1. მუნერ სირთულეეფს შილებე შეხვადას იეჰოვაშ ხალხიქ?

სერიოზულ პრობლემეფ ხომ ვა გიღუნა? შილებე კრებას მიდგაინქ გურ გიწყუნუეს (იაკ. 3:2). თქვან თანამშრომელეფ ვარდა თანაკლასელეფ გიგაძიცანდან რწმენაშ გურშენ (1 პეტ. 4:3, 4). ვარდა ოჯახიშ წევრეფ ოცადდან, მიგოტებაფუან კრებეფშა გილულა დო ქადაგება (მათ. 10:35, 36). განსაცდელ მანგარ რთულ ქორენ-და, შილებე იფიქრათ, ნამდა მეტო ვეშეილებნა იეჰოვაშ მსახურება. მარა რჯერდან, ვა უღჷ მნიშვნელობა, მუნერ სირთულეს შეხვადუთ, იეჰოვა მერჩანა სიბრძნეს დო ძალას თინეფიშ გარზებელო.

2. მუჭოთ რომაელეფიშ 15:4-ის ჭარჷ, მუჭო შილებე იმოქმედას ღორონთიშ სიტყვაშ კითხირქ ჩქინდა?

² მუშ სიტყვას იეჰოვაქ დეტალურო ეჭარ, მუჭო გიორჯგინანდეს არასრულყოფილ ადამიანეფ სირთულეეფს. მუშენ აკეთ იეჰოვაქ თაშ? თე მაგალითეფშე შემლებნა ბრელ მუდგარენ დიბგურუათ. ზუსტას თენა ოჭარაფუ თიქ მოციქულ პავლეს (წეკითხით რომაელეფიშ 15:4). თე შემთხვევეფიშ კითხირს შეულებ გარკვეულ სიმშვიდე დო იმენდ მუჩან. მარა, თექ ჯგირობუა მომღანინ, უმოს მეტ რე საჭირო, ვინემ ხვალე ბიბლიაშ კითხირ. ჩქი საშვალება ოკო ქიმეფჩათ წმინდა წერილეფს, დომთირუან აზროვნება დო შეხუას გურს. მუ ოკო ვაკეთათ, მუჟამსით კონკრეტულ სირთულეშ გარზებელო ხემძღვანელობა მოსაჭირნა? შემლებნა გიმიბრინუათ გურაფაშ ოთხ ნაწილიან მეთოდ: 1) ლოცვა, 2) წარმოსახვაშ უნარ, 3) ტომბაშე ფიქრ დო 4) გიმორნაფა. მორთ გუვარჩუათ, მუ მიშურს თითოულ ნაწილშა. * თეშ უკულ თე მეთოდიშ საშვალებათ ქიდიბგურუანთ მეფე დავითიშ დო მოციქულ  პავლეშ ცხოვრებას მოხვალამირ შემთხვევეფშე.

3. მუ ოკო აკეთათ ბიბლიაშ კითხირიშ დოჭყაფაშახ დო მუშენ?

³ 1) ლოცვა. ბიბლიაშ კითხირიშ დოჭყაფაშახ ქოთხით იეჰოვას, ნამდა ქიმგეხვარან, ქოძირათ, მუჭო შეილებნა სარგებელ მიღათ ნაკითხირშე. მაგალთო, პრობლემეფიშ გარზებელო რჩევას ქოგორუნთ-და, ქოთხით იეჰოვას, დუგოგორაფუან მუშ სიტყვაშე პრინციპ, ნამუთ მიგეხვარებნა სწორას მოქციებას (ფილ. 4:6, 7; იაკ. 1:5).

4. მუქ შილებე მიგეხვარან, ნამდა ბიბლიურ მონაკვეთიქ უმოს რეალურქ იჸუას თქვანო?

⁴ 2) წარმოსახვაშ უნარ. იეჰოვაქ წარმოსახვაშ სარკო უნარ მუჩეს. ბიბლიურ მონაკვეთეფქ თქვანო რეალურქ ქიჸუასინ, წერმიდგინით სიტუაცია დო თქვან დუდ მთავარ პერსონაჟიშ ადგილს ქიგიორინეთ. ქეცადით, ქოძირათ თი მუდგარენეფ, მუდგას თინა ორწყედ დო ქიგინათ, მუდგას თინა გინაფლენდჷ.

