1. Mukonda dyahi Jezú wabhingi kwa Jihova phala kulanga mba kukudila omaxibulu mê?

MU USUKU wê wasukina mu ixi, Jezú wexile muxinganeka o ibhidi yejidibhananayu omaxibulu mê. Ohenda yakwatele kumakamba mê yabhangesa Jezú kubhinga kwa Tatê: “Wakudila kwa Dyabhu yó wabhukumuka.” (Nzwá 17:14, 15) Jezú wejidile kwila kwakambele ngó weji vutuka kudyulu, wejidile we kwila Satanaji Dyabhu weji suluka ni kuzukutisa oso ejimesena kusidivila Jihova. Kyenikiphe omundu wa Jihova wejibhinga kwalanga mba kwakudila.

2. Ihi itudyelelesa kwila Jihova wandatambwijila jinga omisambu?

² Mukonda dyahenda yakwatela Monê, Jihova wabhange yamubhingi Jezú. Se tubhanga yoso phala kubelesela Jihova mwene wanda tuzola we. Okyoso kitusamba mukubhinga kikwatekesu ni kilangidilu mwene wandatutambwijila. Jihova wedikala Omutwameni wamwiji, mwene wamesena ombote ya mwiji wê wandasuluka ni kulanga otwana twê ni henda yoso. Mukonda okubhanga kiki kyalungu ni kuzelesa odijina dyê!

3. Mukonda dyahi lelu twabhindamena okilangidilu kya Jihova?

³ Lelu twabhindamena dingi okilangidilu kya Jihova mukulu ndenge. Satanaji amukaye kudyulu watuluka mungongo ni “njinda yavulu.” (Dij. 12:12) Mwene ubhangesa athu kuxinganeka kwila okutuzukutisa kikalakalu “kya wabhela Nzambi.” (Nzwá 16:2) Amukwawu akambe kuxikina Nzambi atuzukutisa mukonda kitwadifu ni athu kumundu yú. Kabasa okima kibhangesa o athu kutuzukutisa, etu kitubhingi kukala ni yôma. Mukonda dyahi? Mukonda o Mak’â Nzambi atukanena kwila: “O Ngana-phe wala fiyele. Mwène u mi swinisa, u mi langa, phala  o Mudyangudi yó ka mi kwate.” (2 Tes. 3:3) Kyebhi Jihova kyatulanga? Twandadilonga mawukexilu ayadi atulanga.

4. Kala kilondekesa Efezu 6:13-17, ihi yatubhana Jihova phala kutulangidila?

⁴ Jihova watubhana kibhakatu kitena kutulanga kujisosa ja Satanaji. (Tanga Efezu 6:13-17.) Okibhakatu kiki kitulanga kyambote! Maji kyene kyandatulanga ngó kyambote setuzwata okibhakatu kyoso. Kitwatokala kukikatula. Kala mbandu yakibhakatu kiki kilombolola ihi? Tumone.

5. Okizwelu okidi kala phonda kilombolola ihi? Ni mukonda dyahi twatokala kudikuta ophonda yiyi?

⁵ Okidi kala phonda, kilombolola okidi kitusanga mu Mak’â Nzambi, o Bibidya. Mukonda dyahi twatokala kudikuta ophonda yiyi? Mukonda Satanaji mwéne “o tata yamakutu.” (Nzwá 8:44) Mukonda mumazunda ni mazunda amivu, mwene wala kya ni uhete wakutanga makutu ni “kunganala o mundu woso”! (Dij. 12:9) Maji okidi kya Bibidya kitukwatekesa kudimuka phala mwene katunganele. Kyebhi kitudikuta ophonda yiyi? Tubhanga kiki mukudilonga okidi kyalungu ni Jihova, kumubheza “mu nzumbi ni mu kidi,” ni kuzwela jinga okidi mu ithangana yoso.—Nzwá 4:24; Efe. 4:25; Jihe. 13:18.

