1. Pamodi ki Jizus pidi Jeová pa fika di odju na se disiplus?

NA KEL últimu noti di Jizus li na Téra, el staba ta pensa sobri kes prubléma ki se disiplus ta ben pasaba pa el. Pamodi amor ki el ta xintiba pa se amigus, el pidi se Pai ‘pa fika di odju na es, pamodi kel Malvadu.’ (João 17:14, 15) Jizus sabia ma dipôs ki el baba pa Séu, Satanás ta kontinuaba ta géra kóntra kes ki krê sirbi Jeová. Pur isu, povu di Jeová ta ben mesteba proteson.

2. Kuzê ki ta da-nu sertéza ma Jeová ta responde nos orason?

² Pamodi amor ki Jeová ta xinti pa se Fidju, el faze kel ki Jizus pidi-l. Si nu faze nos midjór pa nu obi ku Jeová, tanbê el ta fika ta ama-nu. I óras ki nu ta faze orason ta pidi ajuda i proteson el ta responde-nu. Jeová é sima un Pai ki ta preokupa ku se família. I nunka el ka ta dexa di kuida di se fidjus ku amor. El ta faze kel-li pamodi se nómi sta nvolvidu!

3. Pamodi ki nu meste proteson di Jeová oji?

³ Gósi nu meste proteson di Jeová mutu más inda. Satanás tradu di Séu i el dixi pa Téra ‘xeiu di raiba’. (Apo. 12:12) El ta poi alguns algen ta pensa ma óras ki es ta pirsigi-nu, es sta ta faze ‘un trabadju sagradu pa Deus.’ (João 16:2) Otus algen ki ka ta kridita na Deus, ta pirsigi-nu pamodi nos é diferenti di pesoas di mundu. Ka ta nporta pamodi ki pesoas ta pirsigi-nu, nu ka meste ten medu. Pamodi? Pamodi Palavra di Deus ta fla: ‘Sinhor é fiel, i el ta da nhos forsa i el ta proteje nhos di kel  Malvadu.’ (2 Tes. 3:3) Modi ki Jeová ta proteje-nu? Nu ben odja dôs manera.

4. Sima sta na Efésios 6:13-17, kuzê ki Jeová da-nu pa proteje-nu?

⁴ Jeová da-nu un armadura ki pode proteje-nu óras ki Satanás ta ataka-nu. (Lé Efésios 6:13-17.) Kel armadura spritual li é fórti i el ta funsiona dretu. Má kel armadura ta proteje-nu sô si nu uza kada un di kes pésa ki ta faze párti di el i si nu ka tra-s. Kuzê ki kada pésa di kel armadura ta reprizenta? Nu ben odja.

5. Kuzê ki é sintu di verdadi i pamodi ki nu meste uza-l?

⁵ Sintu di verdadi ta reprizenta kes verdadi ki sta na Palavra di Deus, ki é Bíblia. Pamodi ki nu meste uza-s? Pamodi Satanás é ‘pai di mintira.’ (João 8:44) El ten txeu spiriénsa na kel asuntu li. Dja el ten milharis di anu ta konta mintira i ta ‘ngana Téra interu’! (Apo. 12:9) Má kes verdadi ki sta na Bíblia ta djuda-nu pa Satanás ka ngana-nu. Modi ki nu pode uza kel sintu li? Nu ta faze kel-li, óras ki nu ta prende verdadis sobri Jeová, óras ki nu ta adora-l ku spritu i verdadi i óras ki nu ta konporta ku onestidadi na tudu kuza. — João 4:24; Efé. 4:25; Heb. 13:18.

6. Kuzê ki é koleti di justisa i pamodi ki nu debe uza-l?

⁶ Koleti di justisa ta reprizenta kes lei di Jeová ki é justu. Pamodi ki nu debe uza-l? Na ténpu antigu, koleti ta protejeba korason di un trópa, asi pa spada ô flexa ka panhaba el na korason. Di mésmu manera, koleti di justisa ta proteje nos korason ô kel algen ki nos é di pa déntu. Kel koleti li ka ta dexa kes influénsia mariadu di kel mundu li prujudika-nu. (Pro. 4:23) Jeová krê pa nu ama-l i pa nu sirbi-l di tudu nos korason. (Mat. 22:36, 37) Pur isu, Satanás ta tenta dividi nos korason pa nu ama kes kuza di mundu ki é kes kuza ki Jeová ta ôdia. (Tia. 4:4; 1 João 2:15, 16) I óras ki kel-li ka ta da sértu, el ta tenta amiasa-nu pa nu dizobidese lei di Jeová.

7. Modi ki nu pode bisti koleti di justisa?

⁷ Nu ta bisti koleti di justisa, óras ki nu ta seta kel ki Jeová ta fla ma é dretu ô mariadu i nu ta vive di akordu ku es. (Sal. 97:10) Alguns algen ta atxa ma kes lei di Jeová ta tra-s ses liberdadi. Má un sérvu di Jeová ki ta dexa di sigi prinsípius di Bíblia na se vida, é sima un trópa ki ta tra koleti na meiu di un géra pamodi el ta atxa ma sta pizadu dimás. Kel-li ta sérba un grandi asnera! Má kes algen ki ta ama Jeová ka ta atxa ma se mandamentus é pizadu, má un kuza ki pode salva ses vida. — 1 João 5:3.

