1. Na cava e kerei Jiova kina o Jisu me taqomaki ratou na nona tisaipeli?

ENA iotioti ni bogi i Jisu ni bera ni mate, a vakasamataka tiko na veika dredre eratou na sotava na nona tisaipeli. Ni lomani ratou na nona itokani, e kerei Tamana me “taqomaki ratou tiko ena vuku i koya na vunica.” (Joni 17:14, 15) E kila o Jisu ni sa na lesu i lomalagi, ena saqati ira tiko ga na via qaravi Jiova o Setani na Tevoro. Oya na vuna e vinakati kina me taqomaki ira o Jiova.

2. Na cava meda nuidei kina ni na rogoca o Jiova noda masu?

² E rogoca o Jiova na masu i Jisu ni lomani koya. Ke da saga ena noda vinaka kece meda vakamarautaki Jiova, ena lomani keda tale ga. Ena rogoca na noda masu ni kere veivuke kei na veitaqomaki. Ni Ulunivuvale dauveinanumi o Jiova, ena karoni ira tiko ga na luvena ena yalololoma. Ena vakatau kina na kena irogorogo!

3. Na cava me taqomaki keda kina o Jiova ena gauna qo?

³ Sa qai bibi sara ena gauna qo na veitaqomaki i Jiova. Na vuna? Ni sa biu tani mai lomalagi o Setani qai “cudru vakalevu.” (Vkta. 12:12) Sa rawai ira eso mera tusaqati keda ra qai nanuma nira ‘qarava tiko na Kalou.’ (Joni 16:2) Nida duatani mai na vuravura qo, era tusaqati keda kina eso tale era sega ni vakabauta na Kalou. Se mani cava era tusaqati keda kina, meda kua ni rere. Na vuna? E kaya na Vosa ni Kalou: “E dau dina na Turaga, ena vakadeitaki kemuni, ena taqomaki kemuni me kua ni vakaleqai kemuni na vunica.” (2 Ces. 3:3) E taqomaki keda vakacava o Jiova? Meda veivosakitaka mada e rua na sala.

4. Me vaka e tukuni ena Efeso 6:13-17, na cava e vakarautaka o Jiova me taqomaki keda?

⁴ E vakarautaka o Jiova na iyaragi me taqomaki keda vei Setani. (Wilika Efeso 6:13-17.) E kaukaua na iyaragi vakayalo qo, e yaga tale ga! Ia ena taqomaki keda wale ga ke da tokara tiko, meda kua ni luvata. Na iyaragi cava qori? Meda raica yadudua mada.

5. Na cava na ivau ni ka dina? Cava meda tokara kina?

⁵ Na ivau ni tolomuni na ka dina. Qo na ka dina ena Vosa ni Kalou na iVolatabu. Na cava meda tokara kina? Baleta ni “tama ni lasu” o Setani. (Joni 8:44) Sa vica na udolu na yabaki na nona lasulasu tiko mai, e sa vakacala tale ga “na vuravura taucoko”! (Vkta. 12:9) Ia ena taqomaki keda na ka dina ena iVolatabu meda kua ni vakacalai. Eda na tokara vakacava na ivau ni toloda? Oya nida vulica na ka dina me baleti Jiova, eda sokalou “vakayalo” me “dina” tale ga, da qai dina tiko ga ena ka kece.—Joni 4:24; Efeso 4:25; Iper. 13:18.

6. Na cava na isasabai ni yalododonu? Cava meda tokara kina?

⁶ Na isasabai ni seremuni na yalododonu. Qo e dusia na ivakatagedegede dodonu i Jiova. Na cava meda tokara kina? Me vaka ga ni taqomaka na utona na sotia na isasabai ni serena, ena taqomaki tale ga na lomada mai na veivakacalai ni vuravura nida tokara tiko na isasabai ni yalododonu. (Vkai. 4:23) E vinakata o Jiova meda lomani koya qai qaravi koya ena lomada taucoko. (Maciu 22:36, 37) E saga gona o Setani me waserua na lomada meda lomana na ka ni vuravura, na ka e cata o Jiova. (Jeme. 4:4; 1 Joni 2:15, 16) Ke sega ni mana na nona sasaga qori, ena tusaqati keda meda beca na ivakatagedegede i Jiova.

7. Eda na tokara vakacava na isasabai ni yalododonu?

⁷ Eda na tokara vakacava na isasabai ni yalododonu? Nida ciqoma na ivakatagedegede i Jiova me baleta na ka e donu kei na ka e cala qai muria sara. (Same 97:10) Era rairai nanuma eso ni dredre na ivakatagedegede i Jiova. Ia keda sega ni muria na ivakatagedegede vakaivolatabu, eda na vaka na sotia e luvata na isasabai ni serena ni se katakata sara tu ga na ivalu, ni nanuma ni sa rui bi. Qori e ka vakalialia! Ia o ira na lomani Jiova era sega ni raica na nona ivakaro me icolacola bibi, e itataqomaki ga.—1 Joni 5:3.

