អត្ថបទសិក្សា ១៣
ព្រះយេហូវ៉ានឹងការពារអ្នក តើតាមរបៀបណា?
«លោកម្ចាស់ស្មោះត្រង់ ហើយលោកនឹងធ្វើឲ្យអ្នករាល់គ្នាមាំមួន ព្រមទាំងការពារពីមេកំណាច»។—២ថែ. ៣:៣
ចម្រៀងលេខ១២៤ ចូរមានភក្ដីភាពជានិច្ច
សេចក្ដីសង្ខេប *
១. ហេតុអ្វីលោកយេស៊ូបានសុំព្រះយេហូវ៉ាឲ្យការពារពួកអ្នកកាន់តាមលោក?
នៅយប់ចុងក្រោយនៃជីវិតរបស់លោកយេស៊ូជាមនុស្ស លោកបានគិតអំពីការពិបាកផ្សេងៗដែលពួកអ្នកកាន់តាមលោកនឹងជួបប្រទះ។ ដោយសារលោកយេស៊ូស្រឡាញ់ពួកអ្នកកាន់តាមលោក នោះលោកបានសុំបិតារបស់លោកឲ្យ«ការពារពួកគាត់ ឲ្យរួចពីមេកំណាច»។ (យ៉ូន. ១៧:១៤, ១៥) លោកយេស៊ូដឹងថាក្រោយពីលោកត្រឡប់ទៅស្ថានសួគ៌វិញ មេកំណាចសាថាននឹងបន្តប្រយុទ្ធនឹងអស់អ្នកដែលចង់បម្រើព្រះយេហូវ៉ា។ ដូច្នេះ រាស្ត្ររបស់ព្រះយេហូវ៉ាត្រូវទទួលការការពារ។
២. ហេតុអ្វីយើងអាចប្រាកដថាព្រះយេហូវ៉ានឹងតបឆ្លើយសេចក្ដីអធិដ្ឋានរបស់យើង?
២ ព្រះយេហូវ៉ាតបឆ្លើយសេចក្ដីអធិដ្ឋានរបស់លោកយេស៊ូដោយសារលោកស្រឡាញ់បុត្ររបស់លោក។ បើយើងខំអស់ពីសមត្ថភាពដើម្បីធ្វើឲ្យព្រះយេហូវ៉ាពេញចិត្ត លោកក៏នឹងស្រឡាញ់យើងដែរ ហើយពេលយើងអធិដ្ឋានសុំជំនួយនិងការការពារពីលោក លោកនឹងតបឆ្លើយ។ ព្រះយេហូវ៉ាជាបិតាដែលប្រកបដោយសេចក្ដីស្រឡាញ់ ដូច្នេះលោកនឹងបន្តយកចិត្តទុកដាក់ចំពោះកូនៗរបស់លោក។ បើលោកមិនធ្វើដូច្នេះទេ នោះនឹងបង្អាប់នាមរបស់លោក ឬបង្ខូចកេរ្តិ៍ឈ្មោះលោក។
៣. ហេតុអ្វីយើងត្រូវទទួលការការពារពីព្រះយេហូវ៉ានៅសព្វថ្ងៃនេះ?
៣ ឥឡូវនេះ យើងត្រូវទទួលការការពារពីព្រះយេហូវ៉ាលើសជាងមុនទៅទៀត។ សាថានបានត្រូវបោះទម្លាក់ពីស្ថានសួគ៌«ទាំងមានកំហឹងយ៉ាងខ្លាំង»។ (បប. ១២:១២) វាបានបណ្ដាលឲ្យអ្នកខ្លះដែលបៀតបៀនយើង ជឿថាពួកគេកំពុងធ្វើ«កិច្ចបម្រើពិសិដ្ឋជូនព្រះ»។ (យ៉ូន. ១៦:២) អ្នកខ្លះទៀតដែលមិនជឿទៅលើព្រះ បៀតបៀនយើងដោយសារយើងខុសពីគេក្នុងពិភពលោកនេះ។ ទោះជាមនុស្សបៀតបៀនយើងដោយមូលហេតុអ្វីក៏ដោយ យើងមិនភ័យខ្លាចទេ។ ហេតុអ្វី? ពីព្រោះបណ្ដាំរបស់ព្រះចែងថា៖ «លោកម្ចាស់ស្មោះត្រង់ ហើយលោកនឹងធ្វើឲ្យអ្នករាល់គ្នាមាំមួន ព្រមទាំងការពារពីមេកំណាច»។ (២ថែ. ៣:៣) តើព្រះយេហូវ៉ាការពារយើងយ៉ាងដូចម្ដេច? សូមយើងពិចារណារបៀបពីរយ៉ាង។
ព្រះយេហូវ៉ាផ្ដល់គ្រឿងចម្បាំង
៤. យោងទៅតាមអេភេសូរ ៦:១៣-១៧ តើព្រះយេហូវ៉ាផ្ដល់អ្វីដើម្បីការពារយើង?