6. Okivungathulu kya kuyuka ihi? Ni mukonda dyahi twatokala kukizwata?

⁶ Okivungathulu kya kuyuka, kilombolola o itumu yoso yayuka yenemutubhana Jihova. Mukonda dyahi twatokala kukizwata? Mukulu, omasoladi exile muzwata okivungathulu phala ojisosa ni jixibhata kija a atule kuthulu. Kyene we kimoxi, okivungathulu kya kuyuka kilanga omuxima wetu, kifwa o ukexilu ni ixinganeku yetu. Okivungathulu kiki kitukwatekesa phala omuxima wetu ki ukayele o idifwa yayibha yala kumundu yú. (Jisa. 4:23) Jihova wamesena kwila tumuzola, tumusidivila ni muxima woso. (Mat. 22:36, 37) Kyenyiki Satanaji usota kuwana omuxima wetu phala tuzole we o ima yamundu, o ima yazembe Jihova. (Tiya. 4:4; 1 Nzwá 2:15, 16) Se mwene ulembwa kutukwatela mundunge yiyi, mwene usota kutukwatesa wôma phala kubhukumukina o ijila ya Jihova.

7. Mukonda dyahi twatokala kuzwata okivungathulu kyakuyuka?

⁷ Etu tuzwata okivungathulu kya kuyuka kyoso kituxikina o itumu ya Jihova yalungu ni kyawabha ni kyayibha, anga tu itumaka kumwenyu wetu. (Jisá. 97:10) Sayi athu axinganeka kwila o itumu ya Jihova itukatula o ufolo. Maji oselevende ya Jihova ukamba kukumbidila o itumu ya Bibidya kumwenyu wê, wadifu ni disoladi ukatula okivungathulu bhukaxi ka ita mukonda wamudivwa kwila kyaneme lwavulu, kubhanga kiki wôwa! Oso azolo Jihova kandamona o itumu yê kala “ya bhonzo ku i aluka,” maji anda imona kala kima kitena kubhulula omyenyu yâ.—1 Nzwá 5:3.

8. Ihi ilombolola okuzwata jihayi ja kudiyudika mu njimbu yambote ya paze?

⁸ Phawulu watutendelesa we, wixi: Mu inama muzwata jihayi ja ku di yudika mu njimbu yambote ya paze. Mu izwelu yengi, kifwa mu ithangana yoso, twatokala kukala polondo phala kuboka onjimbu ya Utuminu. Kyoso kitutangela akwetu onjimbu ya Bibidya, okixikanu kyetu kidibandekesa dingi. Kumundu woso, omundu wa Jihova usota kithangana phala kuboka onjimbu yambote kikale kusalu, kuxikola, mumaloja, kuboka nzo ni inzo, kyoso kyaya musumba kima, kyoso kyaya mukunda ojindandu kabheza Jihova, kyoso kyazwela ni athu akambe kwijiya, kate mwene kyoso kikumoneka kima kyafidisa kutunda kubhata mukakithangana, kiki  kyasangulukisa kyavulu. Se twexile ni wôma anga tukamba okuboka twejikala kala odisoladi dyakatula ojiyahi mukitangana kya ita. Se disoladi dibhanga kiki wejitena kudikwama, mukudikwama ojinguma ejitena kumukwata ni maku ahatu, kejitena we kubelesela o itumu yamwendexi wê.

9. Mukonda dyahi twabhindamena ongubu yakuxikana?

⁹ Ongubu ya kuxikana, ilombolola okixikanu kyetu kwa Jihova. Etu twadyelela kwila, Jihova wandakumbidila o ikanenu yê yoso. Okixikanu kiki kitukwatekesa “kujima omifula ya Dyabhu yawama othubya.” Mukonda dyahi twabhindamena ongubu yiyi? Mukonda itulanga phala akwa kulungulula okidi katunganale, phala kitukala we ni wôma wayó asota kusebhulula o ixinganeku yetu. Se tukamba kixikanu kitwandakala ni nguzu yasoko phala kukolokota, kyoso akwetu kyandasota kutubhangesa kubhukumukina o itumu ya Jihova. Ithangana yoso itudituna kubhanga kima kyazembe Jihova, kikale kusalu, kikale kuxikola, kifwa twamukalakala ni ngubu yetu. (1 Phe. 3:15) Ithangana yoso itudituna salu yejitufuta dingi kitadi kyavulu mukonda yejithandanganyesa o ikalakalu yetu munzumbi, kifwa twamukalakala ni ngubu yetu. (Jihe. 13:5, 6) Ithangana yoso itusuluka kusidivila Jihova  ni ufiyele wetu sumbala ni izukutisu, kifwa ongubu yakuxikana yene yamutulanga.—1 Tes. 2:2.

