1. Mɛni he je nɛ Yesu bi Yehowa kaa e bu e kaseli ɔmɛ a he ɔ?

NYƆ mi nɛ e nɔ jena Yesu ma gbo ɔ, e susu nyagbahi nɛ e kaseli ɔmɛ kɛ maa kpe ɔ he. Akɛnɛ Yesu suɔ e kaseli ɔmɛ he je ɔ, e bi e Tsɛ ɔ kaa e “bu a he ngɛ nɔ yayami ɔ he.” (Yoh. 17:14, 15) Yesu le kaa ke e kpale kɛ ho hiɔwe ya a, Satan Abosiami maa ya nɔ maa te si kɛ wo nihi nɛ a suɔ nɛ a sɔmɔ Yehowa a. Enɛ ɔ he ɔ, e sa nɛ Yehowa nɛ po e we bi a he piɛ.

2. Kɛ wa ma plɛ kɛ ná nɔ mi mami kaa Yehowa ma ha wa sɔlemihi a heto ha kɛɛ?

² Yehowa ha Yesu sɔlemi ɔ heto ejakaa e suɔ lɛ. Ke wa bɔ mɔde kaa wa maa pee Yehowa suɔmi nya ní ɔ, Yehowa hu maa suɔ wɔ, nɛ ke wa sɔle kaa e ye bua wɔ nɛ e bu wa he ɔ, e maa bu tue. Akɛnɛ Yehowa ji Tsɛ nɛ ngɛ suɔmi he je ɔ, e maa ya nɔ maa hyɛ e bimɛ a nɔ. Ke e pee we jã a, lɔ ɔ maa gbe e biɛ ɔ he guɛ!

3. Mɛni he je nɛ wa hia Yehowa he piɛ pomi mwɔnɛ ɔ?

³ Wa hia Yehowa he piɛ pomi wawɛɛ amlɔ nɛ ɔ. Akɛnɛ a fiee Satan kɛ je hiɔwe he je ɔ, “e mi mi fu wawɛɛ nitsɛ.” (Kpoj. 12:12) E ha nɛ ni komɛ susu kaa ke a wa wɔ yi mi ɔ, lɔ ɔ tsɔɔ kaa a ngɛ “Mawu sɔmɔe ngɛ blɔ klɔuu nɔ.” (Yoh. 16:2) Ni komɛ hu nɛ a he we Mawu yi ɔ waa wɔ yi mi, ejakaa a susu kaa wa ngɛ slɔɔto ngɛ nihi nɛ a ngɛ je ɔ mi ɔ a he. Bɔ fɛɛ bɔ nɛ ji ɔ, ke a wa wɔ yi mi ɔ, wa yi gbeye. Mɛni he je? Ejakaa Mawu Munyu ɔ de ke: “Anɔkualetsɛ ji Nyɔmtsɛ ɔ nɛ, nɛ e maa wo nyɛ he wami, nɛ e maa po nyɛ he piɛ kɛ je nɔ yayami ɔ he.” (2 Tɛs. 3:3) Mɛni blɔ nɔ Yehowa guɔ kɛ poɔ wa he piɛ? Nyɛ ha nɛ wa susu blɔ enyɔ nɛ Yehowa guɔ nɔ kɛ peeɔ jã a he nɛ waa hyɛ.

4. Ngɛ Efeso Bi 6:13-17 ɔ nya a, mɛni nɛ Yehowa ha wɔ nɛ e kɛ po wa he piɛ?

⁴ Yehowa ha wɔ ta buli a he piɛ pomi níhi nɛ ma nyɛ maa po wa he piɛ kɛ je Satan tuami ɔmɛ a he. (Kane Efeso Bi 6:13-17.) Ta buli a he piɛ pomi níhi nɛ je Mawu ngɔ ɔ ngɛ he wami nɛ a tsuɔ ní saminya! Se loko ta buli a he piɛ pomi ní nɛ ɔmɛ maa po wa he piɛ ɔ, jã wa wo eko fɛɛ eko. Mɛni nɛ ta buli a he piɛ pomi ní ɔmɛ daa si kɛ ha? Nyɛ ha nɛ wa susu eko fɛɛ eko he nɛ waa hyɛ.

