1. ¿Tuku tuwa titaxtuyaw tiku skujnaniyaw Jehová?

¿TITAXTUMAW tuku lu tuwa? Max chatum tala xalak congregación kinkatlawaninitan tuku nitlan (Sant. 3:2). O max tiku akxtum taʼanaw kʼescuela o tiku akxtum taskujaw kinkalikgalhkgamananan xlakata lakskujnaniyaw Jehová (1 Ped. 4:3, 4). O max tiku xalak kifamiliajkan tlawaputunkgo pi nialh kaʼaw ktamakxtumit o nialh nakalitachuwinanaw amakgapitsin tuku kanajlayaw (Mat. 10:35, 36). Komo tuku titaxtumaw lu kinkamakgapatinaman max uma nakinkamaxlajwaniyan. Pero tlan liwana nakatsiyaw pi kaxatukawa taʼakglhuwit tuku natitaxtuyaw, Jehová nakinkamaxkiyan liskgalala chu litliwakga xlakata nakatsiyaw la tlan natayaniyaw.

2. Chuna la wan Romanos 15:4, ¿la tlan nakinkamakgtayayan tuku likgalhtawakgayaw kBiblia?

² Anta kxTachuwin, Jehová matsokgninalh tuku tuwa titaxtukgolh makgapitsin latamanin chu chuna tlawalh xlakata wi tuku nakatsiniyaw. Wa uma tuku matsokgnilh Pablo anta kRomanos 15:4 (kalikgalhtawakga). Komo nakalikgalhtawakgayaw umakgolh, tlan nakinkamakgoxamixiyan chu nakinkamaxkiyan takgalhkgalhin. Pero ni kajwatiya talakaskin nalikgalhtawakgayaw Biblia, kilimastatkan talakaskin nalakgpali kintalakapastaknikan chu nalakgchan kinakujkan. Akxni titaxtuyaw tuku tuwa kkilatamatkan chu katsiputunaw la nalakkaxtlawayaw, tlan natlawayaw uma: 1) oración, 2) naʼakxilhlakachanaw tuku lanit, 3) nalilakpuwanaw chu 4) nalilatamayaw. La uku kalichuwinaw tuku kilhchanima pulakatunu uma. * Chu alistalh nalimaklakaskinaw uma xlakata nakatsiniyaw tuku titaxtukgolh mapakgsina David chu apóstol Pablo.

3. Akxni nina tsukuyaw likgalhtawakgayaw Biblia, ¿tuku kilitlawatkan, chu tuku xlakata?

 ³ 1) Katlawaw oración. Akxni nina tsukuyaw likgalhtawakgayaw Biblia, kaskiniw Jehová pi kakinkamakgtayan nalitamakgtayayaw tuku likgalhtawakgamaw. Akgtum liʼakxilhtit, komo putsamaw tamakgtay xlakata nalakkaxtlawayaw akgtum taʼakglhuwit, kaskiniw pi kakinkamakgtayan natekgsaw kxTachuwin tastakyaw nema nakinkapulalinan (Filip. 4:6, 7; Sant. 1:5).

4. ¿Tuku tlan nakinkamakgtayayan naʼakxilhlakachanaw kkintalakapastaknikan tuku lichuwinan Biblia?

⁴ 2) Kaʼakxilhlakachaw tuku lanit. Akxilhlakachankan tuku lanit, akgtum xtamaskiwin Jehová. Xlakata naʼakxilhlakachanaw kkintalakapastaknikan tuku lichuwinan Biblia, kalilakpuwaw tuku lama anta, kalakpuwaw pi anta wilaw chu kalilakpuwaw pi akinin titaxtumanaw tuku titaxtulh tiku lichuwinamaka, kaʼakxilhwi tuku xla akxilhli chu kamakgkatsiw tuku xla makgkatsilh.

5. ¿Tuku kilhchanima lilakpuwankan, chu tuku nakinkamakgtayayan nalilakpuwanaw tuku likgalhtawakgamaw?