៤ ព្រះយេហូវ៉ាផ្ដល់គ្រឿងចម្បាំងដើម្បីការពារយើងពីការវាយប្រហាររបស់សាថាន។ (សូមអាន អេភេសូរ ៦:១៣-១៧) គ្រឿងចម្បាំងនេះដែលមកពីព្រះគឺមាំនិងមានប្រសិទ្ធភាព! ប៉ុន្តែ យើងនឹងទទួលការការពារ លុះត្រាតែយើងពាក់គ្រប់គ្រឿងចម្បាំងជានិច្ច។ តើគ្រឿងចម្បាំងនីមួយៗនោះជាតំណាងអ្វីខ្លះ? សូមយើងគិតអំពីវាម្ដងមួយៗ។
៥. តើសេចក្ដីពិតជាខ្សែក្រវាត់គឺជាអ្វី ហើយហេតុអ្វីយើងត្រូវពាក់វា?
៥ សេចក្ដីពិតជាខ្សែក្រវាត់។ នេះជាតំណាងសេចក្ដីពិតដែលមាននៅក្នុងគម្ពីរដែលជាបណ្ដាំរបស់ព្រះ។ ហេតុអ្វីយើងត្រូវពាក់ខ្សែក្រវាត់នេះ? ពីព្រោះសាថានជា«ឪពុកនៃការភូតភរ»។ (យ៉ូន. ៨:៤៤) វានិយាយកុហកអស់រាប់ពាន់ឆ្នាំមកហើយ ព្រមទាំងបាន«បំភាន់ពិភពលោកទាំងមូល»។ (បប. ១២:៩) ប៉ុន្តែ សេចក្ដីពិតក្នុងគម្ពីរការពារយើងពីការបោកបញ្ឆោត។ តើយើងពាក់សេចក្ដីពិតជាខ្សែក្រវាត់នេះយ៉ាងដូចម្ដេច? គឺដោយរៀនសេចក្ដីពិតអំពីព្រះយេហូវ៉ា និងគោរពប្រណិប័តន៍លោកដោយ«មានការដឹកនាំពីសកម្មពលរបស់លោកនិងដោយសេចក្ដីពិត» ព្រមទាំងធ្វើការទាំងអស់ដោយទៀងត្រង់។—យ៉ូន. ៤:២៤; អេភ. ៤:២៥; ហេ. ១៣:១៨
ខ្សែក្រវាត់: សេចក្ដីពិតក្នុងបណ្ដាំរបស់ព្រះ
៦. តើសេចក្ដីសុចរិតជាអាវការពារដើមទ្រូងគឺជាអ្វី ហើយហេតុអ្វីយើងត្រូវពាក់វា?
៦ សេចក្ដីសុចរិតជាអាវការពារដើមទ្រូង។ នេះជាតំណាងខ្នាតតម្រាដ៏សុចរិតរបស់ព្រះយេហូវ៉ា។ ហេតុអ្វីយើងត្រូវពាក់គ្រឿងចម្បាំងនេះ? ដូចអាវការពារដើមទ្រូងការពារបេះដូងរបស់ទាហាន នោះសេចក្ដីសុចរិតជាអាវការពារដើមទ្រូង ការពារយើងមិនឲ្យអ្វីដ៏អាក្រក់ក្នុងពិភពលោកនេះមានឥទ្ធិពលលើបុគ្គលិកលក្ខណៈរបស់យើង។ (សុភ. ៤:២៣) ព្រះយេហូវ៉ាតម្រូវឲ្យយើងស្រឡាញ់ និងបម្រើលោកដោយអស់ពីដួងចិត្ត។ (ម៉ាថ. ២២:៣៦, ៣៧) ដូច្នេះ សាថានព្យាយាមធ្វើឲ្យយើងឈប់បម្រើព្រះយេហូវ៉ាឲ្យអស់ពីដួងចិត្តដោយល្បួងយើងឲ្យស្រឡាញ់អ្វីៗក្នុងពិភពលោករបស់វា ជាអ្វីដែលព្រះយេហូវ៉ាស្អប់។ (យ៉ា. ៤:៤; ១យ៉ូន. ២:១៥, ១៦) ម្យ៉ាងទៀត បើវិធីសាស្ត្រនេះមិនជោគជ័យ វានឹងព្យាយាមគំរាមកំហែងយើងឲ្យធ្វើអ្វីដែលព្រះយេហូវ៉ាមិនពេញចិត្ត។
អាវការពារដើមទ្រូង: ខ្នាតតម្រាដ៏សុចរិតរបស់ព្រះយេហូវ៉ា
៧. តើយើងពាក់សេចក្ដីសុចរិតជាអាវការពារដើមទ្រូងយ៉ាងដូចម្ដេច?
