1. Fikieme Jesu ọ rọ lẹ se Jihova re ọ sẹro ilele riẹ?

EVAỌ aso urere taure a te ti kpe Jesu, o je roro kpahe ebẹbẹ nọ i ti te ilele riẹ. Fikinọ o you rai gaga, ọ lẹ se Jihova Ọsẹ riẹ re ọ “sẹro rai fiki omuomu na.” (Jọn 17:14, 15) Jesu ọ riẹ nọ o te zihe kpobọ odhiwu no, Setan Ẹdhọ na ọ te wọso ohwo kpobi nọ ọ gwọlọ gọ Jihova. Fikiere, o gwọlọ nọ a rẹ thọ idibo Jihova.

2. Ẹvẹ u ro mu omai ẹro nọ Jihova ọ te kuyo elẹ mai?

² Jihova ọ kuyo olẹ Jesu na keme o you Jesu Ọmọ riẹ na gaga. Jihova o ti you omai gaga re nọ ma tẹ be dao ẹgba mai kpobi re ma ru oware nọ o rẹ were iẹe. O ti je yo elẹ mai re nọ ma tẹ lẹ sei re ọ thọ omai. Jihova Ọsẹ oyoyou na ọ rẹ thọ omai jẹ sẹro mai emọ riẹ ẹsikpobi. Ọ rẹ siọ ere ba eru hu, keme o rẹ sae raha odẹ riẹ nọ o gbe ru ere he.

3. Fikieme o rọ gwọlọ nọ Jihova ọ thọ omai?

³ O gwọlọ nọ Jihova ọ rẹ thọ omai enẹna vi epaọ anwẹdẹ kpobi. A le Setan no obọ odhiwu ze no, yọ “o wo ofu ọgaga.” (Evia. 12:12) O ru ahwo jọ nọ a bi mukpahe omai roro nọ a tẹ be wọso omai yọ a bi “ru iruo ọrẹri kẹ Ọghẹnẹ.” (Jọn 16:2) Ahwo jọ nọ a rọwo nọ Ọghẹnẹ ọ rrọ họ a be wọso omai re fikinọ ma bi koko izi Ọghẹnẹ, onọ u ru omai wo ohẹriẹ no akpọ na. Oware kpobi nọ a be rọ fiki riẹ kpokpo omai kẹhẹ, ozọ u bi mu omai hi. Fikieme? Keme Ebaibol na ọ ta nọ: “Olori na o re ru ẹme riẹ gba, yọ ọ te kẹ owhai ẹgba jẹ thọ owhai no obọ omuomu na.” (2 Tẹs. 3:3) Oghẹrẹ vẹ Jihova  ọ be rọ thọ omai? Joma ta kpahe idhere ivẹ jọ.

4. Wọhọ epanọ o rrọ Ahwo Ẹfisọs 6:13-17, eme Jihova ọ kẹ omai nọ o rẹ thọ omai?

⁴ Jihova ọ kẹ omai ẹgọ-ẹmo nọ o rẹ sae thọ omai no obọ Setan. (Se Ahwo Ẹfisọs 6:13-17.) Ẹgọ-ẹmo nana ọ rrọ ziezi, ọ rẹ thọ ohwo dẹẹ. Rekọ re o sae thọ omai, ma re ku eware ẹgọ-ẹmo na kpobi họ yọ ma rẹ ba ai no ho. Eme eware ẹgọ-ẹmo na ọvuọvo i dikihẹ kẹ? Joma ta kpahe ae.

5. Eme họ umueku uzẹme na, kọ fikieme u ro wuzou re ma rehọ iẹe mu eku?

⁵ Umueku uzẹme na o dikihẹ kẹ iwuhrẹ uzẹme nọ e rrọ Ebaibol na. Fikieme u ro wuzou re ma rọ umueku uzẹme na gba eku? U wuzou keme Setan nọ ọ rrọ ọwegrẹ mai na yọ “ọsẹ ọrue.” (Jọn 8:44) Nẹnẹ akpọ Setan o bi ro gu ọrue he, yọ o “su akpọ na soso thọ” no. (Evia. 12:9) Rekọ uzẹme nọ o rrọ Ebaibol na o rẹ thọ omai nọ ọ gbẹ sae rọ viẹ omai họ họ. Ẹvẹ ma sae rọ rehọ umueku uzẹme na gba eku? Ma re wuhrẹ re ma riẹ uzẹme na kpahe Jihova, rehọ “ẹzi gbe uzẹme” gọe, je ru eware kpobi avọ oruọzewọ.​—Jọn 4:24; Ẹf. 4:25; Hib. 13:18.

