1. Mun na Yezu y’a ɲini Jehova fɛ a k’ale ka kalandenw latanga?

YEZU ka suu laban na dugukolo kan, a tun be miirila gwɛlɛya minw bɛɛ tun bena a ka kalandenw sɔrɔ. Komi a tun b’a ka kalandenw kanu, o kama, a y’a ɲini a Faa fɛ ko a “k’u tanga juguman ma.” (Zan 17:14, 15). Yezu tun b’a lɔn ko ale seginin kɔ sankolo la, mɔgɔ o mɔgɔ tun bena a ɲini ka Jehova sago kɛ, Sutana Naafigi tun bena to k’o tigi kɛlɛ. O kama, Jehova sagokɛlaw mako tun bena kɛ a la a k’u latanga.

2. Mun na an lanin b’a la ko Jehova bena an ka deliliw jaabi?

² Komi Jehova b’a Dencɛ Yezu kanu, o kama, a tun b’a ka deliliw jaabi. N’an b’an seko bɛɛ kɛ walisa k’an koo diya Jehova ye, a bena an fana kanu. O la, n’an y’a deli ko a k’an dɛmɛ ani k’an latanga, a bena an jaabi. Jehova bena to k’a janto a deenw na ni kanuya ye i ko sotigi ɲuman b’a kɛ cogo min na. N’a m’o kɛ, a tɔgɔ bena tiɲɛ!

3. Mun na an mako b’a la Jehova k’an latanga bi?

³ An mako b’a la Jehova k’an latanga bi ka tɛmɛ sanga ni wagati bɛɛ kan. Sutana gwɛnna ka bɔ sankolo la, a “dimininba” lo (Yir. 12:12). A ye mɔgɔ dɔw lasun u k’a miiri ko u kɛtɔ k’an kɛlɛ, u be ‘Ala sago le kɛra.’ (Zan 16:2). Minw lanin tɛ Ala la, u dɔw b’an kɛlɛ sabu an tɛ koow kɛ i ko duniɲamɔgɔw. A mana kɛ min o min ye, an tɛ siran. Mun na do? Sabu Ala ka Kuma b’a fɔ ko: “Matigi ye kantigi ye, a bena jagwɛlɛya d’aw ma ani k’aw tanga juguman ma.” (2 Tes. 3:3). Jehova b’an latanga cogo di? A b’o kɛ cogo minw na, an k’u la fila lajɛ.

4. Ka kɛɲɛ ni Efɛzikaw 6:13-17 ka fɔta ye, Jehova ye mun lo di an ma walisa k’an latanga?

⁴ Jehova ye kɛlɛkɛminan dɔw di an ma Alako ta fan fɛ minw be se k’an latanga Sutana ma (Efɛzikaw 6:13-17 kalan). U barika ka bon ani u be mɔgɔ latanga yɛrɛ le! Nka n’an b’a fɛ o kɛlɛkɛminanw k’an latanga, fɔɔ an ka to ka baara kɛ n’u kelen kelen bɛɛ ye. O kɛlɛkɛminanw ye mun ni mun lo ye? An k’o lajɛ.

5. Cɛsirilan min kofɔra, o ye mun lo ye ani mun na an ka ɲi k’a siri?

⁵ Tiɲɛn ka kɛ aw ka cɛsirilan ye: O cɛsirilan ye mun lo ye? O ye tiɲɛn kumaw ye minw be sɔrɔ Bibulu kɔnɔ, o min ye Ala ka Kuma ye. Mun na an ka ɲi k’o cɛsirilan siri? An ka ɲi k’a siri sabu Sutana lo ye “galon faa” ye (Zan 8:44). A saan waa caaman ye nin ye, a b’a la ka ngalon tigɛ ani ka ‘diɲɛ ɲagami’! (Yir. 12:9). Nka, tiɲɛn kuma minw be Bibulu kɔnɔ, u b’an latanga Sutana ka lafilikow ma. An be tiɲɛn kɛ an ka cɛsirilan ye cogo di? An b’o kɛ n’an b’a ɲini ka tiɲɛn lɔn Jehova koo la, k’a bato “ni la ani tiɲɛ la” ani ka kɛ hɔɔrɔnw ye koo bɛɛ la.—Zan 4:24 Bible senuma; Efɛz. 4:25; Eburuw 13:18.

