1. Yihowa mannira hiittoo fonqoli iillansara dandaanno?

LOWO qarri iillanni noohe? Songote giddo mitu roduuwi xissiissinoheha ikkara dandaanno. (Yai. 3:2) Woy Yihowara soqqamattoha ikkootto daafira ledokki loossannori woy rossannori mishshannoheha ikkara dandaanno. (1 Phe. 4:3, 4) Woy maatekki miilla gambooshshe haˈrattota woy ammanakkire mannaho kulattota hooltahera woˈnaaltanni nooha ikkara dandaanno. (Mat. 10:35, 36) Iillinohe fonqoli lowo geeshsha xissiisinoheha ikkiro hexxo mudhattoha ikkara dandaanno. Iillannohe fonqoli ikkihano ikkiro Yihowa gara ikkinore assatto gede hayyo aannoheta hattono konne fonqolo dandiite saˈˈatto gede jawaante aannoheta addaxxa dandaatto.

2. Roomu Sokka 15:4 kultanno garinni Maganu Qaale nabbawanke kaaˈlitannonkehu hiittoonniiti?

² Yihowa Qaalisi giddo guuntete xeˈne noonsa manni, qarra dandiite saˈino gara kultanno xagge borreessiisino. Isi hatto assinohu insa xaggenni ronsammoraati. Hakko daafira Yihowa soqqamaasinchu Phaawuloosi tenne hedo coyiˈranno gede assino. (Roomu Sokka 15:4 nabbawi.) Tenne xagge nabbawanke jawaantenna hexxo afiˈneemmo gede assitannonke. Ikkirono horo afiˈrate Qullaawa Maxaafa nabbawatenni sainore assa hasiissannonke. Qullaawu Maxaafi rosi hedonke biddi assannonke gedenna wodaninkera coanno gede assiˈra hasiissannonke. Iillinonke qarra dandee saˈˈate biddishshu hasiisinonkeha ikkiro maa assa dandiineemmo? Aante noota shoole hayyo harunsa dandiineemmo: (1) Huuccatto, (2) Heda, (3) Hiincanna (4) Loosu aana hosiisa. Hanni tenne hayyo harunsa dandiineemmo  gara laˈno. * Hakkiinni kuri hayyo horoonsiˈne Moote Daawitinna soqqamaasinchu Phaawuloosira iillinonsarinni maa ronseemmoro laˈneemmo.

3. Qullaawa Maxaafa nabbawattora albaanni ma assa hasiissannohe? Mayira?

³ (1) Huuccatto. Qullaawa Maxaafa nabbawattora albaanni, nabbawattorinni horo afiˈra dandaatto gara afate kaaˈlahera Yihowa huucciˈri. Lawishshaho, iillinohe qarra dandiite saˈˈate amaale hasidhanni noottoha ikkiro, Qaalisi giddonni harunsattoha xintu seera afiˈratto gede kaaˈlahera Yihowa huucciˈra dandaatto.—Fil. 4:6, 7; Yai. 1:5.

4. Qullaawu Maxaafi rosi xawe leellannohe gede kaaˈlahera dandaannori maati?

⁴ (2) Heda. Yihowa dhagge ikkitannota hedate dandoo uyinonke. Qullaawu Maxaafi rosi xawe leellannohe gede nabbawatto xagge giddo ikkanni noore seekkite hedi, hattono xaggesi nabbabbanni nootto mancho ikkoottohu gede assite hedi. Hakku manchi lainore laˈˈate hattono isira macciishshaminosire huwatate woˈnaali.

5. Hiincate yaa mayyaate? Hiinca dandaattohu hiittoonniiti?

⁵ (3) Hiinca. Hiincate yaa nabbamboonnirenna hakkonne coye loosunni leellisha dandiinanni gara seekkine hedate. Tini nabbamboommore konni albaanni anfoommori ledo xaadinse hedatenna mitto coye seekkine huwatate kaaˈlitannonke. Qullaawa Maxaafa hiincinikkinni nabbawa, sagale qishiˈrate abbiˈnoonnire qishiˈnikkinni agurate gedeeti. Hiinca kayinni addi addire gamba assine coommitanno sagale wodhate gedeeti. Ateneeto togo yite xaˈmakki hiincate kaaˈlitannohe: ‘Xaggete giddo kulloonni manchi kaaˈlannosire maa assino? Yihowa kaaˈlinosihu hiittoonniiti? Tenne xaggenni rosoommori cince saˈˈate kaaˈlannoehu hiittoonniiti?’