⁵ 3) Kalilakpuwaw. Lilakpuwankan kilhchanima nalilakapastaknana tuku likgalhtawakgapat chu tuku masiyaniyan uma. Kinkamakgtayayan tlakg liwana naʼakgatekgsaw tuku likgalhtawakgamaw. Likgalhtawakgakan Biblia chu ni lilakpuwankan, xtachuna akxni kaxtlawakan liwat, komo ni putum nalakgmakapina miliwat tuku lilakgkaxtlawakan max ni kgama katitakgalhwanalh o max ni kgama katitaxtucha. Umakgolh takgalhskinin nakinkamakgtayayan nalilakpuwanaw tuku likgalhtawakgamaw: «¿Tuku tlawalh uma lataman xlakata nalakkaxtlawa xtaʼakglhuwit? ¿La makgtayalh Jehová? ¿La nakimakgtaya uma tuku kkatsininit xlakata tlan naktayani tuku tuwa ktitaxtuma?».

6. ¿Tuku xlakata xlakaskinka nalilatamayaw tuku katsiniyaw?

⁶ 4) Kalilatamaw. Jesús wa pi komo ni nalilatamayaw tuku katsiniyaw, litaxtuyaw xtachuna la chixku tiku tlawa xchik kxkgalhni muntsaya. Palha skuja, pero nitu litaxtu tuku tlawa. ¿Tuku xlakata? Xlakata akxni min lanka unisen, xchik lakxla (Mat. 7:24-27). Nachuna, komo tlawayaw oración, akxilhlakachanaw tuku lanit chu lilakpuwanaw, pero ni lilatamayaw tuku katsininitaw, nitu katilitaxtulh putum tuku tlawanitaw. Akxni natitaxtuyaw tuku tuwa o nakinkaputsastalanikanan, kintakanajlakan ni kintikamakgtayan. Pero komo nalakputsananiyaw chu nalilatamayaw tuku katsiniyaw, tlan tuku nalaksakaw, nakgalhiyaw takaksni chu kintakanajlakan natatliwakglha (Is. 48:17, 18). Katlawaw uma pulaktati xlakata wi tuku nakatsiniyaw tuku titaxtulh mapakgsina David.

7. ¿Tuku nalichuwinanaw?

⁷ ¿Tlawaninitan tuku nitlan chatum miʼamigo o tiku xalak mifamilia? Komo chuna, namakgtayayan nakatsiya tuku tlawalh mapakgsina David akxni xkgawasa, Absalón, tlawanilh tuku nitlan chu lakgamakglhtiputulh xtamapakgsin (2 Sam. 15:5-14, 31; 18:6-14).

8. ¿Tuku tlan natlawayaw xlakata Jehová nakinkamakgtayayan?

⁸ 1) Katlawaw oración. Kalilakpuwaw tuku nalikgalhtawakgayaw chu liwana kawaniw Jehová la makgkatsiyaw xlakata kinkatlawanikan tuku nitlan (Sal. 6:6-9). Alistalh, kaskiniw pi kakinkamakgtayan natekgsaw tastakyaw nema nakinkamakgtayayan nakatsiyaw tuku natlawayaw.

9. Kalichuwinanti tuku titaxtukgolh David chu Absalón.

⁹ 2) Kaʼakxilhlakachaw tuku lanit. Kaʼakxilhlakachaw tuku likgalhtawakgamaw chu kaʼakxilhlakachaw la mamakgkatsinilh putum uma mapakgsina David. Absalón liskujli xlakata latamanin tlan naʼakxilhkgo (2 Sam. 15:7). Akxni  akxilhli pi tlan xwanit, kamalakgachalh skgalananin kxliputum Israel xlakata nakawani latamanin pi xmapakgsinakan xlimaxtukgolh. Tlawalh pi Ahitofel xtatayalh, chatum chixku tiku kstakyawa chu xʼamigo xwanit David. Uma kilhtamaku Absalón xʼakstu mapakgsina limaxtuka, xputsastalanima chu xmakgniputun David, tiku max uma kilhtamaku lu xtatatlama (Sal. 41:1-9). Akxni David katsilh putum uma, tsalataxtulh kJerusalén. Alistalh, ksoldados Absalón talatlawakgolh ksoldados David tiku ni xmakgxtakgkgo. Katlajaka ksoldados Absalón chu xla makgnika.

