunan karakter pian natulongan toy sarili to? Panon ya tinulongan nen Jehova? Anto ray naaralan ko ed sayan salaysay ya makatulong ed problemak, tan panon kon niyaplika itan?’

6. Akin et importante ya iyaplika tayo iray nanaaralan tayo?

⁶ (4) Iyaplika. Imbaga nen Jesus ya no agtayo iyaplika iray nanaaralan tayo, singa tayo sakey ya too ya angipaalagey na abung to ed kabueran. Nankesawan toy nampaalagey, balet anggapo lanlamang so gunggona na sagpot to. Akin ey? On ta no inmuran ya maksil tan dinmelap, mainomay ya nagaygay so abung to. (Mat. 7:24-27) Ontan met ed panagbasa na Biblia. Anggano nampikasi, nan-imadyin, tan nandalepdep tayo, pero no agtayo iyaplika iray inaral tayo, anggapoy gunggona to lanlamang. Akin ey? On ta no onsabi ray subok tan problema, maganggano ya onkapuy so pananisia tayo. Pero no iyaplika tayo iray nanaaralan tayo, mas makapandesisyon tayoy duga, mareen so nonot tayo, tan ombiskeg so pananisia tayo. (Isa. 48:17, 18) Salien tayo pa sirin ya gawaen iyan apatiran apantongtongan tayo legan tayon aaralen so sakey ya agawa ed bilay nen Arin David.

7. Anton salaysay ed Biblia so aralen tayo natan?

⁷ Kasin walay kaarom o kapamilyam ya asakitan to ka? Marakep no aralen mo imay agawad si Arin David sanen say anak ton si Absalom et nantraidor tan nanggaway pakana pian nasamsam so inkaari.—2 Sam. 15:5-14, 31; 18:6-14.

8. Antoy gawaen mo pian tulongan ka nen Jehova?

⁸ (1) Manpikasi. Antis mon basaen iyan salaysay, ibagam ed si Jehova so naliliknam tan no antoy epekto ed sika na aliwliwan ginawa na arum. (Sal. 6:6-9) Ibagam so amin ya naliliknam. Tan ibagam met ed sikato ya makaromog ka komon na saray prinsipyo ya makatulong ed problemam.

9. Anto ray agawa nen nantraidor si Absalom ed si David?

⁹ (2) Man-imadyin. Imadyin mo iray agawa ed sayan istorya tan isip moy epekto tod si Arin David. Pigaran taon lan manggagawa na paraan si Absalom pian naala toy pabor na totoo. (2 Sam. 15:7) Nen aluto-luto lay plano to, angibaki na saray espiya ed interon Israel pian  panisiaen iray totoo ya sikato la so balon ari. Akombinse to ingen si Ahitofel ya misabwatan ed sikato, anta maapit a kaaro tan managsimbawa nen ama to. Nen indeklara la nen Absalom so sarili to bilang ari, labay ton erelen tan pateyen so ama to, ya nayarin diad saman et makapkapuy ta mansasakit. (Sal. 41:1-9) Nen naamtaan itan nen David, tinmakas kaiba to ray lingkor to. Nanlaban iray sundalo nen Absalom tan saray sundalo nen David. Atalo iray rebelde, tan inatey si Absalom.

10. Anto ray agginawa nen Arin David?

¹⁰ Natan, imadyin mo met no antoy nalilikna nen David legan ya nagagawa irayan amin. Anta inar-aro toy Absalom tan pantitiwalaan ton maong si Ahitofel, nitepel da balet ya traidoren! Asaki-sakitan si David, lalo la nen naamtaan ton labay dan pateyen. No arum ya too man, ompan pansuspetsaan to met lay arum ya kakaaro to tan isipen ton kasabwat met ira nen Absalom. Ompan sarili to labat so nonoten to tan ontakas lan bukor. Odino ompan agla onkiwas tan isipen ton anggapo lan balot so nagawaan to. Pero aliwan ontan so reaksion nen David. Diad tua, alampasan to itan ya mair-irap ya subok. Panon to kasin asarag?

11. Antoy ginawa nen David ed saman ya mair-irap ya situasyon?

¹¹ (3) Mandalepdep. Anto ray naaralan mo ed sayan salaysay? Ebatan mo iyan tepet, “Antoy ginawa nen David pian natulongan toy sarili to?” Sikatoy nansiansian kalmado tan inisip ton maong iray desisyon to. Kinmiwas anggano makapaaburido so situasyon tan kinerew toy tulong nen Jehova. Nampatulong met ed saray kakaaro to. Nen wala lay desisyon to, ginawa ton tampol tan agto la pinabayag. Anggano asaki-sakitan si David, agto kinabusol so arum. Tan agnakal so tiwala tod si Jehova tan ed saray kakaaro to.

