1. ¿Ima sasachakuykunapim Jehova Dios serviqkunaqa tarikuchwan?

LLAPALLANCHIKMI ima sasachakuypipas tarikunchik. Yaqapaschá mayqin iñiqmasinchikpas ruwasqanwan utaq rimasqanwan sientirachiwanchik (Sant. 3:2). Ichapas llamkaqmasinchikkuna utaq estudiaqmasinchikkunapas Diosta servisqanchikrayku ñuqanchikmanta asikunku (1 Ped. 4:3, 4). Wakiqninchikpaqqa ichapas ayllunchik harkakunku huñunakuykunaman hinaspa Diosmanta willakuq rinanchikta (Mat. 10:35, 36). Chaykunawan hukmanyaruspam wakinpiqa piensachwan Jehova Dios serviyninchikta saqiruyta. Ichaqa manam iskayrayananchikchu chaykunata atipanapaq yachaytawan kallpata Dios quwananchikmantaqa.

2. Romanos 15:4 nisqanman hinaqa, ¿imaynatam biblia ñawinchayninchik yanapawachwan?

² Jehova Diosmi palabranpi qillqachirqa serviqninkuna sasachakuykunapi tarikuspanku imayna atipasqankumanta. Qillqachirqaqa ñuqanchik yachananchikpaqmi, chaytam apostol Pablopas nirqa (qaway Romanos 15:4). Diosta serviqkunamanta bibliapi leeyninchikqa anchatam kallpanchawasun. Ichaqa manam ñawinchayllachu-ñawinchananchik, aswanqa ñawinchasqanchikta allinta entiendespanchikmi chayman hina kawsakunanchik. Ima sasachakuypipas tarikuptinchik bibliapi leesqanchik yanapawananchikpaqqa: 1) Diostam mañakunanchik, 2) chaypi kasqanchikta hinam piensananchik, 3) yuyaymanananchikmi hinaspapas 4) yachasqanchikman hinam kawsakunanchik. Kay nisqanchikman hina bibliata ñawinchanapaqyá qatiqninpi yachaykusun. *  Chayman hinataqmi yachasun kamachiq Davidmantapas hinaspa apostol Pablomantapas.

3. ¿Imatam ruwananchik bibliata manaraq leechkaspa?

³ 1) Diosta mañakusun. Bibliata manaraq leeyta qallarichkaspayá Jehova Diosta mañakusun chaynapi allinta entiendenanchikpaq. Ima sasachakuypipas tarikuptinchik palabranwan yanapaykuwananchikpaqmi mañakunanchik (Filip. 4:6, 7; Sant. 1:5).

4. ¿Imatam ruwananchik bibliapi Diospa mayqin serviqninmantapas leespanchik?

⁴ 2) Chaypi kasqanchikta piensasun. Jehova Diosmi piensay atiqta unanchawarqanchik. Bibliapi mayqin serviqninmantapas leespanchikqa chaypi kasqanchikta hinam piensananchik. Piensananchiktaqmi imakunata rikusqanpi chaynataq imayna tarikusqanpipas.

5. ¿Imatawanraqmi ruwananchik bibliata ñawinchaspanchik?

⁵ 3) Yuyaymanasun. Bibliata leespanchikqa ima yachachiwasqanchikpim yuyaymanananchik, chayta ruwaspaqa leesqanchiktam allinta entiendesun. Chaymi Diospa mayqin serviqninmantapas ñawinchaspanchikqa kaykunapi yuyaymanananchik: ¿Imatataq ruwarqa sasachakuykunata atipananpaq? ¿Imaynatam Jehova Dios yanaparqa? ¿Imaynatam paymanta yachasqay yanapawanman sasachakuykunata atipanaypaq?

6. ¿Imanasqataq bibliapi yachasqanchikta kasukunanchik?

⁶ 4) Yachasqanchikman hina kawsakusun. Jesusmi nirqa yachasqanchikta mana kasukuspanchikqa aqupa hawanpi wasi ruwaq runaman rikchakusqanchikta, chayna runapaqa wasita ruwananpaq anchata kallpanchakusqanpas yanqapaqmi, lluqlla hamuruspanmi utaq wayrantin para hamuruspanmi chay wasitaqa tuñirachin (Mat. 7:24-27). Bibliata leespanchik mana kasukuptinchikpas yanqapaqmi kanman Diosta mañakuyninchikpas, chaypi kasqanchikta hina piensayninchikpas hinaspa yuyaymanayninchikpas. Ima sasachakuyña kaptinpas manamá ima ruwaytapas atisunchu. Bibliapi yachasqanchikman hina kawsakuspanchikmi ichaqa imatapas allinta tantiasun, hawka tarikusun hinaspapas Jehova Diosmanmi astawan asuykusun (Is. 48:17, 18). Qatiqninpiyá kamachiq Davidmanta yachaykusun.

