1. Save problemija šaj te ovel len disave e Jehovase sluge?

DA LI doživineja disavo baro problemi? Šaj neko ki skupština povredinđa tut (Jak. 3:2). Ja šaj te kolege ki buti ja te amala ki škola marena tuće muj sebepi so služineja e Jehovase (1. Petr. 4:3, 4). Ja šaj neko andi ti porodica na mukhela tut te đa ko sastankija hem te vaćere averencar ando Jehova (Mat. 10:35, 36). Šaj o problemi tano odobor baro so avela tuće ki godi te ćhinave te služine e Jehovase. Ama, savo god te ovel o problemi, ov sigurno so o Jehova ka pomožini tuće mudro te postupine hem ka del tut snaga te istrajine.

2. Premalo Rimljanima 15:4, sar šaj e Devleso Lafi te utičini upro amende?

² Ko po Lafi, o Jehova dinđa te pisinen pe disave primerija kola mothovena amenđe sar šaj o nesavršena manuša te istrajinen ked isi len problemija. Sose? Te šaj amen te sikljova olendar. O Jehova koristinđa e Pavle te pisini odola lafija ko Rimljanima 15:4. (Čitin.) Ked čitinaja odola izveštaija amen dobinaja uteha hem nada. Ama, nane dovoljno samo te čitina e Devleso Lafi. Amen valjani te dozvolina e Devleso Lafi te oblikujini amaro način sar razmislinaja hem odola lafija te takinen amen ko vilo. Na primer, so šaj te pomožini tuće ako valjani tuće savet sar te rešine disavo problemi? Šaj te koristine akala štar buća: (1) molin tut, (2) ćer tuće slika ki godi, (3) hor razmislin, (4) primenin. Akana ka razmotrina akala štar buća. * Palo odova, ka dikha so šaj te  sikljova ando kralj David hem ando apostol Pavle đi koristinaja akala štar buća te proučina e Devleso Lafi.

3. So valjani te ćere angleder te počmine te čitine e Devleso Lafi hem sose?

³ (1) Molin tut. Angleder te počmine te čitine e Devleso Lafi, molin tut e Jehovase te pomožini tut te dikhe sar šaj te koristini tuće odova so čitineja. Na primer, molin tut e Jehovase te pomožini tut ko oleso Lafi te arakhe o načelija kola ka pomožinen tut te đane so te ćere (Fil. 4:6, 7; Jak. 1:5).

4. So šaj te ćere te šaj jekh izveštaj andi Biblija te ovel tuće sar diso so ćaće ulo?

⁴ (2) Ćer tuće slika ki godi. O Jehova dinđa amen sposobnost te zamislina o buća. Te šaj odova izveštaj andi Biblija te ovel tuće sar diso so ćaće ulo, pokušin te zamisline so desini pe ko odova izveštaj hem so tu hijan odova manuš kastar čitineja. Ćhiv tut ko oleso than hem dikh odova so ov dikhela hem osetin odova so ov osetini.

5. Sostar šaj hor te razmisline hem sar šaj te ćere odova?

⁵ (3) Hor razmislin. Šaj hor te razmisline ando odova so čitineja hem ando odova sar šaj odola informacije te primenine ko to životi. Ađahar ka povezine o mislija hem pošukar ka haljove odova so čitineja. Ako čitineja i Biblija, a na razmislineja hor odolestar, odova tano sar ked dikheja i slagalica koja nane sastavimi. Ked hor razmislineja, odova tano sar ked sastavineja i slagalica te šaj te ovel tut celo slika. Te šaj hor te razmisline puć tut akala pućiba hem odgovorin upro olende: „So ćerđa i osoba ando akava izveštaj te šaj te rešini po problemi? Sar o Jehova pomožinđa la? Sar šaj akava so sikljiljum te pomožini man te istrajinav ko me problemija?“

