1. Pingo Yecu olego Jehovah ni ogwok lupwonnyene?

I DYEWOR me agikki me kwone i lobo, Yecu obedo ka tam i kom pekki ma lupwonnyene gibikato ki iye. Pien en onongo maro lupwonnyene, en olego Wonne me ‘gwokogi ki bot Larac.’ (Jon 17:14, 15) Yecu onongo ngeyo ni ka edok cen i polo, Catan Larac-ci bimedde ki lweny i kom ngat mo keken ma mito tic pi Jehovah. Pi meno, jo pa Jehovah onongo gibimito gwok.

2. Ngo ma weko wamoko ni Jehovah bigamo legawa?

² Jehovah ogamo lega pa Yecu pien en maro Wode. Ka watute ki tekowa ducu me maro Jehovah, en bimarowa bene dok en bigamo legawa pi kony kacel ki gwok. Jehovah obedo Lawi ot ma lamar. Pi meno, en bimedde ki gwoko lutinone. Ka en pe ogwokogi, man bibalo nyo kelo lewic i nyinge!

3. Pingo wamito gwok pa Jehovah i kare-ni?

³ Wamito gwok pa Jehovah i kare-ni ma loyo kare mo keken. Kibolo Catan woko ki i polo “ma tye ki akemo madwong.” (Yabo 12:12) En weko jo mogo gitamo ni ka gitye ka unowa, nongo gitye “ka tic pi Lubanga.” (Jon 16:2) Jo mukene, ma pe giye i kom Lubanga, giketo aunauna i komwa pien wapat ki jo me lobo man. Labongo paro pi tyen lok mumiyo giunowa, wan pe walwor. Pingo? Pien Lok pa Lubanga waco ni: ‘Rwot genne, en bimiyowu teko, dok bigwokowu ki i cing Larac.’ (2 Tec. 3:3) Jehovah gwokowa nining? Kong wanyamu yo aryo mapatpat.

4. Ma lubbe ki Jo Epeco 6:13-17, ngo ma Jehovah ominiwa me gwokowa?

⁴ Jehovah omiyo botwa jami lweny ma twero gwokowa ki i kom lweny pa Catan. (Kwan Jo Epeco 6:13-17.) Jami lweny ma Lubanga miyo-ni tek dok tiyo maber! Ento myero wamedde ki tic ki jami lweny magi ducu ka wamito ni ogwokwa. Jami lweny magi ki acel acel gicung pi gin ango? Wabinyamogi kore ki kore.

5. Del pyer me ada obedo gin ango, dok pingo omyero waruki?

⁵ Del pyer cung pi ada ma nonge i Lok pa Lubanga, Baibul. Pingo omyero waruk del man? Pien Catan obedo “won goba.” (Jon 8:44) En dong obedo ka loko goba pi mwaki alip mapol dok obwolo “dano ma i wi lobo ducu”! (Yabo 12:9) Ento lok ada ma tye i Baibul gwokowa weko pe kibwolowa. Waruko del pyer me ada nining? Watimo man ka wapwonyo lok ada madok i kom Jehovah, wawore i “cwiny ki ada,” dok wabedo lugen i jami ducu ma watimo.​—Jon 4:24; Ep. 4:25; Ibru 13:18.

6. Nyonyo me gengo kor cung pi gin ango, dok pingo omyero waruki?

⁶ Nyonyo me gengo korwa cung pi rwom me kit ma atir pa Jehovah. Pingo omyero waruk nyonyo me gengo kor? Kit macalo nyonyo me gengo kor gwoko adunu pa lamony weko pe kicobo, kit ma atir bene gwokowa wek jami maraco me lobo man pe obal cwinywa nyo ngat ma wabedo. (Car. 4:23) Jehovah mito ni wamare dok wati pire ki cwinywa ducu. (Mat. 22:36, 37) Pi meno, Catan tute me poko cwinywa kun bwolowa me maro jami me lobo man​—jami ma Jehovah dagi. (Yak. 4:4; 1 Jon 2:15, 16) Dok ka dirone meno pe otiyo, en miniwa bwura wek watim gin mo ma cwero cwiny Jehovah.

7. Waruko nyonyo me gengo korwa nining?

⁷ Waruko nyonyo me gengo kor ki lubo rwom me gin maber ki gin marac pa Jehovah i kwowa. (Jab. 97:10) Jo mukene gitamo ni rwom me kit ma atir pa Jehovah diyogi. Ento ka wajuko lubo cik ma igi lac me Baibul i kwowa, ci nongo watye calo lamony ma olunyo nyonyo me gengo kore woko i dye lweny pien en tamo ni nyonyo man pek mukato kare woko. Man nongo obedo tim me mingo adada! Bot wan jo ma wamaro Jehovah, “cikke pe nurowa,” ento laro kwowa.​—1 Jon 5:3.