5. მუშენ ოკო იფიფქრათ ტომბაშე დო მუჭო შემლებნა თეშ კეთება?

⁵ 3) ტომბაშე ფიქრ. ტომბაშე ფიქრ ნიშნენს ჯგირო დეფიფქრათ ნაკითხირშე დო თიშე, მუჭო მოხუნა თე ინფორმაცია. თენა მიმეხვარებნა აზრეფიშ დაკავშირებას დო საკითხიშ უჯგუშო ენონჭაფას. ფიქრიშ უმშო ბიბლიაშ კითხირ თიცალ რე, უჯინათ ეიონწყუალ სურათის, ნამუთ დიო ენწყილ ვა რე. ტომბაშე ფიქრ ქოგჷ თე სურათიშ ნაწილეფიშ აკონწყუალას, ნამდა მთლიან სურათ ქოძირათ. ტომბაშე ფიქრის მიგეხვარებნა, პასუხიშ მეჩამა კითხვეფშა: „მუ აკეთ მთავარ პერსონაჟიქ პრობლემაშ გინაჭკირალო? მუჭო მეხვარ იეჰოვაქ თის? მუჭო შემლებ ნაგურეფუშ გიმორნაფა, ნამდა მიმეხვარას განსაცდელეფიშ დროს?“

6. მუშენ ოკო გიმიბრინუათ ნაგურეფ?

⁶ 4) გიმორნაფა. იესოქ თქუ, ნამდა ნაგურეფუს ვეგმიბრინუანთ-და, თი კოჩცალ იპჸით, მით ჸუდეს ქვიშას გედგუნს. თინა მანგარო ხანდენს, მარა თეს ტყურათ ორთჷ. მუშენ იფჩიებუთ თეს? მუშენდა ქარბორია დო დიდწყარალაშ დროს თე ჸუდე აკოცენს (მათ. 7:24—27). თეცალო, ჩქი ქობლოცულენთ, წერმიბდგინენთ დო ქოფიფქრენთ, მარა ნაგურეფუს ვეგმიბრინუანთ-და, ტყურათ ფხანდენთ. განსაცდელეფიშ დო თხოზინიშ დროს ჩქინ რწმენა ვეჸუაფ თიცალ მანგარ, მუნერით საჭირო რე. თეშ გინაწონს, მუჟამსით ბგურაფლენთ დო ნაგურეფუს გიმიბრინუანთ, ბღებულენთ უჯგუშ გადაწყვეტილებეფს, მიღნა უმოს შინაგან სიმშვიდე დო რწმენა მემანგარებნა (ეს. 48:17, 18). თე ოთხნაწილიან გურაფაშ მეთოდიშ გიმორნაფათ, ქობძირათ, მუშ გურაფა შემლებნა მეფე დავითიშ შემთხვევაშე.

7. ნამ ბიბლიურ შემთხვევას გუვარჩიენთ?

⁷ მეგობარქ ვარდა ოჯახიშ წევრიქ ხომ ვაიღალატეს? თაშ ქორენ-და, თქვა მიგეხვარებნა მეფე დავითიშ ქომოლსქუა აბესალომიშ მაგალითიშ გარჩიება. თიქ უღალატ მუშ მუმას დო სამეფოშ მიდაღალას ოცადუდ (2 სამ. 15:5—14, 31; 18:6—14).

8. მუ შეილებნა აკეთათ, იეჰოვაშე მოხვარა მიღათინ?

⁸ 1) ლოცვა. თე შემთხვევაშ კითხირშახ, ქუწით იეჰოვას, გლახათ მიგექცუესინ თიშ შედეგო, მუჭო გინაფლენთ დუდის (ფსალმ. 6:6—9). კონკრეტულო ქეჩით იეჰოვას თქვან გრძნობეფიშ გურშენ. თეშ უკულ ქოთხით თის, ქიმგეხვარან, ქოძირათ პრინციპეფ, ნამუთ განსაცდელეფიშ დროს სწორას მოქციებას მიგეხვარებნა.

