1. Dahaka dainai Iesu ese Iehova ia noia ena hahediba taudia ia gimaia totona?

IESU be ena hanuaboi ginigabena ai, iena hahediba taudia ese do idia davaria hekwakwanai ia lalodia. Iesu be iena turadia ia lalokau henia dainai iena tamana ia noia ‘dika tauna dainai idia do ia gimaia.’ (Ioa. 17:14, 15) Iesu ia diba guba dekenai ia daekau murinai, Satani Diabolo be Iehova ena hesiai taudia do ia tuari henia noho. Unai dainai Iehova ese ena taunimanima ia gimaia be namo.

2. Edena bamona ita abia dae diba, Iehova be iseda guriguri do ia haerelaidia?

² Iehova ese ena natuna Iesu ia lalokau henia dainai iena guriguri ia haerelaidia. Bema ita hekwarahi Iehova ita hamoalea totona, ita do ia lalokau henia danu. Bona heduru totona ita guriguri neganai, iseda guriguri do ia haerelaidia bona ita do ia gimaia. Iehova be lalokau Tamana, unai dainai hanaihanai iena natudia ia gimaia. Bema unai ia karaia lasi, iena ladana namona ia hadikaia diba!

3. Dahaka dainai hari inai negai Iehova ese ita ia gimaia be namo?

³ Dahaka dainai hari inai negai Iehova ese ita ia gimaia be namo? Badina Satani be guba amo idia negea diho bona “ia badu dikadika.” (Apok. 12:12) Ia ese taunimanima momo edia lalona ia veria dainai ita idia dagedage henia neganai, idia laloa “Dirava dekenai hesiai gaukara helagana” idia karaia. (Ioa. 16:2) Ita be tanobada taudia amo ita idau dainai Dirava idia abidadama henia lasi taudia haida ese ita idia dagedage henia. To, herevana unai ia vara, ita gari lasi. Dahaka dainai? Badina Baibel ia gwau: “Lohiabada ese hanaihanai iena hereva ia badinaia bona ia ese umui do ia hagoadaia  bona dika tauna amo umui do ia gimaia.” (2 Tes. 3:3) Iehova be edena dala ai ita ia gimaia? Mani dala rua ita herevalaia.

4. Efeso 6:13-17 hegeregerena, Iehova be dahaka ia henia ita ia gimaia totona?

⁴ Iehova ia henia tuari dabua ese Satani ena hahetoho idauidau amo ita ia gimaia diba. (Efeso 6:13-17 duahia.) Dirava amo ia mai tuari dabua be ia goada bona ita ia durua diba! To ita ia gimaia totona namona be unai tuari dabua ena kahana ta ta ita hahedokilaia. Unai kahana ta ta be dahaka idia laulaulaia? Mani ita herevalaia.

5. Hereva momokani ena beleta be dahaka, bona dahaka dainai ita kwatua be namo?

⁵ Hereva momokani ena beleta ese Baibel ena hereva momokani ia laulaulaia. Dahaka dainai hereva momokani ena beleta ita kwatua be namo? Badina Satani be “koikoi ena tamana.” (Ioa. 8:44) Ia be lagani tausen momo lalonai koikoi herevadia ia gwauraia noho bona “tanobada ibounai ia hakaua kerere vadaeni”! (Apok. 12:9) To, Baibel ena hereva momokani ese ita idia gimaia, unai amo Satani ese ita do ia koia lasi. Hereva momokani ena beleta be edena bamona ita kwatua diba? Unai ita karaia diba bema Iehova ita dibaia, “lauma ai bona momokani” ai ia ita tomadiho henia, bona mai momokani ida gau ibounai ita karaia.​—Ioa. 4:24; Efe. 4:25; Heb. 13:18.

6. Kemena dekenai kara maoromaoro ena auri dabua be dahaka, bona dahaka dainai ita atoa be namo?

⁶ Kemena dekenai kara maoromaoro ena auri dabua be Iehova ena kara maoromaoro taravatudia ia laulaulaia. Dahaka dainai ita atoa be namo? Kemena dekenai auri dabua ese tuari tauna ena kudouna ia gimaia hegeregerena, laulau dalanai kemena dekenai kara maoromaoro ena auri dabua ese tanobada ena lalohadai dikadia amo iseda kudouna ia gimaia. (Aon. 4:23) Iehova ia ura mai kudouna ibounai ida ia ita lalokau henia bona hesiai henia. (Mat. 22:36, 37) Satani ia ura lasi Iehova ita hesiai henia dainai, inai tanobada ena ura gaudia amo iseda lalona ia veria. (Iam. 4:4; 1 Ioa. 2:15, 16) Bema ia kwalimu lasi ita do ia dagedage henia, badina ia ura Iehova ena taravatu ta ita utua.