8. Tyen lokke ngo ka kiwaco ni omyero wabed ma wayubbe me tito kwena maber ma bedo macalo war ma waruko i tyenwa?

⁸ Paulo bene ocuko cwinywa me bedo ma wayubbe me tito lok me kwena maber me kuc ma bedo macalo war. Meno tyen lokke ni, i kare ducu omyero wabed ma wayubbe maber me tito kwena maber me Ker-ri. Ka wanywako kwena me Baibul ki jo mukene, niyewa jing bedo matek. Cuko cwinywa matek ka waneno kit ma jo pa Jehovah i twok lobo-ni ducu gitye ka tic ki kare mo keken ma onen me tito kwena maber. Me labolle, gitito kwena i gang tic nyo i gang kwangi, i ot ki ot nyo i kabedo me biacara, ka gucito ka wil, ka gulimo wadigi ma gipe Lucaden, nyo ka gitye ka lok ki dano ma gingeyo, nyo kadi bed pe gitwero a ki gang pi two nyo tiyo. Ka lworo omakowa ci wajuko tito kwena woko, ci nongo watye calo lamony ma olunyo warne woko i dye lweny; ngene kene ni tyene biwanne. Macalo adwogine, bibedo tek adada me gwokke kekene ka kimonye, dok en pe bibedo atera me lubo rukca pa ladit monnye.

9. Pingo mitte ni wating kwot malac me niye?

 ⁹ Kwot malac-ci cung pi niye ma watye kwede i kom Jehovah. Watye ki niye ni en bicobo cikkene ducu. Niye meno bikonyowa me “neko mac ki i kom atero ma Larac bayo.” Pingo mitte ni wating kwot malac man? Pien gwokowa weko pwony pa jo mungak pe bwolowa dok weko cwinywa pe tur ka jo mukene gicayo jami ma waye iye. Labongo niye, pe wabibedo ki teko me kwero bita pa jo mukene ka gimito ni watur cik pa Jehovah. Ki tungcel, ka wacung matek pi niyewa i gang ticwa nyo i cukul, nongo watye ka tingo kwotwa. (1 Pet. 3:15) Kare ducu ka wakwero dog tic ma culle lamal ento ma twero balo yubwa me woro Jehovah, nongo watye ka tingo kwotwa. (Ibru 13:5, 6) Dok kare ducu ma watiyo pi Jehovah kadi bed watye ka kato ki i aunauna, nongo kwotwa tye ka gwokowa.​—1 Tec. 2:2.

10. Otok nyonyo me wiwa obedo gin ango, dok pingo omyero waruki?

¹⁰ Otok nyonyo me wiwa obedo gen me larre ma Jehovah miyo botwa. Watye ki gen ni en bimiyo bakacic bot jo ducu ma gitimo mitine, dok kadi bed wato,  en bicerowa. (1 Tec. 5:8; 1 Tem. 4:10; Tito 1:1, 2) Kit macalo otok nyonyo gwoko wi lamony, genwa me larre gwoko tamwa. I yo ma nining? Gen meno weko waketo tamwa i kom cikke pa Lubanga dok konyowa weko pekkiwa pe bwoyowa woko. Waruko otok nyonyo man nining? Watimo man ki neno jami kit ma Jehovah neno kwede. Me labolle, pe waketo genwa i kom lonyo ma pe genne, ento i kom Lubanga.​—Jab. 26:2; 104:34; 1 Tem. 6:17.

11. Pala lucwan pa cwiny maleng obedo ngo, dok pingo omyero wati kwede?

¹¹ Pala lucwan pa cwiny maleng obedo Lok pa Lubanga, Baibul. Pala lucwan meno tye ki teko me yaro woko ka maleng kit goba mo keken, pi meno gonyo dano ki i opii me pwony goba ki tim maraco. (2 Kor. 10:4, 5; 2 Tem. 3:16, 17; Ibru 4:12) Wapwonyo kit me tic ki pala lucwan man i yo maber ki i kwan piwa kenwa kacel ki pwonnye ma wanongo kun wok ki i dul pa Lubanga. (2 Tem. 2:15) Medo i kom jami lweny ma Jehovah miniwa, en bene miniwa gwok mo matek adada. Man obedo gin ango?

12. Gin ango mukene ma wamito, dok pingo?

¹² Lamony maryek ngeyo ni pe etwero lweny ki buca mony madit kene ci eloyo, en ngeyo ni emito kony pa lumony luwote. I yo acel-lu, pe watwero loyo lwenywa i kom Catan ki lulub kore kenwa; wamito kony pa omegiwa ki lumegiwa. Jehovah omiyowa lumony milion mapol ata ma giromo konyowa. Gin aye ‘utmegiwa’ ma i wi lobo ducu.​—1 Pet. 2:17.

