1. He swini swikazratu leswi vhanu va Yehovha va nga ha langutanaka na swone?

XANA u langutana ni xikazratu lexikulu? Swi nga yentxeka u khunguvanyisiwi hi mhunu wa kukazri a bandleni. (Yk 3:2) Kumbe xana a vatizrikuloni kumbe vadondzrikuloni va ku poyila hi leswi u tizrelaka Yehovha. (1Pe 4:3, 4) Kumbe swizro swa ndangu swi dzringisa ku ku sivela akuva u nga yi mintlhanganwini kumbe u nga zrezri. (Mt 10:35, 36) Loko xikazratu xi bindzra ngopfu, u nga ha titwa u hele ntamu lakakuva u vona swi yampswa kuva u yima ku tizrela Yehovha. Swi nge na mhaka leswaku he swini swikazratu leswi u kumanaka na swone, Yehovha a ta ku nyika wutlhazri akuva u teka swiboho leswinene nakone a ta ku tiyisa ka swiyimu swoleswo.

2. Hi ku ya hi Ba-le-Roma 15:4, ku dondzra Zritu dzra Xikwembu Nkulukumba swi nga hi pfunisa kuyini?

² A Zritwini dzrakwe, Yehovha a tiyisekise leswaku ku tsraliwa swikombiso swa ndlela leyi vhanu va ku kala ku hetiseka va langutaniki ha yone ni swikazratu leswikulu. Ha yini a yentxe leswo? Akuva hi dondzra ha vone. Hi leswi Yehovha a huhuteliki mupostola Pawulo akuva a swi tsrala. (Dondzra Ba-le-Roma 15:4.) Ku dondzra madzrungula lawo, swi nga hi txhavelela swi tlhela swi hi nyika dumbo hi ndlela ya kukazri. Nambi tanu, akuva Bibele dzri hi pfuna, a hi fanelanga hi dzri dondzra akuva hi khalutisa nkama, hi fanela ku pfumelela matsralwa ma txintxa mayanakanyela yezru ma tlhela ma khumba mbilu yezru. Hi nga yentxa yini loko hi djula nkongomiso akuva hi lwisana ni xikazratu xa kukazri? Hi nga tizrisa magwasu lawa ya mune: 1) Khongota, 2) Swi vone hi miyanakanyu, 3) Yanakanyisisa, nakone 4) Swi tizrisi. A hi vone leswi gwasu ha dzrin’we dzri tlhamuxelaka  swone. * Hi ta gama hi tizrisa madondzrela lawo akuva hi dondzra hi ta wutomi bya hosi Davhida na mupostola Pawulo.

3. Na wu nge si na dondzra Bibele, i yini leswi u fanelaka ku swi yentxa nakone ha yini?

³ 1) Khongota. Na wu nge si na sungula ku dondzra Bibele, kombela Yehovha akuva a ku pfuna ku vona ndlela leyi u nga londzrovotaka ha yone leswi u djulaka ku swi hlaya. Hi xikombiso, loko u djula kongomiso mayelanu ni ndlela leyi u nga langusanaka ni xikazratu xa kukazri ha yone, kombela Yehovha akuva a ku pfuna leswaku u kuma minsinya ya milawu a Zritwini dzrakwe leyi yi nga ku kongomisaka.​—Flp 4:6, 7; Yk 1:5.

4. I yini lexi nga ku pfunaka ku yentxa dzrungula dzra Bibele dzri hanya?

⁴ 2) Swi vone hi miyanakanyu. Yehovha a hi nyiki wuswikoti lebyi hlamalisaka bya ku vona mintxhumu hi miyanakanyu. Akuva swi ku pfuna ku vona dzrungula dzra Bibele na dzri hanya, dzringisa ku swi vone hi miyanakanyu leswi yentxekaka u tlhela u tibeka a mbangwini wa mhunu lweyi ku khaneliwaka ha yene. Zama ku vona mintxhumu leyi mhunu wa kone a kumaniki na yone ni ku titwa hi ndlela leyi a titwiki ha yone.

