1. ¿Kunatsa Jesusajj discipulonakapar jarkʼaqañapatak Awkipar mayïna?

JESUSAJJ janïr jiwayatäkäna uka arumajja, kuna jan walinakansa discipulonakapajj uñjasipjjañapäna uka toqetwa lupʼïna. Niyakejjay discipulonakapar wal munaschïnjja, Supayat jarkʼaqañapatakiw Awkipar mayïna (Juan 17:14, 15). Jesusajj alajjpachar kuttʼjjäna uka qhepatsa, Supayajj Jehová Diosar serviñ munirinakarojj jan waltʼayaskakispänwa, ukwa Jesusajj yatïna. Ukhamajja, Jehová Diosan markapajj Jupan jarkʼaqatäñapaw wakisïna.

2. ¿Jehová Diosajj oracionanakas istʼapunistaniwa sasin kunatsa confiysna?

² Jehová Diosajja, Yoqapar munasitap laykojj oracionap istʼänwa. Jiwasatï Jehová Diosar kusisiyañatak wal chʼamachasiñäni ukhajja, Jupajj munasistaniwa, jarkʼaqtʼasita, yanaptʼita sasin mayiskañäni ukhasa istʼarakistaniwa. Niyakejjay Diosajj wali munasir Awkïchejja, wawanakaparojj cuidapuniniwa. Jan ukham lurkaspa ukhajj sutipsa qʼañuchasispawa, jan walitwa uñjayasirakispa.

3. ¿Kunatsa Jehová Diosamp jarkʼaqatäñ muntanjja?

³ Jichha tiemponjja, jukʼampiw Jehová Diosamp jarkʼaqatäñ muntanjja. Supayajj alajjpachat jaqoqanitäjjewa, ‘wali coleratarakiwa’ (Apoc. 12:12). Arknaqapkistu ukanakat yaqheparojja, jiwasar arknaqasajj ‘Diosarus servipkaspa ukhamwa Supayajj amuyayi’ (Juan 16:2). Diosar jan creyipki ukanakat yaqhepajja, akapachan amuyuparjam jan luratasatwa arknaqapjjarakistu. Ukhamäskpansa, janiw ajjsarktanti, Bibliajj akham siwa: “Tatitusti arunakapar phoqeriwa, jupaw jumanakarojj chʼamañchapjjätamjja, Supayatsa jarkʼaqapjjarakïtamjja” sasa (2 Tes. 3:3). Kunjamsa Jehová Diosajj jarkʼaqestu uk pä toqet uñjañäni.

4. Efesios 6:13-17 textorjamajja, ¿kunsa Jehová Diosajj jarkʼaqasiñasatakejj churistu?

⁴ Supayajj jan waltʼayañ munkistu ukat jarkʼaqasiñasatakejja, Jehová Diosajj armadurwa churistu (Efesios 6:13-17 liytʼañataki). Uka armadurajj wali chʼamaniwa, sumwa jarkʼaqaraki. Ukampis taqpach armadura uchantasiñäni ukhakiw jarkʼaqestani. Jichhajja, uka armaduran sapa partepatwa yatjjataskañäni.

5. ¿Kunatï cheqäki uka wakʼajj kunasa, ukat kunatsa uchasiñasa?

⁵ Kunatï cheqäki uka wakʼajja, Diosan Arupan qellqatäki mä arunjja, Biblian qellqatäki uka cheqa yatichäwinakawa. ¿Kunatsa uk uchasiñasa? ‘Kʼarin awkipata’, mä arunjja Supayat jarkʼaqasiñatakiw uchasiñasa (Juan 8:44). Supayajj walja waranqa maranakaw kʼarisiski, ‘oraqen jakirinakarus engañjaskaraki’ (Apoc. 12:9). Ukampis Biblian cheqa yatichäwinakapaw jan engañjayasiñatakejj yanaptʼistu. ¿Kunjamsa kunatï cheqäki uka wakʼa uchassna? Jehová Diosat kunatï cheqäki uk yateqasa, ‘espiritumpi cheqampi adorasa’, ukat ‘taqe kunan honrado chuymampi sarnaqasa’ (Juan 4:24; Efes. 4:25; Heb. 13:18).

6. ¿Kunas cheqapar sarnaqañ pecho jarkʼaqasiñ chalecojja, kunatsa uchasiñasa?