12. Panon ya tinulongan nen Jehova si David?

¹² Panon ya tinulongan nen Jehova si David? No man-research ka, naamtaan mo ya pinabiskeg nen Jehova si David pian nalampasan to iyan subok. (Sal. 3:1-8, superskripsion) Benendisyonan nen Jehova iray desisyon to. Tan sinuportaan to ray matoor ya kaaro nen David nen akilaban ira pian naprotektaan day ari da.

13. Panon mon naalig si David no walay ansaki-sakit ya ginawad sika na sakey a too? (Mateo 18:15-17)

¹³ (4) Iyaplika. Itepet mod sarilim, ‘Panon ko kasin naalig si David?’ Kiwas kan tampol pian naayos so problema. Agmo la pababayagen. Sarag mon tumboken imay eksakton imbaga nen Jesus ya nabasa ed Mateo 18:15-17. (Basaen) Odino iyaplikam so prinsipyo ya wadtan, depende ed situasyon. Pero agka basta-basta mandedesisyon, lalo la no onsyosyodot ka. Manpikasi ka nid si Jehova tan kerew mo ya pakalmaen to ka tan ikdan to kay karunongan pian antam no antoy dugan gawaen mo. Pantiwalaan mo nin siansia iray kakaarom tan patulongan kad sikara. (Pro. 17:17) Say sankaimportantian, unor moy bilin nen Jehova ya walad Biblia.—Pro. 3:5, 6.

14. Diad anto ran situasyon ya makatulong ed sika so 2 Timoteo 1:12-16; 4:6-11, 17-22?

¹⁴ Kasin babawalan ka na pamilyam diad panlilingkor mod si Jehova? Odino kasin manaayam ka ed bansan ibabawal na gobierno so panagpulong tan pantitipon tayo? No ontan so situasyon mo, seguradon napaseseg ka no basaen moy 2 Timoteo 1:12-16 tan 4:6-11, 17-22. * Insulat iratan nen apostol Pablo legan ya walad prisoan.

15. Anto ray ipikasim ed si Jehova?

 ¹⁵ (1) Manpikasi. Antis mon basaen irayan bersikulo, ibagam ed si Jehova so subok ya dadalanen mo tan no antoy epekto tod sika. Ibagam so amin ya naliliknam. Insan ipikasim ya legan mon babasaen iyan eksperiensya nen Pablo et makalmo ka komon na saray prinsipyo ya makatulong pian nasarag moy subok ya dadalanen mo.

16. Antoy agawa ed si Pablo?

¹⁶ (2) Man-imadyin. Imadyin mo ya sika si Pablo. Aka-gulonggulong ka ed prisoan diad Roma. Apriso ka la dati, pero duma ’ya natan ta antam ya asingger da ka lan pateyen. Anta makapkapuy la lanti laman mo, pinaulyanan ka ni na arum ya agagi.—2 Tim. 1:15.

17. Anto ray agginawa nen Pablo?

¹⁷ No arum ya too so walad kipapasen nen Pablo, ompan isipen to ya agla komon nagmaliw ya Kristiano pian agto la nasali so onman ya irap. Ompan ombarong la ed saramay totoo ed probinsya na Asia ya amaulyan ed sikato tan agla mantiwala ed arum ya kakaaro to. Pero aliwan ontan so reaksion nen Pablo. Nantiwalaan to nin siansia iray matoor ya kakaaro to. Tan agkinmapuy so talek to ya iter nen Jehova so premyo to. Antoy akatulong ed sikato?

18. Antoy ginawa nen Pablo ed saman ya mairap ya situasyon?

¹⁸ (3) Mandalepdep. Ebatan iyan tepet, “Panon ya tinulongan nen Pablo so sarili to?” Anggano amta nen Pablo ya sikatoy asingger da lan pateyen, say sankanonot to nin siansia et say pangigloria ed si Jehova. Sankanonot to met iray agagi tan no panon to ran napaseseg. Tan agew-labi ya manpipikasi ed si Jehova. (2 Tim. 1:3) Imbes ya mansinti ta tinaynan na arum ya agagi, say inisip to la et saramay kakaaro ton matuttulong tan maaro ed sikato, tan pisalsalamatan to ra. Sakey ni, maaral si Pablo—importante ed sikato so panaral na Kasulatan. (2 Tim. 3:16, 17; 4:13) Tan say sankaimportantian, kombinsido ya sikatoy inar-aro nen Jehova tan si Jesus. Sikatoy agdan balot pinaulyanan tan seguradon iter day premyo to lapud katooran to.

