1. Ebɛnadze ntsi na Jesus serɛɛ Jehovah dɛ onyi n’esuafo no mfi ɔbɔn no ho nsie?

ANAFUA a otwa tun wɔ Jesus n’asetsena mu wɔ asaase yi do no, nna ɔrodwen nsɛndzendzen a n’esuafo no behyia no ho. Ɔdɔ a Jesus wɔ ma n’anyɛnkofo no kaa no ma ɔserɛɛ n’Egya dɛ, ‘onyi hɔn mfi ɔbɔn no ho nsie.’ (John 17:14, 15) Nna Jesus nyim dɛ sɛ ɔsan kɔ sor a, Satan Abɔnsam bɔkɔ do akõ etsia hɔn a wɔpɛ dɛ wɔsom Jehovah no. Ɔda edzi kofee dɛ, nna Jehovah no nkorɔfo behia bambɔ.

2. Yebesi dɛn enya awerɛhyɛmu dɛ Jehovah bobua hɛn mpaabɔ?

² Osian ɔdɔ a Jehovah wɔ ma ne Ba Jesus ntsi, otsiee ne mpaabɔ no. Sɛ yɛyɛ dza yebotum biara dɛ yɛbɛyɛ dza ɔsɔ Jehovah n’enyi a, ɔbɔdɔ hɛn so; na sɛ yɛbɔ mpaa dɛ ɔmboa hɛn na ɔmbɔ hɛnho ban a obetsie hɛn. Jehovah yɛ ebusua Tsir a ɔdwen n’ebusua ho, ntsi ɔbɔkɔ do efi ɔdɔ mu ahwɛ ne mba. Osiandɛ, sɛ ɔannyɛ dɛm a, ɔbɛka ne dzin!

3. Ebɛnadze ntsi na yehia Jehovah ne bambɔ ndɛ?

³ Yehia Jehovah ne bambɔ kyɛn aber biara. Aber a wotuu Satan fii sor no, ɔdze “ebufuw kɛse” sianee baa asaase do. (Nyi. 12:12) Satan abɔ mbɔdzen ama hɔn a wɔtaa hɛn no mu binom agye edzi dɛ, sɛ wɔyɛ dɛm a ‘wɔdze rosom Nyankopɔn.’ (John 16:2) Hɔn so a wɔnngye Nyankopɔn nndzi no dze ɔtaa ba hɛn do osiandɛ yɛnnyɛ hɛn adze dɛ mbrɛ wiadze no yɛ no. Ɔmmfa ho adwen a nkorɔfo wɔ ma ntsi wɔtaa hɛn no, yɛmmbɔ hũ. Ebɛnadze ntsi a? Osiandɛ Nyankopɔn n’Asɛm no kã dɛ: “Ɔnokwafo nye Ewuradze a ɔbɛma hom etsim, na ɔahwɛ hom do wɔ ɔbɔn no ho no.” (2 Thess. 3:3) Ebɛn kwan na Jehovah  fa do bɔ hɛnho ban? Hom mma yɛnhwɛ akwan ebien.

4. Dɛ mbrɛ Ephesusfo 6:13-17 kyerɛ no, ebɛnadze na Jehovah dze ama hɛn dɛ ɔmbɔ hɛnho ban?

⁴ Jehovah ama hɛn nsa aka akodze a obotum abɔ hɛnho ban efi nhyɛdo a Satan dze ba hɛn do no ho. (Kenkan Ephesusfo 6:13-17.) Dɛm sunsum afamu akodze yi yɛ dzen na ɔbɔ edwuma papaapa! Naaso sɛ obotum abɔ hɛnho ban a, ɔsɛ dɛ yɛhyɛ no mu biara aber nyinara. Akodze no mu biara gyina hɔ ma ebɛnadze? Ma yɛmfa no nkorkor na yɛnkã ho asɛm.