5. Mɛni ji anɔkuale nɛ ji mlɛmi fimi nɔ́ ɔ, nɛ mɛni he je nɛ e sa nɛ waa wo ɔ?

⁵ Anɔkuale nɛ ji mlɛmi fimi nɔ́ ɔ daa si kɛ ha anɔkualehi nɛ ngɛ Mawu Munyu nɛ ji Baiblo ɔ mi ɔ? Mɛni he je nɛ e sa nɛ waa wo mlɛmi fimi nɔ́ nɛ ɔ? Ejakaa Satan ji “lakpa a e tsɛ.” (Yoh. 8:44) Satan bɔni lakpa yemi jeha akpehi abɔ ji nɛ ɔ, nɛ e sisi nihi “ngɛ zugba a nɔ hehi tsuo”! (Kpoj. 12:9) Se anɔkualehi nɛ ngɛ Baiblo ɔ mi ɔ poɔ wa he piɛ konɛ a ko sisi wɔ. Kɛ wa ma plɛ kɛ wo anɔkuale nɛ ji mlɛmi fimi nɔ́ ɔ ha kɛɛ? Wa ma nyɛ maa pee jã kɛ gu anɔkuale nɛ kɔɔ Yehowa he nɛ wa maa kase, “mumi kɛ anɔkuale” mi nɛ wa ma ja lɛ ngɛ, kɛ anɔkuale nɛ wa maa ye ngɛ níhi tsuo a mi ɔ nɔ.​—Yoh. 4:24; Efe. 4:25; Heb. 13:18.

6. Mɛni nɛ dami nɛ ji gugue nɔ dama a tsɔɔ, nɛ mɛni he je nɛ e sa nɛ waa wo ɔ?

⁶ Dami nɛ ji gugue nɔ dama a daa si kɛ ha Yehowa dami mlaahi. Mɛni he je nɛ e sa nɛ waa wo gugue nɔ dama a? Kaa bɔ nɛ gugue nɔ dama poɔ ta bulɔ tsui he piɛ ɔ, jã kɛ̃ nɛ dami nɛ ji gugue nɔ dama a poɔ wa okadi peemi tsui ɔ he piɛ konɛ ní yayahi nɛ yaa nɔ ngɛ Satan je ɔ mi ɔ nɛ ko ná wa nɔ he wami. (Abɛ 4:23) Yehowa hyɛɛ blɔ kaa waa suɔ lɛ, nɛ wa sɔmɔ lɛ kɛ wa tsui tsuo. (Mat. 22:36, 37) Enɛ ɔ he ɔ, Satan bɔɔ mɔde kaa e ma gba wa tsui ɔ mi nɛ waa suɔ níhi nɛ a ngɛ je ɔ mi, nɛ ji níhi nɛ Yehowa sume ɔ. (Yak. 4:4; 1 Yoh. 2:15, 16) Ke jamɛ a ga tsɔmi ɔ yi manye ɔ, e bɔɔ mɔde kaa e maa wa wɔ yi mi konɛ waa pee níhi nɛ Yehowa sume.

7. Kɛ wa ma plɛ kɛ wo dami nɛ ji gugue nɔ dama a ha kɛɛ?

⁷ Ke wa kplɛɛ Yehowa mlaahi nɛ kɔɔ nɔ́ nɛ da kɛ nɔ́ nɛ dɛ he ɔ nɔ nɛ waa kɛ tsu ní ɔ, lɔ ɔ tsɔɔ kaa wa wo gugue nɔ dama a. (La 97:10) Eko ɔ, ni komɛ ma susu kaa Yehowa mlaa amɛ ngɛ kpɛii tsɔ. Se ke waa kɛ Baiblo sisi tomi mlaahi kpa ní tsumi ɔ, wa maa pee kaa ta bulɔ ko nɛ e je e gugue nɔ dama a be mi nɛ ta ngɛ nɔ yae akɛnɛ e susu kaa dama a mi jiɔ wawɛɛ ɔ he je. Nile be mi kaa nɔ ko maa pee jã! Nihi nɛ a suɔ Yehowa a nɛ́ e kita amɛ kaa a ji “tlomi,” mohu ɔ, a naa lɛ kaa nɔ́ nɛ ma nyɛ ma he a yi wami.​—1 Yoh. 5:3.

