1. Inyuki Yésu a bi bat Yéhôva le a tat banigil bé?

I U U nsôk i niñ yé hana ’isi, Yésu a bi hoñol mandutu banigil bé ba bé lama boma. Kiki a bé gwés mawanda mé, Yésu a bat Isañ le a “sôñ bo i moo ma mut mbe.” (Yôhanes 17:14, 15) Yésu a bé yi le i mbus maké mé i ngii, Satan Nsohop a bé lama leñ bagwélél ba Yéhôva gwét. Jon bagwélél ba Yéhôva ba bé lama bana ngôñ ni mut a ntat bo.

2. Kii i nkwés bés nkaa le Yéhôva a ga timbhe masoohe més?

² Yéhôva a bi timbhe masoohe ma Yésu inyule a bé gwés nye. Ibale di mboñ kii yosôna di nla inyu lémél Yéhôva a’ gwés bés, a’ emble ki masoohe més i ngéda di gwé ngôñ le a hôla bés, tole a sôñ bés. Kiki Isañ mbai nu a ntôñ bon bé, Yéhôva a ga ke ni bisu i tôñ bon bé ni gwéha. A mboñ hala inyu boñ le jôl jé li kee ni bisu i tééba lipubi!

3. Inyuki di gwé ngôñ le Yéhôva a sôñ bés i len ini?

³ Munu dilo di nsôk dini nyen di gwé toi ngôñ le Yéhôva a sôñ bés. Ba bi luhul Satan i ngii, a sôs hana hisi a “ban-ga hiun hikeñi.” (Masoola 12:12) A ngwés kwés i bôt ba ntééñga bés nkaa le i yom ba mboñ i yé loñge i mis ma Djob. (Yôhanes 16:2) Bape ba ntééñga bés inyule maboñok més ma yé mahéñha ni maboñok ma bôt ba nkoñ ’isi unu. Ndi to kii leñek, di nkon bé woñi, inyuki? Inyule Bibel i nkal le: “Nwet a yé maliga, nyen a’  lédés bé, a sôñ ki bé i moo ma mut mbe.” (2 Tésalônika 3:3) Lelaa Yéhôva a nsôñ bés? Di tehe manjel ima.

4. Inoñnaga ni Éfésô 6:13-17, kii Yéhôva a bi ti bés inyu sôñ bés?

⁴ Yéhôva a bi ti bés bijôl bi gwét bi bi nsôñ bés i ngéda Satan a njôs bés. (Añ Éfésô 6:13-17.) Bijôl bi gwét bi mbuu bi, bi gwé ngui bi nsal ki loñge. Bi ga bane bés nseñ ibale di nyoñ ngéda i haba hiki yada mu, ni ibale di nhéya bé gwo ntel ngéda wonsôna gwét bi nom. Kii hiki jôl gwét mu i nkobla? Di pôdôl hiki yada mu.

5. Kii i yé ngôli maliga, inyuki di nlama haba yo?

⁵ Ngôli maliga i yé maliga di nléba ikété Bibel. Inyuki di nlama haba yo? Inyule Satan a yé “isañ bitembee.” (Yôhanes 8:44) Nano a yé dikôô di nwii le a ntembee, a nyumus ki “nkoñ ’isi wonsôna ni bitembee gwé”! (Masoola 12:9) Ndi maliga di nléba ikété Bibel ma nsôñ bés ni bitembee gwé. Lelaa ni di nla haba i ngôli i? Di nhaba yo i ngéda di nigil Bañga i Yéhôva, i ngéda di ngwélél nye “ni mbuu ni maliga,” ni i ngéda di yé maliga ikété mam momasôna.​—Yôhanes 4:24; Éfésô 4:25; Lôk Héber 13:18.