10. Okapasete kakubhuluka ihi? Ni mukonda dyahi twatokala kukata kumutwe?

¹⁰ Okapasete kakubhuluka, kalombolola okidyelelu kitubhana Jihova, okidyelelu kyakutubhulula kukalunga ni kufuta oso abhanga ovondadi yê. (1 Tes. 5:8; 1 Tim. 4:10; Titu 1:1, 2) Okapasete kalanga omutwe wadisoladi. Kyene we kimoxi, okapasete kakubhuluka, kalanga okilunji kyetu. Kiki kibhita kyebhi? Okidyelelu kyatubhana Nzambi kitukwatekesa kulunga okilunji mu ikanenu yê, kitukwatekesa we kutala omaka mu ukexilu watokala. Kyebhi kitwatokala kukalakala ni kapasete k’etu? Tubhanga kiki mukusota kuxikaneka kala kixinganeka Nzambi. Mukifika, etu kitudyelela mujimbongo jamakutu, maji tudyelela kwa Nzambi.—Jisá. 26:2; 104:34; 1 Tim. 6:17.

11. Oxibhata munzumbi ihi? Ni mukonda dyahi twatokala kukalakalanayu?

¹¹ Oxibhata munzumbi, ilombolola o Mak’a Nzambi o Bibidya. Oxibhata yiyi yala ni kutena kwakutungununa omakutu, kwakujituna o athu mumilongi yamakutu, ni ku idifwa yayibha. (2 Kol. 10:4, 5; 2 Tim. 3:16, 17; Jihe. 4:12) Twejiya kukalakala kyambote ni xibhata yiyi, mukudilonga o Bibidya ubheka ni milongi itubhana Nzambi bhukaxi kakilunga kyê. (2 Tim. 2:15) Katuku okibhakatu munzumbi, kilangidilu kyebhi dingi kyanguzu kitubhana Jihova?

12. Ihi dingi itwabhindamena, ni mukonda dyahi?

¹² Odisoladi dyala kya ni uhete wejiya kwila, ubheka we katena kutolola kifuxi kyamasoladi, mwene wabhingi okikwatekesu kyamasoladi ni akwa. Kyene kimoxi, ubheka wetu kitwandatena kutolola Satanaji ni akayedyê, kifwa twabhindamena okikwatekesu kya jiphange jetu mukilunga. Kiki kyene kyabhangesa Jihova kutubhana ‘jiphange javulu mungongo,’ ene ala polondo phala kutukwatekesa.—1 Phe. 2:17.

13. Kala kilondekesa Jihebelewu 10:24, 25, oyônge itena kutukwatekesa kyebhi?

¹³ Ukexilu umoxi wakutambula okikwatekesu kitwabhindamena okuya muyônge. (Tanga Jihebelewu 10:24, 25.) Sayi ithangana etwenyoso tutena kuluwala. Kyoso kiki kikibhita, oyônge itena kutubhana nguzu. O itambwijilu yajiphange jetu mukilunga ituswinisa kyavulu, omadiskulusu abhanga bhukaxi ka Bibidya ni ifika itukwatekesa kusidivila Jihova. Kuzwela ni jiphange ande dyakumateka okyônge ni kudisukilu, kutuswinisa kyavulu. (1 Tes. 5:14) Kumbandu yengi, muyônge tumona okusanguluka kwijila mukukwatekesa akwetu. (Ika. 20:35; Loma 1:11, 12) Oyônge itukwatekesa we mumawukexilu engi, yene ibandekesa omawuhete akuboka ni kulonga. Mukifika, muyônge ene mutubhanamu ojindunge jalungu ni kyebhi kitutena kukalakala ni Jifalamenda Jetu Jakulonga. Kyenikiphe eye watokala kupelepalala kyambote oyônge. Mukithangana kyayônge eye watokala wila matwi tekenge. Kyoso kibhita okyônge, eye watokala kukumbila yoso iwadilongo. Se ubhanga kiki eye wandakituka “u dikwenze mba disoladi dyambote dya Kidistu Jezú.”—2 Tim. 2:3.