6. Sose mora te primenina odova so sikljovaja?

⁶ (4) Primenin. O Isus phenđa so ako na primeninaja odova so sikljovaja, amen hijam sar o manuš kova ćerela po ćher ki pošik. Iako ov dela sa pestar, oleso trud ka ovel uzaludno. Sose? Odolese so ked ka avel i oluja hem ked o bare panja ka bujinen ko oleso ćher, ov ka perel (Mat. 7:24-27). Isto ađahar, ako molinaja amen, ćeraja slika ki godi hem hor razmislinaja, ama na primeninaja odova so sikljovaja, amaro trud ka ovel uzaludno. Ked isi amen problemija ja doživinaja progonstvo, amari vera na ka ovel dovoljno zorali. Ki aver strana, ked proučinaja hem primeninaja odova so sikljovaja, amen ka ana pošukar odluke, ka ovel amen pobaro mir hem amari vera ka ovel pozorali (Is. 48:17, 18). Akana ka dikha so šaj te sikljova andi jekh situacija ando e Davideso životi. Ði ćeraja odova ka koristina akala štar buća kolendar đi akana vaćerđam.

7. Kova izveštaj akana ka razmotrina?

⁷ Da li našalđan to poverenje upro to amal ja upro nekas andi ti porodica? Ako ja, tegani but ka pomožini tuće o izveštaj ando kralj David ked oleso ćhavo, o Avesalom, izdajinđa le hem pokušinđa pes te ćhivel te ovel kralj (2. Sam. 15:5-14, 31; 18:6-14).

8. So šaj te ćere te šaj o Jehova te pomožini tut?

⁸ (1) Molin tut. Ði razmislineja ando akava izveštaj, vaćer e Jehovase sar osetineja tut sebepi so neko lošno ponašinđa pe premalo tute (Ps. 6:6-9). Ov konkretno. Molin tut e Jehovase te pomožini tuće te arakhe o načelija kola ka pomožinen tut te đane so te ćere.

9. So ulo maškaro David hem o Avesalom?

⁹ (2) Ćer tuće slika ki godi. Razmislin ando događaija kotar akava izveštaj hem zamislin sar o kralj David osetini pe. E Davideso ćhavo, o Avesalom, beršencar trudini pe o  manuša te zamangen le (2. Sam. 15:7). Ov haljola soj tano akana pravo vreme hem bićhali pe manušen ko celo Izrael te ubedinen e narodo te prihvatinen ole te ovel olengo kralj. Ov čak ubedini e Davidese šukar amale hem e savetniko, e Ahitofele, te pridružini pe olese ki pobuna. O Avesalom kokri pes ćhivela te ovel kralj hem pokušini te astari hem te mudari e Davide, kova tegani hine but nabormo (Ps. 41:1-9). O David šunela aso odova hem našela ando Jerusalim. Ko krajo, i vojska ando Avesalom borini pe e Davidese vojskaja. E Davidesi vojska pobedini, a o Avesalom ovela mudardo.

10. Sar o kralj David šajinđa te reagujini?

¹⁰ Akana, zamislin sar osetinđa pe o David palo sa akava so ulo lese. Ov manglja pe ćhave hem hine le poverenje upro po amal. Ama, on solduj izdajinđe le. On but povredinđe le hem čak pokušinđe te mudaren le. O David šajinđa te našali po poverenje upro pe avera amala, ađahar so bi ćhivela pese ki godi so hem on pridružinđe pe e Avesalomese. Ov šajinđa te mislini samo upro peste hem kokri te đal ki aver phuv. Ja šajinđa te vazdel pe vasta ando sa. Ama, o David na ćerđa nijekh ando akala buća. Umesto odova, ov na mukhlja te peravi le akija kušnja. Sar uspinđa te ćerel odova?

11. Sar o David reagujinđa ked hine ko problemija?

¹¹ (3) Hor razmislin. Kola načelija arakhljan ko akava izveštaj? Puć kokri tut: „So ćerđa o David te šaj te pomožini kokri pese?“ Ov na ćerđa panika hem na anđa nemudra odluke. Sebepi so na ukočinđa pe andi dar, ov na odugovlačinđa. Umesto odova, ov molinđa pe e Jehovase te pomožini lese. Isto ađahar, o David rodinđa pomoć ando pe amala. Ov sigate ćerđa odova so odlučinđa. Iako hine but povredimo, ov na hine negativno hem na ićerđa i holi ano peste. Umesto odova, ov hem ponodri hine le poverenje upro Jehova hem upro pe amala.

