1. Warom hot Yeesus Yeehoowa ferlangt sayn tisipele xitse?

ES WAAR ti nacht foer Yeesus sayn toot kewees. Tee hot sich ketanke weeche sayn tisipele kemacht wayl eyer teet tsurik tsum himel keen, awer te Taywel teet noch keeche tëne khëmpfe. Tan, weeche liip, hot Yeesus fer sayn Fater ferlangt: “Tuu se keeche te Xlechter xitse.” (Yoo. 17:14, 15) Kewis, Yeehoowa sayn folek praycht kexitst wëre.

2. Wii khene mer uns sicher sin tas Yeehoowa tuut unser kepeete antworte?

² Yeehoowa hot Yeesus sayn kepeet keantwort wayl Eyer tëm liipt — un tas selwiche kilt fer uns aach. Wën mer unser pestes mache fer Yeehoowa kefale, tuut eyer uns liipe un unser kepeete fer hilef un xitsung kriin, antworte. Un, wayl Yeehoowa een liipliche Fater is, tuut eyer uns — sayn khiner — uf phase un xitse. Wën net, tas teet tëm sayn naame, orer was ti layt iwer tëm tenke, trekich mache!

3. Warom prayche mer Yeehoowa sayn xitsung hayt tsu taach hon?

³ Satanaas is “aarich wuutich” kep wii eyer fom himel runer kexmis kep is. Tes weeche, prayche mer Yeehoowa sayn hilef wii noch nii hon! (Apo. 12:12) Un Satanaas hot soo kaar welche layt rom kepapelt tas, wën se uns yachte, sin se “een haylich aarwayt tsu Kot” am mache. (Yoo. 16:2) Anere woo net aan Kot klaape, tuun uns yachte wayl mer anerste wii ti layt fon te welt sin. Awer, ekaal ti situatsyoon, prayche mer khee pang hon. Warom? Wayl Kot sayn Wort saat: “Te Hër is troy, un tee tuut aych ferxtërke un fon tëm Xlechter xitse.” (2 The. 3:3) Wii xitst uns Yeehoowa? Wole mer 2 aate noo kuke.

4. Tëm noo Ëfeser 6:13-17, was hot Yeehoowa uns kep fer uns xitse?

⁴ Fer uns xitse keeche Satanaas sayn atake, Yeehoowa hot uns een ayse west kep. (Lees Ëfeser 6:13-17.) * Tiise ayse west is seer xtark un tuut kuut pariire keeche Satanaas sayn atake. Awer, tas se khan uns xitse, prayche mer yeete teel fon te ayse west aan tsiie — un net aus tuun. Awer, was petayt yeete teel fon tiise ayse west? Wole mer siin.

5. Was is te kroose kërtel fon te woerheet, un warom prayche mer tëm aan tsiie?

⁵ Te kroose kërtel fon te woerheet petayt ti woerheete woo mer khene in Kot sayn Wort, ti Piipel, fine. Warom prayche mer tëm aan tsiie? Wayl wën mer ti woerheete fon te Piipel wise, sin mer net soo laycht hinerkang; un tas xitst uns fon Satanaas, “te fater fon te liie”. (Yoo. 8:44) Satanaas is eene kwap liichner wayl eyer hot xon fiile yoore keloo un ‘ti kans welt hinerkang’. (Apo. 12:9) Wii khene mer tiise kërtel aan tsiie? Meyer tsiie tëm aan wën mer ti woerheet iwer Yeehoowa lërne, wën mer Tëm “mit kayst un woerheet aan peete”, un wën mer eerliche layt sin. (Yoo. 4:24; Ëfe. 4:25; Hep. 13:18)

6. Was is tas prust xilt fon kerechtichkheet, un warom mise mer tëm aan tsiie?

⁶ Tas prust xilt fon kerechtichkheet petayt was is kerecht foer Yeehoowa. Warom prayche mer tëm aan tsiie? Tiise teel fon te ayse west hot een soltaat sayn hërts kexitst. In te selwich aat, tiise kaystlich prust xilt xitst weer mer inerlich sin fon te influens fon te welt. (Xpr. 4:23) Yeehoowa waart tas mer Tëm liipe un tiine mit unser kans hërts. (Mat. 22:36, 37) Awer Satanaas fersuucht unser hërts teele. Wii macht eyer tas? Eyer wil hon tas mer ti tinge fon te welt liipe — tinge woo Yeehoowa hast. (Tya. 4:4; 1 Yo. 2:15, 16) Un, wën tas pariirt net, fersuucht Satanaas uns uner trike tas mer etwas mache woo Yeehoowa net kërn hot.