8. Ke a ke waa wo tokota nɛ waa pee klaalo kaa wa maa jaje tue mi jɔmi he sane kpakpa a, mɛni e tsɔɔ?

⁸ Paulo wo wɔ he wami kaa waa wo tokota nɛ waa pee klaalo kaa wa maa jaje tue mi jɔmi he sane kpakpa a. Enɛ ɔ tsɔɔ kaa e sa nɛ waa pee klaalo be fɛɛ be kaa wa maa fiɛɛ Matsɛ Yemi ɔ he sane kpakpa a. Ke waa kɛ ni kpahi sɛɛ sɛ gbi nɛ ngɛ Baiblo ɔ mi ɔ he ní ɔ, e haa nɛ wa hemi kɛ yemi ɔ mi waa. Ngɛ anɔkuale mi ɔ, ke wa na bɔ nɛ Yehowa we bi ngɛ je kɛ wɛ bɔɔ mɔde kaa a maa ngɔ he blɔ fɛɛ he blɔ nɛ a ma náa kɛ fiɛɛ sane kpakpa a, e woɔ wɔ he wami wawɛɛ. Kaa nɔ hyɛmi nɔ́ ɔ, a fiɛɛɔ ngɛ a ní tsumi hehi, a fiɛɛɔ ngɛ wehi a mi kɛ hehi nɛ nihi pɔɔ bemi ngɛ. Jehanɛ hu ɔ, ke a ya tsuapohi a mi, loo a ya slaa a weku li loo a na nihi nɛ a le mɛ ɔ, a yeɔ mɛ odase. Ke gbeye yemi ha nɛ wa kpa fiɛɛmi ɔ, wa maa pee kaa ta bulɔ ko nɛ e je e tokota be mi nɛ ta ngɛ nɔ yae. E yi kulaa kaa e maa plaa. Ke e ba lɛ jã a, e maa ye kaa e ma fã e he ngɛ he nyɛli ɔmɛ nɛ a ba tua lɛ ɔ a dɛ, nɛ e be nyɛe nɛ e kɛ blɔ tsɔɔmi nɛ ta buli a nɔkɔtɔma a kɛ ma ha a nɛ tsu ní.

9. Mɛni he je nɛ e sa nɛ waa hɛɛ hemi kɛ yemi nɛ ji tsɛ̃i ngua a?

 ⁹ Hemi kɛ yemi nɛ ji tsɛ̃i ngua a daa si kɛ ha hemi kɛ yemi nɛ wa ngɛ ngɛ Yehowa mi ɔ. Wa ngɛ nɔ mi mami kaa Yehowa maa ye e si womihi tsuo a nɔ. Hemi kɛ yemi nɛ ɔ maa ye bua wɔ nɛ waa “gbe nɔ yayami ɔ kɛ̃ɛ̃ mi bihi nɛ a ngɛ tsoe ɔ tsuo.” Mɛni he je nɛ e sa nɛ waa hɛɛ tsɛ̃i ngua nɛ ɔ? E poɔ wa he piɛ konɛ hemi kɛ yemi kuali a tsɔɔmihi ko sisi wɔ, nɛ e ha we nɛ wa hemi kɛ yemi ɔ mi nɛ gbɔjɔ ke nihi ye wa he fɛu. Ke wa be hemi kɛ yemi ɔ, wa be nyɛe maa bu Yehowa tue ke ni kpahi nyɛ wa nɔ kaa wa kua Yehowa mlaa. Be fɛɛ be nɛ wa maa bu Yehowa tue ngɛ wa ní tsumi he loo sukuu ɔ, lɔ ɔ tsɔɔ kaa wa hɛɛ wa tsɛ̃i ngua a. (1 Pet. 3:15) Be fɛɛ be nɛ wa ma kua ní tsumi nɛ ma ha nɛ wa ná sika fuu se e be wɔ blɔ ngmɛe nɛ waa pee babauu ngɛ Yehowa sɔmɔmi mi ɔ, lɔ ɔ tsɔɔ kaa wa hɛɛ wa tsɛ̃i ngua a. (Heb. 13:5, 6) Nɛ be fɛɛ be nɛ wa maa pee Yehowa suɔmi nya ní ngɛ si temi kɛ womi nɛ waa kɛ ngɛ kpee ɔ tsuo se ɔ, lɔ ɔ tsɔɔ kaa wa tsɛ̃i ngua a ngɛ wa he piɛ poe.​—1 Tɛs. 2:2.