12. Sar o Jehova pomožinđa e Davidese?

¹² Sar o Jehova pomožinđa e Davidese? Ako hari ka istražine, ka dikhe so o Jehova dinđa e Davidese snaga te istrajini ki akija kušnja (Ps. 3:1-8; uvod). O Jehova blagoslovinđa e Davidese odluke. Ov pomožinđa e Davidese amalenđe ked on borinđe pe te zaštitinen pe kraljo.

13. Sar šaj te oponašine e Davide ked neko but povredini tut? (Matej 18:15-17)

¹³ (4) Primenin. Šaj te puće kokri tut: „Sar šaj te oponašinav e Davideso primer?“ Valjani sigate te reagujine te rešine o problemi. Premalo odova ki koja situacija hijan, šaj te ćere odova so o Isus phenđa ko Matej 18. poglavlje ja šaj te primenine o načelo ando odova stih. (Čitin Matej 18:15-17.) Ked hijan holjamo, ma siđar te ane odluke. Valjani te moline tut e Jehovase te del tut mir hem mudrost te šaj te đane so te ćere. Ma našal ti vera upro te amala. Umesto odova, prihvatin olengi pomoć (Posl. 17:17). Odova soj tano najvažno, ićer tut ko savet kova o Jehova dela tut prekalo po Lafi (Posl. 3:5, 6).

14. Ko kola situacije o lafija andi 2. Timoteju 1:12-16; 4:6-11, 17-22 šaj te ohrabrinen tut?

¹⁴ Da li neko ki ti porodica protivini pe tuće sebepi so služineja e Jehovase? Ja da li živineja ki phuv kuri tane amare aktivnostija ograničime ja čak zabranime? Ako ja, tegani šaj te ohrabrinen tut o lafija andi 2. Timoteju 1:12-16 hem 4:6-11, 17-22. * O Pavle akala stihija pisinđa đi hine ko phanlipe.

15. Aso so šaj te moline tut e Jehovase?

 ¹⁵ (1) Molin tut. Angleder te čitine akala stihija, vaćer e Jehovase ando to problemi hem phen lese sar osetineja tut sebepi odova. Ov konkretno. Ði čitineja ando odova kola kušnje o Pavle hine le, rode ando Jehova te pomožini tuće te arakhe o načelija kola ka pomožinen tut te đane so valjani te ćere.

16. So desinđa pe e Pavlese?

¹⁶ (2) Ćer tuće slika ki godi. Zamislin tut so hijan ko e Pavleso than. Ov tano akana ko phanlipe ko Rim. Ov hem angleder hine ko phanlipe, ama akana tano sigurno so ka ovel mudardo. Disave ando olese amala mukhlje le hem ov akana nane le više snaga (2. Tim. 1:15).

17. So šajinđa o Pavle te ćerel?

¹⁷ O Pavle šajinđa te mislini ki prošlost hem te mislini so ked bi anela averćhane odluke ko po životi, ov akana na bi ovela ko phanlipe. Ov šajinđa te holjani upro phralja andi Azija kola mukhlje le hem šajinđa te ovel negativno premalo pe avera amala. Ama, o Pavle na ćerđa nijekh ando akala buća. Sose o Pavle šajinđa hem ponodri te verujini pe amalenđe hem te ovel uverimo so o Jehova ka blagoslovini le?

18. Sar o Pavle reagujinđa ked hine ko problemija?

¹⁸ (3) Hor razmislin. Puć tut: „So ćerđa o Pavle te šaj te pomožini kokri pese?“ Čak hem ked đanđa so pana hari ka ovel mudardo, ov na bisterđa soj tano najvažno te anel slava e Jehovase. Ov hem ponodri razmislinđa sar šaj te ohrabrini averen hem osloninđa pe upro Jehova ađahar so redovno molinđa pe (2. Tim. 1:3). Umesto te razmislini samo ando okola kola mukhlje le, ov mothovđa soj tano zahvalno pe amalenđe sebepi so pomožinđe lese ko razna načinija (2. Tim. 3:16, 17; 4:13). Uzo odova, o Pavle hem ponodri proučinđa e Devleso Lafi. Soj tano najvažno, ov hine sigurno so o Jehova hem o Isus mangena le. On na mukhlje le hem hine sigurno so on ka nagradinen le sebepi olesi verno služba.