6. Nɛgɛdeleke min kofɔra, o ye mun lo ye ani mun na an ka ɲi k’a don?

⁶ Tilenninya ka kɛ aw ka nɛgɛdeleke ye: O nɛgɛdeleke ye mun lo ye? O ye Jehova ka sariya tilenninw lo ye. Mun na an ka ɲi k’o nɛgɛdeleke don? Sɔrɔdasi ka nɛgɛdeleke b’a latanga walisa u kana se k’a sɔnkun sɔgɔ. O cogo kelen na, tilenninya nɛgɛdeleke b’an latanga walisa duniɲa nin ka koo kolonw kana an sɔɔn tiɲɛ (Talenw 4:23). Jehova b’a fɛ an k’ale kanu ani an ka baara kɛ a ye n’an dusukun bɛɛ ye (Mat. 22:36, 37). O kama, Sutana b’a ɲini k’an lasun an ka kɛ dusu fila tigiw ye. Cogo di do? A kɛtɔ k’an lasun an ka duniɲa ka fɛɛnw kanu k’a sɔrɔ Jehova b’o fɛɛnw kɔniya (Zaki 4:4; 1 Zan 2:15, 16). N’o fɛɛrɛ ma ɲɛ a bolo, a bena an bagabaga walisa an ka koo dɔ kɛ min man di Jehova ye.

7. An be tilenninya nɛgɛdeleke don cogo di?

⁷ An be tilenninya nɛgɛdeleke don an kɛtɔ ka sɔn Jehova ka sariyaw ma ɲuman ni juguman koo la ani k’u labato (Zab. 97:10). Dɔw be se k’a miiri ko Jehova ka sariyaw be mɔgɔ niin degun. N’an tɛ Bibulu ka sariyakolow sira tagama tugun, an bena kɛ i n’a fɔ sɔrɔdasi dɔ min b’a ka nɛgɛdeleke bɔ kɛlɛ gwantuma na sabu a b’a miiri ko a ka gwili kojugu. O ye hakilintanya ye dɛ! Nka n’an be Jehova kanu, an bena a ye ko a ka cikanw “man gwɛlɛ,” u be mɔgɔ niin kisi le.—1 Zan 5:3.

8. Ka kibaro diiman fɔli kɛ an ka sennasanbara ye, o kɔrɔ ko di?

⁸ Pol y’an jija fana ko kibaro diiman min ye hɛrɛkuma ye, o fɔli ka kɛ an ka sennasanbara ye. O kɔrɔ ko an labɛnnin ka ɲi ka to tuma bɛɛ ka Masaya kibaro diiman fɔ mɔgɔw ye. N’an be Bibulu ka kibaro diiman fɔ mɔgɔw ye, o b’an yɛrɛ ka limaniya barika bonya. Duniɲa kuru bɛɛ kɔnɔ, Jehova Seerew be sababuw ɲini ka kibaro diiman fɔ mɔgɔw ye: baarakɛyɔrɔ, lakɔliso, jagokɛyɔrɔ, soo ni soo, sannikɛyɔrɔ la, n’u tagara bɔ u somɔgɔ dannabaliw ye, n’u be baro kɛra n’u lɔnbagaw ye ani hali n’u tɛ se ka bɔ u ka soo wagati dɔ la. O koo be mɔgɔ jija yɛrɛ le! N’an ye waajuli dabila siranya kosɔn, an bena kɛ i n’a fɔ sɔrɔdasi dɔ min b’a ka sanbara bɔ kɛlɛ tuma na. O  sɔrɔdasi ka teli k’a seenw mandimi. O la, a juguw ka teli ka se a kɔrɔ ani a tɛna se k’a kuntigi ka cikanw labato.

9. Mun na an ka ɲi ka lanaya nɛgɛkunbɛnnan minɛ an bolo?

⁹ Lanaya ka kɛ aw ka nɛgɛkunbɛnnan ye: O ye an ka limaniya ye Jehova koo la. An lanin b’a la ko Jehova bena a ka layiduw bɛɛ dafa. O limaniya b’an dɛmɛ ka “Sutana ka biɲɛ tasumaman bɛɛ faga.” Mun na an ka ɲi ka lanaya nɛgɛkunbɛnnan minɛ an bolo? An ka ɲi k’o kɛ sabu o nɛgɛkunbɛnnan b’an latanga walisa mɔgɔ murutininw kana an lafili n’u ka kalanw ye. A b’an dɛmɛ fana an fari kana faga ni mɔgɔw b’an lɔgɔbɔ an ka lannakow kosɔn. N’an limaniyanin tɛ, an tɛna fanga sɔrɔ ka lɔ kelen kan ni mɔgɔw b’an lasunna ka Jehova ka sariyaw tiɲɛ. Nka koo minw man di Jehova ye, tuma o tuma n’an be ban k’o kɛ baarakɛyɔrɔ wala lakɔliso la, an ka lanaya b’an latangara le (1 Piyɛri 3:15). Baara min sara ka ca, tuma o tuma n’an banna o la sabu a bena an bali ka baara kɛ bɛrɛbɛrɛ Jehova ye, an ka lanaya b’an latangara le (Eburuw 13:5, 6). Tuma o tuma fana n’an be Jehova sago kɛ  kɔrɔbɔliw bɛɛ n’a ta, an ka lanaya b’an latangara.—1 Tes. 2:2.

