1. Sambu na nki Yezu lombaka Yehowa na kutanina balongoki na yandi?

NA MPIMPA ya nsuka ya luzingu ya Yezu awa na ntoto, yandi vandaka kuyindula mingi sambu na bampasi yina balongoki na yandi zolaka kukutana ti yo. Sambu Yezu vandaka kuzola banduku na yandi, yandi lombaka Tata na yandi na ‘kutanina bo sambu na muntu ya mbi.’ (Yoa. 17:14, 15) Yezu zabaka nde ntangu yandi ta vutuka na zulu, Satana Diabulu ta landa kunwanisa bantu yonso yina ke zola kusadila Yehowa. Yo yina, bansadi ya Yehowa vandaka na mfunu ya lutaninu.

2. Inki lenda ndimisa beto nde Yehowa ta pesa mvutu na bisambu na beto?

² Yehowa pesaka mvutu na kisambu ya Yezu sambu yandi ke zolaka Mwana na yandi. Kana beto ke sala yonso sambu na kusepedisa Yehowa, yandi ta zola beto mpi, yandi ta pesa mvutu na bisambu na beto, yandi ta sadisa beto mpi ta tanina beto. Sambu Yehowa kele Mfumu ya dibuta yina ke tudilaka bantu ya dibuta na yandi dikebi, yandi ta landa kuzola bana na yandi. Kana yandi sala ve mutindu yina, yo ta bebisa lukumu na yandi.

3. Sambu na nki bubu yai, beto kele kibeni ti mfunu ya lutaninu ya Yehowa?

³ Bubu yai beto kele kibeni ti mfunu ya lutaninu ya Yehowa. Bo me kulaka Satana na zulu yo yina yandi “kele ti makasi ya ngolo.” (Kus. 12:12) Yandi ke salaka yonso sambu na kundimisa bantu yina ke niokula beto nde bo ke “sadila Nzambi kisalu ya santu.” (Yoa. 16:2) Bantu ya nkaka yina ke kwikilaka ve na Nzambi, ke niokulaka beto sambu beto me swaswana ti bantu ya nsi-ntoto yai. Ata mpidina, beto ke waka ve boma. Sambu na nki? Sambu Ndinga ya Nzambi ke tuba nde: “Mfumu kele ya kwikama; yandi ta pesa beno ngolo mpi yandi ta tanina beno na muntu  ya mbi.” (2 Bate. 3:3) Inki mutindu Yehowa ke taninaka beto? Beto tadila mitindu zole yina Yehowa ke taninaka beto.

4. Mutindu Baefezo 6:13-17 ke monisa yo, Yehowa me pesaka beto nki sambu na kutanina beto?

⁴ Yehowa me pesaka beto binwaninu yina lenda tanina beto ntangu Satana ke nwanisa beto. (Tanga Baefezo 6:13-17.) Binwaninu ya kimpeve kele ngolo mingi mpi yo ke taninaka mbote. Kansi yo ta tanina beto kaka kana beto me lwata yo. Konso kinwaninu ke monisa nki? Ntangu yai beto tubila binwaninu yango.

5. Mukaba ya kieleka kele nki mpi sambu na nki beto fwete lwata yo?

⁵ Mukaba ya kieleka ke monisa kieleka yina kele na Ndinga ya Nzambi, Biblia. Sambu na nki beto fwete lwata mukaba yai? Sambu Satana kele “tata ya luvunu.” (Yoa. 8:44) Yandi me salaka bamvula mingi na kukusa mpi yandi ke kusaka “ntoto ya mvimba.” (Kus. 12:9) Kansi kieleka yina kele na Biblia ke taninaka beto sambu Satana kukusa beto ve. Inki mutindu beto ke lwataka mukaba yai ya kifwani? Beto ke lwataka yo ntangu beto ke longukaka kieleka ya me tala Yehowa, ntangu beto ke sambilaka yandi “na mpeve mpi na kieleka” mpi ntangu beto ke kuditwadisaka na masonga na mambu yonso.—Yoa. 4:24; Baef. 4:25; Baeb. 13:18.

