1. Ano nga mga problema an naieksperyensyahan han katawohan ni Jehova?

MAY naieksperyensyahan ka ba nga makuri nga problema? Bangin may kakongregasyon ka nga nakasakit ha imo. (San. 3:2) O bangin gintatamay ka han imo mga katrabaho o mga kaeskwela tungod kay nag-aalagad ka kan Jehova. (1 Ped. 4:3, 4) O posible nga gindidid-an ka han imo mga kapamilya ha pag-atender ha mga katirok o ha pakiistorya ha iba mahitungod han imo pagtoo. (Mat. 10:35, 36) Kon makuri gud an usa nga problema, bangin abaton mo nga mas maopay na la nga diri na mag-alagad kan Jehova. Pero makakasarig ka nga anoman nga problema an imo naieksperyensyahan, tatagan ka ni Jehova hin kinaadman basi maatubang ito ngan hin kusog basi mailob ito.

2. Sumala ha Roma 15:4, paonan-o makakabulig ha aton an pagbasa ha Pulong han Dios?

² Detalyado nga iginparekord ni Jehova ha iya Pulong kon paonan-o nakaya han diri perpekto nga mga indibiduwal an ira magkuri nga problema. Kay ano? Basi mahibaro kita tikang ha ira. Amo ito an iginpasurat ni Jehova kan apostol Pablo. (Basaha an Roma 15:4.) An pagbasa hini nga mga rekord makakahatag ha aton hin pagliaw ngan paglaom. Pero basi makapahimulos kita, kinahanglan diri la naton basta basahon an Biblia. Kinahanglan naton tugotan an Kasuratan nga magmolde han aton panhunahuna ngan makabantad han aton kasingkasing. Ano an mahimo naton buhaton kon nagbibiling kita hin giya kon paonan-o aatubangon an usa nga problema? Mahimo naton buhaton inin upat nga pitad: (1) Pag-ampo, (2) Pag-imadyin, (3) Pagpamalandong, ngan (4) Pag-aplikar. Hisgotan ta kon paonan-o bubuhaton an tagsa hini. * Katapos,  gagamiton naton ini nga paagi han pag-aram basi mahibaro ha mga panhitabo ha kinabuhi nira Hadi David ngan apostol Pablo.

3. Antes ka magbasa han Biblia, ano an kinahanglan mo buhaton, ngan kay ano?

³ (1) Pag-ampo. Antes ka magbasa han Biblia, paghangyo kan Jehova hin bulig basi makita kon paonan-o ka makakapahimulos ha imo ginbabasa. Pananglitan, kon nagbibiling ka hin sagdon kon paonan-o aatubangon an usa nga problema, paghangyo kan Jehova hin bulig basi makita an mga prinsipyo ha iya Pulong nga maggigiya ha imo.​—Fil. 4:6, 7; San. 1:5.

4. Ano an makakabulig basi magin buhi ha imo an usa nga rekord ha Biblia?

⁴ (2) Pag-imadyin. Gintagan kita ni Jehova han urusahon nga abilidad ha pag-imadyin. Basi magin buhi ha imo an usa nga rekord ha Biblia, imadyina an eksena ngan hunahunaa nga ikaw an nangunguna nga karakter ha imo ginbabasa. Pangalimbasugi nga makita an mga butang nga iya nakikita ngan abaton an emosyon nga bangin inaabat niya.