14. Kikwatekesu kyebhi kitwala nakyu dingi?

¹⁴ Twala we ni mazunda ni mazunda ajyanju ala ni kutena kwavulu enemutukwatekesa. Xinganeka ngó itena kubhanga o anju imoxi! (Iza. 37:36) Kindala xinganeka itena okubhanga okifuxi kya jyanju. Seku muthu mba dimonyo ditena kubhanga o ima ibhanga okifuxi kya jyanju ja Jihova jala ni kutena. Sayi athu enemuzwela kwila ojinguma ne javulu, omuthu umoxi wala ni Jihova kumbandu yê,  wabeta dingi kota. (Afun. 6:16) Okiki kidi mwene! Kinyikiphe sé koleka mba ndandu yé kamubheza Jihova uzwela mba ubhanga kima kikulwalesa, lembalala kwila Jihova wala kumbandu yé. Kana kujimba kwila eye kiwala ubheka. Jihova wala kupholo phala kukwendesa.

15. Kala kilondekesa Izaya 54:15, 17, mukonda dyahi tutena kuzwela kwila o athu nuka andatena kufidisa omundu wa Nzambi?

¹⁵ Ima yavulu ibhangesa omundu yú wamukwendesa kwala Satanaji kutuzemba. Etu kitudite mumaka ajinguvulu, kituxikina we kudita mu ita. Etu twijidisa odijina dyê ku athu, tuboka kwila o utuminu wa Nzambi wene ngó wandabheka okutululuka phala o athu oso, tubelesela we o itumu yê yalungu ni wendelu wambote. Etu tulondekesa ku athu kwila kadyaphemba, wamukwendesa omundu yú, mwéne omuthu wabetakota mukuta omakutu, mwéne we okijibhanganga kyabetakota. (Nzwá 8:44) Etu tutangela we o athu kwila kwakambe ngo omundu wa Satanaji anda ku ubwika. Maji Satanaji ni akayedyê kandatena kutufidisa. Muveji dya kutufidisa etu twandasuluka jinga ni kuximana Jihova mumawukexilu oso ututena. Sumbala wala ni kutena kwavulu, Satanaji kenemutena kufidisa onjimbu yambote kubhixila kumundu woso. Okiki kyenemubhita ngó mukonda Jihova wenemutulanga.—Tanga Izaya 54:15, 17.

16. Kyebhi Jihova kyandabhulula omundu wê mukithangana kya hadi yadikota?

¹⁶ Kwakambe ngó ihi yandabhita? Mukithangana kya hadi yadikota, Jihova wandabhulula omundu wê mumawukexilu abhangesa kudiwana. Kyadyanga mwene wandabhulula ojisevende jê jafiyele kyoso kyandabhangesa ojisobha jangongo kubwika Babilonya Yadikota, kifwa okisangela kyajingelesa joso jamakutu. (Dij. 17:16-18; 18:2, 4) Kayadi, kyoso kyandabwika ombandu yamukwa yasubhuka kumundu wa Satanaji mu ita ya Lumanjedone.—Dij. 7:9, 10; 16:14, 16.

17. Mukonda dyahi watokala kuzukama jinga kwa Jihova?

¹⁷ Se tuzukama jinga kwa Jihova, Satanaji nuka wandatubhanga phulu inangenena. (Loma 16:20) Kyenyikiphe, zwata okiphakatu kyoso, kana kukikatula! Kana kusota kubhânga ubheka wé, kwatekesa ojiphange jê mukilunga, belesela o itendelesu ya Jihova. Se kyene ki ubhanga, dyelela ni kidi kyoso kwila o Tatâ yê yahenda wala kudyulu wandakubhana nguzu wandakulanga jinga.—Iza. 41:10.