7. Edena dala ai kemena dekenai kara maoromaoro ena auri dabua ita atoa?

⁷ Iehova ena taravatu maoro bona kerere dekenai ita abiadae bona badinaia neganai, kemena dekenai kara maoromaoro ena auri dabua ita atoa unai. (Sal. 97:10) Reana haida do idia laloa Iehova ena taravatu idia badinaia be auka. To bema iseda mauri ai Baibel ena hakaua herevadia ita badinaia lasi, ita be tuari lalonai ia laloa ena kemena ena auri dabua be metau dainai ia kokia soldia tauna bamona. Unai be kavakava karana. Iehova idia lalokau henia taudia dekenai iena taravatu be “metau lasi” to edia mauri ai idia ia durua.​—1 Ioa. 5:3.

8. Maino ena sivarai namona harorolaia be tamaka bamona ita atoa ena anina be dahaka?

⁸ Paulo ese ita ia hagoadaia maino ena sivarai namona harorolaia totona do ita hegaegae, unai be tamaka bamona iseda aena dekenai do ita atoa. Anina be nega ibounai Basileia ena sivarai namona harorolaia totona ita hegaegae. Ma haida dekenai Baibel ena hereva ita hadibaia neganai iseda abidadama ia goada. Ita itaia tanobada hegegemadai Iehova ena taunimanima be dala idauidau ai idia haroro neganai ita ia hagoadaia. Hegeregere, gaukara o sikuli gabuna ai, ruma ta ruma ta o bisinesi gabuna ai, sitoa dekenai, witnes lasi varavara, o edia diba taudia idia  hedavari henia neganai idia haroro. Bema gari dainai haroro gaukara ita hadokoa, ita be tuari lalonai ena tamaka ia kokia dainai bero ia abia diba soldia tauna bamona. Unai dainai, tuari lalonai sibona do ia gimaia diba lasi bona do ia auka ena tuari biaguna ena oda herevadia ia badinaia totona.

9. Dahaka dainai abidadama ena kesi badana ita huaia be namo?

⁹ Abidadama ena kesi badana be iseda abidadama Iehova dekenai ia laulaulaia. Ita abiadae ena gwauhamata ibounai do ia hagugurua. Abidadama dainai ‘dika tauna ena diba ibounai mai ena lahi do ita habodoa diba.’ Dahaka dainai abidadama ena kesi badana ita huaia be namo? Badina aposteit taudia edia hahediba herevadia o iseda abidadama dainai ita idia kirikirilaia taudia amo ita ia gimaia. Bema abidadama be lasi, haida ese ita idia doria neganai Iehova ena taravatu ita utua diba. To dina ta ta ai gaukara o sikuli gabuna ai Iehova ese ia inai henia gaudia ita dadaraia neganai, iseda kesi ita huaia unai. (1 Pet. 3:15) Danu bema pei bada moni gaukara ita dadaraia badina iseda tomadiho karana ia hadikaia, ita be iseda kesi ita huaia unai. (Heb. 13:5, 6) Dina ta ta ai Iehova ita hesiai henia lalonai ena be dagedage ita davaria, to iseda  abidadama ena kesi ese ita ia gimaia.​—1 Tes. 2:2.

10. Hahemauri ena kwara gauna be dahaka, bona dahaka dainai ita karaia be namo?

¹⁰ Hahemauri ena kwara gauna be Iehova ese ita dekenai ia henia helaro. Unai helaro be iena ura idia karaia taudia dekenai do ia henia bona ena be ita mase to ita do ia hatoreaisi lou. (1 Tes. 5:8; 1 Tim. 4:10; Tito 1:1, 2) Tuari tauna ena kwara gauna ese ena kwarana ia gimaia hegeregerena, hahemauri ena helaro ese iseda laloa dalana ia gimaia. Edena dala ai? Unai helaro ese ita ia durua Dirava ena gwauhamata namodia ita laloa, bona hekwakwanai negadiai lalohadai maorona ita abia. Unai kwara gauna be edena bamona ita karaia diba? Unai ita karaia bema iseda lalohadai be Dirava ena hegeregerena, bona iseda helaro be do idia dika haraga kohudia dekenai ita atoa lasi, to Dirava ita abidadama henia.​—Sal. 26:2; 104:34; 1 Tim. 6:17.

11. Lauma helaga ena tuari kaia be dahaka, bona dahaka dainai ita gaukaralaia be namo?

¹¹ Lauma helaga ena tuari kaia be Dirava ena Hereva, Baibel. Unai tuari kaia ese hereva koikoi idauidau ia hahedinaraia, bona taunimanima be hahediba hereva koikoi bona kara dika amo ia ruhaia. (2 Kor. 10:4, 5; 2 Tim. 3:16, 17; Heb. 4:12) Unai tuari kaia gaukaralaia namonamo dalana be sibona iseda stadi bona Iehova ena orea lalonai ita abia treinini amo ita dibaia. (2 Tim. 2:15) Iehova ese ita ia gimaia gauna ma ta ia henia danu. Unai be dahaka?

12. Daidia edia heduru ita abia be namo, bona dahaka dainai?

¹² Tuari ia diba namonamo soldia tauna ia diba ia sibona ese ami orea badana do ia tuari henia diba lasi, to soldia ma haida edia heduru ia abia be namo. Unai hegeregerena, ita sibona ese Satani bona ena bamodia ita tuari henia diba lasi, to iseda tadikaka taihu edia heduru ita abia be namo. Iehova ese tanobada hegegemadai “tadikaka oreana” ia henia ita idia durua totona.​—1 Pet. 2:17.