5. I yini ku yanakanyisisa, nakone u nga yanakanyisisa hi ndlela yini?

⁵ 3) Yanakanyisisa. Ku yanakanyisisa swi tlhamuxela ku pimisa hi wuyenti hi leswi u swi dondzraka ni ndlela leyi dzrungula dzra kone dzri tizraka ha yone kwaku. Swi ku pfuna ku vona ku yelana ka timhaka u tlhela u ti twisisa hi wuyenti. Ku dondzra Bibele kambe u nga yanakanyisisi, swi fana ni ku langusa switlephu swa mufoto leswi tsremeleliwiki kambe u nga swi tlhanganisi. Ku yanakanyisisa swi fana ni ku tlhanganisela switlephu leswo akuva u kota ku vona mufoto hinkwawu. Xin’wana lexi taka ku pfuna ku yanakanyisisa i ku tihamba swivutiso swa ku fana ni leswi: ‘Xana lweyi ku khaneliwaka ha yene a yentxe yini akuva a lulamisa mhaka ya kone? Yehovha a mu pfunise kuyini? Leswi ni swi dondzriki lani, swi nga ni pfunisa kuyini ku tiyisela mindzringo?’

6. Ha yini hi fanela ku tizrisa leswi hi swi dondzraka?

⁶ 4) Swi tizrisi. Yesu a hlaye leswaku loko mhunu a nga swi tizrisi leswi a swi dondzraka a fana ni wanuna lweyi a yakaka yindlu yakwe a pfunyeni. A ntizro wakwe i wa mahala. Ha yini? Hikusa yindlu yoleyo yi ta wa loko ndhambhi ni xidzedze swi tlhasa. (Mt 7:24-27) Hi ndlela leyi fanaka, loko hi khongota, hi swi vona hi miyanakanyu hi tlhela hi yanakanyisisa kambe hi nga swi tizrisi leswi hi swi dondzraka, hi tava hi tikazrate mahala. Loko lipfumelo dzrezru dzri dzringiwa, hi ku va hi langutana ni swikazratu kumbe hi xanisiwa, dzrone dzri nga ti tiya. Hi tlhelo dzrimbeni loko hi tizrisa leswi hi swi dondzraka hi kota ku teka swiboho leswinene, hi kuma ku zrula nakone lipfumelo dzrezru dzri ya dzri tiya. (Eza 48:17, 18) Swoswi a hi tizriseni magwasu lawo ya mune akuva hi vona leswi hi nga swi dondzraka hi leswi humeleliki hosi Davhida.

7. He dzrini dzrungula dzra Bibele ledzri hi taka dzri kambisisa swoswi?

⁷ Xana u ni munghanu kumbe xaka ledzri u dzri dumbaka kambe dzri ku kanganyisiki? Loko swi li tanu, u ta pfuneka hi ku dondzra leswi Davhida a swi yentxiki loko n’wanakwe, Absalomu, a mu kanganyisile a va a dzringisa ku mu tekela wuhosi.​—2Sa 15:5-14, 31; 18:6-14.

8. U nga mu kombela yini Yehovha?

⁸ 1) Khongota. Na wu nga si na dondzra hi ta wutomi bya Davhida, khongota ka Yehovha u  mu byela leswi u titwisaka xiswone hi leswi va ku khunguvanyisiki. (Ps 6:6-9) U nga djikadjiki. Ntsrhaku ka leswo, kombela Yehovha a ku pfuna akuva u kuma minsinya ya milawu ya Bibele leyi nga ku kongomisaka loko u zama ku langutana ni swiyimu leswo swa ku kazrata.

9. I yini leswi yentxekiki a makazri ka Davhida na Absalomu?

⁹ 2) Swi vone hi miyanakanyu. Yanakanya hinkwaswu leswi humeleliki hosi Davhida ni ndlela leyi swi mu khumbiki ha yone. Ku dzringana malembe ya ku tala, Absalomu, n’wana wa Davhida, a zame ku tiyentxa n’wamunene akuva vhanu va mu zrandzra. (2Sa 15:7) Ntsrhaku, loko a vone leswaku i nkama wunene, a zrume tinhloli a tikweni hinkwadzru dzra Israyele akuva ti lulamisela vhanu akuva va mu yamukela swanga hosi yavu. A kote nambi ku wonga Ahitofel munghanu lwenkulu, tlhelo mutlhazrihisi wa Davhida, papayi wakwe, akuva a tipatsra na yene ka wupfukeli lebyo. Hi loko Absalomu a tihlaya hosi a va a zama ku khoma ni ku dlaya Davhida, lweyi a swi tikomba a a vabya ngopfu hi nkama wa kone. (Ps 41:1-9) Davhida a gungule kungu ledzro kutani a tsrutsrumela a Yerusalema. Hi wugamu masotxha ya Absalomu ma lwa ni masotxha lama dumbekaka ya Davhida. Hiloko masotxha lawa ya ku xandzruka ma hluliwa, ku va ku dlayiwa Absalomu, n’wana wa Davhida.