6. Ronsoommore loosunni leellisha hasiissannonkehu mayiraati?

⁶ (4) Loosu aana hosiisa. Yesuusi ronsoommore loosu aana hosiinseemmokkiha ikkiro, mine shaafu aana miˈnino manchi gedeere ikkinoommota coyiˈrino. Togoo manchi daafure loosinoha ikkirono daafurisi kaphoho. Mayira yiniro minisi bubbenna lolahu daanno woyite diigamannoho. (Mat. 7:24-27) Hatteente gede ninkeno, huuccatto assiˈne, hende hattono hiincine kaˈne ronsoommore loosunni leellisha hoongummoro yannankenna wolqanke mulla guxxinoommo yaate. Ronsoommore loosunni leellisha hoongummoro fonqolu woy dartu iillannonke woyite ammananke baˈara dandiitanno. Xiinxallineemmohanna ronsoommore loosunni leellinsheemmoha ikkiro kayinni gara ikkinore assineemmo, giddiidi keere afiˈneemmo hattono ammananke kaajjitanno. (Isa. 48:17, 18) Hanni aleenni laˈnummota shoole hayyo horoonsiˈne Moote Daawitira iillinosirinni maa ronseemmoro laˈno.

7. Xa hiittenne Qullaawu Maxaafi xagge xiinxallineemmo?

⁷ Jaalikki woy maatekki miili xissiise egenninohe? Hatto ikkiro Moote Daawiti beetti Abeseloomi xagge xiinxallakki kaaˈlitannohe; isi annasi kaadino hattono annisi gashshoote adhate woˈnaalino.—2 Sam. 15:5-14, 31; 18:6-14.

8. Yihowa kaaˈlannohe gede ma assa dandaatto?

⁸ (1) Huuccatto. Nabbawootto xagge heddanni xissiisiˈrootto gara Yihowara hasaaphi. (Far. 6:6-9) Xissiisinohere badde kuˈli. Hakkiinni iillinohe qarra dandiite saˈˈate kaaˈlannohe biddishsha afiˈratto gede kaaˈlahera Yihowa huucciˈri.

9. Daawitinna Abeseloomi mereero mayi kalaqamino?

 ⁹ (2) Heda. Daawiti xagge nabbawatto woyite hakka woyite ikkinorenna kuni coyi gawajjinosihu hiittoonniitiro hedi. Daawiti beetti Abeseloomi mannu baxannosi gede assiˈrate lowo diro sharramino. (2 Sam. 15:7) Abeseloomi injiitinosi yanna hede, Israeelete manni iso gashshaancho asse adhanno gede ammansiisanno manna Israeelete gobba woˈma soyino. Isi Daawitira muli jaalanna amaalaancho ikkinoha Akixofeeli nafa ammansiise isira finqilanno gede assino. Abeseloomi isonooto moote asse lallawino hattono Daawiti amade shaara woˈnaalino; Daawiti hatte yannara lowo geeshsha dhiwame nooha ikkara dandaanno. (Far. 41:1-9) Daawiti tenne afiti Yerusaalametenni xooqe haˈrino. Gedensoonni Abeseloomi olanto Daawiti olanto ledo qasantino. Finqiltino olanto qeelantino, Daawiti beetti Abeseloomino reyino.

10. Moote Daawiti mayyee hedara dandaanno?

¹⁰ Hanni kuni baalu ikki woyite Daawitira mayi macciishshaminosiro hedi. Isi Abeseloomi baxanno hattono Akixofeeli ammananno. Ikkirono insa lamunku kaaddinosi. Insa isi lowo geeshsha xissiisiˈranno gede assitinosi hattono shaate nafa woˈnaaltino. Daawiti wolootu jaallasino Abeseloomira halantara dandiitanno yee insa ammana hoogara dandaanno. Isi umisi daafira calla hedanna callichisi wole gobba xooqa dandaanno. Woy hexxo mudhe facci asse agurara dandaanno. Ikkirono Daawiti kuri coyibba diassino. Hatteentenni isi iillinosi qarra dandee saino. Isi hatto assa dandiinohu mayiraati?

11. Daawiti qarru iillisi yannara maa assino?

¹¹ (3) Hiinca. Tenne xaggenni maa rosa dandaatto? Ateneeto togo yite xaˈmi: “Daawiti kaaˈlannosire maa assino?” Daawiti mase qece diyiino hattono muddame gara ikkinokkire diassino. Isi assannori baeennasi jalli yeeno digatino. Hatteentenni kaaˈlannosi gede Yihowa huucciˈrino. Qoleno kaaˈlitannosi gede jaallasi xaˈmirino. Isi assara hedinore rahe assino. Daawiti lowo geeshsha xissiisiˈrinoha ikkirono woloota ammana digiwino woy dicaaccaawino. Isi Yihowa addaxxino hattono jaallasi ammanino.

