1. O ā luʻi e ono fesagaʻia e tagata o Ieova?

PO O e mafatia ona o se luʻi faigatā? Atonu na faatigā atu se tasi o le faapotopotoga iā te oe. (Iako. 3:2) Pe na tauemu atu foʻi ē tou te faigaluega pe aʻoʻoga faatasi ona o oe o se Molimau a Ieova. (1 Pete. 4:3, 4) Po ua taumafai foʻi ou tauaiga e taofia lou auai i sauniga po o lou talanoa atu i isi e faatatau i lou faatuatua. (Mata. 10:35, 36) Afai o loo e fesagaʻia se luʻi e sili ona faigatā, atonu o le a e lē toe fia auauna ai iā Ieova. Ae ia e mautinoa, po o ā lava luʻi o loo e fesagaʻia, e foaʻi atu e Ieova le atamai e fesagaʻia ai lenā luʻi ma le malosi e tumau ai.

2. E tusa ai ma le Roma 15:4, o ā aogā iā i tatou o le faitauina o le Afioga a le Atua?

² Ua faamauina e Ieova i lana Afioga faamatalaga auʻiliʻili e faatatau i auala na fesagaʻia ai e tagata lē lelei atoatoa luʻi faigatā. Aiseā? Ina ia tatou aʻoaʻoina mai ai ni lesona aogā. O lea, na faagaeeina e le agaga o Ieova le aposetolo o Paulo e tusia le Roma 15:4. (Faitau.) O le faitauina o na tala, o le a tatou maua ai faamāfanafanaga ma faamalosia ai lo tatou faamoemoe. Ae ina ia maua aogā, e lē lava le tau ina faitau o le Tusi Paia. E tatau ona tatou faatagaina le Tusi Paia e pāʻia o tatou loto ma suia le auala e tatou te mafaufau ai. O le ā e tatou te faia pe a manaʻomia se fautuaga e fesagaʻia ai se luʻi patino? E mafai ona tatou faia auala nei e fā: (1) Tatalo, (2) Faaāta, (3) Mafaufau loloto, ma le (4) Faatatau. Seʻi o tatou talanoaina  mea e aofia ai i na auala. * O le a tatou faaaogāina foʻi nei auala e aʻoaʻo mai ai lesona i mea na tutupu i le tupu o Tavita ma le aposetolo o Paulo.

3. A o leʻi faitauina le Tusi Paia, o le ā e tatau ona e faia ma aiseā?

³ (1) Tatalo. A o leʻi faitauina le Tusi Paia, tatalo iā Ieova ia e malamalama ma maua aogā mai i mea o le a e faitauina. O se faataʻitaʻiga, pe afai o loo e saʻilia se fautuaga i le auala e taulima ai se faafitauli, tatalo iā Ieova mo lana fesoasoani ina ia e maua ni mataupu silisili mai i lana Afioga e taʻitaʻia ai oe.—Fili. 4:6, 7; Iako. 1:5.

4. O le ā e te faia ina ia moni ai iā te oe le tala o le Tusi Paia o loo e faitauina?

⁴ (2) Faaāta. Ua foaʻi mai e Ieova iā i tatou se tomai mataʻina e faaāta ai mea. Ina ia moni iā te oe le tala o le Tusi Paia o loo e faitauina, ia taumafai e faaāta oe i le vaaiga ma taumafai e tuu oe i le tulaga o le tagata lea e te faitau i ai. Ia taumafai e iloa atu mea o loo ia vaaia ma ona faalogona.

5. O le ā le mafaufau loloto, ma e faapefea ona fai?

⁵ (3) Mafaufau loloto. O le mafaufau loloto, e uiga atu i le mafaufau lelei i mea e te faitau i ai ma le auala e te faatatauina ai. E fesoasoani iā te oe e faafesootaʻi ai manatu ma faalolotoina ai lou malamalama i se mataupu. O le faitauina o le Tusi Paia ae lē mafaufau loloto, e tai pei o se paso (jigsaw puzzle) o loo fola i luga o le laulau ona vaega eseese e leʻi tuu faatasia. Ae pe a mafaufau loloto, e pei ua tuufaatasi vaega eseese o le paso ina ia maua le ata atoa. Ina ia fesoasoani iā te oe e mafaufau loloto, ia fesili ma tali fesili nei. O le ā na faia e le tagata autū o le tala e foʻia ai lona faafitauli? Na faapefea ona fesoasoani Ieova iā te ia? E faapefea ona ou faaaogāina lesona na ou aʻoaʻoina mai i lenei tala ou te tumau ai e ui i luʻi?