5. Ebɛnadze nye nokwar abɔdo no, na ebɛnadze ntsi na ɔsɛ dɛ yɛbɔ?

⁵ Nokwar abɔdo no gyina hɔ ma nokwasɛm a ɔwɔ Nyankopɔn n’Asɛm, Bible no mu no. Ebɛnadze ntsi na ɔsɛ dɛ yɛbɔ abɔdo yi? Osiandɛ Satan yɛ ɔtorfo nye “atofosɛm n’egya.” (John 8:44) Ɔdze mfe mpempem pii edzi ator na ɔadaadaa “wiadze nyina”! (Nyi. 12:9) Naaso nokwasɛm a ɔwɔ Bible no mu no bɔ hɛnho ban fi Satan ne ndaadaa ho. Ebɛn kwan do na yɛbɔ dɛm sunsum afamu abɔdo yi? Sɛ yesũa Jehovah ho nokwasɛm, yɛsom no wɔ “sunsum nye nokwar mu,” na yedzi nokwar wɔ biribiara mu a, ɔno kyerɛ dɛ yɛdze asɛnkyerɛdze kwan do abɔdo no abɔ hɛn asen.​—John 4:24; Eph. 4:25; Heb. 13:18.

6. Ebɛnadze nye tsenenee akatabo no, na ebɛnadze ntsi na ɔsɛ dɛ yɛhyɛ?

⁶ Tsenenee akatabo no gyina hɔ ma Jehovah ne tsenenee gyinapɛn. Ebɛnadze ntsi na ɔsɛ sɛ yɛhyɛ akatabo no? Dɛ mbrɛ akatabo bɔ sordaanyi bi n’akoma ho ban no, dɛmara na tsenenee akatabo no so bɔ hɛn asɛnkyerɛdze kwan do akoma no ho ban fi ndzɛmba a ɔwɔ wiadze no mu a obotum enya nkantando bɔn wɔ hɛn do no ho. (Mbɛ. 4:23) Jehovah hwɛ kwan dɛ yɛdze hɛn akoma nyinara bɔdɔ no na yaasom no. (Matt. 22:36, 37) Satan dze, ɔmmpɛ dɛ yɛdze hɛn akoma nyinara bɔsom Jehovah, ntsi ɔbɔ mbɔdzen dɛ ɔbɛma yenya akɔndɔ ama ndzɛmba a ɔwɔ wiadze no mu a Jehovah kyir no. (Jas. 4:4; 1 John 2:15, 16) Na sɛ ɔyɛ iyi na annyɛ yie a, ɔbɔbɔ mbɔdzen dɛ obohunahuna hɛn ma yaayɛ biribi a otsia Jehovah ne mbra.

7. Ebɛnadze na yɛyɛ a ɔkyerɛ dɛ yɛahyɛ tsenenee akatabo no?

⁷ Sɛ yɛgye Jehovah ne mbra a ɔfa papa na bɔn ho no to mu na yɛdze yɛ edwuma wɔ hɛn asetsena mu a, ɔno kyerɛ dɛ yɛahyɛ tsenenee akatabo no. (Ndw. 97:10) Bi a binom bɛtse nka dɛ Jehovah ne mbra kyekyer hɛn. Naaso sɛ yegyaa dɛ yɛdze Bible mu ngyinadonsɛm reyɛ edwuma wɔ hɛn asetsena mu a, yɛbɛyɛ tse dɛ sordaanyi a ɔrokõ, na ɔtse nka dɛ n’akatabo no mu yɛ dur dodow ntsi oeyi ato hɔ. Nyansa nnyi adzeyɛ a ɔtse dɛm mu! Dɛm ntsi, hɔn a wɔdɔ Jehovah no, n’ahyɛdze “nnyɛ dzen” mma hɔn na mbom ɔyɛ dza ɔgye hɔn nkwa.​—1 John 5:3.