⁶ Cheqapar sarnaqañ pecho jarkʼaqasiñ chalecojja, Jehová Diosan cheqap leyinakapawa. ¿Kunatsa uk uchasiñasa? Kunjamtï chalecojj mä soldadon chuymap jarkʼaqkejja, ukhamarakiw cheqapar sarnaqañ pecho jarkʼaqasiñ chalecojj akapachan jan wali amuyunakapat chuymas jarkʼaqestu. (Prov. 4:23). Jehová Diosajja, taqe chuymasampi Jupar munassna serviraksna ukwa muni (Mat. 22:36, 37). Ukatwa, Supayajj Diosar jan taqe chuyma serviñatakejj kunanakatï akapachan utjki ukanak munañasatak chʼamañchistu, ukanak Jehová Diosajj uñisiwa (Sant. 4:4; 1 Juan 2:15, 16). Ukhampachas Diosar istʼaskakiñäni ukhajja, kunanaktï Jehová Diosajj uñiski ukanak lurayañatakejj jukʼampiw chʼamachasini.

7. ¿Kunjamsa cheqapar sarnaqañ pecho jarkʼaqasiñ chaleco uchastanjja?

⁷ Jehová Diosajj kunatï walïki, kunatï jan walïkaraki ukwa sistu, ukarjam sarnaqtan ukhaw cheqapar sarnaqañ pecho jarkʼaqasiñ chaleco uchastanjja (Sal. 97:10). Yaqhep jaqenakajja, Jehová Diosan leyinakaparjam sarnaqasajj janis libre jakaskaspa ukham inas amuyapjjchispa. Ukampis Biblian wiñay yatichäwinakaparjam jan sarnaqkañäni ukhajja, kunjamtï mä soldadojj pecho jarkʼaqasiñ chalecop ‘wali jathiwa’ sasin guerran apsuskejja, ukamp sassnawa. ¿Ukham lursna ukhajj jan amuytʼasir jaqëksnas ukhamäspajjaya? Jehová Diosar munasipki ukanakatakejja, “mandamientonakap phoqañajj janiw chʼamäkiti”, mandamientonakapajj salvavidampi sasiwa (1 Juan 5:3).

8. ¿Kayunakasar wiskhumpi uskuntasisa suma yatiyäwinak yatiyañatak listokïñajj kamsañsa muni?

⁸ Pablojj kayunakamarus wiskhumpi uskuntasis wakichtʼasipjjam, sumankañ apaniri suma yatiyäwinak yatiyañataki sasaw säna. Uka arunakajja, Diosan Reinopat yatiyañatakejj wakichtʼatäñasawa sañwa muni. Mayninakar kuntï Bibliajj siski uk yatiytan ukhajja, Jehová Diosar jukʼampiw confiytanjja. Diosan servirinakapajj taqe horasanwa aka oraqpachan predicasipki, uk yatiñajj wal chʼamañchistu. Sañäni, jupanakajj utat utaw predicapjje, ukatjja trabajona, escuelana, negocio lurkasa, alasir sarkasa, jan Testigöpki uka familiaranakapar visitkasa, jan ukajj uñtʼapki ukanakaruw predicapjje. Jiwasatï ajjsarañat jan predikjjsna ukhajja, kunjamtï mä soldadojj guerrankkasin wiskhup apsuskaspa ukamp  sassnawa. Ukham apsusisajj facilakiw kayup usuchjasispa, enemigonakapat jarkʼaqasiñsa janiw puedkaspati, comandantepar istʼañas chʼamarakïspawa.

9. Diosar confiyatasajj mä jachʼa escudor uñtasitawa, ¿kunatsa uk apañasapuni?

⁹ Jachʼa escudojja, Jehová Diosar confiyktan ukawa. Jupajj promesanakap phoqaniwa sasaw confiytanjja. Ukaw ‘Supayan aqkir flechanakap jiwarayañatak’ yanaptʼistani. Uka escudo apañasapuniwa, ukhamatwa apostatanakan kʼari yatichäwinakapat jarkʼaqasiñäni, jaqenakajj Diosar servitasat jiskʼachapkistu, burlasipkistu ukhas jan aynachtʼkañäniti. Diosar jan confiyjjsna ukhajja, mayninakajj Diosan leyinakap pʼakintayañ munapjjestaspa ukhajj facilakwa jupanakar istʼjjsna. Ukampis jiwasatï trabajonsa, escuelansa, Diosan leyinakap jan pʼakintañatak chʼamachastan ukhajja, Jupar confiyatasajj jarkʼaqestuwa (1 Ped. 3:15). Jehová Diosar taqe chuyma serviñat jarkʼkistaspa uka suma pagat trabajo jan katoqktan ukhajja, Jehová Diosar confiyatasaw mä jachʼa escudor uñtat jarkʼaqaskistu (Heb. 13:5, 6). Diosar serviñat jarkʼatpachas Jupat jan jitheqtktan ukhajja, Jupar confiyatasaw mä jachʼa escudor uñtasit jarkʼaqaskistu (1 Tes. 2:2).