10. Mɛni ji yi wami hemi dade pɛɛ ɔ, nɛ mɛni he je nɛ e sa nɛ wa bu?

¹⁰ Yi wami hemi nɛ ji dade pɛɛ ɔ ji hɛ kɛ nɔ fɔmi nɛ Yehowa ha wɔ. Wa ngɛ hɛ kɛ nɔ fɔmi  kaa Yehowa maa jɔɔ e sɔmɔli tsuo, nɛ ke a gbo po ɔ, e ma tle mɛ si kɛ ba wami mi. (1 Tɛs. 5:8; 1 Tim. 4:10; Tito 1:1, 2) Kaa bɔ nɛ dade pɛɛ poɔ ta bulɔ yi he piɛ ɔ, jã nɔuu kɛ̃ nɛ yi wami hemi nɛ ji dade pɛɛ ɔ poɔ wa susumi he piɛ. Ngɛ mɛni blɔ nɔ? Hɛ kɛ nɔ fɔmi nɛ ɔ yeɔ bua wɔ nɛ wa ngɔɔ wa hɛ kɛ fɔɔ Mawu si womihi a nɔ, nɛ e yeɔ bua wɔ nɛ wa náa juɛmi nɛ da ngɛ nyagbahi nɛ waa kɛ ngɛ kpee ɔmɛ a he. Mɛni blɔ nɔ o maa gu kɛ bu dade pɛɛ nɛ ɔ? Ke wa ha nɛ wa susumi kɛ Yehowa susumi kpa gbi be fɛɛ be ɔ, lɔ ɔ tsɔɔ kaa wa bu dade pɛɛ nɛ ɔ. Kaa nɔ hyɛmi nɔ́ ɔ, wa hɛ kɛ nɔ fɔmi ɔ dɛ si ngɛ ní nami nɛ be si hie daa a nɔ, mohu ɔ, e daa si ngɛ Mawu si womi ɔmɛ a nɔ.​—La 26:2; 104:34; 1 Tim. 6:17.

11. Mɛni ji mumi ɔ klaate ɔ, nɛ mɛni he je e sa nɛ wa kɛ tsu ní?

¹¹ Mumi ɔ klaate ɔ nɛ ji Mawu Munyu ɔ ji Baiblo ɔ nɛ. Jamɛ a klaate ɔ nyɛɔ kpaa lakpa tsɔɔmi fɛɛ lakpa tsɔɔmi he bo, nɛ e haa nɛ nihi yeɔ a he ngɛ lakpa tsɔɔmihi kɛ je mi bami nɛ ma nyɛ maa ye mɛ awi ɔ he. (2 Kor. 10:4, 5; 2 Tim. 3:16, 17; Heb. 4:12) Wa kaseɔ bɔ nɛ a kɛ klaate nɛ ɔ tsuɔ ní saminya ha kɛ gu dɛ he ní kasemi kɛ tsɔsemi nɛ wa nine suɔ nɔ ngɛ Mawu asafo ɔ mi ɔ nɔ. (2 Tim. 2:15) Ngɛ ta buli a he piɛ pomi níhi nɛ Yehowa ha wɔ ɔ se ɔ, e ha wɔ he piɛ pomi nɔ́ kpa ko hulɔ. Mɛni ji lɔ ɔ?

12. Mɛni hu nɛ wa hia, nɛ mɛni he je?

¹² Ta bulɔ nɛ e he be ɔ le kaa lɛ nɔ kake too be nyɛe nɛ e kɛ ta buli babauu nɛ hwu ta nɛ e ye manye; e le kaa e hia e nyɛmimɛ ta buli kpa amɛ a yemi kɛ buami. Jã nɔuu kɛ̃ nɛ wɔ hu wa le kaa wɔ pɛ wa be nyɛe nɛ waa kɛ Satan kɛ e se nyɛɛli ɔmɛ nɛ hwu ngɛ wa dɛ he; wa hia wa nyɛmimɛ a yemi kɛ buami. Ngɛ je kɛ wɛ tsuo ɔ, Yehowa ha wɔ wa “nyɛmimɛ a kuu” ɔ konɛ a ye kɛ bua wɔ.​—1 Pet. 2:17.