8. Sɛ wɔkã dɛ yɛmfa asomdwee asɛmpa no ho ahosiesie nhyehyɛ hɛn anan a ɔkyerɛ dɛn?

⁸ Paul sanee tuu hɛn fo dɛ yɛmfa asomdwee asɛmpa no ho ahosiesie nhyehyɛ hɛn anan. Dza ɔno kyerɛ nye dɛ, ɔsɛ dɛ yesiesie hɛnho aber nyinara dɛ yɛbɛkã Ahendzi ho asɛmpa no. Sɛ yɛkã Bible mu nkrasɛm no kyerɛ afofor a, ɔhyɛ hɛnankasa hɛn gyedzi dzen. Sɛ yɛhwɛ mbrɛ Jehovah no nkorɔfo a wɔwɔ wiadze nyinara no dze ho kwan a wobenya biara kã asɛmpa no a, ɔhyɛ nkuran papaapa. Wɔkã asɛmpa no wɔ edwuma mu, skuul mu, asaasesin a ndwuma wɔ mu, efiefi, ber a woridzi gua, ber a wɔrekɛsera hɔn ebusuafo a wɔnnyɛ Adasefo, ber a wɔnye hɔn anyɛnkofo robɔ nkɔmbɔ, nye ber mpo a yarba anaa mpanyinyɛ ntsi wɔaka dan mu kakra no. Sɛ osuro ntsi yegyaa dɛ yɛrekã asɛmpa no a, yɛbɛyɛ dɛ sordaanyi a  ɔrokõ na ɔaworɔw ne mpaboa; ɔrennyɛ dzen koraa dɛ obetsia biribi do ma oeepira. Dza obefi mu aba nye dɛ, aber a ɔatow ahyɛ no do no, ɔbɛyɛ dzen dɛ ɔbɔbɔ no ho ban, na orunntum nndzi akwankyerɛ a ne sahen dze bɛma no no do.

9. Ebɛnadze ntsi na no ho hia dɛ yesuo gyedzi kokyɛm kɛse no mu?

⁹ Gyedzi kokyɛm kɛse no gyina hɔ ma gyedzi a yɛwɔ wɔ Jehovah mu. Yɛwɔ gyedzi dɛ ɔbɛma n’anohoba ahorow nyinara aba mu. Gyedzi a ɔtse dɛm no bɔboa hɛn ma yeetum “edum ɔbɔn no n’egyenndua a ogya wɔ ano no.” Ebɛnadze ntsi na no ho hia dɛ yesuo kokyɛm kɛse yi mu? Osiandɛ ɔbɔ hɛnho ban amma awaafo aammfa hɔn ator nkyerɛkyerɛ aanndaadaa hɛn. Anaa sɛ nkorɔfo dzi hɛnho fɛw osian hɛn gyedzi ntsi a, ɔbɔ hɛnho ban amma hɛn abaw mu emmbu. Sɛ yennyi gyedzi a, aber a afofor adaadaa hɛn dɛ yembu Jehovah ne mbra do no, ɔbɛyɛ mberɛw dɛ yɛbɛyɛ dza wɔrekã no. Naaso aber biara a yɛbɛyɛ Jehovah n’apɛdze wɔ edwuma mu anaa skuul mu no, nna ɔno kyerɛ dɛ yeesuo hɛn kokyɛm no mu. (1 Pet. 3:15) Aber biara a yɛbɔpow edwuma a akatua no wɔ sor naaso ɔremma yenntum nnyɛ pii wɔ Jehovah no som mu no, nna ɔkyerɛ dɛ yeesuo hɛn kokyɛm no mu. (Heb. 13:5, 6)  Afei so, sɛ yɛkɔ do som Jehovah ɔmmfa ho ɔsoɛrtsia a yehyia no a, ɔno kyerɛ dɛ kokyɛm no robɔ hɛnho ban.​—1 Thess. 2:2.

10. Ebɛnadze nye nkwagye dadzekyɛw no, na ebɛnadze ntsi na ɔsɛ dɛ yɛhyɛ?

¹⁰ Nkwagye dadzekyɛw no nye enyidado a Jehovah dze ma hɛn no​—enyidado a ɔnye dɛ hɔn a wɔyɛ n’apɛdze no obotua hɔn nyina kaw; na sɛ ɔba no dɛ yewu mpo a, ɔabɔ hɛn anohoba dɛ ɔbɛsan dze hɛn aba nkwa mu. (1 Thess. 5:8; 1 Tim. 4:10; Titus 1:1, 2) Dɛ mbrɛ dadzekyɛw bɔ sordaanyi ne tsir ho ban no, dɛmara na nkwagye ho enyidado a yɛwɔ no bɔ hɛn nsusui ho ban. Ebɛn kwan do? Dɛm enyidado no ma yɛkɔ do dze hɛn adwen si Nyankopɔn n’anohoba ahorow do na ɔboa hɛn ma yenya ɔhaw ahorow a yehyia no ho adwen pa. Yesi dɛn hyɛ dɛm dadzekyɛw yi? Sɛ yɛma hɛn nsusui nye Nyankopɔn nedze hyia a, ɔno kyerɛ dɛ yɛahyɛ dadzekyɛw no. Dɛ nhwɛdo no, yɛmmfa hɛnho nnto ahonyadze a onnsi pi do, mbom yɛdze to Nyankopɔn do.​—Ndw. 26:2; 104:34; 1 Tim. 6:17.