12. Yihowa Daawiti kaaˈlinohu hiittoonniiti?

¹² Yihowa Daawiti kaaˈlinohu hiittoonniiti? Mito geeshsha ledde xiinxallite, Yihowa Daawiti iillinosi qarra dandee saˈˈanno gede jawaante uyinosihu hiittoonniitiro afa dandaatto. (Far. 3:1-8; umoonni noo hedo lai.) Yihowa Daawiti assinore maassiˈrinosi. Hattono Daawititi ammanantino jaallasi iso gatisate gaarantu yannara kaaˈlinonsa.

13. Mittu manchi xissiisihero Daawiti lawishsha harunsa dandaattohu hiittoonniiti? (Maatewoosi 18:15-17)

¹³ (4) Loosu aana hosiisa. Ateneeto togo yite xaˈmi: ‘Daawiti lawishsha harunsa dandeemmohu hiittoonniiti?’ Qarru iillannohe woyite qarra tirate assa hasiissannohere rakke assi. Iillinohe qarri garinni, Yesuusi Maatewoosi fooliishsho 18 kulino amaale woy konni qummeeshshiha xintu seera harunsa dandaatto. (Maatewoosi 18:15-17 nabbawi.) Kayinni coyi xissiisinohe daafira muddante gara ikkinokkire assattokki gede qorophi. Yihowa wodanaaˈmatto gedenna gara ikkinore assatto gede kaaˈlahera huucciˈra hasiissannohe. Roduuwakki ammana agurtooti. Hatteentenni insa kaaˈlitannohe woyite maahoyye yii. (Law. 17:17) Baalunkunni roore Yihowa Qaalisi widoonni aannohe amaale harunsi.—Law. 3:5, 6.

14. Layinki Ximootewoosi 1:12-16; 4:6-11, 17-22 illachishatto gede assahera dandaannori maati?

¹⁴ Ammanakkinni kainohunni maatekki miilla gibbinohe? Woy heeˈrattohu Yihowa Farciˈraasine looso hoolloonni woy agamboonni gobbaraati? Hatto ikkiro, 2 Ximootewoosi 1: 12-16; 4:6-11, 17-22 * nabbawakki jawaachishshannohe. Phaawuloosi tenne sokka borreessinohu usuru mine heeˈreeti.

15. Yihowa ma assannohe gede huucciˈra dandaatto?

¹⁵ (1) Huuccatto. Tenne xagge nabbawattora albaanni, qarrakkinna kuni qarri xissiisinohe gara Yihowara hasaaphi. Qarrakki isira badde kuli. Hakkiinni, Phaawuloosira qarru iillinosita kultanno xaggenni, iillinohe qarra dandee saˈˈate kaaˈlannoheha xintu seera afiˈratto gede Yihowa huucciˈri.

16. Phaawuloosira iillinosiri maati?

¹⁶ (2) Heda. Phaawuloosira iillinori gedeeri iillinohehu gede assite hedi. Isi Roomaho usuru mine sansalatetenni usurame no. Isi hakkuyi albaannino usuramino; xa kayinni shinannisita afino. Iso jaallasi giddo mitu agurte hadhinosi hattono mannimmasi daafurtino.—2 Xim. 1:15.

17. Phaawuloosi mayyee hedara dandaanno?

¹⁷ Phaawuloosi alba iillinosi qarra qaage, ‘Diinaggaawe sabbaka aguroommoro xa diusurameemmo’ yee hedara dandaanno. Iisiyu qoqqowira noo jaallasi agurte hadhinositera caaccaawara dandaanno; hattono wole jaallasi ammana hoogara dandaanno. Kayinni Phaawuloosi kuri coyibba diassino. Phaawuloosi Yihowa addaxxinohunna jaallasi ammaninohu mayiraati?

18. Phaawuloosi qarru iillisi yannara maa assino?

¹⁸ (3) Hiinca. Ateneeto “Phaawuloosi kaaˈlannosire maa assino?” yite xaˈmi. Phaawuloosi shinannisita afinoha ikkirono, roore hasiisanno coyi Yihowa ayirranno gede assa ikkitinota dideino. Qoleno isi woloota jawaachishanno gara heda diagurino. Isi ganye huuccatto assiˈre Yihowa addaxxannota leellishino. (2 Xim. 1:3) Phaawuloosi agurte hadhinosiri daafira quwa sae heda agure ammanante baxillunni kaaˈlitinosi jaallasi lowo geeshsha galatino. Hattono Maganu Qaale xiinxalla diagurino. (2 Xim. 3:16, 17; 4:13) Baalunkunni roore Yihowanna Yesuusi baxxannosita woˈmunni woˈma addaxxino. Insa iso tugge diagurtinosi hattono ammaname soqqaminohura baˈraassinosi.