6. Kitaninu-ntulu ya lunungu kele nki mpi sambu na nki beto fwete lwata yo?

⁶ Kitaninu-ntulu ya lunungu ke monisa bansiku ya lunungu ya Yehowa. Sambu na nki beto fwete lwata kitaninu-ntulu? Kaka mutindu kitaninu-ntulu ke taninaka ntima ya soda sambu tolo-tolo kukota ve, kitaninu-ntulu ya lunungu ke taninaka ntima na beto ya kifwani to kimuntu na beto ya kati na bangindu ya mbi ya nsi-ntoto yai. (Bing. 4:23) Yehowa ke zolaka nde beto zola yandi mpi beto sadila yandi na ntima na beto ya mvimba. (Mat. 22:36, 37) Satana ke pusaka beto na kuzola bima ya nsi-ntoto yai yina Yehowa ke mengaka sambu na kukabula ntima na beto. (Yak. 4:4; 1 Yoa. 2:15, 16) Kana yo me simba ve, yandi ke niokulaka beto sambu na kupusa beto na kulemfukila ve minsiku ya Yehowa.

7. Inki mutindu beto ke lwataka kitaninu-ntulu ya lunungu?

⁷ Beto ke lwataka kitaninu-ntulu ya lunungu ntangu beto ke sadilaka minsiku ya Yehowa ya me tala mambu ya mbote mpi ya mbi. (Nk. 97:10) Bantu ya nkaka lenda yindula nde bansiku ya Yehowa kele ngolo mingi. Kana beto yambula kusadila minsiku ya Yehowa, beto ta vanda bonso soda yina me katula kitaninu-ntulu na yandi kansi bitumba me mana ve sambu yandi ke yindula nde yo kele kilo mingi. Yo ta vanda buzoba kibeni! Bantu yina ke zolaka Yehowa, ke monaka nde bansiku na yandi kele “kilo ve” kansi yo ke gulusaka.—1 Yoa. 5:3.

8. Kulwata na makulu na beto luzolo ya kuzabisa nsangu ya mbote ke tendula nki?

⁸ Polo siamisaka beto diaka na kulwata na makulu na beto luzolo ya kuzabisa nsangu ya mbote ya ngemba. Yo ke tendula nde ntangu yonso beto fwete vanda ya kuyilama na kusamuna nsangu ya mbote ya Kimfumu. Ntangu beto ke zabisaka bantu ya nkaka nsangu ya Biblia, lukwikilu na beto ke kumaka ngolo. Ya kieleka, yo ke pesa kikesa na kumona nde Bambangi ya Yehowa na ntoto ya mvimba ke sosaka mabaku yonso sambu na kusamuna nsangu ya mbote na kisika ya kisalu, na nzo-nkanda, na bisika ya mumbongo, ntangu bo ke samuna nzo na nzo, ntangu bo ke sumba bima na zandu, ntangu bo me kwenda kutala bantu ya dibuta na bo yina kele ve Bambangi ya Yehowa, ntangu bo ke solula ti bantu yina bo me zaba mpi nkutu ata bo me kangama na nzo sambu na mwa ntangu. Kana beto wa boma mpi beto yambula kusamuna, beto ta vanda bonso soda yina ke katula  basandale na yandi kansi bitumba me mana ve. Yandi ta lwala kukonda mpasi. Yo ta vanda mpasi sambu yandi kuditanina na bambeni mpi na kulemfukila bansiku ya mfumu na yandi.

9. Sambu na nki beto fwete lwata kitaninu ya nene ya lukwikilu?

⁹ Kitaninu ya nene ya lukwikilu ke monisa lukwikilu na beto na Yehowa. Beto ke ndimaka nde Yehowa ta lungisa balusilu na yandi yonso. Lukwikilu ta sadisa beto “na kufwa batolo-tolo yonso ya tiya ya muntu ya mbi.” Sambu na nki beto fwete lwata kitaninu ya nene? Sambu yo ke taninaka beto na malongi ya baaposta mpi yo ke sadisaka beto na kulemba ve nitu ata bantu ke seka beto. Kana beto kele ve ti lukwikilu, beto ta vanda ve ti ngolo ya kununga bantu yina ke sosa kupusa beto na kufwa minsiku ya Yehowa. Lukwikilu na beto ke taninaka beto konso ntangu yina beto ke buya kusala diambu yina ke fwa minsiku ya Yehowa na kisalu to na nzo-nkanda. (1 Pie. 3:15) Beto ke lwataka kitaninu na beto ya nene ntangu beto ke buyaka kisalu yina ta pesa beto mbongo mingi kansi yina ta kanga beto nzila ya kusala mbote mambu ya kimpeve. (Baeb. 13:5, 6) Kitaninu na beto ya nene ke taninaka beto ntangu yonso yina beto ke landaka kusadila Yehowa ata bantu ke telemina beto.—1 Bate. 2:2.

