1. Poukwa Jézi mandé Jéova voyé on zyé asi disip a-y ?

PANNAN dènyé lannuit-la Jézi pasé asi latè la, i té ka sonjé ki difikilté disip a-y té’é jwenn. Tèlman Jézi té enmé disip a-y, i mandé Papa-y « voyé on zyé asi yo parapòt a méchan-la » (Jan 17:14, 15). Jézi té sav kè lè i té’é viré an syèl-la, Satan Lèdyab té’é goumé èvè toutmoun ki té’é anvi sèvi Jéova. Nou ka tou konprann kè pèp a Jéova té’é bizwen i pwotéjé-yo.

2. Poukwa nou pé sèten kè Jéova ké réponn a priyè an nou ?

² Konm i enmé gason a-y, Jéova réponn a priyè a-y. Si nou ka fè tousa nou pé pou fè Jéova plézi, i ké enmé-nou osi. É si nou ka priyé pou i édé-nou é pou i pwotéjé-nou, i ké réponn a priyè an nou. Jéova sé on Papa ki plen lanmou, kifè, i ké kontinyé pran swen a timoun a-y. Si i pa fè sa, i ké ni on mové répitasyon !

3. Jòdijou, poukwa nou bizwen Jéova pwotéjé-nou ?

³ Jòdijou, plis ki avan, nou bizwen Jéova pwotéjé-nou. Yo mété Satan déwò an syèl-la é « i anrajé toubònman » (Rév. 12:12). I rivé a fè sèwten moun kwè kè lè yo ka pèwsékité-nou, « sé Bondyé yo ka sèvi » (Jan 16:2). Ni dòt ki pa ka kwè an Bondyé é ki ka pèwsékité-nou pas nou pa’a aji kon sé moun-la ki an mond-la. Men kèlkèswa sa ki ka pousé sé moun-la pèwsékité-nou, nou pa pè. Poukwa ? Pas mi sa Pawòl a Bondyé ka di : « Ségnè-la fidèl, i ké ba-zòt fòs é i ké pwotéjé-zòt kont méchan-la » (2 Tés. 3:3). Kijan Jéova ka pwotéjé-nou ? An-nou vwè 2 biten i ka ban-nou.

4. Dapré Éfézyen 6:13-17, ka Jéova ban-nou pou pwotéjé-nou ?

⁴ Jéova ban-nou ékipman a on sòlda pou pwotéjé-nou lè Satan ka ataké-nou (li Éfézyen 6:13-17). Ékipman-la Bondyé ban-nou la solid é i éfikas. Men i ké pwotéjé-nou si nou mèt chak mòso a-y asi nou é si nou pa jen woté-y. Ka chak mòso a ékipman-lasa ka rèprézanté ? Sé sa nou kay vwè konnyéla.

5. Ka ki senti a lavérité é poukwa fò-nou maré-y an ren an nou ?

⁵ Senti a lavérité ka rèprézanté sé vérité-la ki adan Pawòl a Bondyé, Labib. Poukwa fò-nou mèt senti-lasa asi nou ? Pas Satan sé « Papa a mansonj-la » (Jan 8:44). Sa ka fè lanné é lanné misyé ka manti é i ja jous « kouyonné lèmondantyé » (Rév. 12:9). Men grasa sé vérité-la ki an Bib-la, i pé pa kouyonné-nou. Men kijan nou pé maré senti a lavérité an ren an nou ? Fò-nou aprann konnèt Jéova, fò-nou adoré-y « èvè lèspri é lavérité » é fò-nou maché dwèt kèlkèswa sa nou ka fè (Jan 4:24 ; Éféz. 4:25 ; Ébr. 13:18).