11. Ebɛnadze nye sunsum afõwa no, na ebɛnadze ntsi na ɔsɛ dɛ yɛdze dzi dwuma?

¹¹ Sunsum afõwa no nye Nyankopɔn n’Asɛm, Bible no. Dɛm afõwa no wɔ tum a ɔma atorsɛm biara da edzi na ɔma afofor dze hɔnho fi ator nkyerɛkyerɛ nye suban bɔn ho. (2 Cor. 10:4, 5; 2 Tim. 3:16, 17; Heb. 4:12) Yesũa mbrɛ yɛdze afõwa yi bedzi dwuma yie wɔ hɛn ankorankor adzesua mu nye ntsetsee a Nyankopɔn n’ahyehyɛdze no dze ma hɛn no mu. (2 Tim. 2:15) Sɛ akodze a Jehovah dze ma hɛn no da nkyɛn a, ɔma hɛn bambɔ fofor a no mu yɛ dzen. Ɔno nye ebɛnadze?

12. Ebɛnadze bio na yehia, na ebɛnadze ntsi a?

¹² Sordaanyi a noho akokwaa no nyim dɛ nankotsee runntum nnye nsordaafo dɔm bi nnkõ na onndzi hɔn do konyim; obehia ne mfɛfo nsordaafo hɔn mboa. Dɛm pɛpɛɛpɛ na hɛn nkotsee so yerunntum nnye Satan na n’ekyirdzifo nnkõ nndzi hɔn do konyim; yehia hɛn nuanom hɔn mboa. Jehovah ama hɛn wiadze nyina ‘enuayɛkuw’ a wɔboa hɛn.​—1 Pet. 2:17.

13. Dɛ mbrɛ Hebrewfo 10:24, 25 kyerɛ no, sɛ yɛkɔ asafo nhyiamu a ebɛn mfaso na yenya?

¹³ Asafo nhyiamu a yɛkɔ no yɛ kwan kor a yɛfa do nya mboa. (Kenkan Hebrewfo 10:24, 25.) Sɛ hɛn abaw mu bu a​—dɛ mbrɛ ɔyɛ a ɔto hɛn mu biara no​—asafo nhyiamu a yɛbɔkɔ no botum ahyɛ hɛn nkuran. Mbuae a hɛn nuanom fi hɔn akoma mu ma no hyɛ hɛn nkuran. Bible mu ɔkasa ahorow a yetsie nye ɔyɛkyerɛ ahorow a wɔyɛ no hyɛ hɛn bo a yeesi dɛ yɛbɔkɔ do asom Jehovah no mu dzen. Afei, nkɔmbɔ a yɛbɔ ansaana asafo nhyiamu ahyɛ ase nye ber a yɛapon no hyɛ hɛn nkuran. (1 Thess. 5:14) Ɔno da nkyɛn a, asafo nhyiamu a yɛkɔ no ma yenya ho kwan boa afofor na iyi ma hɛn enyi gye. (Andw. 20:35; Rom. 1: 11, 12) Asafo nhyiamu a yɛkɔ no boa hɛn wɔ akwan ahorow do so. Wɔ kwan bi do no, ɔboa hɛn ma hɛnho kokwaa wɔ akodzi no mu, kyerɛ dɛ, osiesie hɛn ma yetu mpon wɔ asɛnka edwuma no mu. Dɛ nhwɛdo no, yesũa mbrɛ yɛdze ndzɛmba a ɔwɔ hɛn Edwindadze Etsitsir A Yɛdze Kyerɛkyerɛ no mu no bedzi dwuma yie. Dɛm ntsi, siesie woho yie ma asafo nhyiamu biara a ebɔkɔ. Sɛ dwumadzi no rokɔ do a, yɛ dzinn tsie. Afei, fa ntsetsee a inyae fii asafo nhyiamu ase no yɛ edwuma. Sɛ eyɛ ndzɛmba a ɔtsetse dɛm a, ebɛyɛ “Christ Jesus sordaanyi pa.”​—2 Tim. 2:3.