6. Eme họ ẹgọ-igbama ẹrẹreokie na, kọ fikieme o rọ roja re ma ku ei họ?

⁶ Ẹgọ-igbama ẹrẹreokie na o dikihẹ kẹ izi Jihova nọ i re ru omai jọ ahwo okiẹrẹe na. Fikieme u ro wuzou inọ ma ku ẹgọ-igbama na họ? Nọ osoja o te ku ẹgọ-igbama riẹ họ, u re ru nọ oware ovo u gbe te udu riẹ hẹ. Epọvo na re, ẹgọ-igbama ẹrẹreokie na ọ rẹ thọ omai nọ ekpehre iroro akpọ nana e gbẹ rọ ruọ omai udu hayo nwene oghẹrẹ ohwo nọ ma rrọ họ. (Itẹ 4:23) Jihova ọ gwọlọ nọ ma re you rie no udu ze, ma vẹ jẹ rọ udu mai kpobi gọe. (Mat. 22:​36, 37) Rekọ Setan ọ be gwọlọ ru re eware akpọ nana nọ Jihova o mukpahe e were omai, re ma gbẹ rọ udu mai kpobi gọ Jihova ha. (Jem. 4:4; 1 Jọn 2:​15, 16) Ma gbe kie kẹe evaọ oyena ha, o ve ru re ahwo a wọso omai jẹ gwọlọ gba omai họ ru oware nọ Jihova o mukpahe.

7. Ẹvẹ ma re ro ku ẹgọ-igbama ẹrẹreokie na họ?

⁷ Jihova o jie izi kẹ omai kpahe oware uwoma gbe oware uyoma. Ma te bi koko izi yena, yọ ẹgọ-igbama ẹrẹreokie na ma kuhọ na. (Ol. 97:10) Ahwo jọ a re roro nọ izi Ọghẹnẹ i keke gahrọ, inọ e rẹ kẹ ohwo uvẹ ru oware nọ ọ gwọlọ họ. Rekọ ma tẹ ta nọ izi Ọghẹnẹ e gahrọ inọ ma sai koko ai hi, kiyọ ma wọhọ osoja nọ ọ ba ẹgọ-igbama riẹ no evaọ aro ẹmo, inọ ọ gbẹdẹ gahrọ. Areghẹ ọ rrọ oware utioye vievie he! Uzẹme riẹ họ, izi Jihova e rrọ “owha ogbẹgbẹdẹ hẹ” rọkẹ ahwo nọ a you rie, ukpoye i re siwi uzuazọ ohwo.​—1 Jọn 5:3.

8. A tẹ ta nọ ohwo ọ ruẹrẹ awọ riẹ kpahe kẹ usi uwoma na, eme u dhesẹ?

⁸ Pọl ọ tuduhọ omai awọ re inọ ma ruẹrẹ awọ mai kpahe re ma whowho usi uwoma udhedhẹ na. Koyehọ, ma rẹ ruẹrẹ oma kpahe re ma hae ta usi uwoma Uvie na ẹsikpobi. Ma tẹ be ta usi uwoma na kẹ ahwo, u re ru nọ ẹrọwọ mai ọ rẹ rọ ga. Eva e be were omai gaga inọ inievo mai nọ e rrọ akpọ na soso a be rọ uvẹ kpobi ta usi uwoma kẹ ahwo. Ma rẹ ta usi uwoma evaọ obọ iruo, obọ isukulu, evaọ eria nọ a rẹ jọ zẹ eware, ma rẹ tae nuwou ruọ uwou, nọ ma te kpobọ eki, nọ ma te weze bru imoni mai nọ e rrọ ukoko ho, gbe amọfa kpobi nọ ma nyaku. Makọ inievo nọ e be sai no uwou ho fiki ẹbẹbẹ jọ a be ta usi uwoma na re. Ozọ u te mu omai te epanọ ma rọ siọ usi uwoma ota ba, kiyọ ma wọhọ osoja nọ ọ ba eviẹ riẹ no awọ evaọ oke ẹmo. O rẹ raha oke he re  eware i te duwu iei awọ. Yọ o rẹ gbẹ lọhọ kẹe he re ọ thọ omariẹ nọ ewegrẹ e tẹ wọ ze. U te no ere no, ọ te gbẹ sai tube ru oware nọ ọga riẹ ọ ta kẹe he.