10. I yini leswi Davhida a a ta va a swi yentxile?

¹⁰ Swoswi pimisa hi ndlela leyi Davhida a titwiki ha yone hi hinkwaswu leswi a swi li ku mu yentxekeleni. Davhida a a mu zrandzra Absalomu. Nakone a a mu dumba Ahitofel. Nambi tanu, vanghanu lava lavakulu va mu kanganyisile ha wubidzri byavu. Va mu khunguvanyise ngopfu swinene, va va va zama ku mu dlaya. Davhida ina a nga ha va dumbanga vanghanu vakwe lavambeni, a pimisa leswaku na vone va mu seketelile Absalomu. Ina kumbe xana a tipimiselile yene a va a dzringisa ku tsrutsruma yene wuswakwe a huma tikweni. Kumbe xana ina a godolile a va a nga yentxi ntxhumu. Kambe Davhida a nga yentxanga ntxhumu ka hinkwaswu leswo. A matsrhan’wini ya leswo a hlule xiyimu lexo xa ku kazrata. A swi kotise kuyini?

11. Xana Davhida a langutanise kuyini ni xikazratu xakwe?

¹¹ 3) Yanakanyisisa. I yini leswi u nga swi dondzraka ka dzrungula ledzro? Hlamula xivutiso lexi: “I yini lexi Davhida a xi yentxiki akuva a tipfuna?” Davhida a nga tsremekaka nhlana, a teka swiboho hi magugu. A nga zruzrumelanga lakakuva a nga yentxi ntxhumu. A matsrhan’wini ya leswo, a kombele mpfunu wa Yehovha hi xikhongoto. A tlhele a kombela ni mpfunu wa vanghanu vakwe. A tekele ku yentxa leswi a a swi bohile. Nambi leswi a a khunguvanyeki ngopfu, Davhida a nga tsrhikanga ku dumba vhanu vambeni nambi ku tsrhama na a hlundzrukile. A tame a dumba Yehovha ni vanghanu vakwe.

12. Xana Yehovha a mu pfunise kuyini Davhida?

¹² Xana Yehovha a mu pfunise kuyini Davhida? Loko wo hambanyana wusetxhi u ta kuma leswaku Yehovha a nyike Davhida ntamu lowu a a wu vilela akuva a tiyiselela swikazratu leswi. (Ps 3:1-8; xihlokwanamhaka) Yehovha a swi tovokisile swiboho swa Davhida, nakone a tlhele a sizrelela vanghanu va Davhida va ku dumbeka loko va lwela ku sizrelela hosi yavu.

13. Xana hi nga mu yetisela hi ndlela yini Davhida loko mhunu a hi khunguvanyisa hi ndlela ya kukazri? (Mattheo 18:15-17)

¹³ 4) Swi tizrisi. Tivutise leswi: ‘Ni nga mu yetiselisa kuyini Davhida?’ Tekela ku yentxa xa kukazri akuva u lulamisa mhaka ya kone. Hi ku ya hi swiyimu swa kone u nga ha tizrisa xilayu xa Yesu lexi nga ka Mattheo ndzrima 18. (Dondzra Mattheo 18:15-17.) U nga teki xiboho hi magugu hi ku ya hi leswi u kwatisiki xiswone. Khongota, u kombela leswaku Yehovha a ku pfuna akuva u kuma ku zrula ka mbilu ni wutlhazri lebyi u byi vilelaka akuva u kota ku  lulamisa mhaka ya kone. U nga tsrhiki ku dumba vanghanu vaku. A matsrhan’wini ya leswo, yamukela mpfunu lowu va ku nyikaka wone. (Pr 17:17) Kambe a henhla ka hinkwaswu, tizrisa kongomiso lowu Yehovha a ku nyikaka wone, hi ku tizrisa Bibele.​—Pr 3:5, 6.