៧ យើងពាក់សេចក្ដីសុចរិតជាអាវការពារដើមទ្រូង ដោយទទួលយកខ្នាតតម្រារបស់ព្រះយេហូវ៉ាស្ដីអំពីអ្វីដែលខុសនិងអ្វីដែលត្រូវ ហើយដោយរស់នៅស្របតាមខ្នាតតម្រាទាំងនោះ។ (ទំនុក. ៩៧:១០) អ្នកខ្លះប្រហែលជាមានអារម្មណ៍ថាខ្នាតតម្រារបស់ព្រះយេហូវ៉ាមិនសូវផ្ដល់សេរីភាពទេ។ ប៉ុន្តែ បើយើងឈប់ធ្វើតាមគោលការណ៍គម្ពីរក្នុងជីវិតរបស់យើង យើងគឺដូចជាទាហានដែលដោះអាវការពារដើមទ្រូងនៅពាក់កណ្ដាលទីក្នុងពេលប្រយុទ្ធ ដោយសារគាត់គិតថាអាវនោះធ្ងន់ពេក។ នោះជាការប្រព្រឹត្តដ៏ឆោតល្ងង់មែន! ចំពោះពួកអ្នកដែលស្រឡាញ់ព្រះយេហូវ៉ា «បញ្ញត្ដិរបស់លោកមិនមែនជាបន្ទុកធ្ងន់ទេ» តែជាអ្វីដែលសង្គ្រោះជីវិត។—១យ៉ូន. ៥:៣
៨. តើការមានចិត្តប្រុងប្រៀបផ្សាយដំណឹងល្អអំពីសេចក្ដីសុខសាន្តទុកជាស្បែកជើងមានន័យយ៉ាងណា?
៨ ប៉ូលក៏លើកទឹកចិត្តយើងឲ្យមានចិត្តប្រុងប្រៀបផ្សាយដំណឹងល្អអំពីសេចក្ដីសុខសាន្តទុកជាស្បែកជើង ក្នុងន័យថាយើងគួរត្រៀមខ្លួនជានិច្ចដើម្បីផ្សព្វផ្សាយដំណឹងល្អអំពីរាជាណាចក្រ។ ពេលយើងប្រាប់អ្នកឯទៀតអំពីដំណឹងក្នុងគម្ពីរ ជំនឿរបស់យើងមាំមួនឡើង។ យើងទទួលការលើកទឹកចិត្ត ពេលយើងឃើញរបៀបដែលរាស្ត្ររបស់ព្រះយេហូវ៉ានៅទូទាំងផែនដី ប្រើគ្រប់ឱកាសដែលពួកគេមានដើម្បីផ្សព្វផ្សាយ មិនថានៅទីណាក៏ដោយ។ ជាឧទាហរណ៍ ពួកគេផ្សព្វផ្សាយនៅកន្លែងធ្វើការ នៅសាលា ពីផ្ទះមួយទៅផ្ទះមួយ ឬនៅតំបន់ពាណិជ្ជកម្ម។ ពួកគេក៏ផ្សព្វផ្សាយពេលពួកគេទៅផ្សារ ទៅសួរសុខទុក្ខសាច់ញាតិដែលមិនមែនជាសាក្សី ឬនិយាយជាមួយអ្នកដែលពួកគេស្គាល់។ បើយើងភ័យខ្លាចខ្លាំងរហូតដល់ឈប់ផ្សព្វផ្សាយ យើងប្រៀបដូចជាទាហានម្នាក់ដែលដោះស្បែកជើងរបស់គាត់ចេញក្នុងអំឡុងពេលប្រយុទ្ធ។ នោះជើងរបស់គាត់នឹងងាយរងរបួស។ ជាលទ្ធផល គាត់នឹងពិបាកការពារខ្លួនពេលមានការវាយប្រហារ ហើយគាត់នឹងមិនអាចធ្វើតាមបង្គាប់របស់មេបញ្ជាការគាត់ទេ។
ស្បែកជើង: ប្រុងប្រៀបផ្សាយដំណឹងល្អ
៩. ហេតុអ្វីយើងត្រូវកាន់ខែលធំនៃជំនឿឲ្យជាប់?