14. Ebɛn mboa fofor na yenya?

¹⁴ Afei so abɔfo ɔpepem pii a wɔwɔ tum no boa hɛn. Ɔwodze hwɛ adze a ɔbɔfo kortsee botum ayɛ! (Isa. 37:36) Afei, susu dza abɔfo dɔm a hɔnho yɛ dzen no botum ayɛ no  ho. Nyimpa anaa sunsum fĩ biara nnyi hɔ a obotum egyina Jehovah no dɔm a hɔnho yɛ dzen yi enyim. Wɔkã dɛ, sɛ Jehovah ka ne Dasefo nokwafo kortsee mpo ho a, wɔyɛ dɔmpepe. (Atsɛ. 6:16) Iyi yɛ nokwasɛm ankasa! Dɛm ntsi sɛ w’edwumamunyi, wo skuulnyi anaa wo busuanyi bi a ɔnnyɛ Ɔdasefo kã asɛm bi anaa ɔyɛ biribi ma ɔbɔ wo hũ a, ma dɛm asɛm no ntsena w’adwen mu. Kaa dɛ nnyɛ wankotsee na erokõ. Na osiandɛ iridzi Jehovah n’akwankyerɛ ekyir ntsi, ɔbɔboa wo.

15. Dɛ mbrɛ Isaiah 54:15, 17 kyerɛ no, ebɛnadze ntsi na obiara runntum mma Nyankopɔn no nkorɔfo nnka hɔn ano nnto mu?

¹⁵ Satan no wiadze no wɔ ndzɛmba pii a ogyina do tan hɛn. Bi nye dɛ, yenngyina ɔfã biara wɔ amanyɛsɛm mu, na yɛnnkɔ ɔkõ. Yɛbɔ Nyankopɔn ne dzin ho dawur, yɛkã n’Ahendzi no ho asɛm dɛ ɔno nkotsee na ɔdze asomdwee bɛbrɛ adasamba na yɛdze ne tsenenee gyinapɛn no yɛ edwuma. Yɛma nkorɔfo hu dɛ nyia odzi wiadze yi do tum no yɛ ɔtorfo tsiɔdzennyi nye owudzifo. (John 8:44) Na yɛkã dɛ ɔnnkɛkyɛr wɔbɛsɛɛ Satan no wiadze no. Naaso, Satan nye n’ekyirdzifo no runntum mma yɛnnka hɛn ano nnto mu da. Mbom, yɛbɔkɔ do afa kwan biara a yebotum do eyi Jehovah ayɛw! Tum a Satan wɔ nyina ekyir no, onntumii nnsiiw hɛn kwan dɛ yɛbɛkã Ahendzi no ho asɛm no akyerɛ nyimpa a wɔwɔ wiadze nyinara no. Sɛ ɔnnyɛ dɛ Jehovah bɔ hɛnho ban a, nkyɛ yerunntum nnyɛ iyi da!​—Kenkan Isaiah 54:15, 17.

16. Ebɛn kwan do na Jehovah bɛgye no nkorɔfo wɔ ahohiahia kɛse no mu?

¹⁶ Ebɛnadze na yɛrohwɛ kwan? Wɔ ahohiahia kɛse no mu no, Jehovah bɛfa akwan ebien a ɔyɛ nwanwa do agye hɛn. Odzi kan, ɔbɛgye n’asomfo anokwafo ber a ɔama asaase do ahemfo no asɛɛ Babylon Kɛse, kyerɛ, ator som ahenman no. (Nyi. 17:16-18; 18:2, 4) Afei, ɔbɛgye no nkorɔfo ber a ɔasɛɛ Satan no wiadze nkaa no wɔ Har-Magedon.​—Nyi. 7:9, 10; 16:14, 16.

17. Sɛ yɛkɔ do bɛn Jehovah a, ebɛn mfaso na yenya?

¹⁷ Sɛ yɛkɔ do bɛn Jehovah a, Satan runntum nnyɛ hɛn biribiara a ɔbɛsɛɛ hɛn afebɔɔ. Nokwasɛm nye dɛ, ɔno mbom na wɔbɛsɛɛ no afebɔɔ. (Rom. 16:20) Dɛm ntsi kɔ do hyɛ Nyankopɔn n’akodze no nyinara​—mma nnyi nngu hɔ! Mma wankotsee nye Satan na no wiadze no nnkõ. Boa wo nuanom na dzi Jehovah n’akwankyerɛ ekyir. Sɛ eyɛ dɛm a, ibenya ahotodo dɛ wo sor Egya a ɔwɔ ɔdɔ no bɛhyɛ wo dzen na ɔaabɔ woho ban.​—Isa. 41:10.