9. Fikieme o rọ roja re ma wha ojese ologbo ẹrọwọ na?

⁹ Ojese ologbo ẹrọwọ na o dikihẹ kẹ ẹrọwọ nọ ma fihọ Jihova. Ma fi ẹrọwọ họ Jihova inọ o ti ru eyaa riẹ kpobi gba. Ẹrọwọ nana o re fiobọhọ kẹ omai “furie ese kpobi nọ e be ware erae nọ omuomu na ọ be sa.” Fikieme o rọ roja re ma wha ojese ologbo nana? Fikinọ u re ru nọ ahwo nọ a kie no ẹrọwọ na no a gbẹ sae rọ rehọ iwuhrẹ erue gbe eme eviẹhọ rai su omai thọ họ. O rẹ jẹ whae ze nọ udu u gbe ro whrehe omai hi nọ a te bi se omai ẹkoko. Ma gbe wo ẹrọwọ họ, ma te sae se he nọ amọfa a tẹ be gwọlọ nọ ma ru oware nọ Jihova o mukpahe. Rekọ oke kpobi nọ ma sae whaha oware nọ o rẹ dha Jihova eva, te evaọ obọ isukulu hayo oria iruo mai yọ ojese ẹrọwọ mai o be thọ omai na. (1 Pita 3:15) Oke kpobi nọ ma siọ iruo nọ a hae te jọ hwa omai osa gbẹdẹ fikinọ o te rehọ oke nọ ma re ro kpohọ ewuhrẹ gbe usi uwoma, yọ ojese ẹrọwọ mai o be thọ omai na. (Hib. 13:5, 6) Ma tẹ be sae gọ Jihova dede nọ a be wọso omai, yọ ojese ẹrọwọ nọ ma wha u bi fiobọhọ kẹ omai na.​—1 Tẹs. 2:2.

10. Eme họ etu ọgaga esiwo na, kọ fikieme u ro wuzou re ma ku ei họ?

 ¹⁰ Etu ọgaga esiwo na họ ẹruore nọ Jihova o ru omai wo. Ma wo ẹruore inọ Jihova ọ te hwosa kẹ ohwo kpobi nọ o bi ru oreva riẹ, yọ ma tẹ maki whu no dede, ọ te kpare omai ze. (1 Tẹs. 5:8; 1 Tim. 4:10; Tait. 1:1, 2) Wọhọ epanọ etu osoja ọ rẹ thọ uzou riẹ na, ere ọvona ẹruore nọ ma wo ọ rẹ thọ iroro mai re. Evaọ oghẹrẹ vẹ? O re fiobọhọ kẹ omai tẹrovi eyaa Ọghẹnẹ, je ru nọ ma gbe ro roro kpahe ebẹbẹ mai gahrọ họ. Kọ ẹvẹ ma sai ro ku etu ọgaga esiwo na họ? Ma rẹ daoma rri eware oghẹrẹ nọ Jihova o rri rai. Wọhọ oriruo, ma re fi iroro mai họ efe akpọ nana ha, ukpoye, Jihova ma re fi ẹruore mai họ.​—Ol. 26:2; 104:34; 1 Tim. 6:17.