5. Ano an pagpamalandong, ngan paonan-o mo ito mahihimo?

⁵ (3) Pagpamalandong. An pagpamalandong nangangahulogan hin paghunahuna hin maopay mahitungod han imo ginbabasa ngan kon paonan-o ito nga impormasyon naaplikar ha imo. Nabulig ito ha imo nga makita an mga koneksyon han mga punto ngan magkaada hin mas hilarom nga pagsabot ha usa nga topiko. An pagbasa han Biblia nga waray pagpamalandong maipapariho ha pagkinita hin mga parte han jigsaw puzzle ha usa nga lamesa, pero diri mo ito gintuturugkop. An pagpamalandong maipapariho ha pagturugkop hito nga mga parte basi makita mo an bug-os nga piktyur. Para mabuligan ka ha pagpamalandong, mahimo mo batunon an mga pakiana nga sugad hini: ‘Ano an ginhimo han nangunguna nga karakter ha akon ginbabasa basi masolusyonan an iya problema? Paonan-o hiya ginbuligan ni Jehova? Paonan-o ko maiaaplikar an mga leksyon nga akon nahibaroan basi makaya ko an mga problema?’

6. Kay ano nga kinahanglan naton iaplikar an aton nahibabaroan?

⁶ (4) Pag-aplikar. Hi Jesus nagsiring nga kon diri naton gin-aaplikar an aton nahibabaroan, pariho kita hin tawo nga nagtutukod hin balay dida ha baras. Nagpipinaniguro hiya pero karag la an iya mga pangalimbasog. Kay ano? Kay kon bumagyo ngan bumaha, marurumpag an iya balay. (Mat. 7:24-27) Sugad man, bisan kon nag-aampo kita, nag-iimadyin, ngan namamalandong pero kon diri naton gin-aaplikar an aton nahibabaroan, makakarag la an aton pangalimbasog. Kon nasasarihan an aton pagtoo pinaagi han mga problema o pagtimaraot, diri ito magpapabilin nga marig-on. Ha luyo nga bahin, kon nag-aaram kita ngan nag-aaplikar han aton nahibabaroan, makakahimo kita hin mas maopay nga mga desisyon, magigin mas murayaw kita, ngan magkakaada kita hin mas marig-on nga pagtoo. (Isa. 48:17, 18) Gamit an upat nga pitad nga aton pa la ginhisgotan, kitaon naton kon ano an aton mahibabaroan tikang ha usa nga panhitabo ha kinabuhi ni Hadi David.

7. Ano nga istorya ha Biblia an aton hihisgotan yana?

⁷ May sangkay ka ba o kapamilya nga nakasakit gud ha imo nga tungod hito nawara an imo pagtapod? Kon oo, makakapahimulos ka ha pagrepaso han istorya mahitungod ha anak ni Hadi David nga hi Absalom nga nagtraydor ha iya tatay ngan nangalimbasog nga agawon an ginhadian tikang ha iya.​—2 Sam. 15:5-14, 31; 18:6-14.

8. Ano an mahimo mo buhaton basi makarawat an bulig ni Jehova?

⁸ (1) Pag-ampo. Samtang ginhuhunahuna mo ito nga istorya, isumat kan Jehova kon ano an imo inaabat mahitungod ha maraot nga pagtratar ha imo. (Sal. 6:6-9) Magin espisipiko. Katapos, paghangyo kan Jehova nga buligan ka nga makita  an mga prinsipyo nga mabulig ha imo nga hibaroan kon ano an imo bubuhaton.

9. Ano an nahitabo kanda David ngan Absalom?

⁹ (2) Pag-imadyin. Hunahunaa an mga panhitabo hini nga istorya, ngan imadyina kon paonan-o naapektohan hi Hadi David. An anak ni David nga hi Absalom damu ka tuig na nga nagpinaniguro basi maruyagan hiya han mga tawo. (2 Sam. 15:7) Han inabat ni Absalom nga ito na an husto nga panahon, nagpadara hiya hin mga espiya ha bug-os nga Israel basi iandam an mga tawo nga karawaton hiya sugad nga ira hadi. Iya pa ngani ginkombinse an usa han duok nga mga sangkay ngan magsaragdon ni David, hi Ahitofel, nga umapi ha pagrebelde. Igindeklara ni Absalom an iya kalugaringon sugad nga hadi, ngan nangalimbasog hiya nga dakpon ngan patayon hi David, nga hito nga panahon posible nga may grabe nga sakit. (Sal. 41:1-9) Nahibaroan ni David an mga ginbubuhat ni Absalom salit binaya hiya ha Jerusalem. Ha urhi, an kasundalohan ni Absalom nakig-away ha kasundalohan nga maunungon kan David. Napirde an rebelde nga kasundalohan, ngan an anak ni David nga hi Absalom ginpatay.