10. ¿Tuku tlan xtitlawalh mapakgsina David?

¹⁰ Alistalh, kaʼakxilhlakachaw tuku makgkatsilh David. Xpaxki Absalón chu xlipawan Ahitofel. Maski chuna, xlakan akgskgawikgolh. Nitlan mamakgkatsinikgolh chu asta xmakgniputunkgo. David tlan xtilakpuwa pi amakgapitsin xʼamigos xtatayakgonit Absalón chu max xtitlawalh pi nialh xkalipawa. Tlan kajwatiya xtililakpuwa tuku xmakgkatsi chu xʼakstu xtsalataxtulh kpaís. O max tlan xtitaxlajwanilh, pero nichuna tlawalh. Wata tayanilh tuku tuwa xtitaxtuma. ¿Tuku makgtayalh chuna natlawa?

11. ¿Tuku tlawalh David akxni xtitaxtuma tuku tuwa?

¹¹ 3) Kalilakpuwaw. ¿Tuku tlan nakatsiniyaw xlakata uma? Tlan nalilakpuwanaw: «¿Tuku tlawalh David xlakata natayani?». Ni mastalh talakaskin pi lu xpekualh o pi uma xtlawalh pi nitlan tuku xlaksakli, wata tlawanilh oración Jehová xlakata naskini xtamakgtay. Na kaskinilh tamakgtay xʼamigos chu akxni wi tuku xlaksaka, lakapala chuna xtlawa. Maski tuwa tuku xtitaxtuma chuntiya kalipawa amakgapitsin chu ni kasitsinilh. Chuntiya kalipawa Jehová chu xʼamigos.

12. ¿La makgtayalh Jehová David?

¹² ¿La makgtayalh Jehová David? Komo tlakg naputsananaw, nakatsiyaw pi Jehová maxkilh litliwakga xlakata xtayanilh tuku tuwa xtitaxtuma (tuku litsuku Sal. 3:1-8). Jehová sikulunatlawalh tuku laksakli David chu na kamakgtayalh xʼamigos tiku makgtayakgolh akxni xputsastalanimaka.

13. Chuna la wan Mateo 18:15-17, ¿la tlan nastalaniyaw xliʼakxilhtit David akxni wi tiku nitlan nakinkamamakgkatsiniyan?

¹³ 4) Kalilatamaw. Kalilakpuwaw: «¿La tlan nakstalani xliʼakxilhtit David?». Pulaktum la tlan chuna natlawayaw wa akxni tunkun nalakkaxtlawayaw taʼakglhuwit. Maski tanu tanu tuku titaxtumaw tlan nastalaniyaw xtastakyaw Jesús nema tekgsaw kMateo capítulo 18 (kalikgalhtawakga Mateo 18:15-17). Pero ni kilimastatkan talakaskin pi tuku titaxtumaw natlawa pi lakapala tuku nalaksakaw. Kaskiniw Jehová pi kakinkamakgtayan ni lu nalakgaputsayaw chu liskgalala xlakata nakatsiyaw tuku natlawayaw. Chuntiya kakalipawaw kiʼamigoskan chu kamakgamakglhtinaw tamakgtay nema xlakan kinkamaxkikgoyan (Prov. 17:17). Chu tuku tlakg xlakaskinka, kastalaniw xtastakyaw Jehová nema kinkamaxkiyan kxTachuwin (Prov. 3:5, 6).

14. ¿Tuku kilhtamaku tlan nakinkamakgpuwantiniyan komo nalikgalhtawakgayaw 2 Timoteo 1:12-16 chu 4:6-11, 17-22?