7. Wii tuun mer ti prust xilt aan tsiie?

⁷ Wii khene mer tiise prust xilt aan tsiie? Meyer mise aan nëme was Yeehoowa saat richtich un ferkheert is, un tas aan heere. (Psal. 97:10) Welche layt mëne tas noo keen was Yeehoowa saat richtich is, xteelt tëne sayn frayheet. Awer, wën mer noo lose ti piiplixe printsiipye noo keen, weyere mer wii een soltaat woo tuut sayn prust xilt in een kriich aus tuun, ploos wayl eyer mënt tas es tsu xweyer is. Tas weyer een tumheet! Fer tii woo Yeehoowa liipe, Tëm sayn kepoote “sin net xweyer” — awer tuun leepe kepe. (1 Yo. 5:3)

8. Was petayt te wile fer ti kuute notisye preetiche wii xuu uf unser fiis hon?

⁸ Te aphostel Phaul hot kesaat tas mer mise te wile fer ti kuute notisye preetiche wii xuu uf unser fiis hon, es wil saan, imer fërtich sin fer ti kuute oter fom Raych preetiche. Un, wën mer fer ti layt preetiche, unser aychne klaape wërt ferxtërkt. Meyer sin uf kemuut wën mer siin Yeehoowa sayn Tsayer uf te kans welt yeete keleechenheet penutse fer ti kuute notisye preetiche — tsum payxpiil: in te aarwayt, in te xuul, haus tsu haus, in te kexefte pletse, wën se khaafe keen, wën se ti parente pesuuche, wën se fertseele mit yemant woo se khëne orer soo kaar wën se khene net naus tsus keen. Wën mer noo lose teete se preetiche wayl mer tsu fiil pang hon, weyere mer wii een soltaat in een kriich woo sayn xuu aus tuut;  tee khent sayn fiis wee mache. Tes weeche, wën eyer atakiirt weyer, fiilaycht kreecht eyer sich net xitse un ti kepoote fon sayn fiirer aan heere.

9. Warom prayche mer tas kroose xits xilt fom klaape fest hale?

⁹ Tas kroose xits xilt fom klaape petayt te klaape woo mer aan Yeehoowa hon. Meyer traue tas eyer tuut sayn ferxpreche erfiile. Mit tiise klaape, kriin mer “ale fayer fletxe woo te Xlechter xiist, aus mache”. Weeche was mise mer tiise kroose xits xilt fest hale? Wayl mit tëm, wëre mer net hinerkang fon te inlërnunge fon te aphostate un wëre mer net oone muut wën ti layt uns xpote. Un, oone klaape, kreechte mer net uns fest xtele wën ti anere uns uner trike fer Yeehoowa sayn kepoote iwertreete. Uf te aner sayt, yeetes mool woo mer in te aarwayt orer in te xuul etwas ap xtose woo Yeehoowa net kërn hot, sin mer tiise kroose xits xilt am fest hale. (1 Phe. 3:15) Yeetes mool woo mer ap xtose een aarwayt woo teet peser petsaale awer teet unser kaystlich rutiin xteere, sin mer tiise kroose xits xilt am fest hale. (Hep. 13:5, 6) Un yeetes mool woo mer Yeehoowa wayter tiine, soo kaar wën ti layt sich keeche uns xtele, tiise kroose xits xilt fom klaape tuut uns xitse. (1 The. 2:2)

10. Was is te ayse khap fon te retung, un warom mise mer tëm aan tuun?

 ¹⁰ Te ayse khap fon te retung petayt ti hofnung woo Yeehoowa uns kept — ti hofnung tas mer wëre fom toot keret un tas Eyer tuut ale sayn troye tiiner peloone. (1 The. 5:8; 1 Tim. 4:10; Tit. 1:1, 2) Eene ayse khap hot een soltaat sayn khop kexitst. In te selwich aat, te ayse khap fon te retung tuut unser ferxtant xitse. Wii soo? Weeche ti hofnung, kriin mer uns aan Yeehoowa sayn ferxpreche traan hale un unser propleeme in te richtich aat siin. Wii khene mer tiise ayse khap aan tuun? Meyer mise uns sicher sin tas was mer tenke xtimt mit was Yeehoowa tenkt. Tsum payxpiil, meyer leye unser hofnung uf Yeehoowa, net “uf unsichere raychtum”. (Psal. 26:2; 104:34; 1 Tim. 6:17)

11. Was is tas xwaart fom kayst, un warom prayche mer es penutse?

¹¹ Tas xwaart fom kayst is Kot sayn Wort, ti Piipel. Tiise xwaart khan yeete lii foer pringe. Soo, kriit es ti layt fray mache fon yeete falx inlërnung un xlecht kewoonheet woo khene tëne xaate mache. (2 Kor. 10:4, 5; 2 Tim. 3:16, 17; Hep. 4:12) Wii khene mer lërne tiise xwaart kuut penutse? Torich tas perseenlich xtuutyum un ti iipung woo mer fon te Orkanisatsyoon kriin. (2 Tim. 2:15) Yeehoowa xitst uns net ploos torich ti ayse west. Es kept aach een aner xtark xitsung. Was is tas?