10. Ano unta an puydi buhaton ni Hadi David?

¹⁰ Sunod, imadyina an posible gud nga gin-abat ni David hini nga nahitatabo ha iya. Hinigugma niya hi Absalom ngan natapod gud hiya kan Ahitofel. Pero nagtraydor hira ha iya. Napasubo gud nira hi David ngan gin-ikaparatay pa ngani hiya. Puydi unta mawara an pagtapod ni David ha iba niya nga kasangkayan ngan magsuspetsa nga dinapig liwat hira kan Absalom. Puydi unta nga an iya kalugaringon na la an iya hunahunaon ngan mangalimbasog nga hiya la an bumaya ha nasud. O puydi unta magpadaog na la hiya ha duro nga panluya. Pero waray buhata ni David an bisan hain hito. Lugod, nalamposan niya ini nga makuri nga problema. Kay ano?

11. Ano an ginbuhat ni David ha iya makuri nga sitwasyon?

¹¹ (3) Pagpamalandong. Ano nga mga prinsipyo an imo mahibabaroan tikang hini nga istorya? Batona ini nga pakiana, “Ano an ginbuhat ni David basi masolusyonan an iya problema?” Hi David waray magpanik ngan maghimo hin dinalidali ngan diri maaramon nga mga desisyon. Waray liwat hiya magpadaog ha kahadlok, nga puydi unta magin hinungdan nga diri na hiya makadesisyon kon ano an iya bubuhaton. Lugod, nag-ampo hiya kan Jehova para hin bulig. Nangaro liwat hiya hin bulig ha iya kasangkayan. Ngan ginbuhat dayon niya an iya ginhimo nga mga desisyon. Bisan kon nasakitan gud hiya, waray hiya magin masuspetsahon ngan magpabilin nga nasisina. Padayon hiya nga sinarig kan Jehova ngan tinapod ha iya mga sangkay.

12. Ano an ginhimo ni Jehova basi buligan hi David?

¹² Paonan-o ginbuligan ni Jehova hi David? Kon magsasaliksik ka, mahibabaroan mo nga gintagan ni Jehova hi David hin kusog nga ginkikinahanglan niya basi mailob ito nga problema. (Sal. 3:1-8; superskripsyon) Ginbendisyonan ni Jehova an mga desisyon ni David. Ngan ginbuligan niya an maunungon nga mga sangkay ni David han nakig-away hira basi proteksyonan an ira hadi.

13. Paonan-o mo masusubad hi David kon may usa nga tawo nga nakasakit gud ha imo? (Mateo 18:15-17)

¹³ (4) Pag-aplikar. Pakianhi an imo kalugaringon, ‘Paonan-o ko masusubad hi David?’ Kinahanglan gumios ka dayon basi sulbaron an problema. Depende ha kahimtang, mahimo mo iaplikar an sagdon ni Jesus nga nakarekord ha Mateo kapitulo 18 ha direkta man nga paagi o an prinsipyo hito. (Basaha an Mateo 18:15-17.) Pero kinahanglan diri ka maghimo hin dinalidali nga mga desisyon nga nagpapadara la ha emosyon. Kinahanglan mag-ampo ka kan Jehova nga tagan ka hin kalmado nga kasingkasing ngan han kinaadman nga imo kinahanglan basi mahibaroan kon ano an imo pagbubuhaton. Padayon nga tumapod ha imo mga sangkay ngan karawata an ira iginhahatag nga bulig. (Prob. 17:17) Labaw ha ngatanan, sunda an sagdon ni Jehova ha imo nga aada ha iya Pulong.​—Prob. 3:5, 6.