8. Na cava na kena ibalebale me tu vakarau ni vakaivava na yavada ena itukutuku vinaka?

⁸ E uqeti keda tale ga o Paula me tu vakarau ni vakaivava na yavada ena itukutuku vinaka ni vakacegu. Kena ibalebale, meda tu vakarau ni vunautaka na itukutuku vinaka ena gauna kece. Nida wasea na ka dina mai na iVolatabu, ena dei na noda vakabauta. E veiuqeti nida raica nira qara na tamata i Jiova e veiyasa i vuravura na gauna veiganiti mera vunautaka kina na itukutuku vinaka, e vanua ni cakacaka, koronivuli, ena yalava ni bisinisi, veivale, nira lai volivoli, nira gade vei ira na wekadra era sega ni tiko ena dina, nira veivosaki kei na nodra veikilai, se nira tiko vakalekaleka e vale ena vuku ni ituvaki. Ke da rere da qai sega ni vunau, eda na vaka na sotia e luvata na nona ivava ni se katakata sara tu ga na ivalu, ena rawarawa ni mavoa na yavana. Ena rawa ni vakamalumalumutaki, ena sega tale ga ni muria na ivakaro ni nona iliuliu se komada.

9. Na cava meda taura tiko kina na isasabai levu ni vakabauta?

 ⁹ Na isasabai levu ni vakabauta oya na noda vakabauti Jiova. Eda vakabauta ni na vakayacora kece na ka e yalataka. Na vakabauta qori eda na “bokoca kina na gasau waqa kece i koya na vunica.” Na cava meda taura tiko kina na isasabai levu? Meda kua ni vakacalai ena nodra ivakavuvuli na vukitani, se da yalolailai nira vakalialiai keda eso ena vuku ni noda vakabauta. Ni sega na vakabauta, ena dredre meda vorata nodra veivakamuai eso nira saga meda beca na ivakatagedegede i Jiova. Ia na gauna kece eda tutaka kina na noda vakabauta e vanua ni cakacaka se koronivuli, eda sa taura tiko na noda isasabai. (1 Pita 3:15) Na gauna tale ga eda sega ni vakadonuya kina e dua na cakacaka saulevu ena vakalatilati ena noda sokalou vei Jiova, eda sa taura tiko na noda isasabai. (Iper. 13:5, 6) Nida qaravi Jiova tiko ga nida tusaqati, sa taqomaki keda sara tiko ga na noda isasabai.—1 Ces. 2:2.

10. Na cava na isala ni bula? Cava meda tokara kina?

¹⁰ Na isala ni bula ya na inuinui e vakarautaka  o Jiova ni na vakaturi ira na mate, ena vakaicovitaki ira tale ga na cakava na lomana. (1 Ces. 5:8; 1 Tim. 4:10; Taito 1:1, 2) Me vaka ga ni na taqomaka na uluna na sotia na nona isala, na isala ni bula ena taqomaka tale ga na noda vakasama. Ena sala cava? Na inuinui ena vukei keda meda vakasamataka tiko ga na ka e yalataka na Kalou, ena donu tale ga na noda rai ni dredre na bula. Eda na tokara vakacava na isala qo? Nida saga me tiko ga vei keda na rai ni Kalou. Kena ivakaraitaki, eda na sega ni nuitaka na iyau e sega ni dei, eda nuitaka ga na Kalou.—Same 26:2; 104:34; 1 Tim. 6:17.

11. Na cava na iseleiwau ni yalo tabu? Cava meda vakayagataka kina?

¹¹ Na iseleiwau ni yalo tabu, na Vosa ni Kalou na iVolatabu. Na iseleiwau ena vakavotuya na veimataqali lasu kece, ena sereki ira tale ga e levu mai na ivakavuvuli lasu kei na itovo ca era bobula tu kina. (2 Kor. 10:4, 5; 2 Tim. 3:16, 17; Iper. 4:12) Eda vulica meda vakayagataka vinaka na iseleiwau nida vuli vakataki keda kei na veivakavulici ni isoqosoqo i Jiova. (2 Tim. 2:15) Meda dikeva mada qo e dua tale na sala e veitaqomaki kina o Jiova. Na cava ya?

12. Na cava tale ena vukei keda? Na vuna?

¹² E kila na sotia sa dede nona veiqaravi ni na sega ni qaqa ke valuta duadua e dua na mataivalu levu. E vinakati mera tokoni koya na nona itokani sotia. Vakacava o keda? Ena dredre tale ga meda valuti Setani kei na nona ito ke da vala duadua. E vinakati nodra veitokoni na tacida. Oya na vuna e vakarautaka kina o Jiova na “mataveitacini kece” e veiyasa i vuravura mera tokoni keda.—1 Pita 2:17.