10. Mpu ya luguluku kele nki mpi sambu na nki beto fwete lwata yo?

 ¹⁰ Mpu ya luguluku kele kivuvu yina Yehowa me pesaka beto, kivuvu yina ke monisa nde yandi ta futumuna beto kana beto me fwa mpi yandi ta sakumuna bantu yonso yina ke salaka luzolo na yandi. (1 Bate. 5:8; 1 Tim. 4:10; Tito 1:1, 2) Mutindu mpu ke taninaka ntu ya soda, kivuvu na beto ya luguluku ke taninaka mabanza na beto. Inki mutindu? Kivuvu yango ke sadisaka beto na kulanda kutula dikebi na balusilu ya Nzambi mpi yo ke sadisaka beto na kudiyangisa ve mingi ntangu beto ke kutana ti bampasi. Inki mutindu beto ke lwataka mpu ya luguluku? Beto ke lwataka mpu ya luguluku ntangu beto ke salaka yonso sambu na kuvanda ti mabanza ya Nzambi. Mu mbandu, beto ke tulaka ve kivuvu na beto na bimvwama yina ke zingaka ve kansi beto ke tulaka yo na Nzambi.—Nk. 26:2; 104:34; 1 Tim. 6:17.

11. Mbele ya mpeve kele nki mpi sambu na nki beto fwete sadila yo?

¹¹ Mbele ya mpeve kele Biblia, Ndinga ya Nzambi. Mbele yai kele ti ngolo ya kubasisa luvunu yonso mpi ya kukatula bantu na kimpika ya malongi ya luvunu mpi ya bikalulu ya mbi. (2 Bak. 10:4, 5; 2 Tim. 3:16, 17; Baeb. 4:12) Beto ke zabaka mbote mutindu ya kusadila mbele yango na nzila ya kulonguka na beto mosi mpi na nzila ya malongi yina beto ke bakaka na dibundu ya Nzambi. (2 Tim. 2:15) Katula binwaninu yai ya beto me tubila, Yehowa ke pesaka diaka lutaninu ya nkaka ya ngolo. Inki kele lutaninu yango?

12. Beto ke vandaka diaka na mfunu ya nki mpi sambu na nki?

¹² Soda yina ke nwanaka mbote bitumba, ke zabaka nde yandi lenda nunga ve bitumba ti basoda mingi na ngolo na yandi mosi. Yandi ke vandaka na mfunu ya lusadisu ya basoda ya nkaka. Mutindu mosi, beto lenda nunga ve Satana mpi bantu na yandi na ngolo na beto mosi. Beto ke vandaka na mfunu ya lusadisu ya bampangi na beto. Yehowa me pesaka beto “kimvuka ya mvimba ya bampangi” ya ntoto ya mvimba sambu na kusadisa beto.—1 Pie. 2:17.

13. Mutindu Baebreo 10:24, 25 ke monisa yo, nki mambote beto ke bakaka ntangu beto ke kwendaka na balukutakanu?

¹³ Beto ke bakaka mpi lusadisu na nzila ya balukutakanu. (Tanga Baebreo 10:24, 25.) Bantangu ya nkaka beto yonso ke lembaka nitu yo yina balukutakanu ke pesaka beto kikesa. Bakomantere mpi bamvutu yina bampangi ke pesaka ke pesaka beto kikesa. Badiskure mpi masolo ya ke katukaka na Biblia yina bo ke salaka ke kumisaka ngolo lukanu na beto ya kulanda kusadila Yehowa. Masolo ya mbote yina beto ke solulaka ti bampangi na ntwala mpi na nima ya balukutakanu ke pesaka beto kikesa. (1 Bate. 5:14) Diaka, balukutakanu ke pesaka beto mabaku ya kuwa kiese yina beto ke vandaka na yo ntangu beto ke sadisaka bantu ya nkaka. (Bis. 20:35; Bar. 1:11, 12) Balukutakanu ke sadisaka beto na mitindu ya nkaka. Yo ke sadisaka beto na kulonga mbote mpi na kusamuna mbote. Mu mbandu, beto ke longukaka mutindu ya kusadila mbote bisadilu yina kele na Bisadilu Sambu na Kulonga. Yo yina, yidikaka mbote balukutakanu. Ntangu lukutakanu ke salama, landa na dikebi yonso. Sadila mambu yina nge ke longuka na balukutakanu. Kana nge sala mutindu yai, nge ta kuma “soda ya mbote ya Kristu Yezu.”—2 Tim. 2:3.