10. Kisili nɛgɛfugulan ye mun lo ye ani mun na an ka ɲi k’a biri?

¹⁰ Kisili nɛgɛfugulan: O ye jigiya ye, Jehova ye min di an ma. O jigiya ye ko Jehova bena a sagokɛlaw bɛɛ duga ani ko hali n’an sara, a bena an suu kunu (1 Tes. 5:8; 1 Tim. 4:10; Titi 1:1, 2). Nɛgɛfugulan be sɔrɔdasi kungolo latanga. O cogo kelen na, an ka jigiya b’an latanga miiriya juguw ma. Cogo di do? A b’an dɛmɛ an ka to ka miiri Ala ka layiduw la ani a b’an dɛmɛ an ka to k’an ka gwɛlɛyaw filɛ ni ɲɛɛ ɲuman ye. An be kisili nɛgɛfugulan biri an kɛtɔ k’an jija ka koow jati i ko Jehova b’u jati cogo min na. Ɲɛyirali fɛ, an t’an jigi la nafolo bantaw kan, nka an b’an jigi la Ala lo kan.—Zab. 26:2; 104:34; 1 Tim. 6:17.

11. Hakili senu ka murujan ye mun lo ye ani mun na an ka ɲi ka baara kɛ n’a ye?

¹¹ Hakili senu ka murujan: O ye Ala ka Kuma ye, o min ye Bibulu lo ye. Barika b’o murujan na ka se ka ngalon sifa bɛɛ bɔ kɛnɛ kan ani ka mɔgɔw hɔɔrɔnya ka bɔ ngalon kalanw ni delinanko juguw la (2 Kor. 10:4, 5; 2 Tim. 3:16, 17; Eburuw 4:12). An b’an yɛrɛ degi ka baara kɛ koɲuman n’o murujan ye an ka kelenna kalan ani fɔrɔmasɔn sababu fɛ. An b’o fɔrɔmasɔn sɔrɔ Ala ka ɔriganisasiyɔn kɔnɔ (2 Tim. 2:15). Jehova ye kɛlɛkɛminan minw di an ma, ka fara olu kan, a be dɛmɛ barikaman wɛrɛ lase an ma. O ye dɛmɛ juman ye?

12. An mako be fɛɛn wɛrɛ juman lo la ani mun na?

¹² Sɔrɔdasi kolɔnbaga b’a lɔn ko ale kelen tɛ se ka kɛlɛbolo barikaman kɛlɛ ani ka see sɔrɔ a kan. A mako b’a sɔrɔdasiɲɔgɔnw ka dɛmɛ na. O cogo kelen na, an kelen tɛ se ka see sɔrɔ Sutana n’a kɔfɛmɔgɔw kan. An mako b’an balimaw ka dɛmɛ na. O kama, duniɲa kuru bɛɛ kɔnɔ, Jehova ye “balimaw” di an ma minw b’an dɛmɛ.—1 Piyɛri 2:17.

13. Ka kɛɲɛ ni Eburuw 10:24, 25 ye, an ka lajɛnw b’an dɛmɛ cogo di?

¹³ An be dɛmɛ sɔrɔ cogo minw na, u la dɔ ye ka taga an ka lajɛnw na (Eburuw 10:24, 25 kalan). An bɛɛ fari be faga tuma dɔw la. N’an fari fagara, an ka lajɛnw be se k’an jija. An balimaw b’an jija n’u ka lakalitaw ye, u b’o minw kɛ n’u dusu bɛɛ ye. U be basigi Bibulu kan ka kalan minw kɛ ani u be koo minw ɲɛyira, o b’an jija an ka to ka Jehova sago kɛ. An be baro minw kɛ n’u ye sanni lajɛnw ka daminɛ ani u bannin kɔ, o b’an jija fana (1 Tes. 5:14). An ka lajɛnw be sababu di an ma fana ka tɔɔw dɛmɛ ani o b’an ninsɔn diya (Kɛw. 20:35; Ɔrɔm. 1:11, 12). An ka lajɛnw b’an dɛmɛ cogo wɛrɛw la fana. U b’an dɛmɛ k’an ka waajuli kɛcogo ani mɔgɔw kalancogo fisaya. Ɲɛyirali fɛ, lajɛnw na, an be baara kɛcogo degi koɲuman n’an ka kalankɛminanw ye. O kama, i yɛrɛ labɛn ka ɲɛ kafo ka lajɛnw kama. Lajɛnw na, mɛnni kɛ koɲuman. O kɔ, i ye fɔrɔmasɔn min sɔrɔ, o sira tagama. N’i b’o koow kɛ, i bena kɛ “Yezu Krista ka sɔlidasiɲuman” ye.—2 Tim. 2:3.

