1. Sape ni hpe makawp maga ya na matu Yehowa hpang Yesu hpa majaw akyu hpyi ai kun?

SHINGGYIM asak aprat hpang jahtum shana hta, sape ni hkrum wa na chyam dinglik lam ni hte seng nna Yesu myit wa ai. Yesu gaw manang ni hpe tsawra ai majaw, “n shawp n kap ai hta na shanhte hpe makawp maga” ya na matu Kawa hpang akyu hpyi ya wa ai. (Yhn 17:14, 15) Shi sumsing lamu de hkrung rawt ngut ai hpang, Yehowa hpe nawku mayu ai ni hpe Satan hte nat ni gaw matut gasat na hpe Yesu chye ai. Dai majaw Yehowa a masha ni gaw makawp maga lam ra ai.

2. Anhte a akyu hpyi ga hpe Yehowa mahtai jaw na lam hpa majaw kam mai ai kun?

² Yehowa gaw shi kasha hpe tsawra ai majaw, Yesu a akyu hpyi ga hpe mahtai jaw wa ai. Yehowa a myit shapyaw ya lu na matu, kaja htum lam hpe anhte galaw na nga yang, shi mung anhte hpe tsawra na re. Anhte hpe karum ya na matu, makawp maga ya na matu anhte a akyu hpyi ga hpe atsawm madat ya ai. Tsawra myit nga ai dinghku a Baw zawn sha, Yehowa mung shi a ma ni hpe tsawra myit hte matut lanu lahku ya na re. Dai hku n galaw ai nga yang, shi a amying, arawng sadang gaw jahpoi asawng hkrum na re.

3. Dai ni aten hta Yehowa a makawp maga ya ai lam hpe hpa majaw ra ai kun?

³ Ya aten hta Yehowa a makawp maga ya ai lam hpe grau nna ra nga ai. Satan gaw sumsing lamu kaw na gawt kau ai hkrum nna, “n-yun bu let” yu wa ai. (Shr 12:12) Anhte hpe zingri zingrat ai gaw, “Karai Kasang a magam hpe gun hpai” nga ai re ngu hkam la hkra masha nkau hpe Satan galaw nga ai. (Yhn 16:2) Anhte gaw mungkan hte n bung ai majaw, Karai Kasang hpe n kam ai ni gaw anhte hpe zingri ai. Gara hku mi raitim, anhte n tsang ra ai. Hpa majaw kun? Karai a mungga hta ndai hku tsun  da ai: ‘Madu chyawm gaw kangka rai nga ai rai nna, shi nanhte hpe shangang shakang ya nna, n hkru n hkra ai hta na, bau sin na ma rin dai.’ (2 Ht 3:3) Yehowa anhte hpe gara hku makawp maga ya ai kun? Lam lahkawng hpe hkaja yu ga.

4. Ehpesu 6:13-17 hku nga yang, anhte hpe makawp maga ya na matu Yehowa hpa lajang da ya ai kun?

⁴ Satan gasat ai hpe ninghkap lu hkra karum ya na hpyen hking hpe, anhte a matu Yehowa lajang da ya ai. (Ehpesu 6:13-17 hpe hti u.) Dai wenyi hpyen hking ni gaw, ngang nna akyu jaw ai. Raitim, hpyen hking langai hpra hpe hpun da yang she, makawp maga lam lu na re. Hpyen hking langai hpra gaw hpa hpe malai tsun ai kun? Langai hpra hpe hkaja yu ga.

5. Teng man lam ngu ai shingkyit gaw hpa rai kun? Dai hpe gara hku kyit da lu na kun?

⁵ Teng man lam ngu ai shingkyit gaw, Karai a mungga hta mu lu ai teng man lam hpe tsun ai. Hpa majaw dai hpe anhte kyit da ra ai kun? Satan gaw “masu magaw ai a kawa” re ai majaw re. (Yhn 8:44) Shi gaw shaning hkying hku masu wa nna, “mungkan ga ting hpe hkalem” nga ai. (Shr 12:9) Raitim, Chyum Laika hta lawm ai teng man lam gaw, anhte masu n hkrum hkra makawp maga ya ai. Ndai ga shadawn shing kyit hpe gara hku kyit da lu na kun? Yehowa hte seng ai teng man lam hpe sharin la ai, “Wenyi n-gun atsam hte teng man ai hku nawku” ai, lam shagu hta arawn alai kaja ai hku na kyit da mai ai.​—Yhn 4:24, JCLB; Ehp 4:25; Heb 13:18.