6. Sé sòlda-la té ka pòté on biten pou pwotéjé lèstonmak a yo. Ka sa ka rèprézanté é poukwa fò-nou mété-y anlè nou ?

⁶ Biten-la ki té ka pwotéjé lèstonmak a sòlda-la ka rèprézanté prensip a Jéova. É tout prensip a-y jis. Poukwa fò-nou mèt biten-lasa anlè nou ? Lè sòlda-la té ka mèt biten-lasa anlè lèstonmak a-y, sa té ka pwotéjé tchè a-y. Menmjan-la, si nou ka suiv sé prensip-la ki an Bib-la, nou pé’é lésé sé vyé biten-la ki an mond-la aji asi tchè an nou (Pwov. 4:23). Jéova vé kè nou enmé-y é kè nou sèvi-y èvè tout tchè an nou (Mat. 22:36, 37). Sé pousa Satan bizwen fè-nou enmé biten ki an mond-la, biten kè Jéova hay, pou nou pé sa arété sèvi Jéova èvè tout tchè an nou (Jak 4:4 ; 1 Jan 2:15, 16). É si sa pa’a maché, i ké pèwsékité-nou pou fè-nou fè on biten Jéova pa enmé.

7. Kijan nou ka sèvi èvè sa ki jis pou pwotéjé lèstonmak an nou ?

⁷ Jéova ka ban-nou prensip pou di-nou ka ki byen é ka ki mal. Si nou ka suiv sé prensip-lasa, nou ké montré kè nou ké sèvi èvè sa ki jis pou pwotéjé lèstonmak an nou (Sòm 97:10). Ni sèwten moun ki ka di kè sé prensip-lasa ka anpéché-yo bwè dlo a yo jan yo vlé. Si nou ka arété suiv prensip a Labib, nou ka touvé-nou kon sòlda ki an plen lagè é ki ka woté biten-la ki ka pwotéjé lèstonmak a-y la pas i ka touvé sa two lou ba-y. Sé yenki on moun sòt ki pé fè on biten konsa ! Men si nou enmé Jéova, nou pé’é touvé ‘komandman a-y fòsan’ pas nou sav kè yo pé sové vi an nou (1 Jan 5:3).

8. Lè yo ka di-nou mèt pyé an nou adan on soulyé ki ka ban-nou balan pou anonsé bon nouvèl a lapé, kijan pou nou konprann sa ?

⁸ Anplis, Pòl ka ankourajé-nou mété pyé an nou adan on soulyé ki ka ban-nou balan pou anonsé bon nouvèl a lapé. Sa vé di kè fò nou toujou paré pou préché bon nouvèl a Wayòm-la. Lè nou ka palé moun dè mésaj-la ki an Bib-la, fwa an nou ka vin pi fò. Sa ka ban-nou fòs lè nou ka vwè kè sèwvitè a Jéova ki toupatou asi latè ka fè tousa yo pé pou préché kèlkèswa koté-la yo yé la. Pa ègzanp, ni sèwten ki ka préché pou kolèg-travay a yo, oben pou kanmarad-lékòl a yo. Yo ka préché osi dè kaz-an-kaz, adan sèwten koté ni plen antrèpriz é plen magazen, lè  yo k’ay achté lenj é soulyé, lè yo k’ay vwè fanmi a yo ki pa Témwen é lè yo ka palé ba moun yo konnèt. Si nou ka lésé lafrous pran lanmen asi nou é kè nou ka arété préché, nou ké touvé-nou kon sòlda ki woté soulyé a-y an plen lagè. Nou ka tou konprann kè yo ké blésé pyé a-y fasilman. Kifè, lè yo ké vin ataké-y, i ké ni dimal a défann-li. É i pé’é pé fè sa komandan a-y mandé-y.

9. Poukwa fò nou ni on gwo boukliyé a lafwa ?

⁹ Gwo boukliyé a lafwa ka rèprézanté fwa an nou an Jéova. Nou sèten kè tout pwomès a-y ké réyalizé. Fwa-la nou ni la ké édé-nou étenn tout flèch plen difé méchan-la ka voyé. Poukwa fò-nou ni gwo boukliyé-lasa ? Pas i ka pwotéjé-nou pou sé apòsta-la pa kouyonné-nou é pou nou pa dékourajé lèwvwè moun ka kritiké kwayans an nou. Si nou pa ni fwa, nou pé’é ni fòs pou tchenbé lèwvwè yo ké fè présyon asi nou pou fè-nou fè sa Jéova pa enmé. Chakfwa nou ka rèfizé fè on biten Jéova pa enmé, ki sé an travay an nou ki sé lè nou lékòl, sé fwa an nou ki ka pwotéjé-nou (1 Pyè 3:15). Chakfwa kè nou ka rèfizé on travay ki té’é pèwmèt-nou ni plis lajan men ki té’é anpéché-nou  sèvi Jéova a san pou san, sé fwa an nou ki ka pwotéjé-nou (Ébr. 13:5, 6). É chakfwa nou ka kontinyé sèvi Jéova magré yo ka pèwsékité-nou, la ankò, sé fwa an nou ki ka pwotéjé-nou (1 Tés. 2:2).