14. An be se ka dɛmɛ wɛrɛ juman lo sɔrɔ?

¹⁴ Mɛlɛkɛ barikaman miliyɔn caaman fana b’an dɛmɛna. Miiri k’a filɛ mɛlɛkɛ kelen dɔrɔn be se ka min kɛ! (Ezayi 37:36). Sisan, miiri k’a filɛ mɛlɛkɛ barikamanw kɛlɛbolo be se ka min kɛ. Mɔgɔ wala jina si tɛ se ka suma ni Jehova  ka kɛlɛbolo barikaman ye. A be fɔ ko Jehova mana fara a sagokɛla dɔ kan, u ka fanga ɲɔgɔn tɛ yen (Kirit. 6:16). O kuma ye tiɲɛn ye yɛrɛ le! O koo to i hakili la n’a y’a sɔrɔ ko i baarakɛɲɔgɔn dɔ, i ka lakɔli filankuru wala i somɔgɔ dannabali dɔ ye koo dɔ fɔ wala ka koo dɔ kɛ min y’i fari faga. A to i hakili la ko i tɛ kɛlɛ kɛra i kelen. Jehova lo b’i ɲɛminɛna.

15. Ka kɛɲɛ ni Ezayi 54:15, 17 ye, mun na mɔgɔ si tɛna se ka Ala sagokɛlaw bali u ka waajuli kɛ?

¹⁵ Sutana ka duniɲamɔgɔw b’an kɔniya koo caaman kosɔn. An t’an seen don politikikow ani kɛlɛkow la abada! An be Ala tɔgɔ fɔ mɔgɔw ye ani an b’a yira u la ko Ala ka Masaya kelenpe lo bena hɛɛrɛ sigi. An be Ala ka sariya tilenninw fana sira tagama. An b’a fɔ mɔgɔw ye ko duniɲa nin kuntigi ye ngalontigɛlaw faa ye ani ko mɔgɔfagala lo (Zan 8:44). An b’a fɔ u ye fana ko Sutana ka duniɲa nin bena halaki yanni dɔɔni. Sutana n’a kɔmɔgɔw tɛna se k’an bali abada ka waajuli kɛ. Nka, an bena to k’an seko bɛɛ kɛ ka nɔɔrɔ la Jehova kan! Hali ni Sutana fanga ka bon kosɔbɛ, a kɔni ma se k’an bali ka Masaya kibaro lase mɔgɔw ma duniɲa kuru bɛɛ kɔnɔ. Ni Jehova tun t’an latangara, an tun tɛna se k’o kɛ abada!—Ezayi 54:15, 17 kalan.

16. Jehova bena a sagokɛlaw kisi cogo di tɔɔrɔba tuma na?

¹⁶ Mun lo b’an kɔnɔna? Tɔɔrɔba wagati la, Jehova bena an kisi cogo kabakoman fila la. A fɔlɔ, a bena a sagokɛla kantigiw kisi tuma min na a bena dugukolo ka masaw lasun u ka Babilonɛba halaki. O Babilonɛba ye ngalon diinanw jɛnkulu ye (Yir. 17:16-18; 18:2, 4). O kɔ, Jehova bena a sagokɛlaw kisi tuma min na a bena Sutana ka duniɲa tɔɔ halaki Arimagedɔn kɛlɛ la.—Yir. 7:9, 10; 16:14, 16.

17. N’an magwɛrɛnin tora Jehova la, o b’an nafa cogo di?

¹⁷ N’an magwɛrɛnin tora Jehova la, Sutana tɛna se k’an mako sa pewu. Tiɲɛn na, ale yɛrɛ lo bena halaki bugubugu (Ɔrɔm. 16:20). O la, Ala ka kɛlɛkɛminanw bɛɛ to i kun ani to ka baara kɛ n’u ye! Kana a ɲini ka kɛlɛ kɛ i kelen. I balimaw dɛmɛ ani a to Jehova k’i ɲɛminɛ. N’i b’o kɛ, la a la ko i sankolola Faa bena barika don i la ani k’i latanga.—Ezayi 41:10.