6. Kii i yé ben i tôl i telepsép, inyuki di nlama haba yo?

⁶ Ben i tôl i telepsép i yé matiñ ma téé sép ma Yéhôva. Inyuki di nlama haba yo? Kiki ben i tôl i ntat tôl sônda le hikoñ hi gwel bañ nye ñem, hala nyen ben i tôl i telepsép i ntat bés le mahoñol ma nkoñ ’isi ma jôp bañ bés i ñem, kayéle ma heñel mut wés kété. (Bingéngén 4:23) Yéhôva a gwé ngôñ le di gwés nye, di gwélél ki nye ni ñem wés wonsôna. (Matéô 22:36, 37) Jon Satan a noode kab ñem wés, le mam ma nkoñ ’isi ma Yéhôva a ñoo, mon ma lémél bés. (Yakôbô 4:4; 1 Yôhanes 2:15, 16) Ibale likeñge jé li li nkile bé, a noode tééñga bés kayéle hala a tinde bés i bôk mambén ma Yéhôva.

7. Lelaa di nla haba ben i tôl i telepsép?

⁷ Di nhaba ben i tôl i telepsép i ngéda di neebe le Yéhôva nyen a kal bés i yom i yé loñge ni i yom i yé béba, ni i ngéda di niñ inoñnaga ni matiñ mé. (Tjémbi 97:10) Bôt bahogi ba nla hoñol le matiñ ma Yéhôva ma nlôôha let. Ndi ibale di nwaa niñ inoñnaga ni matiñ ma Bibel, a yé wengoñle sônda i nhéya ben i tôl i gwét inyule i kal yé i nlôôha yét. Kinje bijôñ! Inyu i bet ba ngwés Yéhôva, mambén mé ma “ñét bé,” ndi ma nsôñ niñ yés.​—1 Yôhanes 5:3.

8. I ngéda ba nkal le makôô ma ban-ga bitamb bi bi yé nkôôbaga i añal ñañ nlam u nsañ hala a nkobla le kii?

⁸ Paul a mbéhe ki bés le, makôô més ma bana bitamb nkôôbaga inyu añal ñañ nlam u nsañ. Hala a nkobla le di nlama ba bebee i añal ñañ nlam u Ane. I ngéda di ntééne bôt likalô, hémle yés i nkônde let. Hala a nti bés makénd ngandak i ngéda di ntehe bagwélél ba Yéhôva ba nyéñ manjel i añal ñañ nlam ni nkoñ ’isi wonsôna, i ngéda ba yé i bôlô, i suklu, mu mabôga map, ni i ngéda ba ntéé likalô i mandap ni mandap, bisabe, i ngéda ba nyuuga bôt bap ba lihaa ba ba ta bé Mbôgi Yéhôva, i ngéda ba nkwélés i bôt ba nyi, ni i ngéda ba gwé bé pôla  i pam mandap map. Ibale di nwaa téé likalô inyule di nkon woñi, hala a yé kiki sônda i i nhéa bitamb gwé i gwét, ha i ngéda i, a yé le a babaa, i ga bane ki nye ndutu ngandak i jo, a ga la ha bé to noñ i yom ñane wé a nkal.

9. Inyuki di nlama begee ben ikeñi i hémle?

⁹ Ben ikeñi i hémle i yé hémle di gwé inyu Yéhôva. Di yé nkwoog nkaa le a ga yônôs mimbônga nwé nwominsôna. I hémle i i ga hôla bés “i lém makoñ ma hié ma mut mbe momasôna.” Inyuki di nlama begee i ben ikeñi i hémle ini? Inyule i ntat bés ni biniigana bi batjañgbene maliga tole ni bibuk bibe bôt ba ñôm bés. Ibabé hémle, ki di ga la bé téñbe ni maliga, i ngéda bôt bape ba ntinde bés i bôk mambén ma Yéhôva. Hiki ngéda nu di ntjél boñ jam li li mbôk mbén Djob, i homa bôlô, i suklu, wee ben yés i hémle yon i nsôñ bés. (1 Pétrô 3:15) Hiki ngéda di ntjél sal bôlô i i nti bés ngandak moni inyule i ga ti bé bés pôla i bégés Djob kiki i nsômbla, wee di bééga ben yés i hémle. (Lôk Héber 13:5, 6) Ni le hiki ngéda nu di nke ni bisu i gwélél Yéhôva, to i ngéda ba nkolba  bés, wee ben yés i hémle yon i yé i sôñ bés.​—1 Tésalônika 2:2.