7. ¿Pikunamantam yachasun?

⁷ ¿Imatam ruwachwan mayqin amistadninchikpas utaq ayllunchikpas qipancharuwaspanchik llakichiwaptinchik? Chayna tarikuptinchikqa kamachiq Davidmanta yachayninchikmi allin kanman. Paytam churin Absalon qipancharuspan payña kamachiq kayta munarqa (2 Sam. 15:5-14, 31; 18:6-14).

8. ¿Imatam ruwananchik Dios yanapawananchikpaq?

⁸ 1) Diosta mañakusun. Kamachiq Davidmanta bibliapi manaraq ñawinchachkaspayá pipas qipancharuwaptinchik imayna tarikusqanchikta sunqumanta Diosman willasun (Sal. 6:6-9). Mañakusuntaqyá allinta ruwananchikpaq palabranwan yachaykachiwananchikpaqpas.

9. Willarimuy Davidmantawan churin Absalonmanta.

⁹ 2) Chaypi kasqanchikta hinayá piensasun. Kamachiq Davidpa churin Absalonmi, kamachiq kayta munaspan runakunapa kuyasqan kananpaq tukuyta ruwarqa. Chayta yachaspanqa mayna llakisqachá Davidqa tarikurqa (2 Sam. 15:7). Chaymantam Absalonqa  taytanpa kamachisqan llaqtakunaman yanapaqninkunata kacharqa payña kamachiq kananmanta willamunankupaq. Chaymantapas, Absalonqa Davidpa ancha kuyasqan amistadnin Aitofeltapas paypa contranpi hatarinanpaqmi umacharurqa. Hinaspanmi kamachiq kananpaq kikillan churakuruspan taytan Davidtapas wañurachiyta munarqa. Chay punchawkunaqa yaqapaschá Davidqa llumpayta unquchkarqa (Sal. 41:1-9). Wañurachinanta yacharuspanmi Davidqa churinmanta ayqikurqa. Chaymantam Absalonpa soldadonkuna Davidpa soldadonkunawan pelearqaku. Hinaptinmi Davidpa soldadonkuna venceruspanku Absalontapas wañurachirqaku.

10. ¿Imatam kamachiq Davidqa sasachakuypi tarikuspan ruwarunman karqa?

¹⁰ David kaspanchikqa imaynaraq kachwan karqa. Payqa churin Absalontawan yanapaqnin Aitofeltaqa anchatam kuyarqa. Chaywanpas qipancharuspankum Davidtaqa wañurachiyta munarqaku. Chayrayku Davidqa ichapas piensanman karqa wakin amistadninkunapas churin Absalonman hukllawakurusqankuta. Chaymantapas, kikillanpi hapipakuspanchá ayqikunman karqa, utaqchá hukmanyasqa tarikuspan manaña ima ruwaytapas atinmanchu karqa. Ichaqa manamá Davidqa chaytachu ruwarqa. Chaynaqa, ¿imataq yanaparqa chayna sasachakuypi tarikuspan mana hukmanyarunanpaq?

11. ¿Imatam kamachiq David ruwarqa sasachakuypi tarikuspan?

¹¹ 3) Yuyaymanasun. ¿Imatam yachachwan kamachiq Davidta ima pasasqanmanta? ¿Imatam David ruwarqa sasachakuypi tarikuspan? Manam payqa manchakuspanchu mana ima ruwaytapas atirqa. Manataqmi llutanpichu imatapas tantiarurqa, aswanqa Jehova Diostam mañakurqa yanapaykunanpaq. Nirqataqmi amistadninkunatapas yanapaykunanpaq. Tantiaruspanqa chayman hina ruwananpaqmi kallpanchakuq. Llakisqa kaspanpas manam Jehova Diospaqwan amistadninkunapaqqa piñakururqachu.

12. ¿Imaynatam Davidta Dios yanaparqa?