¹⁴ ¿Kifamiliajkan ni kinkamaxkiyan talakaskin pi naskujnaniyaw Jehová? ¿O lamaw kʼakgtum país niku ni mastakan talakaskin natlawayaw kintaskujutkan? Komo chuna, tlan nakinkamakgpuwantiniyan komo nalikgalhtawakgayaw 2 Timoteo 1:12-16 chu 4:6-11, 17-22. * Pablo tsokgli uma akxni xtanuma kpulachin.

15. ¿Tuku tlan naskiniyaw Jehová?

¹⁵ 1) Katlawaw oración. Akxni nalikgalhtawakgayaw umakgolh textos, kalitachuwinaw  Jehová tuku titaxtumaw chu tuku makgkatsiyaw. Liwana kawaniw tuku makgkatsiyaw. Alistalh, kaskiniw Jehová kakinkamakgtayan natekgsaw akgtum tastakyaw akxni nalikgalhtawakgayaw tuku titaxtulh Pablo nema nakinkamakgtayayan nakatsiyaw tuku natlawayaw.

16. ¿Tuku xtitaxtuma Pablo?

¹⁶ 2) Kaʼakxilhlakachaw tuku lanit. Kalilakpuwaw pi akinin titaxtumaw tuku titaxtulh Pablo. Xla wi kpulachin anta kRoma chu maski xapulana xtamaknukanita kpulachin, la uku katsi pi namakgnikan. Akgxtakgmakgankgonit makgapitsi xcompañeros chu la uku lu tlakgwanit (2 Tim. 1:15).

17. ¿Tuku max tlan xtitlawalh Pablo?

¹⁷ Pablo tlan kajwatiya max wa xtililakpuwa tuku xtitaxtunit chu xlakapastakli pi komo atanu tuku xlaksakli max nichuna xkitaxtunilh. Max ni xtilinka kpulachin, max tlan xtikasitsinilh lakchixkuwin tiku xalak Asia xwankgonit, tiku akgxtakgmakgankgolh chu nialh xkalipawa amakgapitsin xʼamigos. Pero nichuna tlawalh. ¿Tuku makgtayalh chuntiya nakalipawan xʼamigos chu Jehová?

18. ¿Tuku xlakpuwan Pablo?

¹⁸ 3) Kalilakpuwaw. Kalilakpuwaw uma takgalhskinin: «¿Tuku tlawalh Pablo xlakata natayani?». Maski xkatsi pi nialh makgas xʼamaka makgnikan, ankgalhin lilakpuwa pi tuku tlakg xlakaskinka xwanit wa namalanki Jehová. Chuntiya lakputsalh la tlan nakamakgpuwantini amakgapitsin chu chuntiya tlawanilh oración Jehová (2 Tim. 1:3). Ni kajwatiya lilakpuwa pi amakgapitsin xʼakgxtakgmakgankgonit, wata lichuwinalh pi lu xkapaxtikatsini pi tiku xaxlikana xʼamigos xlitaxtukgo limasiyanikgolh tapaxkit chu ankgalhin makgtayakgolh. Nachuna, chuntiya xlikgalhtawakga xTachuwin Dios (2 Tim. 3:16, 17; 4:13). Chu tuku tlakg xlakaskinka, liwana xkatsi pi Jehová chu Jesús xpaxkikgo. Nitu xmakgxtakgkgonit chu xʼamakgolh sikulunatlawakgo xlakata ni xkamakgxtakgnit.

19. ¿La makgtayalh Jehová Pablo?

¹⁹ Jehová xmakatsininit Pablo pi xʼamaka putsastalanikan xlakata kstalanina Cristo xlitaxtu (Hech. 21:11-13). ¿La makgtayalh Jehová Pablo? Kgalhtilh xʼoraciones chu matliwakglhli (2 Tim. 4:17). Nachuna, Jehová wanilh Pablo pi xʼama sikulunatlawa xlakata nikxni xmakgxtakgnit chu lu kskujnaninit chu kamakgpuwantinilh xʼamigos Pablo xlakata namakgtayakgo.