14. He swini swiyimu leswi u nga tiyisiwaka hi buku 2 Timoteo 1:12-16; 4:6-11, 17-22?

¹⁴ Xana maxaka yaku ma zama ku ku sivela akuva u tizrela Yehovha? Xana u hanya ka tiko ledzri a ntizro wa vhanu va Yehovha u siveleteliwaka ngopfu kumbe u tsimbisiwaka hi ku helela? Loko swi li tanu, u nga tiyisiwa hi ku dondzra 2 Timoteo 1:12-16 na 4:6-11, 17-22. * Pawulo a tsrale swiyenge leswo swa matsralwa na a li djele.

15. U nga mu kombela yini Yehovha?

¹⁵ 1) Khongota. Na wu nge si na dondzra tindzrimana leto, byela Yehovha xikazratu xaku ni ndlela leyi xi ku yentxaka u titwa ha yone. U nga djikadjiki. Kombela Yehovha a ku pfuna akuva u kuma minkongomiso leyi nga ka dzrungula dzra Pawulo, leyi nga ku pfunaka akuva na wene u tiva leswi u nga swi yentxaka.

16. He xini xiyimu lexi Pawulo a kumaniki na xone?

¹⁶ 2) Swi vone hi miyanakanyu. Tiyanakanyi na wu li ka xiyimu xa Pawulo. A tsrimbeleliwe hi matxhini a djele dzra le Roma. A same a petiwa djele, kambe khambi ledzri awa swi tiva leswaku a a yimela ku dlayiwa, nakone a kazralile swinene a mizrini.​—2Tm 1:15.

17. I yini leswi Pawulo ina ka a swi yentxile?

¹⁷ Pawulo a a tava a pimise hi khale kwakwe a va a tibyela leswi: “Loko a no teka xiboho lexi hambaniki, ina ni nga khomiwanga.” A a tava a hlundzrukele vavanuna lava mu tsrutsrumiki va le doropeni dzra Ásia nakone a a ta va a hlawule ku va a nga va dumbe vanghanu vakwe. Kambe Pawulo a nga yentxanga ni xin’we ka leswo. I yini lexi mu pfuniki ku tama a dumba vanghanu vakwe na Yehovha?

18. Xana Pawulo a langutanise kuyini ni swikazratu leswi a kumaniki na swone?

¹⁸ 3) Yanakanyisisa. Hlamula xivutiso lexi: I yini xi pfuniki Pawulo ku lulamisa swikazratu swakwe? Nambi leswi Pawulo a wo yimela ku dlayiwa a nga dzrivalanga leswaku he yini mhaka ya lisima, ku nga ku yisa lidzrumu ka Yehovha. A tlhele a ya mahlweni a yanakanya hi ndlela leyi a nga tiyisaka van’wana ha yone. A dumbe Yehovha hi ku khongota kwakwe minkama hinkwayu. (2Tm 1:3) A matsrhan’wini ya ku tsrhamela ku pimisa hi lava va mu tsrutsrumiki, Pawulo a kombise ku tlangela hi mbilu hinkwayu hi nseketelo wa lizrandzru lowu vanghanu vakwe va ku dumbeka va mu kombisiki hi tindlela ta ku kongoma. Handle ka leswo a ye mahlweni a dondzra Zritu dzra Xikwembu Nkulukumba. (2Tm 3:16, 17; 4:13) Ku tlula hinkwaswu a a dumba hi ku helela leswaku Yehovha na Yesu va mu zrandzra. A va nga mu tsrukulanga nakone a va ta mu hakela hi kola ka ntizro wakwe wa ku dumbeka.

19. Xana Yehovha a mu pfune hi ndlela yini Pawulo?

¹⁹ Yehovha a a mu byelile Pawulo leswaku a a ta kumana ni swikazratu hi leswi a a li mukriste. (Min 21:11-13) Xana Yehovha a mu pfunise kuyni Pawulo? A hlamule swikhongoto swakwe, nakone Yesu a ve tlhelweni ka Pawulo a mu nyika ntamu. (2Tm 4:17) Pawulo a tiyisekisewi leswaku a a ta dzri kuma hakelo ledzri a tizriki hi ntamu wakwe hinkwawu na a lwela dzrone. Yehovha a tlhele a tizrisa vanghanu va ku dumbeka va Pawulo akuva va mu pfuna hi tindlela ta ku kongoma.