9. მუქ მოხვად დავითი დო აბესალომიშ შქას?

⁹ 2) წარმოსახვაშ უნარ. დეფიქრით ბიბლიაშ თე მონაკვეთის მოხვალამირ მოვლენეფშე დო წერმიდგინით, მუჭო იმოქმედ თექ მეფე დავითშა. დავითიშ ქომოლსქუა, აბესალომი, წანეფ რე ოცად, ხალხიშ ჸოროფაშ დამსახურებას (2 სამ. 15:7). მუჟამსით თინა ორწყე, მოქმედებაშ დრო რენ, ჯაშუშეფს უტენს მთელ ისრაელშა ხალხიშ მამზადებელო, ნამდა მუშ მეფობას ხუჯ ქუდუკინან. ხვალე თენა ვარინ, ოცად  დავითიშ ართ-ართ ხოლოშიან მეგობარ დო მრჩეველ, ახითოფელი, გეიჸუნუას ბუნტშა. აბესალომი მუშ დუდის მეფეთ აცხადენს დო უკულ ოცად, ოჭოფას დო დოჸვილას დავითი, ნამუთ შილებე თი დროს სერიოზულო რდუკო დალახებურ (ფსალმ. 41:1—9). დავით გებულენს თე ირფელს დო მინტებ იერუსალიმშე. საბოლათ აბესალომიშ ჯარ დავითიშ ჯარიშ წინააღმდეგ გიშურს. აბუნტებულეფ აგენა ჩხუპის დო დავითიშ ქომოლსქუა აბესალომი ღურუ.

10. მუ შეულებუდ მეფე დავითის უკეთებუდკო?

¹⁰ თეშ უკულ წერმიდგინით, მუჭო იგინანდჷ დავითი დუდის თე ირფელიშ შედეგო. თის უჸორდჷ აბესალომი დო თინა ონდუდ ახითოფელს. მარა თე ხოლოშიან ადამიანეფქ უღალატეს. თინეფქ მანგარო ელაჭუეს გურ დავითის დო თიშ ჸვილუას ხოლო ოცადდეს. დავითის შილებედ შხვა მეგობრეფიშ ნდობა ხოლო მეუდინუაფუდკო დო უეჭვებუდკო, ნამდა თინეფ ხოლო აბესალომიშ მხარეს რდეს. თის შეულებუდ მუშ დუდიშ მეტ მითინშე ვა უფიქრებუდკო დო ხვალე ნტება მუნდომებუდკო. ვარდა შილებე მანგარ გურგოტახილ ჸოფედკო. მარა დავითის თავრეშე ნამთინ ვა უკეთებ, თეშ მანგიორო, თიქ გიორჯგინ თე სირთულეს. მუქ მეხვარ თის თაშ მოქციებას?

11. მუჭო მიქცუ დავითიქ რთულ სიტუაციაშ დროს?

¹¹ 3) ტომბაშე ფიქრ. მუ პრინციპეფიშ გურაფა შეილებნა თე მონაკვეთშე? ქუპასუხით კითხვას: „მუ აკეთ მეფე დავითიქ პრობლემაშ გინაჭკირალო?“ დავითი პანიკას ვენოლაფე დო ნაჩქარევო არასწორ გადაწყვეტილებეფ ვემუღებ. მარა ვართ დრო უღალ დო შიშიშ გურშენ უმოქმედოთ ვა ჸოფე. თეშ მანგიორო, თიქ ლოცვას იეჰოვას მოხვარა ქოთხუ. თიქ მეგობრეფს ხოლო თხუ მოხვარა დო ხეთეშე იმოქმედ, ნამდა შეასრულკო თინა, მუთ გინოჭყვიდ. მართალ რე, მანგარო აფუდ გურ ელაჭვილ, მარა დავითის შხვეფიშ ნდობა ვემუდინუაფ დო ვართ გოჯოგაფ მითინ. თინა კინ ონდუდ იეჰოვას დო მუშ მეგობრეფს.

12. მუ აკეთ იეჰოვაქ დავითიშ მახვარებელო?