14. Ha ano nga mga sitwasyon mahimo ka maparig-on ha pagbasa han 2 Timoteo 1:12-16; 4:6-11, 17-22?

¹⁴ Ginkukontra ka ba han imo mga kapamilya tungod kay nag-aalagad ka kan Jehova? O naukoy ka ba ha nasud diin may mga restriksyon o igindidiri pa ngani an buruhaton han katawohan ni Jehova? Kon oo, mahimo ka maparig-on ha pagbasa han 2 Timoteo 1:12-16 ngan 4:6-11, 17-22. * Iginsurat ni Pablo ini nga mga bersikulo samtang priso hiya.

15. Ano an mahimo mo hangyoon kan Jehova?

¹⁵ (1) Pag-ampo. Antes mo basahon ito nga mga teksto, isumat kan Jehova an imo problema ngan kon ano an imo inaabat hito. Magin espisipiko. Katapos, paghangyo kan Jehova nga buligan ka nga makita an mga prinsipyo ha mga teksto mahitungod han mga problema ni Pablo nga mabulig ha imo nga mahibaroan kon ano an imo bubuhaton.

16. Ano an sitwasyon ni Pablo?

¹⁶ (2) Pag-imadyin. Imadyina nga ikaw an aada ha sitwasyon ni Pablo. Nakakadena hiya ha prisohan ha Roma. Napriso na hiya hadto, pero yana sigurado hiya nga papatayon hiya. Ginbayaan hiya han iba niya nga mga kaupod ngan kapoy na gud hiya.​—2 Tim. 1:15.

17. Ano unta an puydi buhaton ni Pablo?

¹⁷ Puydi unta magpokus hi Pablo ha naglabay ngan maghinunahuna nga kon waray unta hiya magin madasigon nga Kristiano, bangin waray unta hiya arestoha. Puydi unta hiya masina ha mga lalaki ha distrito han Asia nga binaya ha iya, ngan diri na tumapod ha iba niya nga kasangkayan. Pero waray ito buhata ni Pablo. Kay ano nga sigurado hiya nga magigin maunungon la gihapon ha iya an iya mga sangkay ngan babalosan hiya ni Jehova?

18. Ano an ginbuhat ni Pablo ha iya makuri nga sitwasyon?

¹⁸ (3) Pagpamalandong. Batona ini nga pakiana, “Ano an ginbuhat ni Pablo basi masolusyonan an iya problema?” Bisan pa kon hirani na hiya patayon, waray mawara an pokus ni Pablo ha importante gud nga isyu​—an paghimaya kan Jehova. Ngan padayon nga ginhunahuna niya kon paonan-o hiya makakaparig-on ha iba. Sinarig hiya kan Jehova pinaagi han regular nga pag-ampo. (2 Tim. 1:3) Imbes nga paghinunahunaon adton mga binaya ha iya, nagpasalamat lugod hiya han mahigugmaon nga suporta han iya kasangkayan nga maunungon nga binulig ha iya ha praktikal nga mga paagi. Dugang pa, padayon nga gin-adman ni Pablo an Pulong han Dios. (2 Tim. 3:16, 17; 4:13) Ngan an pinakaimportante, bug-os nga sinarig hiya nga hinigugma hiya ni Jehova ngan ni Jesus. Waray nira hiya bayai, ngan babalosan nira hiya tungod han iya maunungon nga pag-alagad.

19. Paonan-o ginbuligan ni Jehova hi Pablo?

¹⁹ Ginpahamangnoan ni Jehova hi Pablo nga pagtitimarauton hiya tungod kay Kristiano hiya. (Buh. 21:11-13) Paonan-o ginbuligan ni Jehova hi Pablo? Ginbaton niya an mga pag-ampo ni Pablo, ngan paglabay han panahon, gintagan hiya hin gahum. (2 Tim. 4:17) Ginpasarig hi Pablo nga makakarawat niya an balos nga iya ginpinanigurohan. Ginpagios liwat ni Jehova an maunungon nga kasangkayan ni Pablo nga maghatag ha iya hin praktikal nga bulig.