8. Kuzê ki siginifika tene pé kalsadu prontu pa spadja notísias sábi di pas?

⁸ Polu tanbê insentiva-nu pa nu tene nos pé kalsadu sénpri prontu pa spadja notísias sábi di pas. Kel-li krê fla ma nu debe sta sénpri prontu pa prega kes notísia sábi di Reinu. Óras ki nu ta pâpia ku otus sobri mensaji di Bíblia, nos fé ta fika más fórti. É bunitu di odja povu di Jeová na mundu interu ta djobe oportunidadi di pâpia sobri notísias sábi. Es ta faze kel-li na trabadju, na skóla, na lugaris di komérsiu, di kaza en kaza, óras ki es ta faze kónpra, óras ki es ta vizita famílias ki é ka Tistimunhas di Jeová, óras ki es ta pâpia ku kes algen ki es konxe i ti mésmu óras ki es ka ta pode sai di kaza duránti algun ténpu. Si nu fika ku medu i nu para  di prega, nu ta sérba sima un trópa ki ta tra se sandálias duránti un géra. Si el fazeba kel-li, éra faxi pa el panhaba pankada na pé. Asi ta sérba difísil di protejeba se kabésa óras ki el atakadu i el ka ta konsigi sigiba kes órdi di se komandanti.

9. Pamodi ki nu meste uza kel skudu grandi di fé?

⁹ Kel skudu grandi di fé ta reprizenta nos fé na Jeová. Nu ta kunfia ma Jeová ta ben kunpri tudu se promésas. Kel fé li ta djuda-nu ‘paga tudu kes flexa di lumi di kel Malvadu’. Pamodi ki nu meste kel skudu grandi? Pamodi el ta proteje-nu di mintira di kes algen ki bandona i fika kóntra organizason di Jeová i di medu di kes algen ki ta pâpia mal di nos krénsa. Sen fé, nu ka ta konsigi ten forsa pa nu aguenta firmi óras ki otus algen ta tenta konvense-nu pa nu ka sigi kes lei di Jeová. Má tudu bês ki nu nega faze algun kuza ki Jeová ta ôdia, ka ta nporta si é na trabadju ô na skóla, nu sta ta uza nos skudu di fé. (1 Ped. 3:15) Tudu bês ki nu nega seta un trabadju ki nu ta ganha más txeu pamodi nu sabe ma el ta ben prujudika nos adorason pa Jeová, nu sta ta uza nos skudu di fé. (Heb. 13:5, 6) I kada  bês ki nu kontinua ta sirbi Jeová sikrê ku opozison, nos skudu di fé sta ta proteje-nu. — 1 Tes. 2:2.

10. Kuzê ki é kapaseti di salvason i pamodi ki nu debe uza-l?

¹⁰ Kapaseti di salvason é kel speransa ki Jeová ta da, ki é kel speransa ma el ta ben libra-nu di mórti i ma el ta ben rekonpensa tudu kes ki ta faze se vontadi. (1 Tes. 5:8; 1 Tim. 4:10; Tito 1:1, 2) Sima un kapaseti ta protejeba kabésa di un trópa, kel kapaseti di salvason ta proteje nos menti. Modi? Kel speransa ki Jeová ta da, ta djuda-nu mante konsentradu na se promésas i ta djuda-nu ka fika preokupadu dimás ku nos prubléma. Modi ki nu pode uza kel kapaseti? Nu ta faze kel-li óras ki nu ta pensa sima Jeová ta pensa. Pur izénplu, nu ka ta poi nos speransa na rikézas ki é ka sértu, má na Deus. — Sal. 26:2; 104:34; 1 Tim. 6:17.

11. Kuzê ki é spada di spritu i pamodi ki nu debe uza-l?

¹¹ Spada di spritu é Palavra di Deus, ki é Bíblia. Kel spada li ten puder di mostra klaru tudu tipu di mintira i di liberta pesoas di ensinus falsu i di ábitus mariadu. (2 Cor. 10:4, 5; 2 Tim. 3:16, 17; Heb. 4:12) Nu ta prende uza kel spada li dretu, através di nos studu pesoal i di kel trenamentu ki nu ta dadu na organizason di Jeová. (2 Tim. 2:15) Alén di da-nu armadura spritual, kal ki é otu proteson fórti ki Jeová da-nu?

12. Kal ki é otu proteson ki Jeová ta da-nu i pamodi?

¹² Un trópa ki ten spiriénsa sabe ma el ka ta konsigi ganha un izérsitu grandi el sô. El meste ajuda di otus trópa. Di mésmu manera, nu ka ta konsigi ganha Satanás i se sigidoris si nu luta nos sô. É pur isu ki Jeová da-nu un otu proteson ki é ajuda di se sérvus. Es é nos irmons ku irmans na mundu interu, ki sta sénpri prontu pa djuda-nu. — 1 Ped. 2:17.