¹² მუჭო მეხვარ იეჰოვაქ დავითის? მუსხირენ გიმორკვიებაშ შედეგო ქოძირუნთ, ნამდა იეჰოვაქ მეჩჷ დავითის ძალა, ნამუთ განსაცდელეფიშ გარზებელო ოსაჭირუდ (ფსალმ. 3:1—8; ეპიგრაფი). თიქ აკურთხჷ დავითიშ მეღებულ გადაწყვეტილებეფ. თეს გეძინელ, თინა ოხვარუდ დავითიშ ართგურ მეგობრეფს, მუჟამსით მუნეფიშ მეფეშ დაცვებელო ბრძოლენდეს.

13. მუჭო შეილებნა მიაჸუნათ დავითიშ მაგალითის, მუჟამსით გურს მანგარო ელგოჭუანა? (მათ. 18:15—17)

¹³ 4) გიმორნაფა. ქოკითხით თქვან დუდის: „მუჭო შემლებ მივაჸუნე დავითიშ მაგალითის?“ ხეთეშე ოკო იმოქმედათ პრობლემაშ გინაჭკირალო. სიტუაციაშ მიხედვით, შეილებნა მათეშ მა-18 დუდის მოჩამილ იესოშ რჩევა, პირდაპირ მნიშვნელობათ ვარდა მუჭოთ პრინციპინ თეშ გიმირინუათ (წეკითხით მათეშ 18:15—17). მარა ემოციეფქ ნაჩქარევო ოკო ვემგოღებაფუან გადაწყვეტილებეფ. ქოთხით იეჰოვას, ქიმერჩან სიმშვიდე დო სიბრძნე, ნამუთ სწორას მოქციებას მიგეხვარებნა. ვადინუათ თქვან მეგობრეფიშ ნდობა. თეშ მანგიორო, მიღით თინეფშე მოხვარა (იგავ. 17:17). მუთ არძაშე უმოს მნიშვნელოვან რე, მიაჸუნით რჩევეფს, ნამდგას იეჰოვა მუშ სიტყვაშე გარზენა (იგავ. 3:5, 6).

14. მუ სიტუაციეფიშ დროს შილებე ელაიკინან გურშა 2 ტიმოთეშ 1:12—16 დო 4:6—11, 17—22-იშ კითხირქ?

¹⁴ წინააღმდეგობას ხომ ვა ხვადუთ ოჯახიშ წევრეფშე? ვარდა თიცალ ქიანას ხომ ვა ცხოვრენთ, სოდეთ იეჰოვაშ ხალხიშ საქმიანობა შეზღუდულ ვარდა ვარიებულ რე? თაშ ქორენ-და, შილებე გურშა ელაიკინან 2 ტიმოთეშ 1:12—16 დო 4:6—11, 17—22-იშ კითხირქ. * პავლექ წმინდა წერილეფიშ თე ნაწილ ციხეს ხედუნ თიმწკუმა ჭარჷ.

15. მუ შეილებნა თხუათ იეჰოვას?

 ¹⁵ 1) ლოცვა. თე მუხლეფიშ კითხირშახ, ქეჩით იეჰოვას თქვან პრობლემეფიშ გურშენ დო ქუწით, მუჭო მოქმედენს თინეფ თქვანდა. კონკრეტულო ქუდურაგადეთ თის. თეშ უკულ ქოთხით, ქიმგეხვარან, პავლეს შეხვადუნ თი განსაცდელეფშე ქოძირათ პრინციპეფ, ნამუთ სირთულეეფიშ დროს სწორას მოქციებას მიგეხვარებნა.

16. მუ მდგომარეობას ინოლ პავლექ?

¹⁶ 2) წარმოსახვაშ უნარ. წერმიდგინით თქვან დუდ პავლეშ ადგილს. თინა რომიშ ციხეს ბორკილეფ ეუძუნ თეშ ხე. პავლე თეიშახ ხოლო რდუ ციხეს, მარა ასე დარწმუნებულ რე, ნამდა დოჸვილნა. თინა ნამთინე ხოლოშიანქ ქიმიოტუ დო ფიზიკურო ხოლო მანგარ დასუსტებულ რე (2 ტიმ. 1:15).