11. Eme họ ọgbọdọ ẹzi na, kọ fikieme o rọ roja re ma rehọ iẹe ruiruo?

¹¹ Ọgbọdọ ẹzi na họ Ẹme Ọghẹnẹ, Ebaibol na. Ọgbọdọ nana ọ da te epanọ o re ro bru ifi iwuhrẹ erue wọhọ odẹme, je si ohwo no igbo ekpehre iruemu nọ e rẹ sae wha uye ze. (2 Kọr. 10:4, 5; 2 Tim. 3:16, 17; Hib. 4:12) Eware nọ ukoko Jihova u bi wuhrẹ omai gbe ewuhrẹ omobọ mai i re fiobọhọ kẹ omai riẹ oghẹrẹ nọ ma rẹ rọ rehọ ọgbọdọ na ruiruo ziezi. (2 Tim. 2:15) U te no ẹgọ-ẹmo na no, Jihova ọ kẹ omai oware ofa jọ nọ o rẹ thọ omai gaga. Oware vẹ oye?

12. Obufihọ ọfa vẹ ma gwọlọ, kọ fikieme?

¹² Emamọ osoja ọ rẹ riẹ kẹ omariẹ inọ ọye ọvo ọ sae họre ogbaẹmo soso re o fi kparobọ họ, isoja ibe riẹ a re fiobọhọ kẹe. Ere ọvona re, mai ohwo ọvuọvo ọ sai lele Setan avọ ogba riẹ fiẹmo ho, inievo ukoko na a re fiobọhọ kẹ omai. Jihova o ru nọ ma rọ jọ akpọ na soso wo “inievo” nọ i re fiobọhọ kẹ omai.​—1 Pita 2:17.

13. Wọhọ epanọ o rrọ Ahwo Hibru 10:24, 25, irere vẹ ma re wo nọ ma tẹ be hai kpohọ ewuhrẹ?

¹³ Jihova ọ be hae rehọ inievo na fiobọhọ kẹ omai nọ ma te kpobọ ewuhrẹ. (Se Ahwo Hibru 10:24, 25.) Udu u re whrehe omai kpobi na ẹsejọ, yọ ma te kpohọ ewuhrẹ, oma o rẹ sasa omai. Inievo ukoko na a rẹ kuyo no udu rai ze, yọ a rẹ rọ ere tuduhọ omai awọ. U te no ere no, eme gbe idhesẹvia nọ a re ru evaọ obọ ewuhrẹ i re fiobọhọ nọ ma re ro dikihẹ ga evaọ egagọ Jihova. Ẹme nọ ma re lele ohwohwo ta re ewuhrẹ o te muhọ gbe oke nọ ewuhrẹ ọ tẹ fa no, o rẹ jẹ bọ omai ga re. (1 Tẹs. 5:14) Ewuhrẹ nọ ma rẹ nya u re je rovie uvẹ fihọ nọ ma re ro fiobọhọ kẹ inievo mai, yọ o rẹ lẹliẹ eva were omai re. (Iruẹru 20:35; Rom 1:11, 12) U wo idhere efa nọ iwuhrẹ nọ ma rẹ nya u re ro fiobọhọ kẹ omai. Ma rẹ jọ obei wuhrẹ epanọ ma sae rọ ta usi uwoma je wuhrẹ amọfa ziezi. Wọhọ oriruo, ma rẹ jọ obei riẹ epanọ ma rẹ rọ rehọ eware nọ e rrọ Ẹkpẹti Ekwakwa Ewuhrẹ na ta usi uwoma je wuhrẹ ahwo ziezi. Fikiere, hae ruẹrẹ oma kpahe kẹ ewuhrẹ ziezi. Hae gaviezọ ziezi re nọ whọ tẹ rrọ obọ ewuhrẹ, re whọ hai je ru eware nọ who wuhrẹ. Enẹ whọ te rọ jọ “emamọ osoja Kristi Jesu.”​—2 Tim. 2:3.