13. Me vaka e tukuni ena Iperiu 10:24, 25, na cava na yaga ni noda dau tiko ena soqoni?

¹³ Dua na sala eda tokoni kina oya nida tiko ena soqoni. (Wilika Iperiu 10:24, 25.) Eda dau yalolailai kece ena so na gauna, ia eda na vakayaloqaqataki nida tiko ena soqoni. E dau veiuqeti na nodra ivakamacala mai vu ni lomadra na tacida. E uqeti keda tale ga na ivunau vakaivolatabu kei na vakatasuasua meda qaravi Jiova tiko ga. Dau vakayaloqaqataki keda na italanoa veiuqeti ni bera na soqoni, vaka kina ni sa oti. (1 Ces. 5:14) Nida tiko tale ga ena soqoni eda na vukea kina eso tale, qori ena vakamarautaki keda. (Caka. 20:35; Roma 1:11, 12) Kena ikuri, na soqoni ena vakavinakataka na iwalewale ni noda vunau kei na veivakavulici. Kena ivakaraitaki, eda vulica na sala meda vakayagataka kina vakavinaka na iVukevuke ni Veivakavulici. Koya gona meda dau vakavakarau vinaka ina soqoni. Ni caka tiko na soqoni, vakarorogo vinaka. Ni oti na soqoni, saga sara mo muria na ka o vulica. Ni o cakava qori, o na “sotia vinaka” i Karisito Jisu.—2 Tim. 2:3.

14. Sala cava tale eda rawa ni vukei kina?

¹⁴ Era tokoni keda tale ga na vica vata na milioni na agilosi kaukaua. E vakairogorogo na ka e cakava e dua mada ga na agilosi! (Aisea 37:36) Koya li mera qai lelevu, sa na va ga ya na nodra kaukaua kei na ka e rawa nira cakava. Ena sega ni dua na tamata se timoni me qaqa vua na mataivalu kaukaua i Jiova. E kaukaua duadua o Jiova, ena nona veitokoni gona ena sega sara ni dua e qaqa vei keda, se mani vakacava na kedra lelevu. (Dvei. 6:16) Qo na ka dina! Mo dau vakasamataka tiko qori ni o yalolailai ena ka era kaya se cakava e valenicakacaka, ira nomu icaba e koronivuli, se o ira na wekamu era sega ni  vakabauta. O sega ni vala duadua, o muria tiko na veidusimaki i Jiova.

15. Me vaka e tukuni ena Aisea 54:15, 17, na cava era na sega ni vagalui rawa kina na tamata ni Kalou?

¹⁵ E levu sara na vuna eda cati kina ena vuravura i Setani. Eda tawaveitovaki ena veika vakapolitiki kei na ivalu. Eda vunautaka na yaca ni Kalou, eda tokona nona Matanitu ni inuinui duadua ga ni bula vakacegu, eda talairawarawa tale ga ina nona ivakatagedegede savasava. Eda vakavotuya ni iliuliu ca e lewai vuravura tiko, e daulasulasu, e daulaba. (Joni 8:44) Eda kacivaka tale ga ni sa vakarau vakarusai na vuravura ca qo. Ena sega ni vagalui keda rawa o Setani kei na nona ito. Eda na vakacaucautaki Jiova tiko ga ena ka kece eda rawa ni cakava! E kaukaua o Setani, ia ena sega ni tarova noda vunautaka na itukutuku ni Matanitu ni Kalou e vuravura raraba. Ena rawati ga qori ena veitaqomaki i Jiova.—Wilika Aisea 54:15, 17.

16. Ena vakabulai ira vakacava na nona tamata o Jiova ena veivakararawataki levu?

¹⁶ Na cava eda vakanamata kina? Ena veivakararawataki levu, o Jiova ena taqomaki keda ena rua na sala vakatubuqoroqoro. Kena imatai, ena vakabulai ira nona dausokalou yalodina ni vakauqeti ira na tui kei vuravura mera valuti Papiloni na Ka Levu, ya na lotu lasu kece. (Vkta. 17:16-18; 18:2, 4) Kena ikarua, ena vakabulai ira na nona tamata ni vakarusa kece na veika tale e vo tu ena vuravura i Setani ena Amaketoni.—Vkta. 7:9, 10; 16:14, 16.

17. Ena yaga vakacava na noda volekati Jiova tiko ga?

¹⁷ Ke da volekati Jiova tiko ga, ena guce na sasaga i Setani me vakaleqai keda. O Setani ga ena vakarusai vakadua. (Roma 16:20) Mo tokara tiko gona na iyaragi vakayalo, kua vakadua ni luvata! Kua tale ga ni nanuma ni o rawa ni vala duadua. Tokoni ira na tacimu vakayalo. Muria tale ga na veidusimaki i Jiova. Ni o cakava qori, o na nuidei ni na vakaukauataki iko na Tamamu vakalomalagi dauloloma, ena vukei iko tale ga.—Aisea 41:10.