13. Ngɛ Hebri Bi 10:24, 25 ɔ nya a, kɛ asafo mi kpehi yeɔ bua wɔ ha kɛɛ?

¹³ Blɔ kake nɛ wa guɔ nɔ kɛ náa yemi kɛ buami ji asafo mi kpe nɛ wa yaa a. (Kane Hebri Bi 10:24, 25.) Kaa bɔ nɛ e pɔɔ bami ngɛ wa kpɛti nihi fuu wa blɔ fa mi ɔ, ke wa kɔni mi jɔ̃ ɔ, asafo mi kpe nɛ wa yaa a haa nɛ wa nɔ gbagba tee. Hetohi nɛ nyɛmimɛ jeɔ a tsui mi kɛ haa a woɔ wɔ he wami. Magbɛ nɔ munyuhi nɛ a daa Baiblo ɔ nɔ kɛ tuɔ, kɛ peemi kɛ tsɔɔ nɛ wa nyɛmimɛ ɔmɛ peeɔ ɔ woɔ wɔ he wami nɛ wa yaa nɔ nɛ wa sɔmɔɔ Yehowa. Nɛ ní sɛɛmi nɛ yaa nɔ ngɛ waa kɛ wa nyɛmimɛ wa kpɛti loko a jeɔ asafo mi kpe sisi loo ke a kpa asafo mi kpe ɔ hu woɔ wɔ he wami. (1 Tɛs. 5:14) Jehanɛ hu ɔ, asafo mi kpehi nɛ wa yaa a haa nɛ wa náa he blɔ kɛ yeɔ bua wa nyɛmimɛ, nɛ lɔ ɔ haa nɛ wa bua jɔɔ. (Níts. 20:35; Rom. 1:11, 12) Asafo mi kpehi nɛ wa yaa a yeɔ bua wɔ ngɛ blɔ kpahi hu a nɔ. E yeɔ bua wɔ nɛ wa peeɔ fiɛɛli kɛ tsɔɔli kpakpahi. Kaa nɔ hyɛmi nɔ́ ɔ, e yeɔ bua wɔ nɛ wa leɔ bɔ nɛ waa kɛ wa Ní Tsɔɔmi Ga Dade ɔmɛ ma tsu ní ha saminya. Lɔ ɔ he ɔ, mo dla o he saminya loko o ya asafo mi kpehi, nɛ ke ní kasemi ɔ ngɛ nɔ yae ɔ, moo bu tue saminya. Ke a kpa asafo mi kpe ɔ, moo ngɔ tsɔsemi nɛ o ná a kɛ tsu ní. Nɛ ke o pee ní nɛ ɔmɛ ɔ, o maa pee “Kristo Yesu ta bulɔ kpakpa.”​—2 Tim. 2:3.

14. Mɛni yemi kɛ buami kpa nɛ wa ngɛ?

¹⁴ Bɔfo akpe nyɔngmahi abɔ nɛ a ngɛ he wami ɔ hu fĩɔ wa se. Mo susu nɔ́ nɛ bɔfo kake pɛ ma nyɛ ma tsu ɔ he nɛ o hyɛ! (Yes. 37:36) Nɛ o hyɛ nɔ́ nɛ bɔfohi babauu nɛ a he wa a ma nyɛ ma tsu. Yehowa kɛ e tabo ɔ a he wa kulaa pe adesa loo daimonio. Yehowa he wa pe nɔ fɛɛ nɔ, lɔ ɔ he ɔ, ke Yehowa piɛɛ wa he ɔ, wa he ma nyɛ maa wa pe nihi nɛ a teɔ si kɛ woɔ wɔ ɔ ke a he hiɛ kaa mɛni po. (Many. 6:16) Munyu nɛ ɔ ji anɔkuale! Mo ha nɛ munyu nɛ ɔ nɛ hi o yi mi be fɛɛ be nɛ o ní tsuli, o sukuu bi, aloo  nɔ ko nɛ e he we yi ɔ ma de nɔ́ ko loo e maa pee nɔ́ ko nɛ ma ha nɛ o kɔni mi nɛ jɔ̃. Mo kai kaa tsa pi mo pɛ nɛ o ngɛ ta nɛ ɔ hwue, Yehowa blɔ tsɔɔmi se nɛ o ngɛ nyɛɛe.