6. Ding hpring ngu ai sinda magap gaw hpa rai kun? Dai hpe hpa majaw hpun da ra ai kun?

⁶ Ding hpring ngu ai sinda magap gaw, Yehowa a ding hpring ai tsang madang ni hpe tsun ai re. Sinda magap hpe hpa majaw anhte hpun ra ai kun? Sinda magap gaw hpyen la langai a salum hpe makawp maga ya ai. Dai zawn sha, ding hpring ngu ai sinda magap gaw mungkan a shingkang ka-up ai lam n hkrum na matu, anhte a ga shadawn salum hpe makawp maga ya ai. (Gsh 4:23) Yehowa gaw myit masin mahkra hte shi hpe tsawra nna nawku shangun mayu ai. (Mat 22:36, 37) Dai majaw Satan gaw, Yehowa nju ndawng ai ndai mungkan kaw na lam ni hpe anhte tsawra wa hkra galaw nga ai. (Yak 4:4; 1 Yh 2:15, 16) Dai lam hte n mai ai nga yang, Yehowa a tsang madang ni hpe anhte n hkan sa hkra jahkrit shama ai.

7. Ding hpring ngu ai sinda magap hpe gara hku hpun da mai ai kun?

⁷ Jaw ai, shut ai hte seng ai Yehowa a tsang madang ni hpe hkap la nna dai hte maren asak hkrung ai hku na, ding hpring ngu ai sinda magap hpe anhte hpun da mai ai. (Shk 97:10) Yehowa a tsang madang ni gaw grai tara ja ai ngu masha nkau hkamsha ma ai. Raitim, Chyum Laika tsang madang ni hpe n hkan sa mat sai nga yang, hpyen la langai gaw majan pa hta, sinda magap hpe grai li ai ngu hkamsha nna raw kau ai hte bung na re. Dai gaw grai angawk ai lam re. Yehowa hpe tsawra ai ni a matu, “hkang da ai ga” gaw hkan sa na matu n yak ai. Asak hpe pyi hkye la lu ai.​—1 Yh 5:3.

8. Kabu gara shiga hkaw tsun ai ngu ai kyepdin hpe din da ai gaw hpa lachyum rai kun?

⁸ Ngwi pyaw ai hpe shabyin ai kabu gara shiga hkaw tsun na matu jin jin rai nga na kyepdin hpe din da na matu mung, Pawlu n-gun jaw wa ai. Mungdan kabu gara shiga hpe hkaw tsun na matu, galoi mung jin jin rai nga ging ai ngu ai lachyum re. Kaga ni hpe Chyum Laika shiga tsun dan ai shaloi, anhte a makam masham mung ngang kang wa ai. Mungkan ting hta nga ai Yehowa a masha ni gaw, gara shara kaw mi rai rai hkaw tsun na matu ahkaw ahkang tam nga ai hpe mu lu ai gaw n-gun lu hpa re. Ga shadawn, jawng ni hta, nta langai hpang langai, hpaga yunga lawk, gat ni, jinghku ni, htingbu ni hpe hkaw tsun ma ai. Anhte gaw  hkrit tsang nna n hkaw tsun sai nga yang, majan pa hta hpyen la gaw kyepdin hpe raw kau ai hte bung na re. Shi a lagaw aloi hte sha hkala mat na re. Tinang hkum tinang makawp maga na matu yak nna hpyen du a matsun ga hpe hkan sa na matu mung yak na re.

9. Makam masham ngu ai n-gang hpe hpa majaw lang da ging ai kun?

⁹ Makam masham ngu ai n-gang gaw Yehowa hpe kam ai makam masham hpe tsun ai re. Yehowa gaw ga sadi yawng hpe hpring sup hkra galaw ya na hpe anhte kam ai. Dai makam masham gaw, “n hkru n hkra ai wa a wan pala nlang hte hpe sat dang kau lu” shangun ai. N-gang hpe anhte hpa majaw lang da ra ai kun? Makam masham htak mat ai ni a sharin achyin lam hpe n kam hkra karum ya nna, anhte a makam masham jahpoi asawng hkrum ai shaloi, myit n daw mat hkra karum ya ai majaw re. Makam masham n nga yang, Yehowa a tsang madang ni hpe n hkan sa na matu, kaga ni shadut wa ai shaloi ning hkap lu na n re. Maga mi hta gaw bungli (sh) jawng hta, anhte a makam masham maga tsap shagu, n-gang hpe lang da ai re. (1 Pe 3:15) Nawku daw jau lam hpe hkra machyi wa shangun chye ai bungli kaja ni hpe ningdang kau shagu mung, n-gang hpe lang da ai re. (Heb 13:5, 6) Ninghkap ai lam ni a lapran Yehowa hpe nawku nga ai lang shagu gaw, n-gang hpe lang nga ai re. N-gang a majaw anhte makawp maga hkrum nga ai re.​—1 Ht 2:2.