10. ¿Kunas salvasiñ cascojja, ukat kunjamsa uchastanjja?

 ¹⁰ Salvasiñ cascojja, Jehová Diosajj mä suytʼäwi churkistu ukawa. Uka suytʼäwejja, Diosaw jiwañat salvitani, sasin confiyañawa, voluntädap lurapkani ukanakaw premio katoqapjjani sasin confiyañarakiwa (1 Tes. 5:8; 1 Tim. 4:10; Tito 1:1, 2). Kunjamtï mä cascojj soldadon pʼeqep jarkʼaqkejja, ukhamarakiw ‘Diosaw salvitani’ sasin suytʼañajj jan wali amuyunakat jarkʼaqestu. ¿Kunjamsa jarkʼaqestu? Diosan promesanakapat lupʼiñatakiw yanaptʼistu, jan waltʼäwinakan uñjaskasas jan sinti llakisiñatakiw yanaptʼarakistu. ¿Kunjamsa salvasiñ casco uchastanjja? Jehová Diosjam amuyañatak chʼamachasisaw uchastanjja. Sañäni, ‘tukusir qollqer confiyañat sipansa Diosaruw confiytanjja’ (Sal. 26:2; 104:34; 1 Tim. 6:17).

11. ¿Espíritu santojj churkistu uka espadajj kunasa, ukat kunatsa apnaqañasa?

¹¹ Espíritu santojj churkistu uka espadajja, Diosan Arupawa, mä arunjja, Bibliawa. Uka espadajj kʼarinak qhanstayañatakisa, kʼari yatichäwinakat jaqenakar qhespiyañatakisa, jan wali vicionak apanukuyañatakis wali chʼamaniwa (2 Cor. 10:4, 5; 2 Tim. 3:16, 17; Heb. 4:12). Uka espadjja, Bibliat sapak yatjjatasa, Diosan markapajj yatichkistu uka yanaptʼa katoqasaw sum apnaqañ yateqtanjja (2 Tim. 2:15). Jehová Diosajj janiw armadura churasaki jarkʼaqkistuti. ¿Kuna toqes jarkʼaqarakistu?

12. ¿Supayar atipjañatakejj kunsa muntanjja, ukat kunatsa?

¹² Experienciani mä soldadojja, janiw mä ejercitorojj sapapaki atipjkaspati, jan ukasti, mayni soldado masinakapampikiw atipjaspa uk jupajj sumwa yati. Supayampiru yanapirinakapampirojj ukhamarakiw sapasakejj jan atipjañ puedksnati. Atipjañasatakejj jilat kullakanakasan yanaptʼapwa muntanjja. Jehová Diosajj jiwasar yanaptʼañapatakejj oraqpachankir jilat kullakanakwa churistu (1 Ped. 2:17).

13. Hebreos 10:24, 25 textorjamajja, ¿kunjamsa tantachäwinakajj yanaptʼistu?

¹³ ¿Kunjamatsa jilat kullakanakan yanaptʼap katoqsna? Tantachäwinakar sarasaw katoqsna (Hebreos 10:24, 25 liytʼañataki). Taqeniw awisajj aynachtʼat uñjastanjja. Ukampis tantachäwinakar sarasajj wali chʼamañchtʼataw jikjjatastanjja. Jilat kullakanakan taqe chuyma arstʼatapajj wal chʼamañchtʼistu. Demostracionanakasa, jilatanakajj discursonak arstʼapki ukas Diosar serviskakiñatakiw chʼamañcharakistu. Tantachäwinak janïr qalltkipana, tantachäw tukuyatar jupanakamp parltʼasiñas wal chʼamañcharakistu (1 Tes. 5:14). Tantachäwinakajja, mayninakar yanaptʼañatakiw yanaptʼarakistu, ukajj wal kusisiyistu (Hech. 20:35; Rom. 1:11, 12). Janiw ukakïkiti, tantachäwinakanwa sum predicañsa yatichañsa yateqtanjja. Sañäni, ukanwa Bibliat yatichañatak utjkistu uka qellqatanaksa, videonaksa sum apnaqañ yateqtanjja. Ukhamajja, tantachäwinakatak sum wakichtʼasipjjañäni, tantachäwinakansa sum istʼapjjañäni, ukatsti ukarjam lurañatak chʼamachasipjjarakiñäni. Ukhamtï lurañänejja, sapa mayniw “Cristo Jesusan mä suma soldadopjamajj” guerratak suma wakichtʼatäñäni (2 Tim. 2:3).