17. მუ შეულებუდ პავლეს უკეთებუდკო?

¹⁷ პავლეს შეულებუდ ყურადღება ულირშა გეგნიღკო დო უფიქრებუდკო, ნამდა შხვანერ გადაწყვეტილება მეუღებუდკონ, ალბათ ასე ციხეს ვეჸუაფუდ. თის შეულებუდ გურ მორთუმუდკო თი კოჩეფშე, მიდგაქ აზიას მიოტუეს თინა დო შხვა მეგობრეფიშ ნდობა ხოლო მიოდინუკო. მარა პავლეს თეცალ მუთუნ ვა უკეთებ. მუქ მეხვარ თის, ვა უდინუაფუდკო ნდობა დო იმენდ?

18. მუჭო მიქცუ პავლექ რთულ სიტუაციაშ დროს?

¹⁸ 3) ტომბაშე ფიქრ. ქუპასუხით კითხვას: „მუ აკეთ პავლექ პრობლემაშ გინაჭკირალო?“ თიმწკუმა ხოლო, მუჟამსით პავლე ღურას ელუდ, ვა გოჭყოლად არძაშ უმოს მთავარ — იეჰოვაშ განდიდება. თეწკუმა ართო, თინა აგრძელენდჷ თიშე ფიქრის, მუჭო შეულებუდ ელუკინკო შხვეფს გურშა. პავლე იეჰოვაშა რდუ მენდებულ დო რეგულარულო ლოცულენდჷ (2 ტიმ. 1:3). თიშ მანგიორო, ნამდა ზედმეტო უფიქრებუდკო თინეფშე, მიდგაქ მიოტუ, პავლე მარდულობას გიმოხანტუნდჷ მუშ ართგურ მეგობრეფიშ მიმართ, მით ჸოროფათ ელურდჷ თის დო პრაქტიკულო ოხვარუდ. თეს გეძინელ, პავლეს ვემუტებ ღორონთიშ სიტყვაშ გურაფა (2 ტიმ. 3:16, 17; 4:13). მუთ მთავარინ, ბოლოშახ რდუ დარწმუნებულ, ნამდა იეჰოვა დო იესოს უჸორდეს თინა. თინეფს ვემუტებნა პავლე დო მუშ ართგურ მსახურებაშ გურშენ დაჯილდოვენდეს.

19. მუჭო მეხვარ იეჰოვაქ პავლეს?

¹⁹ იეჰოვაქ გაფრთხილ პავლე, ნამდა ქრისტიანობაშ გურშენ თხოზინშა აჸიდ გარზებელ (საქ. 21:11—13). მუჭო მეხვარ ღორონთიქ თის? იეჰოვაქ უპასუხ პავლეშ ლოცვეფს დო თინა ძალას არზენდჷ თე მოციქულს (2 ტიმ. 4:17). პავლე დარწმუნებულ რდუ, ნამდა მიღენდჷ ჯილდოს, ნამდგაშეთ მანგარო ხანდენდჷ. თეს გეძინელ, იეჰოვაქ პავლეშ ართგურ მეგობრეფ გეგმირინუ, ნამდა პრაქტიკულო ქუმუხვარებუდკო თიშა.

20. რომაელეფიშ 8:38, 39-შ მიხედვით, მუჭო შეილებნა მიაჸუნათ პავლეშ მაგალითის?

²⁰ 4) გიმორნაფა. ქოკითხით თქვან დუდის: „მუჭო შემლებ მივაჸუნე პავლეშ მაგალითის? პავლეცალო ჩქი ხოლო ოკო ველდათ, ნამდა რწმენაშ გურშენ თხოზინშა მაჸინა გარზებელ (მარ. 10:29, 30). განსაცდელეფიშ დროს სიმტკიცე ვა ვოდინუათინ, ოკო მივენდათ იეჰოვას ლოცვათ დო მიღდან ბიბლიაშ გურაფაშ ჯგირ ჩვევა. თეწკუმა ართო, ოკო ვაგმოჭყორდან, ნამდა ართ-ართ არძაშე უმოს მნიშვნელოვან საქმე, მუდგაშ კეთება შემლებნა, იეჰოვაშ განდიდება რე. შემლებნა დარწმუნებულ ვორდათ, იეჰოვა დღას ვემმოტენა დო მითინს დო მუთუნს ვეშულებ ჩამთხინუან თიშ ჸოროფა (წეკითხით რომაელეფიშ 8:38, 39; ებრ. 13:5, 6).