10. ‘Kas-la ki ka sové la’, ka sa yé é poukwa fò-nou mété-y asi tèt an nou ?

¹⁰ Kas-la ki ka sové la sé èspérans-la Jéova ka ban-nou la. Nou ni lèspwa kè i ké rékonpansé toutmoun ki ka fè volonté a-y é kè menmsi nou mò, i ké résisité-nou (1 Tés. 5:8 ; 1 Tim. 4:10 ; Tit 1:1, 2). Kas-la sòlda-la ka mèt la ka pwotéjé tèt a-y. Menmjan-la osi, èspérans-la Jéova ka ban-nou la ka pwotéjé lèspri an nou. An ki sans i ka pwotéjé-nou ? Èspérans-lasa ka édé-nou rété konsantré asi sé pwomès-la Jéova ka fè-nou la, é grasa-y, nou pa’a lésé pon pwoblèm pran tèt an nou. Kijan nou ka mèt kas-lasa asi tèt an nou ? Nou pé di nou ni kas an nou si mantalité an nou annakò èvè ta Bondyé. Pa ègzanp, nou pa’a mèt èspwa an nou adan richès ki pé disparèt men nou ka mété-y an Bondyé plito (Sòm 26:2 ; 104:34 ; 1 Tim. 6:17).

11. ‘Épé a lèspri-la’, ka sa yé é poukwa fò-nou sèvi èvè-y ?

¹¹ Épé a lèspri-la ka rèprézanté Labib, Pawòl a Bondyé. Grasa épé-lasa nou ka mèt tout mansonj déwò. Konsa, sé moun-la nou ka édé la pa’a lésé pon ansègnman ki pa bon kouyonné-yo é nou ka édé-yo pèd mové labitid yo té ni (2 Kor. 10:4, 5 ; 2 Tim. 3:16, 17 ; Ébr. 4:12). Lè nou ka étidyé tousèl an nou, é lè lòwganizasyon ka fòwmé-nou, nou ka aprann sèvi èvè épé an nou pibyen (2 Tim. 2:15). Nou vwè kè Jéova ka ban-nou on ékipman men i ka pwotéjé-nou ondòt jan ankò. Kijansa ?

12. Ki dòt biten nou bizwen é poukwa ?

¹² On bon sòlda sav byen kè tousèl a-y, i pé’é pé gangné on gwo lawmé ; i bizwen sélézòt sòlda-la. Menmjan-la, nou pé pa gangné konba-la kont Satan é bannélo a-y tousèl an nou ; nou bizwen frè é sè an nou soutyenn-nou. Jéova ban-nou on fanmi ki plen frè é sè toupatou si latè é yo la pou édé-nou (1 Pyè 2:17).

13. Sèlon Ébré 10:24, 25, kijan sé réinyon-la ka édé-nou ?

¹³ Jéova pé soutyenn-nou osi lè nou k’ay réinyon (li Ébré 10:24, 25). Sa ka rivé noutout dè santi-nou dékourajé. A moman-lasa, sé réinyon-la pé ban-nou fòs. Lè frè é sè an nou ka fè bèl ti komantè, sa ka ankourajé-nou. Sé diskou-la é sé sijé-la ka édé-nou kontinyé sèvi Jéova. É lè nou ka palé èvè frè é sè an nou avan é apré sé réinyon-la, sa ka ankourajé-nou (1 Tés. 5:14). Anplisdisa, sé réinyon-la ka pèwmèt-nou ankourajé frè é sè an nou é sa ka ban-nou tchè-kontan (Akt 20:35 ; Wom. 1:11, 12). Sé réinyon-la pé édé-nou adan dòt domenn osi. Yo ka édé-nou préché pibyen é anségné pibyen. Pa ègzanp, nou ka aprann sèvi pibyen èvè sé zouti-la ki adan bwèt a zouti an nou pou anségné. Alò, pran tan préparé-w byen pou sé réinyon-la. Pannan sé réinyon-la, pa gobé mouch, kouté byen ! Apré sé réinyon-la, mèt sa ou aprann an pratik. Si ou fè sa, ou ké vin on « bon sòlda a Kris Jézi » (2 Tim. 2:3).