៩ ខែលធំនៃជំនឿជាតំណាងជំនឿដែលយើងមានទៅលើព្រះយេហូវ៉ា។ យើងទុកចិត្តថាលោកនឹងសម្រេចអស់ទាំងសេចក្ដីសន្យារបស់លោក។ ជំនឿនេះនឹងជួយយើងឲ្យ«ពន្លត់អស់ទាំងព្រួញឆេះរបស់មេកំណាច»។ ហេតុអ្វីយើងត្រូវកាន់ខែលធំនេះឲ្យជាប់? ដោយសារវាការពារយើងមិនឲ្យសេចក្ដីបង្រៀនរបស់អ្នកក្បត់ជំនឿបោកបញ្ឆោតយើង ហើយជួយយើងមិនឲ្យធ្លាក់ទឹកចិត្តពេលអ្នកឯទៀតសើចចំអកជំនឿរបស់យើង។ បើគ្មានជំនឿ យើងនឹងមិនមានកម្លាំងដើម្បីទប់ទល់ពេលអ្នកឯទៀតព្យាយាមបង្ខិតបង្ខំយើងមិនអើពើនឹងខ្នាតតម្រារបស់ព្រះយេហូវ៉ា។ ប៉ុន្តែ រាល់ដងដែលយើងកាន់ជំហរមាំមួនចំពោះជំនឿរបស់យើងនៅកន្លែងធ្វើការឬនៅសាលា យើងកំពុងកាន់ខែលរបស់យើងយ៉ាងជាប់។ (១ពេ. ៣:១៥) រាល់ដងដែលយើងបដិសេធការងារដែលទទួលប្រាក់ខែខ្ពស់ជាង តែវារារាំងយើងពីការគោរពប្រណិប័តន៍ព្រះ យើងកំពុងកាន់ខែលរបស់យើងយ៉ាងជាប់។ (ហេ. ១៣:៥, ៦) ម្យ៉ាងទៀត យើងមានការការពារពីខែលនៅរាល់ដងដែលយើងបម្រើព្រះយេហូវ៉ាទោះជាមានការប្រឆាំងក្ដី។—១ថែ. ២:២
ខែល: ជំនឿលើព្រះយេហូវ៉ានិងសេចក្ដីសន្យារបស់លោក
១០. តើសេចក្ដីសង្គ្រោះទុកជាមួកការពារក្បាលគឺជាអ្វី ហើយហេតុអ្វីយើងត្រូវពាក់វា?
១០ សេចក្ដីសង្គ្រោះទុកជាមួកការពារក្បាលគឺជាសេចក្ដីសង្ឃឹមដែលព្រះយេហូវ៉ាផ្ដល់ឲ្យយើង ពោលគឺសេចក្ដីសង្ឃឹមដែលលោកនឹងសង្គ្រោះយើងពីសេចក្ដីស្លាប់ និងឲ្យរង្វាន់ដល់អស់អ្នកដែលធ្វើតាមបំណងប្រាថ្នារបស់លោក។ (១ថែ. ៥:៨; ១ធី. ៤:១០; ទីត. ១:១, ២) ដូចមួកការពារក្បាលរបស់ទាហាន នោះសេចក្ដីសង្ឃឹមអំពីសេចក្ដីសង្គ្រោះការពារសមត្ថភាពគិតគូររបស់យើង។ តើតាមរបៀបណា? សេចក្ដីសង្ឃឹមនោះជួយយើងឲ្យបន្តផ្ដោតអារម្មណ៍ទៅលើសេចក្ដីសន្យារបស់ព្រះ ហើយជួយយើងឲ្យមានទស្សនៈត្រឹមត្រូវចំពោះបញ្ហារបស់យើង។ តើយើងពាក់មួកនេះយ៉ាងដូចម្ដេច? គឺដោយបន្តធ្វើឲ្យប្រាកដថារបៀបគិតគូររបស់យើងសមស្របនឹងគំនិតរបស់ព្រះ។ ជាឧទាហរណ៍ យើងមានសង្ឃឹមមិនមែនលើទ្រព្យដែលមិនទៀង តែមានសង្ឃឹមលើព្រះ។—ទំនុក. ២៦:២; ១០៤:៣៤; ១ធី. ៦:១៧
មួកការពារ: សេចក្ដីសង្ឃឹមរស់ជារៀងរហូត
១១. តើដាវនៃសកម្មពលគឺជាអ្វី ហើយហេតុអ្វីយើងត្រូវប្រើវា?