19. Sar o Jehova pomožinđa e Pavlese?

¹⁹ O Jehova upozorinđa e Pavle so ka ovel progonimo sebepi soj tano hrišćanin (Dela 21:11-13). Sar o Jehova pomožinđa e Pavlese? Ov odgovorinđa ko olese molitve hem ko pravo vreme zorjaćerđa le (2. Tim. 4:17). O Jehova uverinđa e Pavle so ov ka dobini i nagrada asi koja but trudinđa pe. Isto ađahar, o Jehova podstakninđa e Pavlese amalen te pomožinen le ko razna načinija.

20. Ked razmislinaja ando lafija kotar o Rimljanima 8:38, 39, sar šaj te oponašina e Pavleso primer?

²⁰ (4) Primenin. Puć tut: „Sar šaj me te oponašinav e Pavle?“ Sar o Pavle, hem amen valjani te očekujina so ka ova progonime sebepi so služinaja e Jehovase (Mar. 10:29, 30). Te šaj te aćhova verna e Jehovase ked hijam ko kušnje, amen valjani te oslonina amen upro leste ađahar so ka molina amen hem ađahar so redovno ka proučina oleso Lafi. Niked na valjani te bistra so jekh andi najvažno buti koja valjani te ćera tani te slavina e Jehova. Šaj te ova sigurna so o Jehova niked na ka mukhel amen hem so niko našti te ćhinavi le te mangel amen (Čitin Rimljanima 8:38, 39; Jevr. 13:5, 6).

21. So pomožinđa jekha phenjaće hem jekhe phralese te savladinen pe problemija?

²¹ O primerija andi Biblija šaj te pomožinen amen te ovel amen snaga te istrajina ko amare problemija. Na primer, i Aja, jekh phen koja služini sar pionir ko Japan, phenela  so i priča ando Jona pomožinđa laće te na daral te svedočini ko javna thana. O Hektor, jekh terno phral andi Indonezija kase roditeljija nane e Jehovase svedokija, phenela so e Rutako primer podstakninđa le te sikljol pobuter ando Jehova hem te služini olese.

22. Ko so šaj te pomožinen amen amare video-izdanja, o dramsko čitibe andi Biblija hem i serija ando člankija „Primeri vere“?

²² Kuri šaj te arakhe e biblijake primerija kola šaj te zorjaćeren tut? Amare video-izdanja, o dramsko čitibe andi Biblija hem i serija ando člankija „Primeri vere“, šaj te pomožinen tut ko e biblijake izveštaija te dikhe sar diso so ćaće ulo. * Angleder te dikhe, te šune ja te čitine akala šukar istražime izveštaija, molin tut e Jehovase te pomožini tut te arakhe disave mislija kola šaj te primenine. Zamislin so tu hijan odija osoba kolatar čitineja. Hor razmislin ando odova so e Jehovase verna sluge ćerđe hem sar ov pomožinđa len te istrajinen ko pe problemija. Palo odova, primenin odova so sikljiljan ko to životi. Zahvalin e Jehovase asi pomoć koja već dobineja. Mothov so hijan zahvalno asi pomoć ađahar so ohrabrineja averen hem pomožineja lenđe.

23. Premalo Isaija 41:10, 13, so o Jehova obećini so ka ćerel amenđe?

²³ O životi ko akava sveto kuri vladini o Satana šaj te ovel but pharo hem disavo puti na đanaja so te ćera (2. Tim. 3:1). Ama, na valjani te brinina amen ja te dara. O Jehova đanela kola problemija isi amen. Ked peraja, o Jehova obećini so ka ićeri amen pe zorale desno vasteja. (Čitin Isaija 41:10, 13.) Amen hijam sigurna so o Jehova ka pomožini amen hem so i Biblija ka del amen snaga te istrajina ko amare problemija.