20. Paonan-o naton masusubad an pagtoo ni Pablo, sugad han iginpapakita ha Roma 8:38, 39?

²⁰ (4) Pag-aplikar. Pakianhi an imo kalugaringon, ‘Paonan-o ko masusubad hi Pablo?’ Pariho kan Pablo, kinahanglan laoman naton nga pagtitimarauton kita tungod han aton pagtoo. (Mar. 10:29, 30) Basi makapabilin nga matinumanon kan Jehova bisan pa han mga problema, kinahanglan naton sumarig ha iya pinaagi ha pag-ampo ngan regular nga pag-adman an iya Pulong. Ngan kinahanglan pirme naton hinumdoman nga an usa han pinakaimportante nga aton mahihimo amo an paghimaya kan Jehova. Makakasiguro kita nga diri gud kita babayaan ni Jehova, ngan waray bisan  hin-o nga makakautod han iya gugma ha aton.​—Basaha an Roma 8:38, 39; Heb. 13:5, 6.

21. Ano an nakabulig kanda Aya ngan Hector basi malamposan an ira problema?

²¹ Anoman an aton kahimtang, mapaparig-on kita han mga ehemplo ha Biblia. Pananglitan, hi Aya nga payunir ha Japan nagsiring nga an istorya mahitungod kan Jonas nakabulig ha iya nga malamposan an iya kahadlok ha pagsangyaw ha publiko. Hi Hector, nga usa nga batan-on ha Indonesia nga an mga kag-anak diri Saksi, napagios han ehemplo ni Ruth nga mag-aram mahitungod kan Jehova ngan mag-alagad ha iya.

22. Paonan-o ka makakapahimulos hin bug-os ha mga drama tikang ha Biblia o ha serye nga “Subara an Ira Pagtoo”?

²² Diin ka makakabiling hin mga ehemplo ha Biblia nga magpaparig-on ha imo? An aton mga video ngan mga audio drama ngan an serye nga “Subara an Ira Pagtoo” nabulig nga magin buhi an mga panhitabo ha Biblia. * Antes ka magkita, mamati, o magbasa hini nga ginsaliksik hin maopay nga mga istorya, paghangyo kan Jehova nga buligan ka nga mabilngan an espisipiko nga mga punto nga maiaaplikar mo. Imadyina nga ikaw an aada ha sitwasyon han nangunguna nga karakter. Pamalandonga kon ano an ginbuhat hinin hinigugma nga mga surugoon ni Jehova ngan kon paonan-o niya hira ginbuligan nga malamposan an mga problema. Katapos, iaplikar ha imo sitwasyon an mga leksyon nga imo nahibaroan. Pasalamati hi Jehova ha bulig nga iya na ginhahatag ha imo. Ngan ipakita nga gin-aapresyar mo ito pinaagi ha pagbiling hin mga higayon nga parig-unon ngan buligan an iba.

23. Sumala ha Isaias 41:10, 13, ano an iginsasaad ni Jehova nga iya bubuhaton para ha aton?

²³ Makuri gud an pagkinabuhi ha kalibotan nga kontrolado ni Satanas, ngan usahay diri ngani kita maaram kon ano an aton bubuhaton. (2 Tim. 3:1) Pero diri kita angay mabaraka o mahadlok. Maaram hi Jehova han aton naieksperyensyahan nga mga problema. Kon matumba kita, nagsasaad hiya nga kakaptan kita niya han iya makusog nga too nga kamot. (Basaha an Isaias 41:10, 13.) Pinaagi han bug-os nga pagsarig ha iya bulig, magkakaada kita kusog tikang ha Kasuratan ngan malalamposan naton an bisan ano nga problema.