¹² ¿Imaynatam Davidta Jehova Dios yanaparqa? Sasachakuykunapi kaspan mana llumpayta hukmanyarunanpaqmi yanaparqa (Sal. 3:1-8; qallariyninpiwan). Yanaparqataqmi allinta tantiaspan chayman hina ruwananpaqpas. Diosqa Davidpa soldadonkunatapas peleaptinkum yanaparqa, chaynapi Davidta mana wañurachinankupaq.

13. ¿Imatam David hina ruwachwan pipas sientirachiwaptinchik? (Rimarimuytaq Mateo 18:15-17 nisqanmantapas).

¹³ 4) Yachasqanchikman hina kawsakusun. ¿Imatam David hina ruwachwan pipas sientirachiwaptinchik? Chaylla allinyanakunanchikpaqmi imatapas ruwananchik, chaypaqqa Mateo qillqapi Jesuspa nisqanman hinam ruwachwan (qaway Mateo 18:15-17). Manam piñakuspachu imatapas llutanpi tantiarunanchik. Jehova Diostayá mañakusun hawkalla kaspa yachaywan imatapas tantiananchikpaq. Hinallayá iñiqmasinchikkunataqa kuyasun. Amayá paykunamantaqa iskayrayasunchu, yanapaykuwaptinchikqa chaskikusunyá (Prov. 17:17). Imamantapas astawanqa palabranpi Jehova Diospa niwasqanchiktayá kasukusun (Prov. 3:5, 6).

14. ¿Imakunapitaq yanapawachwan 2 Timoteo 1:12-16; 4:6-11 hinaspa 17-22 nisqanta ñawinchayninchik?

¹⁴ Jehova Diosta servinanchikta ayllunchik harkakuptinqa utaq Diosmanta willakuyninchikta autoridadkunapa harkakusqan llaqtapi yachaptinchikqa carcelpi kachkaspan  apostol Pablopa qillqasqankunata ñawinchayninchikmi yanapawachwan. Chaykunam tarikun 2 Timoteo 1:12-16; 4:6-11 hinaspa 17-22 nisqanpi. *

15. ¿Imapaqmi Jehova Diosta mañakuchwan?

¹⁵ 1) Diosta mañakusun. Pablopa qillqasqanta manaraq ñawinchachkaspayá taytanchik Jehova Diosman imayna tarikusqanchikta willakusun. Imapipuni yanapaykuwananchikpaqyá willakusun. Mañakusuntaqyá sasachakuykunapi Pablo tarikuptin ima yanapasqanmanta allinta entiendenanchikpaqpas.

16. ¿Ima sasachakuykunapim Pablo tarikurqa?

¹⁶ 2) Pablo kasqanchikta piensasun. Payqa Roma nacionpi carcelpi kaspanqa yachakurqañam manapas unaymanta wañurachinankutaqa. Wakin yanapaqninkunapas saqirurqakum. Pabloqa mana kallpayuq hinañam tarikurqa. ¿Imatam ruwachwan karqa Pablo hina tarikuspanchik? (2 Tim. 1:15).

17. ¿Imatam Pabloqa sasachakuypi kaspan ninman karqa?

¹⁷ Pabloqa ichapas ninman karqa: “Jesuspa qatiqnin kanaypaq mana tantiakuspayqa manachá kaynachu carcelpi kachkayman karqa”, nispan. Chaymantapas, wakin iñiqmasinkuna saqirusqanraykuchá piñakuruspan huk iñiqmasinkunamantapas iskayrayayta qallaykunman karqa, ichaqa manamá chaytaqa piensarqachu. Chaynaqa, ¿imam yanaparqa Jehova Diospi hinalla hapipakunanpaq hinaspa iñiqmasinkunamanta mana iskayrayananpaq?

18. ¿Imatam Pablo ruwarqa carcelpi kaspan mana hukmanyarunanpaq?

¹⁸ 3) Yuyaymanasun. ¿Imatam Pablo ruwarqa carcelpi kaspan mana hukmanyarunanpaq? Wañuchinankutaña yachaspanpas imamantapas puntataqa Diosta hatunchananpaqmi kallpanchakurqa. Chaymantapas hinallam tukuy sunqunwan Jehova Diosta mañakurqa, hinallataqmi kallpancharqa iñiqmasinkunatapas (2 Tim. 1:3). Wakin iñiqmasinkuna saqirusqanwan hukmanyarunanmantaqa kuyasqan iñiqmasinkuna yanapaykusqanmantam tukuy sunquwan agradecekurqa. Pabloqa manataqmi saqirurqachu Diospa palabranmanta yachaytapas (2 Tim. 3:16, 17; 4:13). Manataqmi iskayrayarqachu Jehova Dioswan Jesus kuyasqanmantaqa, mana haykapipas saqisqanmantaqa hinaspa kasukusqanrayku suyasqanta chaskinanmantaqa.