12. Was noch prayche mer hon, un warom?

¹² Een soltaat woo speryens hot wees tas eyer khan net een kriich keeche een mechtich militeer aleen khëmpfe — tee praycht ti hilef fon anere soltaate hon. In te selwich aat, meyer khene net keeche Satanaas un sayn nookeener aleen khëmpfe — meyer prayche ti hilef fon te priiter un xwestere hon. Un Yeehoowa hot uns een “kans pruuterxaft” kep fer uns helfe. (1 Phe. 2:17)

13. Tëm noo Hepreeyer 10:24, 25, wii khene ti fersamlunge uns helfe?

¹³ Een aat woo mer unerxtitsung kriin is torich ti fersamlunge. (Lees Hepreeyer 10:24, 25.) * Als mool, fine mer uns al oone muut, awer ti fersamlunge khene uns helfe. Tsum payxpiil, ti hërtsliche antworte fon te priiter un unser kexpreeche mit tëne, tuun uns uf muute. Un ti reete un foerxtelunge ferxtërke unser pextimung fer wayter Yeehoowa tiine. (1 The. 5:14) In te fersamlunge hon mer aach ti keleechenheet fer unser priiter helfe — un hilef kepe lost uns froo. (Aph. 20:35; Rom. 1:11, 12) Ti fersamlunge helfe uns aach in anere aate. In tëne, lërne mer wii peser preetiche un in lërne. Tsum payxpiil, mer lërne wii te Inlërnung Kit peser penutse. Tan, foer te fersamlung, tuu tich kuut in richte; torich ti fersamlung, tuu mit acht heere; un noo te fersamlung, tuu aan wëne was tuu kelërnt host. Soo, tuust tuu “een kuut soltaat fon Yeesus Kristus” wëre. (2 Tim. 2:3)

14. Was fer aner hilef hon mer?

¹⁴ Meyer hon aach ti unerxtitsung fon milyoone mechtiche engele. Tenk mool aan was khan een engel aleen mache. (Isa. 37:36) Awer yets rechen aan ales was een militeer fon engele mache khan! Khee mënx orer taywel khan sich keeche Yeehoowa sayn engel militeer xtele. Un Yeehoowa is te Ale Mechtiche. Tes weeche, wën eyer mit uns is, sin mer imer xtërker wii unser keechner, een tuun wii fiil sin se! (Rich. 6:16) Tan, prayche mer net pang xpiire orer uns oone muut fine wën een aarwayt orer xuul koleke, orer een parent woo net Yeehoowa sayn Tsayer is, etwas keeche uns  saat orer keeche uns macht. Eriner tich: tuu pist net aleen in tiise kriich. Wayls tuu Yeehoowa sayn lënkung noo keest, khanst tuu tich sicher sin tas eyer tich uner xtitse tuut!

15. Tëm noo Isaiias 54:15, 17, warom khan nimant Kot sayn folek um hale ti preetich aarwayt mache?

¹⁵ (Lees Isaiias 54:15, * 17. *) Ti welt unich Satanaas sayn kontrol hot fiile uersache fer uns hase. Tsum payxpiil, meyer tuun uns net in te politik rin mexe orer im kriich khëmpfe. Meyer mache Yeehoowa sayn naame pekhant, un keen mer tëm sayn kesetse noo. Meyer preetiche tas ploos Kot sayn Raych khan woere friit pringe. Un mer tsayche fer ti layt tas te fiirer fon tiise welt aarich xlecht is — yemant woo liie un um pringe tuut. (Yoo. 8:44) Un noch: meyer mache pekhant tas Satanaas sayn welt wërt klaych fernicht. Soo wii soo, Satanaas un sayn nookeener tuun nii net unser preetich aarwayt um hale kriin. Xtats tas, meyer tuun wayter Yeehoowa loope in yeete aat wii mer khene. Un opwool Satanaas aarich xtark is, hot eyer net ti pexeet fom Raych um hale kriit ti kans welt trefe. Tas is ploos meechlich wayl Yeehoowa uns xitse tuut.

16. In was fer aate tuut Yeehoowa sayn folek xitse torich ti kroos tripulatsyoon?

¹⁶ Was khomt noch? Torich ti kroos tripulatsyoon, Yeehoowa tuut uns xitse in tswaay wunerliche aate. Eyerst: wën Yeehoowa ti kheeniche fon te eyert uf rechne tuut Papiloon ti Kroos fernichte — es wil saan, al ti falxe relichyoone —, tuut eyer sayn folek xitse. (Apo. 17:16-18; 18:2, 4) Xpeeter, tuut eyer sayn folek xitse wën eyer te rest fon Satanaas sayn welt im Armaxeton fernicht. (Apo. 7:9, 10; 16:14, 16)

17. Was fer nutse kriin mer wën mer ticht pay Yeehoowa plaype?

¹⁷ Wën mer ticht pay Yeehoowa plaype, niks woo Satanaas macht khan eewich xaate pringe. In woerheet, is tee woo wërt fer imer fernicht. (Rom. 16:20) Tan, tuu ti kans ayse west aan tsiie — un nii net aus tuun! Fersuuch net te kriich keeche Satanaas un sayn welt aleen khëmpfe: xtits tayn priiter un xwestere uner. Un kee Yeehoowa sayn lënkung noo. Wëns tuu tas ales machst, khanst tuu tich sicher sin tas tayn liiplich Fater im himel tuut tich ferxtërke un xitse. (Isa. 41:10)