21. მუქ მეხვარ აია დო ჰექტორს, გიორჯგინესკო თი სირთულეეფს, ნამდგას შეხვადუდეს?

²¹ მუდგა მდგომარეობა ვა მიღდანინ, ბიბლიურ მაგალითეფს შეულებ ჩქინ გამანგარება. მაგალთო ართ და, აია, ნამუთ პიონერო მსახურენს იაპონიას, იჩიებ, ნამდა იონაშ  მაგალითიქ მეხვარ, გიორჯგინკო სახალხოთ დამოწმებაშ შიშის. ჰექტორი, ახალგაზრდა ჯიმა ინდონეზიაშე, მიდგაშ მშობლეფ ვამსახურნა იეჰოვას, რუთიშ მაგალითიქ აღძრჷ, ქუდუგურუაფუდკო იეჰოვაშ გურშენ დო ემსახურკო თის.

22. მუჭო შეილებნა მიღათ სარგებელ ბიბლიურ დრამეფშე ვარდა სტატიეფიშ სერიაშე „მიაჸუნით თინეფიშ რწმენაშ მაგალითის“?

²² სო შეილებნა გორათ ბიბლიურ მაგალითეფ, ნამუთ გუგამანგარენა? ჩქინ ვიდეოეფ, აუდიოდრამეფ დო სტატიეფიშ სერია „მიაჸუნით თინეფიშ რწმენაშ მაგალითის“ მიგეხვარებნა უმოს რეალურქ ქიჸუას თქვანო ბიბლიურ შემთხვევეფქ. * სოიშახ უჯინეთ, ურჩქილეთ ვარდა წეკითხენთ თე ჯგირო გიმორკვიებულ შემთხვევეფს, ქოთხით იეჰოვას, ქიმგეხვარან, ქოძირათ კონკრეტულ აზრ, მუთ შეილებნა გიმირინუათ. წერმიდგინით თქვან დუდ მთავარ პერსონაჟიშ ადგილს. დეფიქრით, მუ აკეთეს იეჰოვაშ თე ძვირფას მსახურეფქ დო მუჭო მეხვარ თიქ, გიორჯგინესკო სირთულეეფს. თეშ უკულ გეგმირინეთ ნაგურეფ თქვან სიტუაციას. მადლობა ქუწით იეჰოვას თი მოხვარაშენ, მუდგას უკვე გარზენა. ირნერ საშვალება დოგორით შხვეფშა გურიშელაკინალო დო მახვარებელო დო თეშნერო ქაძირეთ იეჰოვას, ნამდა აფასენთ თიშ მოხვარას.

23. მუჭოთ ესაიაშ 41:10, 13-ს ჭარჷ, მუს მოპირნა იეჰოვა?

²³ ცხოვრება ქვეყნიერებას, ნამდგას სატანა აკონტროლენს, შილებე რთულ რდას დო მინშა ვა მიჩქუდან, მუჭო მიფქცუათ (2 ტიმ. 3:1). მარა ჩქი ოკო ვა ბწუხენდათ დო ვა მოშქურდან. იეჰოვას უჩქჷ, მუ მდგომარეობას ვორეთ. თინა მოპირნა, ნამდა, მუჟამსით მოხვარა მოსაჭირნა, მუშ ძალიერ მარძგვან ხეს ქუმოფთხუნა (წეკითხით ესაიაშ 41:10, 13). ჩქი ბოლოშა ვორეთ დარწმუნებულ, ნამდა იეჰოვა ქიმმეხვარებნა დო ბიბლიაშე მიბღენთ ძალას, მუდგაშ საშვალებათ გივორჯგინათ ნებისმიერ სირთულეს.