19. Yihowa Phaawuloosi kaaˈlinosihu hiittoonniiti?

¹⁹ Yihowa Phaawuloosi Kiristaancho ikkino daafira dartu iillannosita balaxe kulinosi. (Soq. 21:11-13) Yihowa Phaawuloosi kaaˈlinosihu hiittoonniiti? Isi Phaawuloosi huucciˈrino huuccattora dawaro qolinosi hattono wolqa uyinosi. (2 Xim. 4:17) Phaawuloosi baraarsha afiˈrate jawaate loosino daafira isi konne baraarsha afiˈrannota dihuluullamino. Yihowa, Phaawuloosi ammanantino jaallasino kaaˈlitannosi gede assino.

20. Roomu Sokka 8:38, 39 kultanno garinni Phaawuloosi iillinosi qarra cince saˈˈanno gede kaaˈlinosiri maati? Ati isi lawishsha harunsa dandaattohu hiittoonniiti?

²⁰ (4) Loosu aana hosiisa. Ateneeto togo yite xaˈmi, ‘Phaawuloosi lawishsha harunsa dandeemmohu hiittoonniiti?’ Phaawuloosi gede ninkerano ammanankenni kainohunni dartu iillankera dandaannota heda hasiissannonke. (Maq. 10:29, 30) Fonqolu iillannonke woyite ammanamme heeˈrate ganyine huuccatto assiˈranna woˈmanka woyite Qaalesi xiinxalla hasiissannonke. Baalunkunni roorino coyi Yihowa ayirranno gede assa ikkitinota woˈmanka woyite qaaga hasiissannonke. Yihowa tuge agurannonkekkitanna aye manchi assannorino isi baxilliwiinni badankera dandaannokkita addaxxa dandiineemmo.—Roomu Sokka 8:38, 39 nabbawi; Ibi. 13:5, 6.

21. Ayanna Hekiteri iillinonsa qarra qeelte saˈanno gede kaaˈlinonsari maati?

²¹ Heeˈnoommo gari ikkihano ikkiro, Qullaawu Maxaafi giddo kulloonni xaggenni jawaante afiˈra dandiineemmo. Lawishshaho,  Jaappaanete gobbara heedhannoti Aya yinanni suwisaancho, Yoonaasi xagge gudumaaleho waajjitukkinni soqqantanno gede kaaˈlitinoseta coyidhino. Indoneezhiyaho heeˈrannoha Hekiteri yinanni wedellicha, maatesi Yihowa Farciˈraasine ikka hooggurono Ruuti lawishshi Yihowa daafira rosatenna isira soqqamate kaˈˈanno gede assinosi.

22. Qullaawu Maxaafi diraaminninna Ammanatenni Insa Faale Hadhe yaanno maxaafira noo xaggenni horo afiˈra dandaattohu hiittoonniiti?

²² Jawaachishshannoheta Qullaawu Maxaafi lawishshuwa hiikkiinni afiˈra dandaatto? Viidiyubba, diraamu gariti Qullaawu Maxaafi niwaawe hattono Ammanatenni Insa Faale Hadhe (Amaaru Afoo) yaanno maxaafi Qullaawu Maxaafi xagge seekke huwatate kaaˈlannonke. * Seekkine xiinxalline qixxeessinoonnita kuri viidiyubba laˈˈattora woy macciishshattora hattono borro nabbawattora albaanni atera kaaˈlitanno hedo afiˈratto gede kaaˈlahera Yihowa huucciˈri. Xaggesi nabbabbanni nootto mancho ikkoottohu gede assite hedi. Kuni ammanaminohu Yihowa soqqamaanchi assinorenna Yihowa isi iillinosi qarra dandee saˈˈanno gede kaaˈlinosihu hiittoonniitiro hiinci. Hakkiinni konne roso loosu aana hosiisi. Kaaˈlinohe daafira Yihowa galati. Woloota jawaachishattonna kaaˈlatto faro hasidhe Yihowa assinoherira galatattota leellishi.

23. Isayaasi 41:10, 13 kultanno garinni Yihowa ma assankera qaale eino?

²³ Sheexaanu gashshinote tenne alamera heeˈneemmo heeshsho qarru batiˈrinote; mito woyite isinni kande amandeemmori baˈˈankera dandaanno. (2 Xim. 3:1) Ikkirono yaada woy waajja dihasiissannonke. Yihowa iillanni noonke qarra afino. Isi umbeemmo woyite jawaata ikkitinote qiniiticho angasinni amade kayisannonketa kulinonke. (Isayaasi 41:10, 13 nabbawi.) Isi kaaˈlannonketa woˈmunni woˈma addaxxine, Qullaawa Borronni jawaante afiˈranna iillannonke qarra baala qeelle saˈˈa dandiineemmo.