១១ ដាវនៃសកម្មពលគឺជាគម្ពីរដែលជាបណ្ដាំរបស់ព្រះ។ ដាវនោះមានឫទ្ធានុភាពបកអាក្រាតការកុហកទាំងអស់ និងរំដោះមនុស្សពីសេចក្ដីបង្រៀនមិនពិតនិងទម្លាប់អាក្រក់។ (២កូ. ១០:៤, ៥; ២ធី. ៣:១៦, ១៧; ហេ. ៤:១២) យើងរៀនប្រើដាវនោះឲ្យបានត្រឹមត្រូវតាមរយៈការសិក្សាផ្ទាល់ខ្លួន និងការបង្ហាត់បង្រៀនដែលយើងទទួលពីអង្គការរបស់ព្រះ។ (២ធី. ២:១៥) ក្រៅពីគ្រឿងចម្បាំងនោះ ព្រះយេហូវ៉ាផ្ដល់ការការពារដ៏ខ្លាំងក្លាមួយទៀតដល់យើង។ តើនោះជាអ្វី?
ដាវ: គម្ពីរដែលជាបណ្ដាំរបស់ព្រះ
យើងមិនមែនតយុទ្ធតែម្នាក់ឯង
១២. តើយើងត្រូវការអ្វីទៀត ហើយហេតុអ្វី?
១២ ទាហានដែលមានបទពិសោធន៍ដឹងថាគាត់មិនអាចយកឈ្នះកងទ័ពដ៏ធំតែម្នាក់ឯងបានទេ។ គាត់ត្រូវការជំនួយពីទាហានឯទៀត។ ស្រដៀងគ្នាដែរ យើងមិនអាចតយុទ្ធនឹងសាថាននិងគ្នីគ្នារបស់វាតែម្នាក់ឯងបានទេ តែយើងត្រូវការការគាំទ្រពីបងប្អូនរបស់យើង។ ព្រះយេហូវ៉ាបានផ្ដល់«បងប្អូនរួមជំនឿ»នៅទូទាំងពិភពលោកដើម្បីជួយយើង។—១ពេ. ២:១៧
១៣. យោងទៅតាមហេប្រឺ ១០:២៤, ២៥ តើការចូលរួមកិច្ចប្រជុំផ្ដល់ប្រយោជន៍អ្វីខ្លះដល់យើង?
១៣ របៀបមួយដែលយើងទទួលការគាំទ្រគឺដោយចូលរួមកិច្ចប្រជុំរបស់យើង។ (សូមអាន ហេប្រឺ ១០:២៤, ២៥) ជួនកាលយើងទាំងអស់គ្នាចេះធ្លាក់ទឹកចិត្ត ដូច្នេះកិច្ចប្រជុំអាចលើកទឹកចិត្តយើង។ យើងទទួលការលើកទឹកចិត្តពីចម្លើយដ៏អស់ពីចិត្តរបស់បងប្អូន។ សុន្ទរកថាដែលមានមូលដ្ឋានលើគម្ពីរ និងការសម្ដែងនៅកិច្ចប្រជុំជំរុញចិត្តយើងឲ្យបន្តបម្រើព្រះយេហូវ៉ា។ យើងក៏ទទួលការលើកទឹកចិត្តពីការសំណេះសំណាលគ្នាដ៏មានប្រយោជន៍មុននិងក្រោយកិច្ចប្រជុំ។ (១ថែ. ៥:១៤) បន្ថែមទៅទៀត កិច្ចប្រជុំរបស់យើងផ្ដល់ឱកាសឲ្យយើងមានអំណរដែលមកពីការជួយអ្នកឯទៀត។ (សកម្ម. ២០:៣៥; រ៉ូម ១:១១, ១២) កិច្ចប្រជុំរបស់យើងក៏ជួយយើងតាមរបៀបផ្សេងទៀតដែរ ដូចជាជួយយើងឲ្យទៅជាអ្នកផ្សាយនិងអ្នកបង្រៀនដែលប៉ិនប្រសប់ជាង។ ជាឧទាហរណ៍ យើងរៀនប្រើឧបករណ៍ដើម្បីបង្រៀនគម្ពីរដោយមានប្រសិទ្ធភាព។ ដូច្នេះ សូមរៀបចំកិច្ចប្រជុំឲ្យបានល្អ។ សូមយកចិត្តទុកដាក់ស្ដាប់កិច្ចប្រជុំ។ ក្រោយកិច្ចប្រជុំ សូមធ្វើតាមការបង្ហាត់បង្រៀនដែលអ្នកទទួល។ ដោយធ្វើអ្វីទាំងនេះ អ្នកនឹងទៅជា«ទាហានល្អប្រសើររបស់គ្រិស្តយេស៊ូ»។—២ធី. ២:៣
១៤. តើយើងមានជំនួយអ្វីទៀត?