6. Aiseā e tatau ai ona tatou faatatauina mea ua tatou aʻoaʻoina?

⁶ (4) Faatatau. Na fetalai Iesu, pe a tatou lē faatatauina mea ua tatou aʻoaʻoina, ua pei la i tatou o se tamāloa ua fau lona fale i luga o le oneone. E galue mamafa ae e maʻimau lona malosi. Aiseā? Auā pe a agi mai le matagi ma oo mai lologa ma taia ai lona fale, ona malepe ai lea. (Mata. 7:24-27) E faapena foʻi pe afai e na o lo tatou tatalo, faaāta ma mafaufau loloto ae lē faatatauina mea ua tatou aʻoaʻoina. O le a maʻimau lo tatou malosi. Pe a tofotofoina lo tatou faatuatua ona o luʻi ma sauāga, o le a lē malosi lo tatou faatuatua e faafetaiaʻia ai. Ae pe a tatou suʻesuʻe ma faatatau mea ua tatou aʻoaʻoina, o le a tatou faia la faaiʻuga atamai, faateleina lo tatou filemu ma atiaʻe se faatuatua malosi. (Isa. 48:17, 18) Seʻi o tatou faaaogāina auala e fā na tatou talanoaina, e aʻoaʻo mai ai ni lesona i mea na tutupu i le olaga o le tupu o Tavita.

7. O le ā le tala faale-Tusi Paia o le a tatou talanoaina?

⁷ Pe na faatigā atu sau uō po o se isi o ou tauaiga iā te oe? Afai o lea, o le a aogā la iā te oe le iloiloina o le tala e faatatau iā Apisaloma le atalii o le tupu o Tavita, lea na tetee i lona tamā ma foua le malo.—2 Samu. 15:5-14, 31; 18:6-14.

8. O ā mea e mafai ona e tatalo ai iā Ieova?

⁸ (1) Tatalo. Ae e te leʻi faitauina lenā tala, ia faailoa iā Ieova ou faalogona e faatatau i le auala na faileagaina ai oe. (Sala. 6:6-9) Ia faapatino au tatalo. Ia talosaga iā Ieova ia e iloa  mataupu silisili e taʻitaʻia ai oe, a o e taumafai e fesagaʻia lenā luʻi faigatā.

9. E faapefea ona e faamatalaina le mea na tupu iā Tavita ma Apisaloma?

⁹ (2) Faaāta. Ia manatunatu i mea na tutupu i lenā tala ma faaāta aafiaga na oo iā Tavita. E tele tausaga na galue ai Apisaloma e faaliliu atu loto o tagata Isaraelu iā te ia. (2 Samu. 15:7) Ina ua iloa e Apisaloma ua talafeagai le taimi, na ia auina atu loa sipai i itu uma o Isaraelu e sauniuni tagata ina ia talia o ia o lo latou tupu. Na ia faaliliuina foʻi le loto o Aitofele le uō vavalalata ma o se faufautua a Tavita, ina ia ʻau ma ia i le fouvalega. Na faailoa atu e Apisaloma ua avea o ia ma tupu ma na ia taumafai e puʻe ma fasiotia Tavita. E foliga mai o le taimi lenā o loo maʻi tigāina Tavita. (Sala. 41:1-9) Na iloa e Tavita lenā taupulepulega faalilolilo ma sola ese loa mai i Ierusalema. O le iʻuga, na tau le ʻautau a Apisaloma ma fitafita faamaoni a Tavita, ma na faatoʻilaloina le ʻau fouvale ma fasiotia ai Apisaloma.

10. O le ā na ono faia e le tupu o Tavita?

¹⁰ Seʻi faaāta faalogona o Tavita a o tutupu na mea iā te ia. Na alofa Tavita iā Apisaloma ma na ia maufaatuatuaina foʻi Aitofele. Peitaʻi, na faalataina o ia e nei tagata na vavalalata iā te ia. Na la matuā faatigā ma taumafai e fasioti Tavita. Na ono lē faatuatuaina e Tavita isi ana uō ma manatu ai ua latou ʻau faatasi ma Apisaloma. Na ono manatu Tavita mo lona lava lelei ma lotovaivai ai ma sola na o ia. Ae e leʻi faia e Tavita na mea, na ia manumalo mai i lenei luʻi faigatā. Aiseā na mafai ai ona ia faia faapea?

11. O le ā na faia e Tavita ina ia foʻia ai le faafitauli?

¹¹ (3) Mafaufau loloto. O ā mataupu silisili e tatou te aʻoaʻoina mai i lenei tala? Ia tali le fesili lenei. “O le ā na faia e Tavita e foʻia ai le faafitauli?” E leʻi popolevale Tavita ma faatopelau ona faia ni filifiliga lē atamai. E leʻi faimeatuu Tavita pe lē mautonu ona o le fefe. Ae na ia tatalo iā Ieova mo le fesoasoani. Na ia tāpā foʻi le fesoasoani a ana uō. Na vave ona ia gaoioi e faataunuu ana faaiʻuga. E ui ina matuā tigā faalogona o Tavita, ae e leʻi sesē ai lana vaai ma teulotoina le ita. Na ia maufaatuatuaina pea Ieova ma ana uō.

