1. Nĩkĩ Yesũ wakũlilye Yeova asũvĩae amanyĩw’a make?

ŨTUKŨ wa mũthya Yesũ e kũũ nthĩ, nĩwasũanĩaa ĩũlũ wa mathĩna ala makakwataa amanyĩw’a make. Na kwoou nũndũ nĩwamendete, nĩwakũlilye Ĩthe wake ‘amasũvĩe nũndũ wa ũla mũthũku.’ (Yoa. 17:14, 15) Yesũ nĩweesĩ kana asyoka ĩtunĩ, Satani ũla nĩwe Ndevili akaendeea kũkita onthe ala mekwenda kũmũthũkũma Yeova. Kwoou vate nzika, andũ ma Yeova nĩmethĩawa na vata wa kũsũvĩwa.

2. Twĩsĩ ata kana vaiĩ ĩvinda Yeova ũkalea kũsũngĩa mboya sitũ?

² Yeova asũngĩie mboya ya Mwana wake nũndũ nũmwendete. O naitũ tweeka kyonthe kĩla tũtonya tũmwendeesye, akatwenda. Na yĩla twamũvoya atũtetheesye na aitũsũvĩa, akatwĩthukĩĩasya. Nũndũ twĩ syana syake, vai ĩvinda o na yĩmwe ũkaeka kũtũthĩnĩkĩa. Na kĩtumi nũndũ akaema kwĩka ũu, ethĩwa ayĩyanangĩa ĩsyĩtwa!

3. Nĩkĩ twĩ na vata wa kũsũvĩwa nĩ Yeova?

³ Ũmũnthĩ nĩw’o twĩ na vata mũnene wa kũsũvĩwa nĩ Yeova. Nĩkĩ? Nũndũ Satani nĩwekiw’e kuma ĩtunĩ, na “e na ũthatu mwingĩ.” (Ũvu. 12:12) Nũvotete kũkenga amwe matũthĩnasya makambĩĩa kũsũanĩa kana yĩla meũtũthĩny’a, methĩawa maithũkũma “ũthũkũmi mũtheu kwa Ngai.” (Yoa. 16:2) Namo angĩ matamwĩsĩ Ngai matũthĩnasya nũndũ monaa twĩ kĩvathũkany’o na ala angĩ. Ĩndĩ o na ethĩwa twĩthĩnw’a nũndũ wa kĩtumi kĩva, tũyaĩle kũlikwa nĩ wia. Nĩkĩ? Nĩkwĩthĩwa Ndeto ya Ngai yaĩtye atĩĩ: “Mwĩaĩi nĩ mũĩkĩĩku, na akamwĩkĩa vinya na kũmũsũvĩana na ũla mũthũku.” (2 Ath. 3:3) Yeova atũsũvĩaa ata? Ekai twone nzĩa ilĩ ũtũmĩaa.

4. Kwosana na ĩandĩko ya Aeveso 6:13-17, nĩ kyaũ Yeova ũtũnengete kĩtũsũvĩe?

⁴ Yeova nũtũnengete mĩio ya kaũ ĩtonya kũtũsũvĩa yĩla Satani watũkita. (Soma Aeveso 6:13-17.) Mĩio ĩsu nĩ mĩlũmu na ĩtethasya wĩa wayo nesa. Ĩndĩ ĩtũtethasya o yĩla twamyosa, twamĩkĩa, na twaendeea kũmĩtũmĩa tũte kũmĩia ũtee. Mĩio ĩsu nĩ yĩva? Ekai tũmĩneenee.

5. Nĩ kyaũ kĩelekanĩtw’e na mũsivi wa ũla w’o, na nĩkĩ twaĩlĩte kwĩyova mũsivi ũsu?

⁵ Mũsivi wa ũla w’o nĩ ũw’o ũla wĩ Ndetonĩ ya Ngai, Mbivilia. Nĩkĩ twaĩlĩte kwĩyova mũsivi ũsu? Nũndũ Satani nĩ “ĩthe wa ũvũngũ.” (Yoa. 8:44) Akenganĩte myaka mingĩ mũno na eĩtwe kana nũkengete “nthĩ yonthe”! (Ũvu. 12:9) Ĩndĩ ũw’o ũla wĩ Mbivilianĩ nĩw’o ũtũsũvĩaa ndakatũkenge. Twĩyovaa mũsivi ũsu ata? Nĩ kwa kwĩmanyĩsya ũw’o ĩũlũ wa Yeova, kũmũthaitha “nthĩnĩ wa veva na nthĩnĩ wa w’o,” na kwĩthĩwa twĩ aĩkĩĩku maũndũnĩ onthe.—Yoa. 4:24; Aev. 4:25; Aevl. 13:18.