13. Sima sta na Hebreus 10:24, 25, modi ki runions pode djuda-nu?

¹³ Un manera ki nos irmons ta djuda-nu é óras ki nu ta sisti runion. (Lé Hebreus 10:24, 25.) Di vês en kuandu, nos tudu nu pode fika dizanimadu. Óras ki kel-li kontise, runion pode da-nu forsa. Kes komentáriu ki nos irmons ku irmans ta da di korason ta da-nu koraji. Kes diskursu i dimonstrason ki es ta faze, ta motiva-nu pa nu kontinua ta sirbi Jeová. I óras ki nu ta pâpia ku es antis i dipôs di runion, nu ta xinti txeu animadu. (1 Tes. 5:14) I na runion, nu ta xinti alegria di djuda otus algen. (Atos 20:35; Rom. 1:11, 12) Runions tanbê ta djuda-nu di otus manera. Es ta midjora nos kapasidadi di prega i di inxina. Pur izénplu, na runion nu ta prende modi ki nu ta uza dretu kes Feraménta prinsipal pa inxina. Pur isu, pripara dretu pa kada runion. Duránti runion, presta txeu atenson. Dipôs di runion, faze sima bu prende. Si bu faze si, bu ta bira ‘un bon trópa di Kristu Jizus’. — 2 Tim. 2:3.

14. Kal ki é otu ajuda ki Jeová da-nu?

¹⁴ Tanbê nu ten ajuda di kes milhon di anju poderozu di Jeová. Pensa na kuzê ki un izérsitu di anju é kapás di faze. (Isa. 37:36) Ka ten ningen ki é sima kel izérsitu di Jeová li ki é poderozu. Jeová é más poderozu ki ten. Pur isu óras ki el sta ku nos, nu ta ser sénpri más fórti ki nos inimigus, ka ta nporta es é kantu.  (Juí. 6:16) Nu ka ten dúvida ma kel-li é verdadi. Pur isu, óras ki bu sta xinti dizanimadu pamodi un kuza ki un koléga ô un família ki ka é Tistimunha di Jeová fla ô faze, lenbra sénpri di kenha ki sta ku bo. Bu ka sta bo sô na es luta. Bu ta sigi orientasons di Jeová, pur isu el ta djuda-u.

15. Sima sta na Isaías 54:15, 17, pamodi ki ningen ka ta konsigi para nos pregason?

¹⁵ Es mundu kontroladu pa Satanás ten txeu motivu pa odia-nu. Nu ka ta mete na pulítika nen nu ka ta partisipa na géra. Nu ta inxina nómi di Deus i nu ta prega ma é sô Reinu di Deus ki pode traze pas pa tudu algen i nu ta obi ku se leis sobri konportamentu. Nu ta prova pesoas ma governanti di kel mundu li é maior mintirozu i asasinu di tudu algen. (João 8:44) I nu ta prega ma ka ta dura, mundu di Satanás ta ben distruídu. Má Satanás ku se sigidoris nunka ka ta konsigi para nos pregason. Envês di kel-li, nu ta kontinua ta lova Jeová di tudu manera ki nu ta pode! Sikrê Satanás ten txeu puder, el ka ta konsigi inpidi mensaji di Reinu di txiga na pesoas di mundu interu. I tudu kel-li é posível pamodi nu ten proteson di Jeová. — Lé Isaías 54:15, 17.

16. Modi ki Jeová ta ben salva se povu na grandi tribulason?

¹⁶ Kuzê ki sta kuazi ta ben kontise? Na grandi tribulason, Jeová ta ben salva-nu di dôs manera spetakular. Primeru, el ta ben salva se sérvus lial, óras ki el poi kes rei di Téra ta distrui Babilónia kel Grandi ki é tudu kes relijion falsu. (Apo. 17:16-18; 18:2, 4) Dipôs, el ta ben salva se povu más un bês óras ki el distrui kel otu párti di mundu di Satanás na Armajedon. — Apo. 7:9, 10; 16:14, 16.

17. Pamodi ki nu meste kontinua ta ten un amizadi fórti ku Jeová?

¹⁷ Si nu kontinua ta ten un amizadi fórti ku Jeová, Satanás ka ta konsigi faze nada ki pode prujudika-nu pa tudu ténpu. Na verdadi, é el ki ta ben distruídu pa tudu ténpu. (Rom. 16:20) Nton, bisti bu armadura konplétu i nunka ka bu tra-l! Ka bu tenta luta bo sô. Apoia bus irmons ku irmans. I sigi orientasons di Jeová. Si bu faze si, bu pode ten sertéza ma bu Pai na Séu, ki ta ama-u, ta da-u forsa i ta proteje-u. — Isa. 41:10.