14. ¿Khitinakas yanaptʼarakistaspa?

¹⁴ Wali chʼamani walja millón angelanakaw yanaptʼarakistaspa. Mä sapa angelajj kunsa luraspa uk yatjjtanwa, ukhamajj ¿kunsa mä ejército angelanakajj luraspa uk amuysnati? (Is. 37:36). Janiw kuna jaqesa, ni demonionakas Jehová Diosan jachʼa ejercitopjamajj utjkiti.  Diosajj taqe chʼamaniwa, Jupatï jiwasampïnejja, enemigonakasajj waljanïkpasa atipjañäniwa (Juec. 6:16). Ukat janiw pächasktanti. Trabajonkiri jan ukajj escuelankiri compañerosasa, jan ukajj jan Testigöki uka familiarasajj arsutapampi, luratapampi aynachtʼayañ munistani ukhajja, ukwa amtañasa. Janiw sapakïktanti Jehová Diosaw jiwasampïski, Jupaw yanaptʼistani.

15. Isaías 54:15, 17 textorjamajja, ¿kunatsa Diosan markaparojj janiw predicañ khitis jarkʼkaspati sasajj sissna?

¹⁵ Supayampi apnaqata akapachajj walja razonanakatwa uñisistu. Jiwasajj janiw politicar apoyktanti, ni guerrarus sarktanti. Diosan sutipwa jaqenakar yatiytanjja, Diosan Reinopakiw sumankañ apanini sasaw yatiyaraktanjja, Diosan leyinakaparjamaw sarnaqaraktanjja. Akapacha apnaqerejj kʼarïtapa, jaqe jiwayirïtapa, jan sinttʼasirïtapwa qhanañchtanjja (Juan 8:44). Akapachajj niyaw tukjatäjjani sasaw yatiyaraktanjja. Supayampi yanapirinakapampejj janipuniw predicañ jarkʼañ puedkistaniti. Jehová Diosarojj kunayman toqet jachʼañchaskakiñäniwa. Supayajj chʼamanïkchisa, Diosan Reinopat aka oraqpachan yatiyasiski uk janiw jarkʼañ puedkiti. ¿Kunatsa? Jehová Diosaw jarkʼaqaskistu (Isaías 54:15, 17 liytʼañataki).

16. Jachʼa tʼaqesïwinjja, ¿kunsa Jehová Diosajj markap laykojj lurani?

¹⁶ ¿Kunas jutïrin pasani? Jachʼa tʼaqesïwinjja, Jehová Diosaw markapar jarkʼaqani. Maya, ‘oraqenkir reyinakajj’ Jachʼa Babiloniar tʼunjkani, mä arunjja taqe falso religionanakar tʼunjkani ukhaw Jupat jan jitheqtir servirinakaparojj jarkʼaqani (Apoc. 17:16-18; 18:2, 4). Paya, Supayan apnaqat akapachankirinakat jiltʼkani ukanakar Armagedonan tʼunjkani ukhaw markaparojj jarkʼaqarakini (Apoc. 7:9, 10; 16:14, 16).

17. ¿Kunatsa Jehová Diosat jan jitheqtañasäki?

¹⁷ Jehová Diosat jan jitheqtkañäni ukhajja, Supayajj janiw kunäkipansa wiñayatak jan waltʼaykistaniti. Antisas jupaw wiñayatak tukjatäni (Rom. 16:20). Ukhamajja, Diosajj churkistu uka taqpach armadurampi uchantasiñäni, janipun kunäkipansa apsusipjjañäniti. Janipun sapaki nuwasipjjañäniti, antisas jilat kullakanakasar yanaptʼapjjañäni, Jehová Diosan ewjjtʼanakaparus istʼapjjarakiñäni. Ukhamtï lurañänejja, wali munasir Awkisaw chʼamañchistani, jarkʼaqarakistani (Is. 41:10).