6. Nĩ kyaũ kĩelekanĩtw’e na ngao ya kĩthũi ya ũlũngalu, na nĩkĩ twaĩlĩte kũmĩkĩa?

⁶ Ngao ya kĩthũi ya ũlũngalu nĩ myolooto mĩlũngalu ya Yeova. Nĩkĩ twaĩlĩte kũmĩkĩa? O tondũ ngao ya kĩthũi ĩsũvĩaa mũsikalĩ ndakatonywe ngoo, now’o ngao ya kĩthũi ya ũlũngalu ĩsũvĩaa ngoo sitũ sya ngelekany’o, kana ũla mũndũ wa nthĩnĩ, ndakanangwe nĩ nthĩ ĩno. (Nth. 4:23) Yeova endaa tũmwende na tũimũthũkũma na ngoo yonthe. (Mt. 22:36, 37) Ĩndĩ Satani ekĩaa kĩthito aany’e ngoo sitũ kwa kũtũsesenga twende syĩndũ ila Yeova ũmenete syĩ ĩũlũ wa nthĩ. (Yak. 4:4; 1 Yoa. 2:15, 16) Aemwa nĩ kũtũsesenga, ekaa kũtũthĩny’a nĩ kana tũikaatĩĩe myolooto ya Yeova.

7. Twĩkĩaa ngao ya kĩthũi ya ũlũngalu ata?

⁷ Twĩkĩaa ngao ya kĩthũi ya ũlũngalu kwa kwĩtĩkĩla myolooto ya Yeova ĩũlũ wa ũseo na ũthũku na kwa kũmĩatĩĩa. (Sav. 97:10) Amwe mew’aa myolooto ya Yeova ta ĩmovete. Ĩndĩ tũkaeka kũatĩĩa myolooto ya Mbivilia, twĩthĩwa twekala ta mũsikalĩ waumya ngao yake ya kĩthũi kaũ ũendeee nĩkwĩthĩwa atĩ eew’a yamũitavĩa. Ũsu wĩthĩwa wĩ ũtumanu mũnene ta kĩ! Ethĩwa nĩtũmwendete Yeova, tũikonaa mĩao yake yĩ “mũio mũito,” ĩndĩ tũkamanyaa kana atũnengete ĩtũtangĩĩe.—1 Yoa. 5:3.

8. Tũtonya kwĩkĩa ata iatũ maaũnĩ maitũ nĩ kana twĩthĩwe twĩyũmbanĩtye kũtavany’a ũvoo mũseo?

⁸ Ũndũ ũngĩ Vaulo ũtwĩkĩĩte vinya twĩke nĩ kwĩkĩa iatũ maaũnĩ maitũ nĩ kana twĩthĩwe twĩyũmbanĩtye kũtavany’a ũvoo mũseo wa mũuo. Ũu nĩ kwasya kana mavinda onthe twaĩlĩte kwĩthĩwa twĩyũmbanĩsye kũtavany’a ũvoo mũseo wa Ũsumbĩ. Yĩla twatavya angĩ ũvoo ũla wĩ Mbivilianĩ, mũĩkĩĩo witũ nũlũlũmĩĩlaa. Nĩtwĩkĩawa vinya mũno twoona ũndũ andũ ma Yeova kĩla vandũ matataa ũndũ matonya matavany’e ũvoo mũseo. Kwa ngelekany’o, amwe nĩmatavanasya me wĩanĩ, me sukulu, isionĩ sya viasala, kana nyũmba kwa nyũmba. Angĩ nĩmatavanasya yĩla mathi kũthooa syĩndũ sokonĩ, yĩla me na andũ ma mũsyĩ mate Ngũsĩ, yĩla mekũea ngewa na anyanyae moo, kana yĩla matatonya kumaala mũsyĩ kwa kavinda. Tũkalikwa nĩ wia na tũieka kũtavany’a, twĩthĩwa twekala ta mũsikalĩ waumya iatũ syake kaũ ũendeee. Mũsikalĩ ũsu ndalea kũũmĩa nyaaĩ, na nũndũ wa ũu, ũyĩthĩa yĩla wokitwa ndatonya kwĩyũkitĩa nesa. Na eka ũu, ndatonya kũatĩĩa kĩla mũnene woo ũkũmatavya.