19. Panon ya tinulongan nen Jehova si Pablo?

¹⁹ Abayag lan imbaga nen Jehova ed si Pablo ya sikatoy napairap lapud impagmaliw ton Kristiano. (Gawa 21:11-13) Panon ton tinulongan? Inebatan to ray pikakasi nen Pablo tan pinabiskeg to. (2 Tim. 4:17) Pinaseguroan nen Jehova si Pablo ya seguradon awaten toy premyo to lapud nanmatoor anggad sampot. Inusar met nen Jehova iray kakaaro nen Pablo ya ontulong ed sikato.

20. Panon tayon naalig so kombiksion nen Pablo ya nabasa ed Roma 8:38, 39?

²⁰ (4) Iyaplika. Itepet mod sarilim, ‘Panon ko kasin naalig si Pablo?’ Tandaan tayo ya amin tayo ran Kristiano et nasubok lapud pananisia tayo. (Mar. 10:29, 30) Pian makapanmatoor tayo anggano wala ray subok, agtayo ontutundan manpikasi tan kerewen tayoy tulong nen Jehova. Importante ya mabasa tan maaral tayoy Biblia. Tan nepeg ya say sankanonot tayon lanang et say pangigloria ed si Jehova. Manmatalek tayo met ya ag-itayon balot paulyanan nen Jehova tan agbalot manguman so panangaro tod sikatayo.—Basaen so Roma 8:38, 39; Heb. 13:5, 6.

21. Antoy akatulong ed si Aya tan Hector pian nasarag day subok?

²¹ Anggan anto ni tay subok ya dadalanen tayo, walan walay karakter ed Biblia ya pakaaralan tayo, tan napabiskeg itayo ed alimbawa to. Singa bilang, si Aya ya payunir ed Japan et  imbaga to ya say istorya nen Jonas so akatulong pian nalabanan toy takot ton man-public witnessing. Si Hector balet ya kabataan ed Indonesia tan aliwan Tasi iray atateng to et akaaral ed si Ruth. Say alimbawa nen Ruth so amaseseg ed sikato ya itultuloy ton kabaten tan panlingkoran si Jehova.

22. Antoy gawaen mo pian makaaral kan maong ed saray video, dramatikon panagbasa na Biblia, odino artikulo diad seryen “Aligen so Pananisia Ra”?

²² Anto ni ray makatulong pian lalom ya nakabkabat iray karakter ed Biblia? Wala ray ginawa na organisasyon tayo ya video, dramatikon panagbasa na Biblia, tan saray artikulo ed seryen “Aligen so Pananisia Ra” pian magmaliw ya mabilabilay ed isip tayo ray istoryad Biblia. * Pero antis mon bantayan, dengelen, o basaen iraya, manpikasi ka nid si Jehova tan ibagam ed sikato ya nanengneng mo komon iray punto ya dugaruga ed situasyon mo. Imadyin mo ya sikan mismo may karakter ed Biblia. Dalepdep mo no anto ray ginawa na sarayan matoor ya lingkor nen Jehova tan no panon to ran tinulongan ed saray subok ya dinalan da. Insan iyaplikam iray naaralan mo. Misalamat kad si Jehova ed amin ya tulong ya iiter tod sika. Say sakey a paraan pian nipanengneng moy pisasalamat mo et no pasesegen tan tulongan mo met so arum.

23. Base ed Isaias 41:10, 13, antoy insipan nen Jehova ya gawaen to parad sikatayo?

²³ Mair-irap so bilay ed sayan mundo ya uuleyan nen Satanas, tan no maminsan et agtayo la amtay gawaen tayo ed karakel na problema. (2 Tim. 3:1) Balet anggapoy nepeg tayon pampagaan o takotan ta amta nen Jehova iray dadalanen tayo. Insipan to ya say mabiskeg ya kawanan a lima to so onalalay ed sikatayo. (Basaen so Isaias 41:10, 13.) Makapanmatalek ka ya diad tulong to tan ed biskeg ya iter na Salita to, nasarag mo so anggan anton subok!