20. Chuna la wan Romanos 8:38, 39, ¿la tlan nalimasiyayaw takanajla chuna la tlawalh Pablo?

²⁰ 4) Kalilatamaw. Kalilakpuwaw uma: «¿La tlan nakstalani xliʼakxilhtit Pablo?». Chuna la Pablo, katsiyaw pi nakinkaputsastalanikanan xlakata kintakanajlakan (Mar. 10:29, 30). Pero xlakata ni namakgxtakgaw Jehová akxni natitaxtuyaw tuku tuwa, talakaskin natlawaniyaw oración chu ankgalhin nalikgalhtawakgayaw xTachuwin. Ni kilipatsankgatkan pi tuku tlakg xlakaskinka wa namalankiyaw Jehová. Liwana katsiyaw pi Jehová nikxni kintikamakgxtakgni chu pi nila tiku natlawa pi xla nialh nakinkalimasiyaniyan xtapaxkit (kalikgalhtawakga Romanos 8:38, 39; Heb. 13:5, 6).

21. ¿Tuku kamakgtayalh Aya chu Hector natayanikgo tuku tuwa xmakgkatsikgo natlawakgo?

²¹ Kaxatukawa tuku natitaxtuyaw, xliʼakxilhtitkan tiku kalichuwinankan kBiblia tlan nakinkamatliwakglhan. Akgtum liʼakxilhtit, Aya, chatum precursora xalak Japón, wan pi tuku titaxtulh Jonás makgtayalh nialh lu napekuan akxni lichuwinan Dios niku anankgo lhuwa latamanin. Hector, chatum kgawasa xalak Indonesia, tiku lakskujnanima Jehová maski xnatlatni ni xtatayananin Jehová litaxtukgo,  wan pi xliʼakxilhtit Rut makgtayanit chuntiya tlakg nakatsini xlakata Jehová chu nalakskujnani.

22. ¿La tlan tlakg nalitamakgtayayaw videos, talikgalhtawakga Biblia la akgtum drama chu lecciones xla libro «Tlan liʼakxilhtit xtakanajlakan»?

²² ¿Niku tlakg natekgsaw liʼakxilhtit xalak Biblia nema tlan nakinkamatliwakglhkgoyan? Videos, talikgalhtawakga Biblia la akgtum drama chu lecciones xla libro «Tlan liʼakxilhtit xtakanajlakan», kinkamakgtayayan naʼakxilhaw kkintalakapastaknikan tuku titaxtukgolh xlakskujnin Dios. * Akxni nina akxilhaw, kgaxmataw o likgalhtawakgayaw umakgolh, kaskiniw Jehová pi kakinkamakgtayan natekgsaw tuku tlan nakinkamakgtayayan kkilatamatkan. Kaʼakxilhlakachaw pi akinin tiku lichuwinamaka anta. Kalilakpuwaw tuku tlawalh chu la makgtayalh Jehová uma xlakskujni xlakata natayani tuku tuwa xtitaxtuma. Alistalh, kalilatamaw tuku katsininitaw chuna la tuku titaxtumaw. Chu xaʼawatiya, kapaxtikatsiniw Jehová xlakata kinkamakgtayanitan chu kalakputsaw la tlan nakamakgpuwantiniyaw chu nakamakgtayayaw amakgapitsin.

23. ¿Tuku kinkamalaknuniyan Jehová anta kʼIsaías 41:10, 13?

²³ Latamakan kxkakilhtamaku Satanás lakgachunin lu tuwa tamakgkatsi chu namin kilhtamaku ni katikatsiw tuku natlawayaw (2 Tim. 3:1). Pero ni talakaskin lu nalakgaputsayaw o napekuanaw, xlakata Jehová katsi tuku titaxtumaw. Akxni lakaskinaw tamakgtay, xla wan pi nakinkalimakgtayayan xpakgastakat (kalikgalhtawakga Isaías 41:10, 13). Liwana katsiyaw pi Jehová nakinkamakgtayayan, chu Biblia kinkamaxkiyan litliwakga xlakata natayaniyaw tuku tuwa titaxtuyaw.