9. Nĩkĩ twaĩle kwosa ĩla ngao nene ya mũĩkĩĩo?

 ⁹ Ngao nene ya mũĩkĩĩo nĩ mũĩkĩĩo ũla twĩthĩawa naw’o nthĩnĩ wa Yeova. Nĩtũĩkĩĩĩte kana ndalea kwĩanĩsya mawatho make onthe. Mũĩkĩĩo ũsu nĩw’o ũtũtetheeasya “kũvosya maangi onthe makene mwaki ma ũla mũthũku.” Nĩkĩ twaĩle kwosa ngao ĩsu nene ya mũĩkĩĩo? Nũndũ nĩyo ĩtũsũvĩaa tũikaw’e nĩ momanyĩsyo ma akaĩi ma mũĩkĩĩo kana tũikatelemw’e nĩ ala matũneeneaa naĩ. Tũte na mũĩkĩĩo tũyĩsa kwĩthĩwa na vinya wa kũleana na ala meũtũsesenga tũekane na myolooto ya Yeova. Ĩndĩ kĩla ĩvinda twatetea mũĩkĩĩo witũ wĩanĩ kana sukulu, no ũndũ ũmwe na twĩthĩawa tũkwete ngao yitũ. (1 Vet. 3:15) Kĩla ĩvinda twalea wĩa ũkũĩva nesa ethĩwa nũũvĩngĩĩsa mĩvango yitũ ya ũthaithi, no ũndũ ũmwe na twĩthĩawa tũkwete ngao yitũ. (Aevl. 13:5, 6) Na kĩla ĩvinda twaendeea kũmũthũkũma Yeova o na ethĩwa nĩtũũvĩngwa, twĩthĩawa tũsũvĩĩtwe nĩ ngao yitũ.—1 Ath. 2:2.

10. Nĩ kyaũ kĩelekanĩtw’e na ngovia ya kyũma ya ũtangĩĩo, na nĩkĩ twaĩlĩte kũmĩkĩa?

¹⁰ Ngovia ya kyũma ya ũtangĩĩo nĩ wĩkwatyo ũla Yeova ũtũnengete. Nũtũnengete wĩkwatyo wa kũtũthayũũkya twakw’a na kũtũnenga ĩtuvi twaendeea kwĩka kwenda kwake.  (1 Ath. 5:8; 1 Tim. 4:10; Tito 1:1, 2) O tondũ ngovia ya kyũma ĩsũvĩaa mũtwe wa mũsikalĩ, now’o wĩkwatyo wa ũtangĩĩo ũsũvĩaa kĩlĩko kitũ. Ũkĩsũvĩaa ata? Wĩkwatyo ũsu nũtũtetheeasya kwĩkala tũsũanĩĩte mawatho ma Ngai, na ũitũsũvĩa tũikatinde tũsũanĩĩte mũno mathĩna ala matũkwatĩte. Twĩkĩaa ngovia ĩsu ata? Twĩkaa ũu kwa kũĩkĩĩthya kana mosũanĩo maitũ nĩmoosana na ma Ngai. Kwa ngelekany’o, tũyĩkwatasya ũthwii ũla wanangĩkaa, ĩndĩ tũmwĩkwatasya Ngai.—Sav. 26:2; 104:34; 1 Tim. 6:17.