20. Hi nga dzri yetisela hi ndlela yini lipfumelo dzra Pawulo hi lani swi kombisiwaka ha kone ka Ba-le-Roma 8:38, 39?

²⁰ 4) Swi tizrisi. Tivutise leswi. ‘Hi nga mu yetisa hi ndlela yini Pawulo?’ Ku fana na Pawulo hi fanela ku yimela ku xanisiwa hi kola ka lipfumelo  dzrezru. (Mr 10:29, 30) Akuva hi tama hi dumbeka loko hi dzringiwa, hi fanela ku tiseketela hi Yehovha hi xikhongoto hi tlhela hi va ni xihena lexinene xa ku dondzra Zritu dzrakwe minkama hinkwayu. Nakone minkama hinkwayu hi fanela ku dzrimuka leswaku wun’we wa mintxhumu ya lisima ngopfu leyi hi nga yi yentxaka, i ku yisa lidzrumu ka Yehovha. Hi nga tiyiseka hi ku helela leswaku Yehovha a nga ti za a hi tsrukulile nakone a ku na ntxhumu lexi vhanu va nga xi yentxaka lexi nga helisaka lizrandzru ledzri Yehovha a nga na dzrone ha hine.​—Dondzra Ba-le-Roma 8:38, 39; Hb 13:5, 6.

21. I yini lexi pfuniki Aya na Hector akuva va hlula swikazratu leswi a va kumana na swone?

²¹ Nambi loko swiyimu swezru swo tsrhamisisa kuyini, hi nga tiyisiwa hi swikombiso swa le Bibeleni. Hi xikombiso, Aya, phayona dzra kukazri a Japão, a hlaya leswaku xikombiso xa Yonasi xi mu pfunile akuva a hlula ku txhava ku zrezra a livaleni. Hector, mumpshwa wa kukazri a Indonésia, lweyi vapswele vakwe va kalaka va nga tizreli Yehovha, a hlaya leswaku xikombiso xa Ruti xi mu kutxile akuva a dondzra ha Yehovha ni ku va a mu tizrela.

22. Xana u nga ma londzrovota hi ndlela yini mavídeo lama seketeliwiki a Bibeleni ni xiyenge lixi liki “Tekelela Ripfumelo Ra Vona”?

²² U nga swi kuma kwini swikombiso swa le Bibeleni leswi nga ku tiyisaka? Mavideo yezru, madrama ya ku dondzra ka Bibele ni swiyenge leswi liki “Tekelela Ripfumelo Ra Vona”, swi nga ku pfuna akuva u yentxa dondzro yaku ya Bibele yi hanya. * Kutani kambisisa madzrungula wolawu ya Bibele lama sentxhiwiki ha hombe. Tivone a mbangwini wa mhunu lweyi u dondzraka ha yene. Yanakanyisisa hi leswi malandzra lawa ya ku zrandzreka ya Yehovha ma swi yentxiki ni ndlela leyi Yehovha a ma pfuniki ha yone ku hlula swikazratu. Kutani, tizrisa leswi u swi dondzriki. Khensa Yehovha hi mpfunu lowu a ku nyikaka swoswi, nakone kombisa ku tlangela mpfunu wolowo hi ku djuletela mikhandlu ya ku kutxa ni ku tiyisa vambeni.

23. Hi ku ya hi Ezaya 41:10, 13, i yini leswi Yehovha a dumbisaka ku hi yentxela swone?

²³ Wutomi a misaveni leyi yi fumiwaka hi Sathana byi nga ha bindzra hi va hi nga swi tivi swa ku swi yentxa. (2Tm 3:1) Kambe leswo a swi fanelanga swi hi hlatiyelisa kumbe ku hi txhavisa. Yehovha awa swi tiva leswi hi kumanaka na swone. Loko hi wa, a hi dumbisa ku hi khoma hi voko dzrakwe ledzra ntamu. (Dondzra Ezaya 41:10, 13.) Loko hi wu dumba hi ku helela nseketelo wakwe, hi nga kuma ntamu a matsralweni hi tlhela hi hlula xihinga xin’wana ni xin’wana.