12. Na faapefea ona fesoasoani Ieova iā Tavita?

¹² Na faapefea ona fesoasoani Ieova iā Tavita? Pe a fai sau saʻiliʻiliga, o le a e iloa ai na foaʻi atu e Ieova iā Tavita le malosi na ia manaʻomia, e tumau ai e ui i lenā luʻi. (Sala. 3:1-8; ulutala) Na faamanuia Ieova i filifiliga a Tavita, ma na ia fesoasoani i uō faamaoni a Tavita a o tau e puipuia lo latou tupu.

13. E faapefea ona e faaaʻoaʻo iā Tavita pe a faatigā atu se tasi iā te oe? (Mataio 18:15-17)

¹³ (4) Faatatau. Ia fesili ifo, ʻE faapefea ona ou faaaʻoaʻo iā Tavita?’ E manaʻomia ona e vave gaoioi e foʻia le faafitauli. E mafai ona e faatatauina le fautuaga o loo i le Mataio mataupu e 18, e fua i le tulaga o mea. (Faitau le Mataio 18:15-17.) E lē tatau ona faatopelau ma fua a tatou faaiʻuga i o tatou faalogona. Ae e tatau ona tatalo iā Ieova e foaʻi atu se loto toʻafilemu, ma le atamai e manaʻomia e feagai ai ma lenā faafitauli. Ia maufaatuatuaina pea au uō ma talia la latou fesoasoani. (Faata. 17:17) Ae o le mea e sili ona tāua, ia mulimuli i fautuaga a Ieova o loo i lana Afioga.—Faata. 3:5, 6.

14. O ā mea e tutupu e ono faalaeiau ai oe e faitau le 2 Timoteo 1:12-16; 4:6-11, 17-22?

¹⁴ Po o e fesagaʻia ni teteega mai i lou aiga? Po o e nofo i se atunuu o loo iai ni faasāsāaga, po ua matuā faasā ai lava le  galuega a Molimau a Ieova? Afai o lea, e ono faalaeiauina oe i le faitauina o le 2 Timoteo 1:12-16 ma le 4:6-11, 17-22. * Na tusia e Paulo na mau a o faafalepuipuiina.

15. O le ā e mafai ona e tatalo ai iā Ieova?

¹⁵ (1) Tatalo. A o leʻi faitauina na mau, ia faailoa iā Ieova lou faafitauli ma ou faalogona. Ia sasaa atu iā Ieova ou faalogona moni. Ia talosaga iā Ieova ina ia e malamalama i mataupu silisili e faatatau i mea na tutupu iā Paulo, ma iloa ai le auala e fesagaʻia ai lou faafitauli.

16. E faapefea ona e faamatalaina le tulaga o Paulo?

¹⁶ (2) Faaāta. Seʻi tuu oe i le tulaga o Paulo. O loo saisaitia o ia i filifili i le falepuipui i Roma. Na faafalepuipui muamua o ia ae o le taimi lea, ua mautinoa e Paulo o le a fasiotia o ia. Ua tuulafoaʻia o ia e nisi o ana uō ma ua matuā vaivai lava.—2 Timo. 1:15.

17. O le ā na ono faia e Paulo?

¹⁷ Na ono uaʻi atu Paulo i lona olaga na iai muamua ma manatu ai, ana lē avea o ia ma Kerisiano e lē faafalepuipuiina. Na ono lototigā Paulo i tane na tuulafoaʻia o ia i Asia. Na ono sesē foʻi lana vaai i isi ana uō. Ae e leʻi faia e Paulo na mea. Aiseā na mautinoa ai pea ma saʻo le vaai a Paulo?

18. O le ā na faia e Paulo e fesagaʻia ai lenā luʻi faigatā?

¹⁸ (3) Mafaufau loloto. Ia tali le fesili lenei, “O le ā na faia e Paulo e foʻia ai le faafitauli?” E ui na mautinoa e Paulo ua toeitiiti fasiotia o ia, ae e leʻi sesē ai lana vaai i le mea e sili ona tāua, o le avatu o le viiga iā Ieova. Na faaauau pea ona mafaufau Paulo i mea e faalaeiau ai isi. Na ia faalagolago foʻi iā Ieova e ala i le tatalo e lē aunoa. (2 Timo. 1:3) Nai lo o le soona uaʻi atu o Paulo iā i latou na tuulafoaʻia o ia, na ia faaalia le lotofaafetai i ana uō faamaoni o ē na fesoasoani ma lagolagosua iā te ia. E lē gata i lea, na faaauau pea ona suʻesuʻe e Paulo le Afioga a le Atua. (2 Timo. 3:16, 17; 4:13) O le mea e sili ona tāua, na matuā mautinoa e Paulo, e alolofa Ieova ma Iesu iā te ia. E la te lē tuulafoaʻia o ia, ma o le a la tauia lana auaunaga faamaoni.