10. Hkye hkrang la ngu ai hpri gup chyawp gaw hpa rai kun? Dai hpe hpa majaw chyawp da ra ai kun?

 ¹⁰ Hkye hkrang la ngu ai hpri gup chyawp gaw, Yehowa anhte hpe jaw ai myit mada lam re. Si ai kaw na shalawt la hkrum na, shi a myit ra ai lam hpe galaw ai ni yawng shaman chyeju lu la na ngu ai myit mada lam re. (1 Ht 5:8; 1 Tm 4:10; Tit 1:1, 2) Hpri gup chyawp gaw hpyen la a baw hpe makawp maga ya ai zawn, hkye hkrang la hkrum na ngu ai myit mada lam gaw anhte a myit mang lam hpe makawp maga ya ai. Gara hku na kun? Dai myit mada lam gaw Karai a ga sadi ni hpe matut myit maju jung shangun ai. Mang hkang ni hpe sha n myit nga na matu karum ya ai. Ndai hpri gup chyawp hpe gara hku chyawp da lu na kun? Karai a myit mang ai lam hte maren matut myit ai hku na re. Ga shadawn, anhte a myit mada lam hpe sut su ai hta n re sha, Karai a ntsa tawn da ai.​—Shk 26:2; 104:34; 1 Tm 6:17.

11. Wenyi a ntawng nhtu gaw hpa rai kun? Dai hpe hpa majaw lang ra ai kun?

¹¹ Wenyi a ntawng nhtu ngu ai gaw, Karai Kasang a mungga re ai Chyum Laika re. Ndai ntawng nhtu gaw, masu magaw lam yawng hpe madun dan lu ai. Shut shai ai sharin achyin lam hte hkra machyi shangun ai lailen ni a mayam prat kaw na shalawt ya ai. (2 Ko 10:4, 5; 2 Tm 3:16, 17; Heb 4:12) Karai a uhpung kaw na jaw ai shaman shakyang lam hte tinang hkrai hkaja ai lamang hku nna, ndai nhtu hpe atsawm chye lang hkra sharin la ai. (2 Tm 2:15) Anhte hpe makawp maga ya na matu hpyen hking ni sha n-ga, kaga lam ni hpe mung Yehowa lajang da ya ai. Dai gaw hpa rai kun?

12. Gara madi shadaw lam anhte ra ai kun? Hpa majaw kun?

¹² Mahkrum madup nga ai hpyen la gaw, hpyen dap kaba hpe shi hkrai awng dang lu na n re ai hpe chye ai. Kaga hpyen la ni a karum shingtau lam ra ai. Dai hte maren, Satan hte shi hpang hkan ai ni hpe tinang hkrai n lu ninghkap ai. Hpunau nauna ni a karum madi shadaw lam ra ai. Anhte hpe karum ya na matu, mungkan grup “kahpu kanau” uhpung hpe Yehowa lajang da ya ai.​—1 Pe 2:17.

13. Hebre 10:24, 25 hku nga yang, nawku zuphpawng hpe lung ai majaw gara akyu ni lu na kun?

¹³ Zuphpawng ni hpe lung ai hku nna mung, madi shadaw lam hpe anhte lu la ai. (Hebre 10:24, 25 hpe hti u.) Anhte yawng gaw kalang lang myit daw chye ai. Dai aten hta zuphpawng lamang hku nna n-gun bai lu la ai. Hpunau nauna ni a myit masin kaw na pru wa ai mahtai ni gaw, anhte hpe n-gun lu shangun ai. Chyum Laika hta madung da ai mungga ni hte hkrang shala ni gaw, Yehowa hpe matut nawku hkra shadut ya ai. Zuphpawng n hpang shi yang hte ngut ai hpang, shada da tsun shaga nna mung n-gun lu la ai. (1 Ht 5:14) Zuphpawng ni hta kaga ni hpe karum ya lu ai majaw mung, kabu gara lam hkamsha ai. (Kas 20:35; Rom 1:11, 12) Zuphpawng ni gaw, atsawm hkaw tsun chye na matu hte sharin achyin chye na matu mung anhte hpe karum ya ai. Ga shadawn, Sharin Achyin Hkingrai Ni hpe atsawm chye lang hkra anhte sharin la ai. Dai majaw, zuphpawng ni a matu atsawm hkyen lajang u. Zuphpawng hta atsawm madat u. Chye wa ai lam hpe tatut hkan sa u. Dai lam ni hpe nang galaw ai nga yang, “Hkristu Yesu a hpyen ma kaja” tai wa na re.​—2 Tm 2:3.