13. Heberu 10:24, 25 hegeregerena, hebou lao henia karana ese edena dala ai ita ia durua?

¹³ Heduru ita abia dalana ta be hebou do ita lao henia. (Heberu 10:24, 25 duahia.) Ita ibounai be nega haida ita lalomanoka, to hebou ita lao neganai goada ita abia. Idia henia tok bona haheitalai idauidau ese ita ia hagoadaia, Iehova ita hesiai henia totona. Hebou ia do matamaia lasi bona hebou murinai haida ita hereva henia karana ese ita ia hagoadaia. (1 Tes. 5:14) Danu hebou lao henia karana ese dala ia kehoa ma haida ita durua bona unai ese ita ia hamoalea. (Kara 20:35; Roma 1:11, 12) Iseda hebou ese dala ma haida ai ita ia durua danu. Ita ia durua haroro bona hahediba taudia namodia ai ita lao totona. Hegeregere, hadibaia gaukara ena tulu idauidau gaukaralaia dalana ita dibaia. Unai dainai kongrigeisen heboudia totona ita hegaegae bona hebou lalonai ita kamonai namonamo. Unai murinai ita dibaia gaudia ita gaukaralaia. Unai amo “Keriso Iesu ena tuari tauna namona ta” ai do ita lao.​—2 Tim. 2:3.

14. Ita idia durua gaudia ma haida be dahaka?

¹⁴ Ita be aneru milioni momo edia heduru ita abia danu. Aneru tamona ese ia karaia diba gauna mani oi laloa! (Isa. 37:36) Bona aneru orea goadana ese idia hagugurua diba gaudia mani oi laloa. Tau ta o demoni ta be Iehova ena ami oreana ia halusia diba lasi. Iehova ena siahu be bada herea. Unai dainai bema ia be iseda kahanai, herevana iseda inai taudia be momo, to ita kwalimu diba. (Gun. 6:16) Unai dainai, bema emu gaukara o sikuli turana ta  eiava witnes lasi varavara ta ena hereva o kara dainai oi lalomanoka, unai oi laloa noho be namo. Laloatao inai tuari lalonai oi be sibona oi tuari lasi. Danu, oi be Iehova ena hakaua dalana oi badinaia noho.

15. Isaia 54:15, 17 hegeregerena, dahaka dainai ta ese iseda haroro gaukara ia koua diba lasi?

¹⁵ Satani ena taunimanima ese badina momo dainai ita idia inai henia. Ita be gavamani ta ita durua lasi bona tuari lalonai ita vareai lasi. Ita be Dirava ena ladana bona iena Basileia sibona ese ia mailaia maino ita harorolaia, bona iena kara maoromaoro ita badinaia. Bona ita hahedinaraia inai tanobada ena lohia tauna be koikoi bona ala-ala tauna. (Ioa. 8:44) Bona ita gwauraia hedinarai Satani ena tanobada be kahirakahira do ia ore. To, Satani bona ia idia badinaia taudia be iseda haroro gaukara do idia koua lasi. Oibe, dala idauidau ai Iehova do ita hanamoa noho! Ena be Satani be mai ena siahu, to tanobada hegegemadai Basileia ena sivarai namona harorolaia gaukarana ia koua diba lasi. Unai ia vara badina Iehova ese unai gaukara ia gimaia.​—Isaia 54:15, 17 duahia.

16. Edena dala Iehova ese hisihisi badana lalonai iena taunimanima do ia hamauria?

¹⁶ Vaira neganai dahaka do ia vara? Hisihisi badana lalonai, Iehova ese dala idaudia rua amo ita do ia hamauria. Ginigunana, tanobada ena king taudia do ia gaukaralaia tomadiho koikoi edia basileia, Babulonia Badana unai, idia hadikaia ore neganai, iena abidadama hesiai taudia do ia hamauria. (Apok. 17:16-18; 18:2, 4) Bena Aramagedono tuarina ai Satani ena taunimanima oredia ia hadikaia ore neganai Iehova ese ena taunimanima do ia hamauria.​—Apok. 7:9, 10; 16:14, 16.

17. Iehova kahirakahira ita noho neganai dahaka namo do ita abia?

¹⁷ Bema Iehova kahirakahira ita noho, Satani be ita do ia hadikaia lasi. To Iehova ese Satani do ia hadikaia ore momokani. (Roma 16:20) Unai dainai tuari dabua ibounai oi hahedokilaia, bona oi kokia lasi! Namo lasi sibona emu goada amo Satani bona ena tanobada oi tuari henia. Namona be emu tadikaka taihu oi durua bona Iehova ena hakaua dalana oi badinaia. Bema unai bamona oi karaia, do oi abiadae momokani emu lalokau guba Tamana ese oi do ia hagoadaia bona gimaia.​—Isa. 41:10.