15. Ngɛ Yesaya 54:15, 17 ɔ nya a, mɛni he je nɛ nɔ́ ko nɔ́ ko be nyɛe ma ha nɛ Yehowa we bi nɛ a kpa fiɛɛmi ɔ?

¹⁵ Je nɛ Satan ngɛ kudɔe ɔ nyɛɔ wɔ ngɛ yi mi tomihi fuu a he je. Se kɛ̃ ɔ, waa kɛ wa he wui ma kudɔmi sanehi a mi, nɛ wa hwui ta hulɔ. Wa tsɔɔ nihi Mawu biɛ ɔ, wa tsɔɔ mɛ kaa Mawu Matsɛ Yemi ɔ pɛ nɛ e maa ngɔ tue mi jɔmi kɛ ba. Waa kɛ Mawu dami mlaahi tsuɔ ní, nɛ wa tsɔɔ mɛ kaa nɔ nɛ e ngɛ je ɔ kudɔe ɔ ji lakpatsɛ kɛ nɔ gbelɔ. (Yoh. 8:44) Wa fiɛɛɔ hu kaa e be kɛe nɛ Yehowa ma kpata Satan je ɔ hɛ mi. Nɛ wa be hae nɛ Satan kɛ nihi nɛ a nyɛɛ e se ɔ nɛ a ha nɛ wa kpa fiɛɛmi, wa maa ya nɔ nɛ waa ngɔ he blɔhi tsuo nɛ wa ma ná a kɛ je Yehowa yi! E ngɛ mi kaa Satan he wa wawɛɛ mohu lɛɛ, se e nyɛ we nɛ e tsi Matsɛ Yemi ɔ he sɛ gbi ɔ nya nɛ nihi ko nu ngɛ je kɛ wɛ. Enɛ ɔ ba mi akɛnɛ Yehowa poɔ wa he piɛ ɔ he je.​—Kane Yesaya 54:15, 17.

16. Mɛni blɔ nɔ Yehowa maa gu kɛ he e we bi a yi wami ngɛ amanehlu ngua a mi?

¹⁶ Mɛni nɛ ngɛ wa hɛ mi kɛ ma? Ngɛ amanehlu ngua a mi ɔ, Yehowa maa gu nyakpɛ blɔ enyɔ komɛ a nɔ kɛ he wa yi wami. Kekleekle ɔ, ke Yehowa ha nɛ matsɛmɛ nɛ a ngɛ zugba a nɔ ɔ kpata lakpa jamihi tsuo a nyɛ nɛ ji Babilon Ngua a hɛ mi ɔ, e ma he e sɔmɔli anɔkualetsɛmɛ a yi wami. (Kpoj. 17:16-18; 18:2, 4) Kɛkɛ lɔ ɔ se ɔ, ke e kpata nihi nɛ a piɛ ngɛ Satan je ɔ mi ɔ a hɛ mi ngɛ Harmagedon ta a mi se ɔ, e ma he e we bi a yi wami.​—Kpoj. 7:9, 10; 16:14, 16.

17. Ke wa ya nɔ nɛ wa ha nɛ huɛ bɔmi kpakpa hi waa kɛ Yehowa wa kpɛti ɔ, mɛni se nɛ wa náa?

¹⁷ Ke wa ya nɔ nɛ wa ha nɛ huɛ bɔmi kpakpa hi waa kɛ Yehowa wa kpɛti ɔ, Satan be nyɛe maa ye wɔ awi kɛ ya neneene, mohu ɔ, lɛ nɛ a ma kpata e hɛ mi kɛ ya neneene. (Rom. 16:20) Lɔ ɔ he ɔ, moo wo ta buli a he piɛ pomi ní ɔmɛ tsuo, nɛ o ko je kɔkɔɔkɔ! Koo bɔ mɔde kaa o maa hwu ta a ngɛ o dɛ he. Moo ye bua o nyɛmimɛ nyumuhi kɛ yihi, nɛ o kɛ Yehowa blɔ tsɔɔmi nɛ tsu ní. Ke o pee jã a, o ma nyɛ ma ná nɔ mi mami kaa o hiɔwe Tsɛ ɔ maa wo mo he wami nɛ e maa po o he piɛ.​—Yes. 41:10.