11. Nĩ kyaũ kĩelekanĩtw’e na ũvyũ wa veva, na nĩkĩ twaĩlĩte kũũtũmĩa?

¹¹ Ũvyũ wa veva nĩ Ndeto ya Ngai, Mbivilia. Ũvyũ ũsu nĩ mũĩ vyũ ũkethĩa no ũteme na ũkaany’a ũvũngũ w’onthe, na ũkathasya andũ kuma ũkombonĩ wa momanyĩsyo ma ũvũngũ na mĩkalĩle mĩthũku. (2 Ako. 10:4, 5; 2 Tim. 3:16, 17; Aevl. 4:12) Kwĩmanyĩsya Mbivilia twĩ ithyoka vamwe na kũmanyĩw’a nĩ ũseũvyo wa Ngai nĩkũtũmanyĩasya kũtũmĩa ũvyũ ũsu nesa. (2 Tim. 2:15) Eka mĩio ĩsu ya kaũ twaneenea, ve nzĩa ĩngĩ Yeova ũtũmĩaa kũtũsũvĩa. Nĩ nzĩa yĩva?

12. Nĩ kyaũ kĩngĩ twĩthĩawa na vata nakyo, na nĩkĩ?

¹² Ngũmbaũ ya kaũ nĩyĩsĩ kana ndĩsa kũsinda nguthu ya asikalĩ yĩ yoka; no nginya ĩtetheew’e nĩ asikalĩ ala angĩ. O ta ũu, tũyĩsa kũsinda Satani na aatĩĩi make twĩ ithyoka; no nginya tũtetheew’e nĩ ana-a-asa na eĩtu-a-asa maitũ. Yeova nũtũnengete “ana-a-asa” nthĩ yonthe na methĩawa meyũmbanĩtye kũtũtetheesya.—1 Vet. 2:17.

13. Kwosana na Aevelania 10:24, 25, tũtethekaa ata twathi maũmbanonĩ?

¹³ Ũndũ ũmwe ũtũtetheeasya kũkwata ũtethyo wa ana-a-asa maitũ nĩ kũthi maũmbanonĩ. (Soma Aevelania 10:24, 25.) Mavinda kwa mavinda nĩtũkusaa ngoo, ĩndĩ nĩtũkwataa vinya yĩla twathi maũmbanonĩ. Kwa ngelekany’o, yĩla ana-a-asa na eĩtu-a-asa maumya maelesyo moo kuma ngoonĩ nĩmatwĩkĩaa vinya. Maũvoo ala maumaw’a na ilungu sya mawonany’o ila syĩthĩawa vo, nitwĩkĩaa vinya tũendeee kũmũthũkũma Yeova. O na ngewa ila tũeaa namo ũmbano ũtanambĩĩa na wathela nitwĩkĩaa vinya. (1 Ath. 5:14) O na ĩngĩ, maũmbano nĩmatũnengae mwanya wa kũtanĩa kũtetheesya angĩ. (Meko 20:35; Alo. 1:11, 12) Ĩndĩ ve ũtethyo ũngĩ tũkwataa maũmbanonĩ. Nĩmatumaa twaĩlangya ũtũĩka witũ wa kũtũmĩa mĩio yitũ ya kaũ kwa kũtũtetheesya twĩthĩwe atavany’a na alimũ aseango. Kwa ngelekany’o, nĩmatũmanyĩasya kũtũmĩa nesa Syĩndũ Ila Tũtũmĩaa Mũno Kũmanyĩsya. Kwoou ĩyũmbanĩasye maũmbano ma kĩkundi nesa. Na yĩla maũmbano maendeee, teaa kũtũ. Na ĩndĩ ũitũmĩa kĩla weemanyĩsya maũmbanonĩ. Weeka maũndũ asu, ũkatw’ĩka “mũsikalĩ mũseo wa Klĩsto Yesũ.”—2 Tim. 2:3.