10. Kii i yé kôñgô i tohi, inyuki di nlama haba yo?

¹⁰ Kôñgô i tohi i yé botñem Yéhôva a nti bés​—botñem le a ga tohol bés mok mi nyemb, a bom ki i bet ba mboñ sômbôl yé. (1 Tésalônika 5:8; 1 Timôtéô 4:10; Titô 1:1, 2) Kiki kôñgô i nhô ño sônda, hala nyen hémle inyu tohi i ntat mahoñol més. Lelaa? Botñem i nhôla bés i ke ni bisu i bok mahoñol mu mam Yéhôva a bi bôn bés ni i boñ le mandutu ma yuu bañ bés. Lelaa di nla haba kôñgô yés? Di mboñ hala i ngéda di mboñ biliya le mahoñol més ma kiha ni mahoñol ma Djob. Kiki hihéga, Nyambe nyetama nyen di mbôdôl ñem, he bé lingwañ li li nom bé.​—Tjémbi 26:2; 104:34; 1 Timôtéô 6:17.

11. Kii i yé pansoñ i mbuu, inyuki di gwé ngôñ ni yo?

¹¹ Pansoñ i mbuu i yé Bañga i Djob le Bibel. I pansoñ i i gwé ngui i yelel to bimbe bitembee ni i kobol bôt i minkôm mi bikwéha bi biniigana, yak bilem bibe. (2 Korintô 10:4, 5; 2 Timôtéô 3:16, 17; Lôk Héber 4:12) Di nigil gwélél i pansoñ i ni njel yigil i Bibel yés bésbomede ni i ngéda di nkôs biniigana bi ntôñ u Djob. (2 Timôtéô 2:15) U héya bijôl bi gwét di ntehe, Yéhôva a nti ki bés yom ipe i i gwé ngui ngandak inyu sôñ bés. Kii i?

12. Inyu jo, kii ipe di gwé ngôñ, inyuki?

¹² Sônda i i nyi gwét, i nyi le i nla bé yémbél ngim ntôñ gwét yotama; i gwé ngôñ ni mahôla ma ini sônda ipe. Nlélém ni bés, di ta bé le di jôs Satan ni bôt bé bésbotama, di yémbél; di gwé ngôñ ni lôk kéé yés i bôda ni i bôlôm. Yéhôva a bi ti bés “ntôñ u lôk kéé” ikété nkoñ ’isi wonsôna inyu hôla bés.​—1 Pétrô 2:17.

13. Inoñnaga ni kaat Lôk Héber 10:24, 25, umbe nseñ di ñôt i ngéda di nke makoda?

¹³ Yom yada i i nhôla bés mu gwét bi, i yé i ke makoda. (Añ Lôk Héber 10:24, 25.) I yé i pam ngim mangéda le bésbobasôna di nôgda wee di yé ntombok, ha ngéda i, makoda ma nla hôla bés i témbna ngui yés. Mandimbhe ma lôk kéé i bôda ni i bôlôm ma nti bés makénd. Minkwel ba nti ni ndémbél i ntagbe bi nlédés makidik més i téñbe i gwélél Yéhôva. I ngéda di nkwel ni lôk kéé yés i bibôdle ni mamélél ma likoda, hala a nti bés makénd. (1 Tésalônika 5:14) Ni ki le, makoda ma nti bés maséé i lôl bôt bape mahôla. (Minson mi baôma 20:35; Rôma 1:11, 12) Makoda ma nhôla ki bés ikété manjel mape. Ma nhôla bés i hôlôs likeñge jés inyu jôs Satan, i tibil añal ñañ nlam ni i niiga bôt maliga. Kiki hihéga, ma niiga bés i tibil gwélél bisélél di gwé mu Nkuu wés bisélél inyu niiga. Jon kôôba loñge i ngéda u nke makoda. I ngéda u yé likoda, tibil emble. I mbus likoda, bii i mam u nigil i bisélél. Ibale u mboñ mam ma momasôna, u ga yila “bañga sônda i Kristô Yésu.”​—2 Timôtéô 2:3.