19. Na faapefea ona fesoasoani Ieova iā Paulo?

¹⁹ Na lapataʻia e Ieova Paulo o le avea ma Kerisiano, o le a ia fesagaʻia ai sauāga. (Galu. 21:11-13) Na faapefea ona fesoasoani Ieova iā Paulo? Na tali Ieova i tatalo a Paulo, ma mulimuli ane foaʻi atu iā te ia le mana. (2 Timo. 4:17) Na faamautinoa atu e Ieova iā Paulo o le a ia maua le taui na ia galue mamafa ai. Na faaaogā foʻi e Ieova uō faamaoni a Paulo e fesoasoani iā te ia.

20. I le Roma 8:38, 39, e faapefea ona tatou faaaʻoaʻo iā Paulo?

²⁰ (4) Faatatau. Ia fesili ifo, ʻE faapefea ona ou faaaʻoaʻo iā Paulo?’ E tatou te faatalitalia foʻi o le a sauāina i tatou, ona o i tatou o auauna a Ieova. (Mare. 10:29, 30) Ina ia tumau pea lo tatou faamaoni e ui i tofotofoga, e tatau ona tatou faalagolago iā Ieova, e ala i le tatalo ma suʻesuʻe e lē aunoa le Tusi Paia. E tatau ona tatou manatua i taimi uma, o se tasi o mea e sili ona tāua e tatou te faia, o le avatu o le viiga iā Ieova. Ia tatou mautinoa, e lē tuulafoaʻiina lava i tatou e Ieova, ma e leai foʻi se tasi e mafai ona aveesea lona alofa mo i tatou.—Faitau le Roma 8:38, 39; Epe. 13:5, 6.

21. O le ā na fesoasoani iā Aya ma Hector e foʻia ai luʻi na la fesagaʻia?

²¹ Po o le ā lava lo tatou tulaga, ae e faamalosia i tatou i faaaʻoaʻoga mai i le Tusi Paia. O se faataʻitaʻiga, na taʻua e Aya o se paeonia  mai i Iapani, na fesoasoani iā te ia le tala iā Iona e foʻia ai lona fefe i talaʻiga i nofoaga faitele. Na taʻua foʻi e Hector o se talavou i Indonesia e lē Molimau a Ieova ona mātua, na uunaʻia o ia e le faaaʻoaʻoga a Ruta e aʻoaʻo e faatatau iā Ieova ma auauna iā te ia.

22. E faapefea ona e maua le tele o aogā, mai i tala faale-Tusi Paia, ma le faasologa o mataupu “Faaaʻoaʻo i lo Latou Faatuatua”?

²² O fea e te maua ai faaaʻoaʻoga faale-Tusi Paia e faamalosia ai oe? E fesoasoani a tatou vitiō, tala faalogologo faale-Tusi Paia ma le faasologa o mataupu “Faaaʻoaʻo i lo latou Faatuatua,” e faamalosia ai oe. * A o e leʻi matamata, faalogologo pe faitau na tala, ia tatalo mo le fesoasoani a Ieova ina ia e iloa ni lesona tāua e te faatatauina. Ia tuu oe i le tulaga o le tagata o loo e faitau i ai. Ia mafaufau loloto i mea na faia e nei auauna faamaoni a Ieova, ma le auala na fesoasoani ai Ieova iā i latou e foʻia o latou faafitauli, ona faatatau lea o na lesona. Ia faafetai iā Ieova mo lana fesoasoani iā te oe. Ia faaalia foʻi lou talisapaia o lenā fesoasoani e ala i le saʻili o avanoa e faalaeiau ma fesoasoani ai i isi.

23. E tusa ai ma le Isaia 41:10, 13, o le ā ua folafola mai e Ieova mo i tatou?

²³ E faigatā lo tatou ola ai i se lalolagi o loo pulea e Satani, ma o nisi taimi e lofitūina ai i tatou i faafitauli. (2 Timo. 3:1) Ae e lē tatau ona tatou popole pe fefefe ai, auā o loo silafia e Ieova mea o loo tatou fesagaʻia. Ua folafola mai e Ieova pe a tatou paʻuʻū, o le a ia uuina i tatou i lona lima taumatau. (Faitau le Isaia 41:10, 13.) O lo tatou mautinoa atoatoa i lana fesoasoani, e tatou te maua ai le malosi mai i le Tusi Paia ma foʻia ai so o se faafitauli e tatou te fesagaʻia.