១៤ យើងក៏មានការគាំទ្រពីបណ្ដាទេវតាខ្លាំងក្លាដ៏ច្រើនអនេក។ សូមគិតអំពីអ្វីដែលទេវតាមួយរូបប៉ុណ្ណោះអាចធ្វើ។ (អេ. ៣៧:៣៦) ចុះទម្រាំទេវតាដ៏ខ្លាំងក្លាមួយកងទ័ពអាចធ្វើលើសជាងនេះយ៉ាងណាទៅ! គ្មានមនុស្សឬវិញ្ញាណអាក្រក់ណា អាចយកឈ្នះកងទ័ពដ៏ខ្លាំងក្លារបស់ព្រះយេហូវ៉ាបានទេ។ គេធ្លាប់និយាយថា សាក្សីដ៏ស្មោះត្រង់ម្នាក់បូកនិងព្រះយេហូវ៉ា ស្មើនឹងគ្នាដ៏ច្រើនអនេក លើសជាងពួកសត្រូវ។ (ចៅ. ៦:១៦) យើងអាចជឿជាក់ថានេះជាការពិត! សូមចាំជានិច្ចអំពីអ្វីទាំងនេះពេលអ្នកធ្លាក់ទឹកចិត្តដោយសារអ្វីដែលអ្នករួមការងារ សិស្សរួមថ្នាក់ ឬសាច់ញាតិដែលមិនមែនជាអ្នកជឿនិយាយឬធ្វើ។ សូមកុំភ្លេចថាអ្នកមិនមែនតយុទ្ធម្នាក់ឯងទេ។ អ្នកកំពុងធ្វើតាមការណែនាំពីព្រះយេហូវ៉ា ដូច្នេះអ្នកមានការគាំទ្រពីលោក។
ព្រះយេហូវ៉ានឹងបន្តការពារយើង
១៥. យោងទៅតាមអេសាយ ៥៤:១៥, ១៧ ហេតុអ្វីគ្មានអ្នកណាអាចបញ្ឈប់រាស្ត្ររបស់ព្រះពីការផ្សព្វផ្សាយ?
១៥ ពិភពលោកដែលនៅក្រោមការគ្រប់គ្រងរបស់សាថានមានមូលហេតុជាច្រើនឲ្យស្អប់យើង ដូចជាយើងកាន់ជំហរអព្យាក្រឹតចំពោះរឿងនយោបាយ ហើយមិនចូលរួមក្នុងសង្គ្រាមទេ។ យើងប្រកាសអំពីនាមរបស់ព្រះ ផ្សព្វផ្សាយថាមានតែរាជាណាចក្ររបស់លោកប៉ុណ្ណោះអាចនាំមកនូវសន្តិភាព និងកាន់ខ្ជាប់តាមខ្នាតតម្រាដ៏សុចរិតរបស់លោក។ យើងបកអាក្រាតអ្នកគ្រប់គ្រងពិភពលោកនេះថាជាអ្នកភូតភរដ៏ទុច្ចរិតនិងជាឃាតករ។ (យ៉ូន. ៨:៤៤) ម្យ៉ាងទៀត យើងប្រកាសថាមិនយូរទៀត ពិភពលោករបស់សាថាននឹងត្រូវបំផ្លាញចោល។ ប៉ុន្តែ សាថាននិងគ្នីគ្នារបស់វានឹងមិនអាចបញ្ឈប់កិច្ចការផ្សព្វផ្សាយរបស់យើងបានឡើយ។ ផ្ទុយទៅវិញ យើងនឹងបន្តសរសើរព្រះយេហូវ៉ាតាមរបៀបណាក៏ដោយដែលយើងអាចធ្វើបាន។ ទោះជាសាថានមានអំណាចខ្លាំងក្លាក្ដី វាមិនអាចរារាំងមនុស្សនៅទូទាំងពិភពលោកពីការឮដំណឹងអំពីរាជាណាចក្រឡើយ។ នេះគឺដោយសារតែយើងមានការការពារពីព្រះយេហូវ៉ា។—សូមអាន អេសាយ ៥៤:១៥, ១៧
១៦. តើព្រះយេហូវ៉ានឹងសង្គ្រោះរាស្ត្ររបស់លោកក្នុងអំឡុងគ្រាទុក្ខវេទនាដ៏ខ្លាំងតាមរបៀបណាខ្លះ?