14. Yeova atũnengete ũtethyo ũngĩ wĩva?

¹⁴ Ũtethyo ũngĩ Yeova ũtũnengete nĩ wa alaĩka milioni mbingĩ me vinya. Kwavindĩĩsya kĩla kĩtonya kwĩanĩw’a no mũlaĩka o ũmwe! (Isa. 37:36) Yu wĩona nguthu ya alaĩka me vinya ta ĩtonya kwĩanĩsya maũndũ manenevete ata? Vai ndaimoni o na ĩmwe kana mũndũ o na wĩva ũtonya kũsindana na ita isu syĩ vinya sya Yeova. No twasye kana Ngũsĩ ĩmwe ndĩkĩĩku yongelanw’a na Yeova, yĩthĩawa yamesya vinya kũvĩtũka amaitha maitũ o na ethĩwa nĩ aingĩ. (Asi. 6:16) Ũsu nĩ ũw’o tũtesa kũkananĩsya! Kwoou lilikanaa kĩu yĩla watelemw’a nĩ kĩndũ kyeekwa kana kyaneenwa nĩ mũndũ mũthũkũmaa ĩmwe,  mũsomaa ĩmwe, kana mũndũ wa mũsyĩ ũte Ngũsĩ. Lilikana kana ndũkitaa wĩ weka. Nũmwĩtĩkĩlĩtye Yeova akũtongoesye.

15. Kwosana na Isaia 54:15, 17, nĩkĩ andũ ma Ngai matesa kũvindĩthw’a?

¹⁵ Ve maũndũ maingĩ matumaa tũmenwa nĩ nthĩ ĩno ĩsumbĩkĩtwe nĩ Satani. Kwa ngelekany’o, tũyĩlikasya siasanĩ kana kaũnĩ. Tũtavanasya ĩũlũ wa ĩsyĩtwa ya Ngai, tũkatetheesya andũ kũmanya kana Ũsumbĩ wake now’o wĩ w’oka ũkatũetee mũuo, na tũatĩĩaa myolooto yake mĩlũngalu. O na nĩtũtetheeasya andũ kũmanya kana mũsumbĩ wa nthĩ ĩno nĩ mũkengani mũthũku mũno na nĩ mũaani. (Yoa. 8:44) Na eka ũu, tũtavanasya kana nthĩ ĩno ya Satani ĩkilyĩ kwanangwa. Ĩndĩ o na Satani na aatĩĩi make matata ata, maikesa kũtũvindĩthya. Twĩendeea kũtũmĩa nzĩa syonthe ila tũkwona tũmũtaĩe Yeova! O na kau Satani e vinya mwingĩ, ndaaĩsa kũvota kũsiĩĩa ũvoo wa Ũsumbĩ ndũkavikĩe andũ nthĩ yonthe. Kĩu kĩtonyekete nũndũ Yeova nũtũsũvĩaa.—Soma Isaia 54:15, 17.

16. Yeova akatangĩĩa andũ make ata ĩvindanĩ ya ũla thĩna mũnene?

¹⁶ Nĩ kyaũ tweteele? Ĩvindanĩ ya ũla thĩna mũnene, tũkoona Yeova aitũtangĩĩa kelĩ kwa nzĩa ya mwanya vyũ. Mbee, akatangĩĩa athũkũmi make aĩkĩĩku yĩla ũkatuma asumbĩ ma nthĩ mananga Mbaviloni Ĩla Nene, nayo nĩ ndĩni syonthe sya ũvũngũ. (Ũvu. 17:16-18; 18:2, 4) Ĩvinda ya kelĩ yĩla ũkatangĩĩa andũ make nĩ yĩla ũkethĩwa ayananga kĩlungu kĩla kĩkethĩwa kĩtiele kya nthĩ ĩno ya Satani kaũnĩ wa Alimaketoni.—Ũvu. 7:9, 10; 16:14, 16.

17. Tũtethekaa ata twekala twĩ na ngwatanĩo nzeo na Yeova?

¹⁷ Tweethĩwa na ngwatanĩo nzeo na Yeova, vai ũndũ o na ũmwe Satani ũtonya kwĩka ũkatũũmĩsya tene na tene. Ũ Satani nĩwe ũkanangwa tene na tene. (Alo. 16:20) Kwoou osa mĩio yonthe ya kaũ na ũimĩkĩa, na ũiendeea kũmĩtũmĩa ũte kũmĩia ũtee! Ndũkokite kaũnĩ ũũ wĩ weka. Tw’ĩĩka ana-a-asa na eĩtu-a-asa maku. Na ũimwĩtĩkĩlya Yeova akũtongoesye. Weeka ũu, ĩkala wĩsĩ nesa vyũ kana Ĩthe waku wa ĩtunĩ akakwenda, na akakwĩkĩaa vinya na aikũsũvĩa.—Isa. 41:10.