14. Ki dòt moun ki pé édé-nou ?

¹⁴ Anplisdisa, nou ni plizyè milyon zanj ki puisan toubònman é ki ka soutyenn-nou. Sonjé sa onsèl zanj pé fè ! (Iz. 37:36). Alò, konnyéla, éséyé imajiné sa plizyè milyon zanj kapab fè. Si on  nonm oben on démon bizwen goumé èvè Jéova, i ja pèd fil a-y ! Jéova toupuisan. Alò, dépi ou vwè i èvè nou, nou ké toujou gangné lènmi an nou kèlkèswa kantité yo yé (Jij 6:16). Nou pé sèten dè sa a 200 pou san ! Alò, lèwvwè on kolèg-travay a-w, on kanmarad-lékòl a-w oben on fanmi a-w ki pa Témwen ka di-w oben ka fè-w on biten ki ka dékourajé-w, sonjé kantité moun ki an syèl-la pou soutyenn-vou. Sonjé kè ou pa’a goumé tousèl a-w. Konm ou ka suiv dirèksyon a Jéova, i ka soutyenn-vou.

15. Sèlon Izayi 54:15 é 17, poukwa ponmoun pé’é jen rivé anpéché-nou préché ?

¹⁵ Mond-la anba men a Satan é sé pousa i hay-nou konsa. Nou pa’a mélanjé-nou an politik é nou pa’a fè lagè nonplis. Nou ka fè moun konnèt non a Bondyé. Nou ka anonsé kè sé yenki wayòm a Bondyé ki ké mèt lapé asi latè é nou ka suiv prensip a Bondyé. Nou ka fè toutmoun sav kè Satan sé on moun ki mové toubònman (Jan 8:44). É nou ka anonsé kè talè, mond-la Satan ka dirijé la ké fè pach. Men Satan é bannélo a-y pé’é jen pé anpéché-nou préché. Okontrè, nou ké fè tousa nou pé pou nou kontinyé ba Jéova glwa. Satan pé puisan puisan a-y si i vé men jous alajouné jòdi, i po’o jen rivé anpéché sé moun-la tann mésaj a Wayòm-la kèlkèswa koté-la yo yé la si latè ! Si i po’o jen rivé fè sa sé paskè Jéova ka pwotéjé-nou (li Izayi 54:15, 17).

16. Pannan gwo tribilasyon-la, kijan Jéova ké sové pèp a-y ?

¹⁶ Ka ki ka atann-nou ? Pannan gwo tribilasyon-la, Jéova ké sové-nou 2 fason diféran é i ké fè sa on mannyè èstraòwdinè. Prèmyèwman, Jéova ké détwi Gran Babilòn-la kivédi tout sé fo-rèlijyon-la men i ké sové sèwvitè a-y ki fidèl (Rév. 17:16-18 ; 18:2, 4). Aprésa, i ké détwi mond a Satan anplen é i pé’é lésé ayen atè. Sé yenki pèp a-y Jéova ké sové (Rév. 7:9, 10 ; 16:14, 16).

17. Si nou bon bon zanmi èvè Jéova, kijan sa pé édé-nou ?

¹⁷ Satan ké fè-nou dimal men sé ké pou on tan si nou bon bon zanmi èvè Jéova. An réyalité, sé-y ki ké fè pach (Wom. 16:20). Alò, mèt ékipman-la Jéova ba-w la asi-w é pa jen woté-y ! Pa konpranndèdi ou ké pé gangné konba kont Satan é bannélo a-y tousèl a-w. Soutyenn frè é sè a-w. É kontinyé lésé Jéova dirijé-w. Si ou ka fè sa, ou pé sèten kè Pap’a-w ki an syèl-la é ki plen lanmou ké ba-w fòs é ké pwotéjé-w (Iz. 41:10).