១៦ តើអ្វីនឹងកើតឡើងនៅថ្ងៃអនាគត? ក្នុងអំឡុងគ្រាទុក្ខវេទនាដ៏ខ្លាំង ព្រះយេហូវ៉ានឹងសង្គ្រោះយើងតាមរបៀបដ៏អស្ចារ្យពីរយ៉ាង។ ទី១ លោកនឹងសង្គ្រោះអ្នកបម្រើដ៏ស្មោះត្រង់របស់លោកក្នុងអំឡុងពេលដែលលោកបណ្ដាលឲ្យពួកស្ដេចនៅផែនដីបំផ្លាញបាប៊ីឡូនដ៏ខ្លាំងក្លា ពោលគឺសាសនាមិនពិតទាំងឡាយ។ (បប. ១៧:១៦-១៨; ១៨:២, ៤) ទី២ លោកនឹងសង្គ្រោះរាស្ត្ររបស់លោកពេលដែលលោកបំផ្លាញផ្នែកសេសសល់នៃពិភពលោករបស់សាថាននៅសង្គ្រាមហាម៉ាគេដូន។—បប. ៧:៩, ១០; ១៦:១៤, ១៦
១៧. តើយើងទទួលប្រយោជន៍យ៉ាងណាពីការបន្តនៅជិតស្និទ្ធនឹងព្រះយេហូវ៉ា?
១៧ ពេលយើងបន្តនៅជិតស្និទ្ធនឹងព្រះយេហូវ៉ា នោះសាថានមិនអាចធ្វើឲ្យយើងរងទុក្ខរហូតទេ។ តាមពិត វាជាបុគ្គលដែលនឹងត្រូវបំផ្លាញចោលជារៀងរហូត។ (រ៉ូម ១៦:២០) ដូច្នេះ សូមទទួលយកគ្រប់គ្រឿងចម្បាំងពីព្រះ ហើយពាក់វាជានិច្ច! សូមកុំព្យាយាមតយុទ្ធនឹងសាថាននិងពិភពលោករបស់វាតែម្នាក់ឯងឡើយ។ ចូរគាំទ្របងប្អូនរួមជំនឿ ហើយចូរធ្វើតាមការណែនាំពីព្រះយេហូវ៉ា។ បើអ្នកធ្វើដូច្នេះ អ្នកអាចជឿជាក់ថាបិតារបស់អ្នកដែលនៅស្ថានសួគ៌ដែលប្រកបដោយសេចក្ដីស្រឡាញ់ នឹងធ្វើឲ្យអ្នកមាំមួន ព្រមទាំងការពារអ្នក។—អេ. ៤១:១០
ចម្រៀងលេខ១៤៩ ចម្រៀងជ័យជម្នះ
^ វគ្គ 5 គម្ពីរសន្យាថាព្រះយេហូវ៉ានឹងធ្វើឲ្យយើងមាំមួន ព្រមទាំងការពារយើង។ ក្នុងអត្ថបទនេះ យើងនឹងឆ្លើយសំណួរដូចតទៅនេះ៖ ហេតុអ្វីយើងត្រូវទទួលការការពារ? តើព្រះយេហូវ៉ាការពារយើងតាមរបៀបណា? តើយើងត្រូវធ្វើអ្វីដើម្បីទទួលជំនួយដែលព្រះយេហូវ៉ាផ្ដល់ឲ្យ?