14. Gara madi shadaw lam hpe mung anhte lu da ai kun?

¹⁴ Wan hku law ai atsam kaba ai lamu kasa ni a madi shadaw ai lam hpe anhte lu la ai. Lamu kasa langai sha pyi hpa galaw lu ai hpe myit yu u. (Esa 37:36) Atsam kaba ai lamu kasa hpyen dap nga yang, hpa ni hpe galaw lu na hpe myit yu u. Yehowa a atsam kaba ai hpyen dap hpe gara masha (sh) nat mung gasat lu na n re. Sadi dung ai Yehowa Sakse langai hte Yehowa pawng dat yang, ninghkap ai ni hta na grau n-gun ja mat ai. (Trg 6:16) Dai gaw teng sha re.  Jawng manang, bungli manang, jinghku langai ngai gaw nang hpe myit daw hkra tsun ai, galaw ai shaloi dai hpe dum u. Nang hkrai gasat nga ai n re ai hpe dum u. Yehowa a matsun ga hpe nang hkan sa nga ai re.

15. Esaia 54:15, 17 hku nga yang, Karai a masha ni galaw nga ai hkaw tsun bungli hpe hkring mat hkra hpa majaw kadai mung n lu galaw ai kun?

¹⁵ Satan uphkang ai npu hta nga ai mungkan gaw, anhte hpe nju ndawng na lam law law nga ai. Raitim, anhte gaw mung masa lam hta lapran tsap nna, majan hta mung lawm na n re. Karai a amying hte Karai a Mungdan sha simsa lam hpe galaw ya na lam ndau shana ai. Shi a ding hpring ai tsang madang ni hte maren matut asak hkrung ai. Mungkan hpe uphkang ai wa gaw, masu magaw ai a kawa rai nna, masha sat ai wa re ai lam anhte sakse madun ai. (Yhn 8:44) Kade n na yang Satan a mungkan jahten hkrum sana hpe anhte ndau shana ai. Satan hte shi a hpang hkan ai ni a majaw, asim sha nga mat ai baw galoi galaw na n re. Anhte dang lu ai made Yehowa Karai Kasang hpe matut shakawn shagrau mat na re. Satan gaw atsam kaba ai raitim, mungkan ting chyam bra hkra Mungdan shiga hkaw tsun ai hpe gaw n hkum pat lu ai. Yehowa a makawp maga lam hpe lu la ai majaw, matut hkaw tsun lu nga ai.​—Esaia 54:15, 17 hpe hti u.

16. Ru tsang kaba laman hta Yehowa gaw shi a masha ni hpe gara hku hkye la na kun?

¹⁶ Shawng hta hpa byin wa na kun? Ru tsang kaba laman hta mau hpa lam lahkawng hte Yehowa anhte hpe hkye la na re. Langai, shut shai ai nawku htung yawng lawm ai Galu Kaba ai Babelon hpe mungkan ting na hkawhkam ni gasat hkra, Yehowa shadut na re. Dai aten hta sadi dung ai mayam ni hpe Yehowa hkye la na re. (Shr 17:16-18; 18:2, 4) Lahkawng, Satan mungkan a ngam nga ai daw yawng hpe Hara Magedon hta tsep kawp jahten kau ai shaloi, Yehowa gaw shi a masha ni hpe hkye la na re.​—Shr 7:9, 10; 16:14, 16.

17. Yehowa hte matut hku hkau na nga yang hpa akyu ni lu na kun?

¹⁷ Yehowa hte anhte matut hku hkau na nga yang, Satan gaw anhte hpe htani htana hkra machyi mat hkra galaw lu na n re. Kaja nga yang shi she jahten hkrum na wa re. (Rom 16:20) Dai majaw, hpyen hking nlang hte hpe bu hpung dagraw nga u. Matut nna akyu jashawn mat u. Nang hkrai sha hkum gasat. Hpunau nauna ni hpe karum ya u. Yehowa a lam matsun hpe hkan sa u. Rai yang, na a sumsing Kawa gaw nang hpe shangang shakang ya nna, makawp maga ya mat na re.​—Esa 41:10.