14. Mambe mahôla mape di gwé?

¹⁴ Didun di biañgel di di gwé ngui ngandak di nhôla ki bés. Hégda yom añgel yada i nla boñ! (Yésaya 37:36) Nano di béñge i yom didun di biañgel di yé le di boñ. Mut nye ki nye, to mbuu mbe wo ki wo u gwé bé ngui i jo  gwét kiki Yéhôva. Yéhôva a yé Nu ngui yosôna, jon i ngéda a yé ni bés, di nloo baoo bés bobasôna ngui, to ibale ba yé ngandak. (Bakéés 6:16) Maliga ma! Ibale di mbigda i mam ma, solôñ yés i bôlô, liwanda jés li suklu tole mut wés lihaa nu a ta bé Mbôgi Yéhôva a ta bé le a kal bés jam tole a boñ bés ngim jam i i yé le i tômbôs bés. Bigda le u ta bé wetama mu sañ i. Noñ maéba ma Yéhôva.

15. Inoñnaga ni kaat Yésaya 54:15, 17, inyuki bagwélél ba Djob ba ga yén bé nwee kekikel?

¹⁵ Nkoñ ’isi u Satan u gwé ngandak manjom i oo bés. Di ntjél yoñ ngaba i mam ma m’bô, di ntjél ki yoñ ngaba i gwét. Di mpubus jôl li Nyambe, di ñañle bôt bobasôna le ndik Ane Nyambe yon i ga lona nsañ, di nôgôl ki matiñ mé ma téé sép. Di ñañle bôt le ñane nkoñ ’isi unu a yé mut bitembee nunkeñi ni mut manola. (Yôhanes 8:44) Di ñañal ki le nkoñ ’isi u Satan u yé bebee ni tjiba. Ndi kekikel Satan ni bôt bé ba ga la bé téé nson u ñañ nlam. Maselna ni hala, di ga gwélél manjel momasôna inyu ke ni bisu i bégés Yéhôva! Tolakii Satan a gwé ngui ngandak, a nla bé kéñ le ñañ nlam u Ane u añlana ni nkoñ ’isi wonsôna. Hala a nla ndik bôña inyule Yéhôva a ntat bés.​—Añ Yésaya 54:15, 17.

16. Lelaa Yéhôva a ga tohol litén jé i njiiha ikeñi?

¹⁶ Kii i mbem bés? I njiiha ikeñi, Yéhôva a ga gwélél manjel ima ma tôbôtôbô inyu tohol bés. Kiki jam li bisu, Yéhôva a ga tohol bagwélél bé i ngéda a’ tinde bikiñe bi nkoñ ’isi i tjé Babilôn, nyañ bikwéha bi bibase. (Masoola 17:16-18; 18:2, 4) I mbus, a ga tat litén jé i ngéda a ga tjé nkoñ ’isi u Satan i Armagédôn.​—Masoola 7:9, 10; 16:14, 16.

17. Umbe nseñ di nkôs i yén bebee ni Yéhôva?

¹⁷ Ibale di nyén isi bipapai bi Yéhôva, Satan a ga la bé ôbôs maada més ni Yéhôva, to kéñ bés i kôs bisai bi boga. Ñ, nyen a ga tjiba i boga ni boga. (Rôma 16:20) Jon, haba bijôl bi gwét gwobisôna Nyambe a nti bés, u héiga bañ gwo kekikel! U yéñ bañ jo sañ wetama. Nit ini lôk kéé ipe. U noñ ki maéba ma Yéhôva. Ibale u mboñ hala, u nla ba nkwoog nkaa le Tata woñ nu gwéha a ga lédés we, a sôñ ki we.​—Yésaya 41:10.