14. Amono ọfa a rrọ kugbe omai?

¹⁴ Jihova o wo ikọ-odhiwu buobu gbidi gbidi nọ i bi fiobọhọ kẹ omai re, yọ a wo ogaga ulogbo. Kareghẹhọ nọ ukọ-odhiwu ọvuọvo o kpe ezae idu buobu. (Aiz. 37:36) A gbe du ta ha oware nọ ogbaẹmo ikọ-odhiwu soso a rẹ sai ru! Ohwo-akpọ hayo ukumuomu ọvuọvo ọ sae dadamu kẹ ogbaẹmo Jihova ha evaọ ohọre. Jihova o wo ogaga kpobi, fikiere nọ ọ tẹ rrọ kugbe omai no, ma rẹ ga vi ewegrẹ mai  makọ oghẹrẹ nọ a bu te kẹhẹ. (Ibr. 6:16) Uzẹme ọvo o rrọ ẹme yena. Fikiere, hae kareghẹhọ eme yena nọ ohwo nọ wha gbẹ rrọ iruo, ibe ọmọ-isukulu ra, hayo ohwo uviuwou ra jọ nọ ọ rrọ ukoko ho ọ tẹ ta ẹme hayo ru oware jọ nọ o be lẹliẹ ozọ mu owhẹ. Nọ orọnọ who bi ru oreva Jihova na, riẹ nọ ahwo nọ a rrọ kugbe owhẹ a rrọ buobu.

15. Wọhọ epanọ o rrọ Aizaya 54:15, 17, fikieme ohwo ọvo ọ gbẹ sae rọ whaha omai iruo usi uwoma ota na ha?

¹⁵ U wo eware buobu nọ akpọ Setan ọ be rọ fiki rai mukpahe omai. Ejọ rai họ, ma bi dhomahọ isuẹsu akpọ na ha, yọ ma re fiẹmo ho. Ma bi ru ahwo riẹ odẹ Ọghẹnẹ, ma be ta usi uwoma inọ Uvie Ọghẹnẹ ọvo o te wha udhedhẹ ze, ma te bi je koko izi Ọghẹnẹ. Ere ọvo ho, ma bi ru ahwo riẹ inọ Setan nọ o bi su akpọ nana yọ ọtọrue oyoma, ọ tẹ jẹ rrọ ojihẹ. (Jọn 8:44) Ma be jẹ ta usi uwoma kẹ ahwo nọ, kẹle na, Ọghẹnẹ ọ te raha akpọ Setan no. O make rrọ ere na, Setan avọ ahwo riẹ a sae fare omai unu hu nọ ma gbẹ rọ ta usi uwoma na ha. Ukpoye, ma be rọ uvẹ kpobi ta usi uwoma na jẹ be rọ ere jiri Jihova ẹsikpobi. Whaọ, makọ epanọ Setan o wo ogaga te na, ọ re sae whaha iruo usi uwoma nọ ma rrọ akpọ-soso ta na ha. Ma be sai ru iruo nana kẹhẹ na, fikinọ Jihova ọ rrọ kugbe omai.​—Se Aizaya 54:15, 17.

16. Ẹvẹ Jihova o ti ro siwi idibo riẹ evaọ oke uye ulogbo na?

¹⁶ Eme ma bi rẹro riẹ? Oke uye ulogbo na u ti te, yọ nọ u te muhọ no, u wo oke sa-sa nọ Jihova o ti ro siwi omai. Orọ ọsosuọ, o ti siwi omai evaọ oke nọ ọ te rọ isu akpọ na raha Babilọn Ologbo na, koyehọ egagọ erue akpọ-soso. (Evia. 17:16-18; 18:2, 4) Kẹsena evaọ oke nọ ọ te rọ rehọ ẹmo Amagidọn raha ahwo nọ a kiọkọ evaọ akpọ Setan na no, o ve ti je siwi omai.​—Evia. 7:9, 10; 16:14, 16.

17. Irere vẹ ma re wo nọ ma tẹ talamu Jihova?

¹⁷ Ma tẹ talamu Jihova, Setan ọ rẹ sai ru omai oware uyoma ovo nọ ma rẹ ruẹ uye riẹ bẹdẹ bẹdẹ hẹ. Ọyomariẹ họ ọnọ a te raha kufiẹ bẹdẹ bẹdẹ. (Rom 16:20) Fikiere, wha ẹgọ-ẹmo ọsoso nọ o no obọ Ọghẹnẹ ze na họ oma, whọ bae no vievie he! Kareghẹhọ nọ whẹ ọvo whọ rrọ ohọre na ha. Hai fiobọhọ kẹ inievo ukoko na. Hai ru eware nọ Jihova o bi wuhrẹ owhẹ ẹsikpobi. Who te ru enẹ, Jihova, Ọsẹ oyoyou ra na ọ te bọ owhẹ ga jẹ thọ owhẹ.​—Aiz. 41:10.