13. Ma lubbe ki Jo Ibru 10:24, 25, adwogi mabeco ango ma wanongo ka wacito i cokke?

¹³ Yo acel ma wanongo kwede kony aye ki bedo tye i cokkewa. (Kwan Jo Ibru 10:24, 25.) Wan ducu i kare mogo cwinywa tur. Ka meno otimme ci cokke twero cuko cwinywa. Lagam ma omegiwa ki lumegiwa gimiyo ki i cwinygi, cuko cwinywa. Pwony ki lapor ma gimiyo ma jenge i Baibul tugo cwinywa me medde ki tic pi Jehovah. Dok wanongo cuko cwiny ka waloko kwedgi ma peya cokke ocakke ki dok i ngeye. (1 Tec. 5:14) Medo i kom meno, cokkewa miniwa kare me konyo jo mukene dok man keliwa yomcwiny. (Tic 20:35; Rom. 1:11, 12) Cokkewa konyowa i yo mukene bene. Gikonyowa me bedo lutit kwena ki lupwonye mabeco. Me labolle, wanongo pwonnye i kom kit me tic ki Jami Ticwa ma Pigi Tego me Pwony i yo maber. Pi meno, yubbe maber adada pi cokke. I cawa me cokke, ter iti iwiny lok maber. I nge cokke, ket i tic pwony ma inongo. Ka itimo kit meno, ci ibidoko “askari maber pa Yecu Kricito.”​—2 Tem. 2:3.

14. Kony mukene ango ma watye kwede?

¹⁴ Watye bene ki cwak pa lumalaika milion mapol. Tam kong i kom gin ma lamalaika acel twero timone! (Ic. 37:36) Dong igo gin ma dul mony pa lumalaika madit twero cobone. Pe tye dano mo nyo kadi wa jogi ma gitwero loyo dul mony pa Jehovah matek-ki. Jehovah aye obedo ngat matek loyo ducu. Pi meno, ka en tye tung botwa, kare ducu wabibedo tek loyo lumonewa, kadi bed gipol nining. (Lungol. 6:16) Watwero bedo ki gen ni meno lok ada! Ka cwinyi otur pi gin mo ma latic lawoti, latin kwan lawoti, nyo wati mo ma pe Lacaden owaco nyo otimo, tam i kom jo ducu ma gitwero konyi. Wi opo ni, pe itye keni i lweny man. Itye ka lubo tela pa Jehovah.

15. Ma lubbe ki Icaya 54:15, 17, pingo pe tye ngat mo keken ma twero gengo jo pa Jehovah ki tito kwena?

¹⁵ Jo me lobo man ma tye i te loc pa Catan-ni gitye ki tyen lok mapol me dagowa. Pe wacwako pati mo keken me wibye dok pe wadonyo i lweny. Watito pi nying Lubanga, watito ni Ker-re keken aye bikelo kuc, dok walubo rwomme me kit ma atir. Wanyuto bot jo me lobo-ni ni laloc me lobo-ni obedo lagoba dok lanek. (Jon 8:44) Dok watito ni lobo pa Catan-ni cokcok-ki kibiketo tere woko. Kadi bed kit meno, Catan ki lulub kore pe gibijuko ticwa me tito kwena. Me ka meno, wabimedde ki pako Jehovah i yo mo keken ma watwero! Kadi bed Catan tek adada, en pud pe otwero gengo kwena maber me Ker-ri ki o i but lobo-ni ducu. Man twere keken pien watye ki gwok pa Jehovah.​—Kwan Icaya 54:15, 17.

16. Jehovah bilaro jone nining i kare me twon can madit atika-ni?

¹⁶ Ngo ma wabikato ki iye macok cok-ki? I kare me twon can madit atika-ni, Jehovah bilarowa i yo aryo mamwonya adada. Mukwongo, en bilaro luticce ma lugen i kare ma bitugo cwiny luker me lobo man me jwero te Babilon Madit, ma en aye dini goba ducu me lobo-ni. (Yabo 17:16-18; 18:2, 4) I nge meno, en bilaro jone i kare ma bijwero but lobo pa Catan mudong-ngi i lweny me Armagedon.​—Yabo 7:9, 10; 16:14, 16.

17. Adwogi maber ango ma wanongo ka wamedde ki bedo cok ki Jehovah?

¹⁷ Ka wamedde ki bedo cok ki Jehovah, Catan pe bitwero timo gin mo marac i komwa ma birii matwal. Ki lok ada, en aye kibijwere matwal. (Rom. 16:20) Pi meno, ruk jami lweny ducu ma Lubanga miyo​—dok imedde ki tic kwedgi! Pe item lweny i kom Catan ki lobone keni. Mi cwak ki omege ki lumege. Dok ilub tira ma Jehovah miyo. Ka itimo meno, ci itwero bedo ki gen ni Woru me polo ma lamar-ri bimini teko dok bigwoki.​—Ic. 41:10.