14. Banani diaka ke sadisaka beto?

¹⁴ Bamilio ya bawanzio yina kele ngolo mingi ke sadisaka beto mpi. Yindula fioti mambu yina wanzio mosi lenda sala. (Yez. 37:36) Sesepi yai, yindula mambu yina bawanzio mingi lenda sala. Ata muntu mosi ve to demo mosi kele ngolo kiteso mosi ti bawanzio ya ngolo  ya Yehowa. Yehowa me luta bantu yonso na ngolo. Yo yina kana yandi kele ti beto, beto ta vanda ngolo ntangu yonso kuluta bambeni na beto ata bo kele mingi. (Baz. 6:16) Yo kele mpenza kieleka! Kuvila ve mambu yai ntangu nduku na nge ya nzo-nkanda, nduku na nge ya kisalu to muntu ya dibuta yina ke sambilaka ve Yehowa me tuba to me sala mambu yina me lembisa nge nitu. Zaba nde nge kele ve nge mosi na bitumba yai. Nge ke landa lutwadisu ya Yehowa.

15. Mutindu Yezaya 54:15, 17 ke monisa yo, sambu na nki ata muntu mosi ve lenda kanga bansadi ya Yehowa nzila ya kusamuna?

¹⁵ Nsi-ntoto ya Satana kele ti bikuma mingi ya kumenga beto. Beto ke kotaka ve ata fioti na mambu ya politiki mpi beto ke kumaka ve basoda. Beto ke longaka zina ya Nzambi, beto ke longaka nde Kimfumu na yandi mpamba ta tula ngemba mpi beto ke zitisaka bansiku na yandi ya lunungu. Beto ke monisaka bantu nde mfumu ya nsi-ntoto yai kele muntu ya luvunu mpi muntu ya nku. (Yoa. 8:44) Beto ke zabisaka bantu lufwa ya nsi-ntoto yai ya mbi ya Satana. Kansi Satana ti bantu na yandi lenda kanga beto ve ata fioti nzila ya kusamuna. Beto ta landa kukumisa Yehowa mpi kusadila bima yonso yina beto kele ti yo sambu na kusala yo. Ata Satana kele ngolo mingi, yandi me kukaka ve kukanga beto nzila ya kusamuna nsangu ya Kimfumu na ntoto ya mvimba. Beto ke salaka mambu yai yonso sambu Yehowa ke taninaka beto.—Tanga Yezaya 54:15, 17.

16. Inki mutindu Yehowa ta gulusa bansadi na yandi na mpasi ya nene?

¹⁶ Inki mambu ta salama na bilumbu ke kwisa? Na mpasi ya nene, Yehowa ta gulusa beto na mitindu zole ya kuyituka. Ntete, yandi ta gulusa bansadi na yandi ya kwikama ntangu yandi ta pusa bantotila ya ntoto na kufwa Babilone ya Nene, kimvuka ya mabundu yonso ya luvunu. (Kus. 17:16-18; 18:2, 4) Na nima, yandi ta gulusa bansadi na yandi ntangu yandi ta fwa bantu yonso ya nsi-ntoto ya Satana na bitumba ya Armagedoni.—Kus. 7:9, 10; 16:14, 16.

17. Inki mambote beto ta baka kana beto ke bikala ya kwikama na Yehowa?

¹⁷ Kana beto ke bikala ya kwikama na Yehowa, Satana ta niokula beto ve mvula na mvula. Kansi yandi muntu ta fwa kimakulu. (Bar. 16:20) Yo yina, lwata binwaninu yonso mpi landa kusadila yo. Kunwana ve na ngolo na nge mosi. Sadisa bampangi na nge mpi landa lutwadisu ya Yehowa. Kana nge sala mutindu yina, ndima nde Tata na nge ya zulu yina ke zolaka nge ta pesa nge ngolo mpi ta tanina nge.—Yez. 41:10.