19. ¿Imaynatam Jehova Diosqa Pablota yanaparqa?

¹⁹ Jehova Diosqa nirqañam Pablotaqa payta servisqanrayku sasachakuykunapi kananmanta (Hech. 21:11-13). ¿Imaynatam Pablota yanaparqa? Mañakusqanta uyariykuspam hinaspa kallpanchaykuspam (2 Tim. 4:17). Nirqataqmi payman sunqu kasqanrayku Jesuswan kuska kamachimunanmantapas. Diosqa Pablotaqa yanapaykurqataqmi iñiqmasinkunawanpas.

20. Romanos 8:38, 39 nisqanman hinaqa, ¿imamantam Pablo mana iskayrayarqachu? ¿Imaynatam payta qatipakuchwan?

²⁰ 4) Yachasqanchikman hinayá kawsakusun. ¿Imaynatam Pablota qatipakuchwan? Pay hinam ñuqanchikpas yachanchik Diosta servisqanchikrayku runakuna chiqniwananchikmanta (Mar. 10:29, 30). Chayna sasachakuypi kaspaqa Diosman sunqu kanapaqmi mañakunanchik, hinaspapas palabranmantam hinalla yachananchik. Imamantapas astawanqa Jehova Diosta hatunchanapaqmi kallpanchakunanchik. Manataqmi iskayrayananchikchu imaña-haykaña kaptinpas yanapawananchikmantaqa. Manamá Diospa kuyakuyninmantaqa imapas rakiwachwanchu (qaway Romanos 8:38, 39; Heb. 13:5, 6).

21. ¿Imataq iskay iñiqmasinchikkunata yanapan Diosta hinalla servinankupaq?

²¹ Ima sasachakuypiña kaptinchikpas bibliapi Diospa wakin serviqninkunamanta yachayninchikqa kallpanchawasunmi. Japon nacionpi yachaq tukuy tiemponwan willakuq iñiqmasinchikmi nin: “Achka runakunapa kasqanpi mana manchakuspay Diosmanta willakunaypaqmi yanapawarqa bibliapi Jonasmanta yachayniy”, nispa. Indonesia nacionpi yachaq musu iñiqmasinchiktañataqmi Rutmanta yachaynin yanapan tayta-maman mana testigo kaptinpas hinalla Diosmanta yachananpaq hinaspa tukuy sunquwan servinanpaq.

22. ¿Imatam ruwachwan ñawpaq tiempopi Diospa serviqninkunamanta allinta yachananchikpaq?

²² ¿Imakunataq yanapawachwan ñawpaq tiempopi Diospa serviqninkunamanta allinta yachananchikpaq? Chaypaqmi kachkan videokuna, uyarinallapaq actuacionkuna hinaspa “Iñiyninkuta qatipakunapaq” niq yachachikuykuna. * Chaykunata manaraq qawachkaspa, uyarichkaspa utaq leechkaspayá Jehova Diosta mañakusun paykunamanta allinta yachananchikpaq. Paykuna kasqanchikta utaq chaypi kasqanchikta hinayá piensasun. Imakuna ruwasqanpiyá yuyaymanasun, yuyaymanasuntaqyá sasachakuykunapi kaptin Dios imayna yanapasqanpipas. Paykunatayá qatipakusun sasachakuypi kaspanchik. Chaymantañataqyá yachasqanchikmanta Jehova Diosta agradecekusun, hinaspapas iñiqmasinchikkunatayá kallpanchasun.

23. ¿Imatam taytanchik Jehova Dios niwanchik Isaias 41:10, 13 nisqanpi?

²³ Kay pachapi satanas munaychakusqanraykum sasachakuykunapi kasun. Wakinpiqa manam ima ruwaytapas atisunchu (2 Tim. 3:1). Chaywanpas manam manchakunanchikchu. Taytanchik Jehova Diosqa qawamuwachkanchikmi ima sasachakuypi kasqanchiktapas, chaymi yanapaykuwananchikpaq kikin niwanchik (qaway Isaias 41:10, 13). Chaynaqa, manapunim iskayrayananchikchu ima sasachakuypiña kaptinchikpas palabranwan Dios yanapaykuwananchikmantaqa.